7. ஸங்க⁴பே⁴த³கக்க²ந்த⁴கம்

ச²ஸக்யபப்³ப³ஜ்ஜாகதா²

330. ஸங்க⁴பே⁴த³கக்க²ந்த⁴கே அபி⁴ஞ்ஞாதா அபி⁴ஞ்ஞாதாதி பாகடா பாகடா. ஸக்யகுமாரா நாம காளுதா³யிப்பபு⁴தயோ த³ஸ தூ³தா ஸத்³தி⁴ம் பரிவாரேஹி அஞ்ஞே ச ப³ஹூ ஜனா. அம்ஹாகந்தி அம்ஹேஸு; அம்ஹாகம் குலதோதி வா வுத்தம் ஹோதி. க⁴ராவாஸத்த²ம் அனுஸாஸிஸ்ஸாமீதி க⁴ராவாஸே யம் கத்தப்³ப³ம், தம் ஜானாபேஸ்ஸாமி. உத³கம் நின்னேதப்³ப³ந்தி யதா² உத³கம் ஸப்³ப³ட்டா²னே ஸமம் ஹோதி, ஏவம் காதப்³ப³ம். நித்³தா⁴பேதப்³ப³ந்தி திணானி உத்³த⁴ரிதப்³பா³னி. பு⁴ஸிகா உத்³த⁴ராபேதப்³பா³தி ஸுகு²மபலாலமிஸ்ஸத⁴ஞ்ஞா பலாலிகா பலாபேதப்³பா³. ஓபுனாபேதப்³ப³ந்தி ஸுகு²மபலாலம் அபனேதப்³ப³ம். த்வஞ்ஞேவ க⁴ராவாஸத்தே²ன உபஜானாஹீதி த்வஞ்ஞேவ க⁴ராவாஸத்த²ம் ஜானாஹி. அஹம் தயா யதா²ஸுக²ம் பப்³ப³ஜாஹீதி ஏத்த² அஹம் தயா ஸத்³தி⁴ம் பப்³ப³ஜிஸ்ஸாமீதி ஸஹாயஸினேஹேன ஸஹஸா வத்துகாமோ ஹுத்வா புன ரஜ்ஜஸிரிலோபே⁴ன பரிகட்³டி⁴யமானஹத³யோ ‘‘அஹம் தயா’’தி ஏத்தகமேவ வத்வா ஸேஸம் வத்தும் நாஸக்கீ²தி ஏவமத்தோ² வேதி³தப்³போ³.

331. நிப்பாதிதாதி நிக்க²மிதா. மானஸ்ஸினோதி மானஸ்ஸயினோ; மானனிஸ்ஸிதாதி வுத்தம் ஹோதி.

332. யஸ்ஸந்தரதோ ந ஸந்தி கோபாதி ததியமக்³கே³ன ஸமூஹதத்தா யஸ்ஸ சித்தே கோபா ந ஸந்தி. யஸ்மா பன ப⁴வோதி ஸம்பத்தி, விப⁴வோதி விபத்தி; ததா² ப⁴வோதி வுட்³டி⁴, விப⁴வோதி ஹானி; ப⁴வோதி ஸஸ்ஸதம், விப⁴வோதி உச்சே²தோ³; ப⁴வோதி புஞ்ஞம், விப⁴வோதி பாபம்; விப⁴வோதி ச அப⁴வோதி ச அத்த²தோ ஏகமேவ, தஸ்மா இதிப⁴வாப⁴வதஞ்ச வீதிவத்தோதி ஏத்த² யா ஏஸா ஸம்பத்திவிபத்திவுட்³டி⁴ஹானிஸஸ்ஸதுச்சே²த³புஞ்ஞபாபவஸேன இதி அனேகப்பகாரா ப⁴வாப⁴வதா வுச்சதி; சதூஹிபி மக்³கே³ஹி யதா²ஸம்ப⁴வம் தேன தேன நயேன தம் இதிப⁴வாப⁴வதஞ்ச வீதிவத்தோதி ஏவமத்தோ² த³ட்ட²ப்³போ³. நானுப⁴வந்தீதி ந ஸம்பாபுணந்தி; தஸ்ஸ த³ஸ்ஸனம் தே³வானம்பி து³ல்லப⁴ந்தி அதி⁴ப்பாயோ.

