8. வத்தக்க²ந்த⁴கம்

ஆக³ந்துகவத்தகதா²

357. வத்தக்க²ந்த⁴கே இதா³னி ஆராமம் பவிஸிஸ்ஸாமீதி இமினா உபசாரஸீமஸமீபம் த³ஸ்ஸேதி; தஸ்மா உபசாரஸீமம் பத்வா உபாஹனாஓமுஞ்சனாதி³ ஸப்³ப³ம் காதப்³ப³ம். க³ஹேத்வாதி உபாஹனத³ண்ட³கேன க³ஹேத்வா. படிக்கமந்தீதி ஸன்னிபதந்தி. விஸ்ஸஜ்ஜேதப்³ப³ந்தி பத்த²ரிதப்³ப³ம். கோ³சரோ புச்சி²தப்³போ³தி ‘‘கோ³சரகா³மோ ஆஸன்னே உதா³ஹு தூ³ரே, காலஸ்ஸேவ பிண்டா³ய சரிதப்³ப³ம் உதா³ஹு தி³வா’’தி ஏவம் பி⁴க்கா²சாரோ புச்சி²தப்³போ³. அகோ³சரோ நாம மிச்சா²தி³ட்டி²கானம் வா கா³மோ பரிச்சி²ன்னபி⁴க்கோ² வா கா³மோ; யத்த² ஏகஸ்ஸ வா த்³வின்னம் வா பி⁴க்கா² தி³ய்யதி, ஸோபி புச்சி²தப்³போ³. பானீயம் புச்சி²தப்³ப³ந்தி ‘‘கிம் இமிஸ்ஸா போக்க²ரணியா பானீயம்யேவ பிவந்தி, நஹானாதி³பரிபோ⁴க³ம்பி கரோந்தீ’’தி ஏவம் பானீயஞ்சேவ பரிபோ⁴ஜனீயஞ்ச புச்சி²தப்³ப³ம். கேஸுசி டா²னேஸு வாளமிகா³ வா அமனுஸ்ஸா வா ஹோந்தி, தஸ்மா ‘‘கம் காலம் பவிஸிதப்³ப³ம், கம் காலம் நிக்க²மிதப்³ப³’’ந்தி புச்சி²தப்³ப³ம்.

ப³ஹி டி²தேனாதி ப³ஹி நிக்க²மந்தஸ்ஸ அஹினோ வா அமனுஸ்ஸஸ்ஸ வா மக்³க³ம் த³த்வா டி²தேன நில்லோகேதப்³போ³. ஸசே உஸ்ஸஹதி ஸோதே⁴தப்³போ³தி யதி³ ஸக்கோதி, ஸப்³போ³ விஹாரோ ஸோதே⁴தப்³போ³. அஸக்கோந்தேன அத்தனோ வஸனோகாஸோ ஜக்³கி³தப்³போ³. ஸப்³ப³ம் ஸோதே⁴தும் ஸக்கோந்தஸ்ஸ பன த³ஸ்ஸிதே விஹாரஸோத⁴னவத்தே வினிச்ச²யோ மஹாக²ந்த⁴கே வுத்தனயேனேவ வேதி³தப்³போ³.

ஆக³ந்துகவத்தகதா² நிட்டி²தா.