333. அஹிமேக²லிகாதி அஹிம் கடியம் ப³ந்தி⁴த்வா. உச்ச²ங்கே³தி அங்கே.

334. ஸம்மன்னதீதி ஸம்மானேதி. யம் துமோ கரிஸ்ஸதீதி யம் ஸோ கரிஸ்ஸதி.

ச²ஸக்யபப்³ப³ஜ்ஜாகதா² நிட்டி²தா.

பகாஸனீயகம்மாதி³கதா²

336. கே²ளாஸகஸ்ஸாதி ஏத்த² மிச்சா²ஜீவேன உப்பன்னபச்சயா அரியேஹி வந்தப்³பா³ கே²ளஸதி³ஸா, ததா²ரூபே பச்சயே அயம் அஜ்ஜோ²ஹரதீதி கத்வா கே²ளாஸகோதி ப⁴க³வதா வுத்தோ.

340. பத்த²த்³தே⁴ன காயேனாதி போத்த²கரூபஸதி³ஸேன நிச்சலேன காயேன.

342. மயம் கோ² ப⁴ணே ராஜஞாதகா நாமாதி ராஜா அம்ஹே ஜானாதீதி ராஜஞாதகஸ்ஸ பா⁴வேன அத்தானம் உக்கம்ஸந்தோ ஆஹ. பஹட்ட²கண்ணவாலோதி ப³ந்த⁴னே நிச்சலே கத்வா.

து³க்க²ஞ்ஹி குஞ்ஜர நாக³மாஸதோ³தி போ⁴ குஞ்ஜர பு³த்³த⁴னாக³ம் ஆஸாத³னம் வத⁴கசித்தேன உபக³மனம் நாம து³க்க²ம். நாக³ஹதஸ்ஸாதி பு³த்³த⁴னாக³ம் கா⁴தகஸ்ஸ.

படிகுடியோவ ஓஸக்கீதி ததா²க³தாபி⁴முகோ²யேவ பிட்டி²மேஹி பாதே³ஹி அவஸக்கி. அலக்கி²கோதி ஏத்த² ந லக்கே²தீதி அலக்கி²கோ; ந ஜானாதீதி அத்தோ², அஹம் பாபகம்மம் கரோமீதி ந ஜானாதி. ந லக்கி²தப்³போ³தி வா அலக்கி²கோ; ந பஸ்ஸிதப்³போ³தி அத்தோ².

343. திகபோ⁴ஜனந்தி ஏத்த² தீஹி ஜனேஹி பு⁴ஞ்ஜிதப்³ப³போ⁴ஜனம். தம் பஞ்ஞாபேஸ்ஸாமீதி தம் அனுஜானிஸ்ஸாமி. க³ணபோ⁴ஜனே பன யதா²த⁴ம்மோ காரேதப்³போ³தி. பஞ்சவத்து²யாசனகதா² ஸங்கா⁴தி³ஸேஸவண்ணனாயம் வுத்தா. கப்பந்தி ஆயுகப்பம். ப்³ரஹ்மம் புஞ்ஞந்தி ஸேட்ட²ம் புஞ்ஞம். கப்பம் ஸக்³க³ம்ஹீதி ஆயுகப்பமேவ.

பகாஸனீயகம்மாதி³கதா² நிட்டி²தா.

ஸங்க⁴பே⁴த³ககதா²

344. அத² கோ² தே³வத³த்தோ ஸங்க⁴ம் பி⁴ந்தி³த்வாதி ஸோ கிர ஏவம் ஸலாகம் கா³ஹேத்வா தத்தே²வ ஆவேணிகம் உபோஸத²ம் கத்வா க³தோ, தேனேதம் வுத்தம்.