ஆவாஸிகவத்தகதா²

359. ஆவாஸிகவத்தே – ஆஸனம் பஞ்ஞபேதப்³ப³ந்தி ஏவமாதி³ ஸப்³ப³ம் வுட்³ட⁴தரே ஆக³தே சீவரகம்மம் வா நவகம்மம் வா ட²பேத்வாபி காதப்³ப³ம். சேதியங்க³ணம் ஸம்மஜ்ஜந்தேன ஸம்மஜ்ஜனிம் நிக்கி²பித்வா தஸ்ஸ வத்தம் காதும் ஆரபி⁴தப்³ப³ம். பண்டி³தோ ஹி ஆக³ந்துகோ ‘‘ஸம்மஜ்ஜாஹி தாவ சேதியங்க³ண’’ந்தி வக்க²தி. கி³லானபே⁴ஸஜ்ஜம் கரோந்தேன பன ஸசே நாதிஆதுரோ கி³லானோ ஹோதி, பே⁴ஸஜ்ஜம் அகத்வா வத்தமேவ காதப்³ப³ம். மஹாகி³லானஸ்ஸ பன பே⁴ஸஜ்ஜமேவ காதப்³ப³ம். பண்டி³தோ ஹி ஆக³ந்துகோ ‘‘கரோஹி தாவ பே⁴ஸஜ்ஜ’’ந்தி வக்க²தி. பானீயேன புச்ச²ந்தேன ஸசே ஸகிம் ஆனீதம் பானீயம் ஸப்³ப³ம் பிவதி, ‘‘புன ஆனேமீ’’தி புச்சி²தப்³போ³யேவ. அபிச பீ³ஜனேனபி பீ³ஜிதப்³போ³, பீ³ஜந்தேன ஸகிம் பாத³பிட்டி²யம் பீ³ஜித்வா ஸகிம் மஜ்ஜே² ஸகிம் ஸீஸே பீ³ஜிதப்³ப³ம், ‘‘அலம் ஹோதூ’’தி வுத்தேன ததோ மந்த³தரம் பீ³ஜிதப்³ப³ம். புன ‘‘அல’’ந்தி வுத்தேன ததோ மந்த³தரம் பீ³ஜிதப்³ப³ம். ததியவாரம் வுத்தேன பீ³ஜனீ ட²பேதப்³பா³. பாதா³பிஸ்ஸ தோ⁴விதப்³பா³, தோ⁴வித்வா ஸசே அத்தனோ தேலம் அத்தி², தேன மக்கே²தப்³பா³. நோ சே அத்தி², தஸ்ஸ ஸந்தகேன மக்கே²தப்³பா³. உபாஹனாபுஞ்ச²னம் பன அத்தனோ ருசிவஸேன காதப்³ப³ம். தேனேவ ஹேத்த² ‘‘ஸசே உஸ்ஸஹதீ’’தி வுத்தம். தஸ்மா உபாஹனா அபுஞ்ச²ந்தஸ்ஸாபி அனாபத்தி. ‘‘கத்த² மய்ஹம் ஸேனாஸனம் பாபுணாதீ’’தி புச்சி²தேன ஸேனாஸனம் பஞ்ஞபேதப்³ப³ம், ‘‘ஏதம் தும்ஹாகம் ஸேனாஸனம் பாபுணாதீ’’தி ஏவம் ஆசிக்கி²தப்³ப³ந்தி அத்தோ². பப்போ²டேத்வா ஹி பத்த²ரிதும் பன வட்டதியேவ.

நவகஸ்ஸ வத்தே – பானீயம் ஆசிக்கி²தப்³ப³ந்தி ‘‘ஏதம் பானீயம் க³ஹேத்வா பிவாஹீ’’தி ஆசிக்கி²தப்³ப³ம். பரிபோ⁴ஜனீயேபி ஏஸேவ நயோ. ஸேஸம் புரிமஸதி³ஸமேவ. மஹாஆவாஸேபி அத்தனோ ஸந்திகம் ஸம்பத்தஸ்ஸ ஆக³ந்துகஸ்ஸ வத்தம் அகாதும் ந லப⁴தி.

ஆவாஸிகவத்தகதா² நிட்டி²தா.

க³மிகவத்தகதா²

360. க³மிகவத்தேஸு தா³ருப⁴ண்ட³ந்தி ஸேனாஸனக்க²ந்த⁴கே வுத்தம் மஞ்சபீடா²தி³. மத்திகாப⁴ண்ட³ம்பி ரஜனபா⁴ஜனாதி³ ஸப்³ப³ம் தத்த² வுத்தப்பபே⁴த³மேவ. தம் ஸப்³ப³ம் அக்³கி³ஸாலாய வா அஞ்ஞதரஸ்மிம் வா கு³த்தட்டா²னே படிஸாமேத்வா க³ந்தப்³ப³ம். அனோவஸ்ஸகே பப்³பா⁴ரேபி ட²பேதும் வட்டதி. ஸேனாஸனம் ஆபுச்சி²தப்³ப³ந்தி ஏத்த² யம் பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம், யத்த² உபசிகா நாரோஹந்தி, தம் அனாபுச்ச²ந்தஸ்ஸாபி அனாபத்தி. சதூஸு பாஸாணகேஸூதிஆதி³ உபசிகானம் உப்பத்திட்டா²னே பண்ணஸாலாதி³ஸேனாஸனே கத்தப்³பா³காரத³ஸ்ஸனத்த²ம் வுத்தம். அப்பேவ நாம அங்கா³னிபி ஸேஸேய்யுந்தி அயம் அஜ்ஜோ²காஸே ட²பிதம்ஹி ஆனிஸம்ஸோ. ஓவஸ்ஸககே³ஹே பன திணேஸு ச மத்திகாபிண்டே³ஸு ச உபரி பதந்தேஸு மஞ்சபீடா²னம் அங்கா³னிபி வினஸ்ஸந்தி.

க³மிகவத்தகதா² நிட்டி²தா.

அனுமோத³னவத்தகதா²

362. அனுமோத³னவத்து²ஸ்மிம் இத்³த⁴ம் அஹோஸீதி ஸம்பன்னம் அஹோஸி. சதூஹி பஞ்சஹீதி ஸங்க⁴த்தே²ரேன அனுமோத³னத்தா²ய நிஸின்னே ஹேட்டா² படிபாடியா சதூஹி நிஸீதி³தப்³ப³ம். அனுதே²ரே நிஸின்னே மஹாதே²ரேன ச ஹேட்டா² ச தீஹி நிஸீதி³தப்³ப³ம். பஞ்சமே நிஸின்னே உபரி சதூஹி நிஸீதி³தப்³ப³ம். ஸங்க⁴த்தே²ரேன ஹேட்டா² த³ஹரபி⁴க்கு²ஸ்மிம் அஜ்ஜி²ட்டே²பி ஸங்க⁴த்தே²ரதோ பட்டா²ய சதூஹி நிஸீதி³தப்³ப³மேவ. ஸசே பன அனுமோத³கோ பி⁴க்கு² ‘‘க³ச்ச²த² ப⁴ந்தே, ஆக³மேதப்³ப³கிச்சம் நத்தீ²’’தி வத³தி, க³ந்தும் வட்டதி. மஹாதே²ரேன ‘‘க³ச்சா²ம ஆவுஸோ’’தி வுத்தே ‘‘க³ச்ச²தா²’’தி வத³தி, ஏவம்பி வட்டதி. ‘‘ப³ஹிகா³மே ஆக³மேஸ்ஸாமா’’தி ஆபோ⁴க³ம் கத்வாபி ப³ஹிகா³மம் க³ந்த்வா அத்தனோ நிஸ்ஸிதகே ‘‘தும்ஹே தஸ்ஸ ஆக³மனம் ஆக³மேதா²’’தி வத்வாபி க³ந்தும் வட்டதியேவ. ஸசே பன மனுஸ்ஸா அத்தனோ ருசிகேன ஏகேன அனுமோத³னம் காரேந்தி, நேவ தஸ்ஸ அனுமோத³தோ ஆபத்தி, ந மஹாதே²ரஸ்ஸ பா⁴ரோ ஹோதி. உபனிஸின்னகதா²யமேவ ஹி மனுஸ்ஸேஸு கதா²பேந்தேஸு மஹாதே²ரோ ஆபுச்சி²தப்³போ³, மஹாதே²ரேன ச அனுமோத³னாய அஜ்ஜி²ட்டோ²வ ஆக³மேதப்³போ³தி இத³மேத்த² லக்க²ணம். வச்சிதோதி ஸஞ்ஜாதவச்சோ; வச்சபீளிதோதி அதி⁴ப்பாயோ.

அனுமோத³னவத்தகதா² நிட்டி²தா.

ப⁴த்தக்³க³வத்தகதா²

364. ப⁴த்தக்³க³வத்தே ‘‘அந்தோகா³மோ வா ஹோது விஹாரோ வா, மனுஸ்ஸானம் பரிவேஸனட்டா²னம் க³ச்ச²ந்தேன சீவரம் பாருபித்வா காயப³ந்த⁴னம் ப³ந்த⁴னமேவ வட்டதீ’’தி அட்ட²கதா²ஸு வுத்தம். ந தே²ரே பி⁴க்கூ² அனுபக²ஜ்ஜாதி தே²ரே பி⁴க்கூ² அதிஅல்லீயித்வா ந நிஸீதி³தப்³ப³ம். ஸசே மஹாதே²ரஸ்ஸ நிஸின்னாஸனேன ஸமகம் ஆஸனம் ஹோதி, ப³ஹூஸு ஆஸனேஸு ஸதி ஏகம் த்³வே ஆஸனானி ட²பேத்வா நிஸீதி³தப்³ப³ம். பி⁴க்கூ² க³ணேத்வா பஞ்ஞத்தாஸனேஸு அனிஸீதி³த்வா மஹாதே²ரேன நிஸீதா³தி வுத்தேன நிஸீதி³தப்³ப³ம். நோ சே மஹாதே²ரோ வத³தி, ‘‘இத³ம், ப⁴ந்தே, ஆஸனம் உச்ச’’ந்தி வத்தப்³ப³ம். ‘‘நிஸீதா³’’தி வுத்தே நிஸீதி³தப்³ப³ம். ஸசே பன ஏவம் ஆபுச்சி²தேபி ந வத³தி, நிஸீத³ந்தஸ்ஸ அனாபத்தி; மஹாதே²ரஸ்ஸேவ ஆபத்தி. நவகோ ஹி ஏவரூபே ஆஸனே அனாபுச்சா² நிஸீத³ந்தோ ஆபஜ்ஜதி, தே²ரோ ஆபுச்சி²தே அனனுஜானந்தோ. ந ஸங்கா⁴டிம் ஓத்த²ரித்வாதி ந ஸங்கா⁴டிம் அவத்த²ரித்வா நிஸீதி³தப்³ப³ம்.