345. பிட்டி² மே ஆகி³லாயதீதி சிரனிஸஜ்ஜாய வேத³னாபி⁴பூ⁴தா பா³த⁴தி. தமஹம் ஆயமிஸ்ஸாமீதி தம் அஹம் பஸாரேஸ்ஸாமி. ஆதே³ஸனாபாடிஹாரியானுஸாஸனீ நாம ‘‘ஏவம்பி தே மனோ, ததா²பி தே மனோ’’தி ஏவம் பரஸ்ஸ சித்தம் ஜானித்வா தத³னுரூபா த⁴ம்மதே³ஸனா.

346. மமானுகுப்³ப³ந்தி மமானுகிரியம் குருமானோ. கபணோதி து³க்கி²தோ. மஹாவராஹஸ்ஸாதி மஹானாக³ஸ்ஸ. மஹிம் விகுப்³ப³தோதி பத²விம் பதா³லேந்தஸ்ஸ. பி⁴ஸம் க⁴ஸமானஸ்ஸாதி பி⁴ஸம் கா²த³ந்தஸ்ஸ. நதீ³ஸு ஜக்³க³தோதி ஏத்த² ஸோ கிர ஹத்தி²னாகோ³ ஸாயன்ஹஸமயம் தம் நதி³னாமகம் போக்க²ரணிம் ஓகா³ஹேத்வா கிலந்தோ ஸப்³ப³ரத்திம் வீதினாமேஸி, ஜாலிகம் கரோதி, தேன வுத்தம் ‘‘நதீ³ஸு ஜக்³க³தோ’’தி.

347. ஸுதாதி ஸோதா. அஸந்தி³த்³தோ⁴ ச அக்கா²தீதி நிஸ்ஸந்தே³ஹோ ஹுத்வா அக்கா²தி அனுஸந்தி⁴வஸேன யோஜேத்வா யோஜேத்வா.

350. அபாயே நிப்³ப³த்திஸ்ஸதீதி ஆபாயிகோ. ஏவம் நேரயிகோ. கப்பம் ட²ஸ்ஸதீதி கப்பட்டோ². இதா³னி பு³த்³த⁴ஸஹஸ்ஸேனாபி திகிச்சி²தும் ந ஸக்காதி அதேகிச்சோ².

மா ஜாது கோசி லோகஸ்மிந்தி மா கதா³சிபி கோசி ஸத்தோ லோகஸ்மிம். உத³பஜ்ஜதா²தி உபபஜ்ஜத². ஜலம்வ யஸஸா அட்டா²தி யஸஸா ஜலந்தோ விய டி²தோ. தே³வத³த்தோதி மே ஸுதந்தி ‘‘ஈதி³ஸோ தே³வத³த்தோ’’தி ப⁴க³வதா ஸுதம்பி அத்தி², ததே³வ க³ஹேத்வா இத³ம் வுத்தம். ஸோ பமாத³மனுசிண்ணோதி ஏத்த² பமாத³ம் அனுசினாதீதி அனுசிண்ணோ, பமாதோ³ அப்பஹீனோதி அத்தோ². ஆஸஜ்ஜ நந்தி பாபகேன சித்தேன பத்வா, விஸோஸேத்வாதி வா அத்தோ². அவீசினிரயம் பத்தோதி இத³ம் பன ஆஸீஸாயம் அதீதவசனம். பே⁴ஸ்மாதி ப⁴யானகோ.

ஸங்க⁴பே⁴த³ககதா² நிட்டி²தா.

உபாலிபஞ்ஹாகதா²

351. ஏகதோ உபாலி ஏகோதி த⁴ம்மவாதி³பக்கே² ஏகோ. ஏகதோ த்³வேதி அத⁴ம்மவாதி³பக்கே² த்³வே. சதுத்தோ² அனுஸ்ஸாவேதீதி ஸங்க⁴ம் பி⁴ந்தி³ஸ்ஸாமீதி அத⁴ம்மவாதி³சதுத்தோ² ஹுத்வா அனுஸ்ஸாவேதி; அனுனயந்தோ ஸாவேதி ‘‘ந தும்ஹாகம்யேவ நரகப⁴யம் அத்தி², அம்ஹாகம்பி அத்தி², ந அம்ஹாகம் அவீசிமக்³கோ³ பிஹிதோ, ந மயம் அகுஸலா ந பா⁴யாம. யதி³ ஹி அயம் அத⁴ம்மோ அவினயோ அஸத்து²ஸாஸனம் வா ப⁴வேய்ய, ந மயம் க³ண்ஹேய்யாமா’’திஆதி³னா நயேன ‘‘அத⁴ம்மம் த⁴ம்மோ’’தி ஏவம் அட்டா²ரஸ பே⁴த³கரவத்தூ²னி போ³தே⁴தீதி அத்தோ². ஸலாகம் கா³ஹேதீதி ஏவம் அனுஸ்ஸாவேத்வா பன ‘‘இத³ம் க³ண்ஹத², இத³ம் ரோசேதா²’’தி வத³ந்தோ ஸலாகம் கா³ஹேதி.

ஏகதோ உபாலி த்³வே ஹோந்தீதிஆதீ³ஸுபி ஏஸேவ நயோ. ஏவம் கோ² உபாலி ஸங்க⁴ராஜி சேவ ஹோதி ஸங்க⁴பே⁴தோ³ சாதி ஏவம் ஹோதி; ந பன ஏத்தாவதா ஸங்கோ⁴ பி⁴ன்னோ ஹோதி.

பி⁴க்கு² கோ² உபாலி பகதத்தோ ஸமானஸம்வாஸகோ ஸமானஸீமாயம் டி²தோ ஸங்க⁴ம் பி⁴ந்த³தீதி ஏத்த² ஸியா ஏவம் ‘‘தே³வத³த்தோ கத²ம் பகதத்தோ’’தி. கத²ம் தாவ ந பகதத்தோ, ரஞ்ஞோ கா⁴தாபிதத்தா ருஹிருப்பாத³ஸ்ஸ ச கதத்தாதி? தத்த² வதா³ம – ஆணத்தியா தாவ விரத்³த⁴த்தா ரஞ்ஞோ கா⁴தாபனம் நத்தி². ‘‘தேன ஹி த்வம், குமார, பிதரம் ஹந்த்வா ராஜா ஹோஹி, அஹம் ப⁴க³வந்தம் ஹந்த்வா பு³த்³தோ⁴ ப⁴விஸ்ஸாமீ’’தி ஏவஞ்ஹி தஸ்ஸ ஆணத்தி. குமாரோ பன ராஜா ஹுத்வா பச்சா² பிதரம் மாரேஸி; ஏவம் தாவ ஆணத்தியா விரத்³த⁴த்தா ரஞ்ஞோ கா⁴தாபனம் நத்தி². ருஹிருப்பாதே³ பன கதமத்தேயேவ ருஹிருப்பாத³பச்சயா ப⁴க³வதா அப⁴ப்³ப³தா ந வுத்தா, ந ச ஸக்கா ப⁴க³வதோ வசனம் வினாயேவ தஸ்ஸ அப⁴ப்³ப³தா ஆரோபேதும்.

‘‘ருஹிருப்பாத³கோ, பி⁴க்க²வே, அனுபஸம்பன்னோ ந உபஸம்பாதே³தப்³போ³, உபஸம்பன்னோ நாஸேதப்³போ³’’தி –

இத³ம் பன ப⁴க³வதா ஸங்க⁴பே⁴த³தோ பச்சா² வுத்தம், தஸ்மா பகதத்தேனேவ தேன ஸங்கோ⁴ பி⁴ன்னோதி.