உபோ⁴ஹி ஹத்தே²ஹீதி பத்ததோ⁴வனஉத³கம் ஸந்தா⁴ய வுத்தம். த³க்கி²ணோத³கம் பன புரதோ ஆதா⁴ரகே பத்தம் ட²பேத்வா க³ஹேதப்³ப³ம். ஸாது⁴கந்தி உத³கஸத்³த³ம் அகரோந்தேன.

ஸூபஸ்ஸ ஓகாஸோதி யதா² ஸூபஸ்ஸ ஓகாஸோ ஹோதி; ஏவம் மத்தாய ஓத³னோ க³ண்ஹிதப்³போ³தி அத்தோ². ஸமகம் ஸம்பாதே³ஹீதி இத³ம் ந கேவலம் ஸப்பிஆதீ³ஸுயேவ ஓத³னேபி வத்தப்³ப³ம். ஸப்பிஆதீ³ஸு பன யம் அப்பம் ஹோதி ஏகஸ்ஸ வா த்³வின்னம் வா அனுரூபகம், தம் ஸப்³பே³ஸம் ஸமகம் ஸம்பாதே³ஹீதி வுத்தே மனுஸ்ஸானம் விஹஸா ஹோதி, தஸ்மா தாதி³ஸம் ஸகிம் வா த்³விக்க²த்தும் வா க³ஹேத்வா ஸேஸம் ந க³ஹேதப்³ப³ம்.

ந தாவ தே²ரேன பு⁴ஞ்ஜிதப்³ப³ந்தி இத³ம் யம் பரிச்சி²ன்னபி⁴க்கு²கம் ப⁴த்தக்³க³ம், யத்த² மனுஸ்ஸா ஸப்³பே³ஸம் பாபேத்வா தா³துகாமா ஹோந்தி, தம் ஸந்தா⁴ய வுத்தம். யம் பன மஹாப⁴த்தக்³க³ம் ஹோதி, யத்த² ஏகஸ்மிம் பதே³ஸே பு⁴ஞ்ஜந்தி, ஏகஸ்மிம் பதே³ஸே உத³கம் தி³ய்யதி, தத்த² யதா²ஸுக²ம் பு⁴ஞ்ஜிதப்³ப³ம்.

ந தாவ உத³கந்தி இத³ம் ஹத்த²தோ⁴வனஉத³கம் ஸந்தா⁴ய வுத்தம். அந்தரா பிபாஸிதேன பன க³லே விலக்³கா³மிஸேன வா பானீயம் பிவித்வா ஹத்தா² ந தோ⁴விதப்³பா³. ஸசே மனுஸ்ஸா ‘‘தோ⁴வத² ப⁴ந்தே பத்தஞ்ச ஹத்தே² சா’’தி வத³ந்தி, பி⁴க்கூ² வா ‘‘தும்ஹே உத³கம் க³ண்ஹதா²’’தி வத³ந்தி, வட்டதி.