அத⁴ம்மம் த⁴ம்மோதி தீ³பேந்தீதிஆதீ³ஸு அட்டா²ரஸஸு பே⁴த³கரவத்தூ²ஸு ஸுத்தந்தபரியாயேன தாவ த³ஸ குஸலகம்மபதா² த⁴ம்மோ, த³ஸ அகுஸலகம்மபதா² அத⁴ம்மோ. ததா² சத்தாரோ ஸதிபட்டா²னா, சத்தாரோ ஸம்மப்பதா⁴னா, சத்தாரோ இத்³தி⁴பாதா³, பஞ்சிந்த்³ரியானி, பஞ்ச ப³லானி, ஸத்த போ³ஜ்ஜ²ங்கா³, அரியோ அட்ட²ங்கி³கோ மக்³கோ³தி ஸத்ததிம்ஸ போ³தி⁴பக்கி²யத⁴ம்மா த⁴ம்மோ நாம; தயோ ஸதிபட்டா²னா, தயோ ஸம்மப்பதா⁴னா, தயோ இத்³தி⁴பாதா³, ச² இந்த்³ரியானி, ச² ப³லானி, அட்ட² போ³ஜ்ஜ²ங்கா³, நவங்கி³கோ மக்³கோ³தி ச சத்தாரோ உபாதா³னா, பஞ்ச நீவரணா, ஸத்த அனுஸயா, அட்ட² மிச்ச²த்தாதி ச அயம் அத⁴ம்மோ.

தத்த² யம்கிஞ்சி ஏகம் அத⁴ம்மகோட்டா²ஸம் க³ஹேத்வா ‘‘இமம் அத⁴ம்மம் த⁴ம்மோதி கரிஸ்ஸாம; ஏவம் அம்ஹாகம் ஆசரியகுலம் நிஸ்ஸாய நிய்யானிகம் ப⁴விஸ்ஸதி, மயஞ்ச லோகே பாகடா ப⁴விஸ்ஸாமா’’தி தம் அத⁴ம்மம் ‘‘த⁴ம்மோ அய’’ந்தி கத²யந்தா அத⁴ம்மம் த⁴ம்மோதி தீ³பேந்தி நாம. ததே²வ த⁴ம்மகோட்டா²ஸேஸு ச ஏகம் க³ஹேத்வா அயம் அத⁴ம்மோதி கதே²ந்தா த⁴ம்மம் அத⁴ம்மோதி தீ³பேந்தி நாம. வினயபரியாயேன பன பூ⁴தேன வத்து²னா சோதே³த்வா ஸாரேத்வா யதா²படிஞ்ஞாய காதப்³ப³ம் கம்மம் த⁴ம்மோ நாம, அபூ⁴தேன வத்து²னா அசோதே³த்வா அஸாரேத்வா அபடிஞ்ஞாய காதப்³ப³ம் கம்மம் அத⁴ம்மோ நாம.

ஸுத்தந்தபரியாயேன ராக³வினயோ தோ³ஸவினயோ மோஹவினயோ ஸம்வரோ பஹானம் படிஸங்கா²தி அயம் வினயோ நாம, ராகா³தீ³னம் அவினயோ அஸம்வரோ அப்பஹானம் அப்படிஸங்கா²தி அயம் அவினயோ நாம. வினயபரியாயேன வத்து²ஸம்பத்தி ஞத்திஸம்பத்தி அனுஸ்ஸாவனஸம்பத்தி ஸீமாஸம்பத்தி பரிஸாஸம்பத்தீதி அயம் வினயோ நாம, வத்து²விபத்தி…பே… பரிஸாவிபத்தீதி அயம் அவினயோ நாம.

ஸுத்தந்தபரியாயேன சத்தாரோ ஸதிபட்டா²னா… அட்ட²ங்கி³கோ மக்³கோ³தி இத³ம் பா⁴ஸிதம் லபிதம் ததா²க³தேன; தயோ ஸதிபட்டா²னா, தயோ ஸம்மப்பதா⁴னா, தயோ இத்³தி⁴பாதா³, ச² இந்த்³ரியானி, ச² ப³லானி, அட்ட² போ³ஜ்ஜ²ங்கா³, நவங்கி³கோ மக்³கோ³தி இத³ம் அபா⁴ஸிதம் அலபிதம் ததா²க³தேன. வினயபரியாயேன சத்தாரோ பாராஜிகா, தேரஸ ஸங்கா⁴தி³ஸேஸா, த்³வே அனியதா, திம்ஸ நிஸ்ஸக்³கி³யா பாசித்தியாதி இத³ம் பா⁴ஸிதம் லபிதம் ததா²க³தேன; தயோ பாராஜிகா, சுத்³த³ஸ ஸங்கா⁴தி³ஸேஸா, தயோ அனியதா, ஏகத்திம்ஸ நிஸ்ஸக்³கி³யா பாசித்தியாதி இத³ம் அபா⁴ஸிதம் அலபிதம் ததா²க³தேன.

ஸுத்தந்தபரியாயேன தே³வஸிகம் ப²லஸமாபத்திஸமாபஜ்ஜனம், மஹாகருணாஸமாபத்திஸமாபஜ்ஜனம், பு³த்³த⁴சக்கு²னா லோகவோலோகனம், அட்டு²ப்பத்திவஸேன ஸுத்தந்ததே³ஸனா, ஜாதககதா²தி இத³ம் ஆசிண்ணம்; ந தே³வஸிகம் ப²லஸமாபத்திஸமாபஜ்ஜனம்…பே… ந ஜாதககதா²தி இத³ம் அனாசிண்ணம். வினயபரியாயேன நிமந்திதஸ்ஸ வஸ்ஸாவாஸம் வஸித்வா அபலோகேத்வா சாரியபக்கமனம், பவாரேத்வா சாரியபக்கமனம், ஆக³ந்துகேஹி ஸத்³தி⁴ம் பட²மம் படிஸந்தா²ரகரணந்தி இத³ம் ஆசிண்ணம்; தஸ்ஸேவ ஆசிண்ணஸ்ஸ அகரணம் அனாசிண்ணம் நாம.

ஸுத்தந்தபரியாயேன சத்தாரோ ஸதிபட்டா²னா…பே… அட்ட²ங்கி³கோ மக்³கோ³தி இத³ம் பஞ்ஞத்தம் நாம; தயோ ஸதிபட்டா²னா…பே… நவங்கி³கோ மக்³கோ³தி இத³ம் அபஞ்ஞத்தம் நாம. வினயபரியாயேன சத்தாரோ பாராஜிகா…பே… திம்ஸ நிஸ்ஸக்³கி³யா பாசித்தியாதி இத³ம் பஞ்ஞத்தம் நாம; தயோ பாராஜிகா…பே… ஏகத்திம்ஸ நிஸ்ஸக்³கி³யா பாசித்தியாதி இத³ம் அபஞ்ஞத்தம் நாம.

‘‘அனாபத்தி அஜானந்தஸ்ஸ, அதே²ய்யசித்தஸ்ஸ, ந மரணாதி⁴ப்பாயஸ்ஸ, அனுல்லபனாதி⁴ப்பாயஸ்ஸ, ந மோசனாதி⁴ப்பாயஸ்ஸா’’தி தத்த² தத்த² வுத்தா அனாபத்தி அனாபத்தி நாம. ‘‘ஜானந்தஸ்ஸ, தே²ய்யசித்தஸ்ஸா’’திஆதி³னா நயேன வுத்தா ஆபத்தி ஆபத்தி நாம. பஞ்சாபத்திக்க²ந்தா⁴ லஹுகாபத்தி நாம, த்³வே ஆபத்திக்க²ந்தா⁴ க³ருகாபத்தி நாம. ச² ஆபத்திக்க²ந்தா⁴ ஸாவஸேஸாபத்தி நாம, ஏகோ பாராஜிகாபத்திக்க²ந்தோ⁴ அனவஸேஸாபத்தி நாம. த்³வே ஆபத்திக்க²ந்தா⁴ து³ட்டு²ல்லாபத்தி நாம, பஞ்சாபத்திக்க²ந்தா⁴ அது³ட்டு²ல்லாபத்தி நாம.