நிவத்தந்தேனாதி ப⁴த்தக்³க³தோ உட்டா²ய நிவத்தந்தேன ஸங்கே⁴ன ஏவம் நிவத்திதப்³ப³ந்தி த³ஸ்ஸேதி. கத²ம்? ‘‘நவகேஹீ’’தி ஸப்³ப³ம் த³ட்ட²ப்³ப³ம். ஸம்பா³தே⁴ஸு ஹி க⁴ரேஸு மஹாதே²ரானம் நிக்க²மனோகாஸோ ந ஹோதி, தஸ்மா ஏவம் வுத்தம். ஏவம் நிவத்தந்தேஹி பன நவகேஹி கே³ஹத்³வாரே ட²த்வா தே²ரேஸு நிக்க²ந்தேஸு படிபாடியா க³ந்தப்³ப³ம். ஸசே பன மஹாதே²ரா து⁴ரே நிஸின்னா ஹோந்தி, நவகா அந்தோகே³ஹே, தே²ராஸனதோ பட்டா²ய படிபாடியா ஏவ நிக்க²மிதப்³ப³ம். காயேன காயம் அக⁴ட்டேந்தேன யதா² அந்தரேன மனுஸ்ஸா க³ந்தும் ஸக்கோந்தி, ஏவம் விரளாய படிபாடியா க³ந்தப்³ப³ம்.

ப⁴த்தக்³க³வத்தகதா² நிட்டி²தா.

பிண்ட³சாரிகவத்தகதா²

366. பிண்ட³சாரிகவத்தே – கம்மம் வா நிக்கி²பதீதி கப்பாஸம் வா ஸுப்பம் வா முஸலம் வா யம் க³ஹேத்வா கம்மம் கரோந்தி, டி²தா வா நிஸின்னா வா ஹோந்தி, தம் நிக்கி²பதி. ந ச பி⁴க்கா²தா³யிகாயாதி இத்தீ² வா ஹோது புரிஸோ வா, பி⁴க்கா²தா³னஸமயே முக²ம் ந உல்லோகேதப்³ப³ம்.

பிண்ட³சாரிகவத்தகதா² நிட்டி²தா.

ஆரஞ்ஞிகவத்தகதா²

368. ஆரஞ்ஞிகவத்தே – ஸேனாஸனா ஓதரிதப்³ப³ந்தி வஸனட்டா²னதோ நிக்க²மிதப்³ப³ம்.

பத்தம் த²விகாய பக்கி²பித்வாதி ஏத்த² ஸசே ப³ஹிகா³மே உத³கம் நத்தி², அந்தோகா³மேயேவ ப⁴த்தகிச்சம் கத்வா அத² ப³ஹிகா³மே அத்தி², ப³ஹிகா³மே ப⁴த்தகிச்சம் கத்வா பத்தோ தோ⁴வித்வா வோத³கோ கத்வா த²விகாய பக்கி²பிதப்³போ³.

பரிபோ⁴ஜனீயம் உபட்டா²பேதப்³ப³ந்தி ஸசே பா⁴ஜனானி நப்பஹோந்தி, பானீயமேவ பரிபோ⁴ஜனீயம்பி கத்வா உபட்டா²பேதப்³ப³ம். பா⁴ஜனம் அலப⁴ந்தேன வேளுனாளிகாயபி உபட்டா²பேதப்³ப³ம். தம்பி அலப⁴ந்தஸ்ஸ யதா² ஸமீபே உத³கஆவாடோ ஹோதி, ஏவம் காதப்³ப³ம். அரணிஸஹிதே ஸதி அக்³கி³ம் அகாதும்பி வட்டதி. யதா² ச ஆரஞ்ஞிகஸ்ஸ, ஏவம் கந்தாரப்படிபன்னஸ்ஸாபி அரணிஸஹிதம் இச்சி²தப்³ப³ம். க³ணவாஸினோ பன தேன வினாபி வட்டதி. நக்க²த்தானேவ நக்க²த்தபதா³னி.

ஆரஞ்ஞிகவத்தகதா² நிட்டி²தா.

ஸேனாஸனவத்தகதா²

369. ஸேனாஸனவத்தே – த்³வாரம் நாம யஸ்மா மஹாவளஞ்ஜம், தஸ்மா தத்த² ஆபுச்ச²னகிச்சம் நத்தி², ஸேஸானி பன உத்³தே³ஸதா³னாதீ³னி ஆபுச்சி²த்வாவ காதப்³பா³னி. தே³வஸிகம்பி ஆபுச்சி²தும் வட்டதி. அதா²பி ‘‘ப⁴ந்தே ஆபுச்சி²தமேவ ஹோதூ’’தி வுத்தே வுட்³ட⁴தரோ ‘‘ஸாதூ⁴’’தி ஸம்படிச்ச²தி, ஸயமேவ வா ‘‘த்வம் யதா²ஸுக²ம் விஹராஹீ’’தி வத³தி; ஏவம்பி வட்டதி. ஸபா⁴க³ஸ்ஸ விஸ்ஸாஸேனாபி வட்டதியேவ. யேன வுட்³டோ⁴ தேன பரிவத்திதப்³ப³ந்தி வுட்³டா⁴பி⁴முகே²ன பரிவத்திதப்³ப³ம். போ⁴ஜனஸாலாதீ³ஸுபி ஏவமேவ படிபஜ்ஜிதப்³ப³ம்.

ஸேனாஸனவத்தகதா² நிட்டி²தா.

ஜந்தாக⁴ரவத்தாதி³கதா²

371. ஜந்தாக⁴ரவத்தே – பரிப⁴ண்ட³ந்தி ப³ஹிஜக³தி.

373. ஆசமனவத்து²ஸ்மிம் – ஸதி உத³கேதி ஏத்த² ஸசே உத³கம் அத்தி², படிச்ச²ன்னட்டா²னம் பன நத்தி², பா⁴ஜனேன நீஹரித்வா ஆசமிதப்³ப³ம். பா⁴ஜனே அஸதி பத்தேன நீஹரிதப்³ப³ம். பத்தேபி அஸதி அஸந்தம் நாம ஹோதி. ‘‘இத³ம் அதிவிவடம் புரதோ அஞ்ஞம் உத³கம் ப⁴விஸ்ஸதீ’’தி க³தஸ்ஸ உத³கம் அலப⁴ந்தஸ்ஸேவ பி⁴க்கா²சாரவேலா ஹோதி, கட்டே²ன வா கேனசி வா புஞ்சி²த்வா க³ந்தப்³ப³ம், பு⁴ஞ்ஜிதும்பி அனுமோத³னம்பி காதும் வட்டதி. ஆக³தபடிபாடியாதி வச்சகுடியம் பஸ்ஸாவட்டா²னே ந்ஹானதித்தே²தி தீஸுபி ஆக³தபடிபாடியேவ பமாணம்.

374. வச்சகுடிவத்தே – ந த³ந்தகட்ட²ம் கா²த³ந்தேனாதி அயம் வச்சகுடியாபி அவச்சகுடியாபி ஸப்³ப³த்தே²வ படிக்கே²போ. ந ப²ருஸேன கட்டே²னாதி பா²லிதகட்டே²ன வா க²ரேன வா க³ண்டி²கேன வா கண்டகேன வா ஸுஸிரேன வா பூதினா வா ந அவலேகி²தப்³ப³ம். அவலேக²னகட்ட²ம் பன அக்³க³ஹேத்வா பவிட்ட²ஸ்ஸ ஆபத்தி நத்தி².

ந ஆசமனஸராவகேதி ஸப்³ப³ஸாதா⁴ரணட்டா²னம் ஸந்தா⁴யேதம் வுத்தம். தத்ர ஹி அஞ்ஞே அஞ்ஞே ஆக³ச்ச²ந்தி, தஸ்மா உத³கம் ந ஸேஸேதப்³ப³ம். யம் பன ஸங்கி⁴கேபி விஹாரே ஏகதே³ஸே நிப³த்³த⁴க³மனத்தா²ய கதம் டா²னம் ஹோதி புக்³க³லிகட்டா²னம் வா, தஸ்மிம் வட்டதி. விரேசனம் பிவித்வா புனப்புனம் பவிஸந்தஸ்ஸாபி வட்டதியேவ.

ஊஹதாதி ஊஹதி³தா; ப³ஹி வச்சமக்கி²தாதி அத்தோ². தோ⁴விதப்³பா³தி உத³கம் ஆஹரித்வா தோ⁴விதப்³பா³. உத³கம் அத்தி², பா⁴ஜனம் நத்தி², அஸந்தம் நாம ஹோதி. பா⁴ஜனம் அத்தி², உத³கம் நத்தி², ஏதம்பி அஸந்தம். உப⁴யே பன அஸதி அஸந்தமேவ, கட்டே²ன வா கேனசி வா புஞ்சி²த்வா க³ந்தப்³ப³ம். ஸேஸம் ஸப்³ப³த்த² உத்தானமேவாதி.

ஜந்தாக⁴ரவத்தாதி³கதா² நிட்டி²தா.

வத்தக்க²ந்த⁴கவண்ணனா நிட்டி²தா.