புரிமனயேனேவ பனேத்த² வுத்தப்பகாரம் த⁴ம்மம் ‘‘அத⁴ம்மோ அய’’ந்தி கத²யந்தா ‘‘த⁴ம்மம் அத⁴ம்மோ’’தி தீ³பேந்தி நாம. அவினயம் ‘‘வினயோ அய’’ந்தி…பே… அது³ட்டு²ல்லாபத்திம் ‘‘து³ட்டு²ல்லாபத்தி அய’’ந்தி கத²யந்தா ‘‘அது³ட்டு²ல்லாபத்திம் து³ட்டு²ல்லாபத்தீ’’தி தீ³பேந்தி நாம. ஏவம் ‘‘அத⁴ம்மம் த⁴ம்மோ’’தி வா…பே… ‘‘அது³ட்டு²ல்லாபத்திம் து³ட்டு²ல்லாபத்தீ’’தி வா தீ³பேத்வா பக்க²ம் லபி⁴த்வா சதுன்னம் ஸங்க⁴கம்மானம் அஞ்ஞதரம் ஸங்க⁴கம்மம் ஏகஸீமாயம் விஸும் கரோந்தேஹி ஸங்கோ⁴ பி⁴ன்னோ நாம ஹோதி. தேன வுத்தம் – ‘‘தே இமேஹி அட்டா²ரஸஹி வத்தூ²ஹி அபகஸ்ஸந்தீ’’திஆதி³.

தத்த² அபகஸ்ஸந்தீதி பரிஸம் ஆகட்³ட⁴ந்தி, விஜடேந்தி, ஏகமந்தம் உஸ்ஸாரேந்தி ச. அவபகாஸந்தீதி அதி விய பகாஸேந்தி யதா² விஸம்ஸட்டா²வ ஹோந்தி, ஏவம் கரோந்தி. ஆவேனிந்தி விஸும். ஏத்தாவதா கோ² உபாலி ஸங்கோ⁴ பி⁴ன்னோ ஹோதீதி ஏவம் அட்டா²ரஸஸு பே⁴த³கரவத்தூ²ஸு யம்கிஞ்சி ஏகம்பி வத்து²ம் தீ³பேத்வா தேன தேன காரணேன ‘‘இமம் க³ண்ஹத², இமம் ரோசேதா²’’தி ஸஞ்ஞாபேத்வா ஸலாகம் கா³ஹாபேத்வா விஸும் ஸங்க⁴கம்மே கதே ஸங்கோ⁴ பி⁴ன்னோ ஹோதி. பரிவாரே பன ‘‘பஞ்சஹி உபாலி ஆகாரேஹி ஸங்கோ⁴ பி⁴ஜ்ஜதீ’’திஆதி³ வுத்தம், தஸ்ஸ இமினா இத⁴ வுத்தேன ஸங்க⁴பே⁴த³லக்க²ணேன அத்த²தோ நானாகரணம் நத்தி². தம் பனஸ்ஸ நானாகரணாபா⁴வம் தத்தே²வ பகாஸயிஸ்ஸாம. ஸேஸம் ஸப்³ப³த்த² உத்தானமேவாதி.

உபாலிபஞ்ஹாகதா² நிட்டி²தா.

ஸங்க⁴பே⁴த³கக்க²ந்த⁴கவண்ணனா நிட்டி²தா.