6. ஸேனாஸனக்க²ந்த⁴கம்

விஹாரானுஜானனகதா²

294. ஸேனாஸனக்க²ந்த⁴கே – அபஞ்ஞத்தம் ஹோதீதி அனனுஞ்ஞாதம் ஹோதி. விஹாரோ நாம அட்³ட⁴யோகா³தி³முத்தகோ அவஸேஸாவாஸோ. அட்³ட⁴யோகோ³தி ஸுபண்ணவங்ககே³ஹம். பாஸாதோ³தி தீ³க⁴பாஸாதோ³. ஹம்மியந்தி உபரிஆகாஸதலே பதிட்டி²தகூடாகா³ரோ பாஸாதோ³யேவ. கு³ஹாதி இட்ட²காகு³ஹா ஸிலாகு³ஹா தா³ருகு³ஹா பம்ஸுகு³ஹா. ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸாதி ஆக³தஸ்ஸ ச அனாக³தஸ்ஸ ச சதூஸு தி³ஸாஸு அப்படிஹதசாரஸ்ஸ சாதுத்³தி³ஸஸ்ஸ ஸங்க⁴ஸ்ஸ.

295. அனுமோத³னகா³தா²ஸு – ஸீதம் உண்ஹந்தி உதுவிஸபா⁴க³வஸேன வுத்தம். ஸிஸிரே சாபி வுட்டி²யோதி ஏத்த² ஸிஸிரோதி ஸம்பு²ஸிதகவாதோ வுச்சதி. வுட்டி²யோதி உஜுகமேக⁴வுட்டி²யோ ஏவ. ஏதானி ஸப்³பா³னி படிஹந்தீதி இமினாவ பதே³ன யோஜேதப்³பா³னி.

படிஹஞ்ஞதீதி விஹாரேன படிஹஞ்ஞதி. லேணத்த²ந்தி நிலீயனத்த²ம். ஸுக²த்த²ந்தி ஸீதாதி³பரிஸ்ஸயாபா⁴வேன ஸுக²விஹாரத்த²ம். ஜா²யிதுஞ்ச விபஸ்ஸிதுந்தி இத³ம்பி பத³த்³வயம் ‘‘ஸுக²த்த²ஞ்சா’’தி இமினாவ பதே³ன யோஜேதப்³ப³ம். இத³ஞ்ஹி வுத்தம் ஹோதி – ஸுக²த்த²ஞ்ச விஹாரதா³னம், கதமம் ஸுக²த்த²ம்? ஜா²யிதும் விபஸ்ஸிதுஞ்ச யம் ஸுக²ம், தத³த்த²ம். அத² வா பரபதே³னபி யோஜேதப்³ப³ம் – ஜா²யிதுஞ்ச விபஸ்ஸிதுஞ்ச விஹாரதா³னம்; இத⁴ ஜா²யிஸ்ஸந்தி விபஸ்ஸிஸ்ஸந்தீதி த³த³தோ விஹாரதா³னம் ஸங்க⁴ஸ்ஸ அக்³க³ம் பு³த்³தே⁴ன வண்ணிதம். வுத்தஞ்ஹேதம் – ‘‘ஸோ ச ஸப்³ப³த³தோ³ ஹோதி, யோ த³தா³தி உபஸ்ஸய’’ந்தி (ஸம். நி. 1.42).

யஸ்மா ச அக்³க³ம் வண்ணிதம், ‘‘தஸ்மா ஹி பண்டி³தோ போஸோ’’தி கா³தா². வாஸயேத்த² ப³ஹுஸ்ஸுதேதி ஏத்த² விஹாரே பரியத்திப³ஹுஸ்ஸுதே ச படிவேத⁴ப³ஹுஸ்ஸுதே ச வாஸேய்ய. தேஸம் அன்னஞ்சாதி யம் தேஸம் அனுச்ச²விகம் அன்னஞ்ச பானஞ்ச வத்தா²னி ச மஞ்சபீடா²தி³ஸேனாஸனானி ச, தம் ஸப்³ப³ம் தேஸு உஜுபூ⁴தேஸு அகுடிலசித்தேஸு. த³தே³ய்யாதி நித³ஹேய்ய. தஞ்ச கோ² விப்பஸன்னேன சேதஸா ந சித்தப்பஸாத³ம் விராதே⁴த்வா, ஏவம் விப்பஸன்னசித்தஸ்ஸ ஹி தே தஸ்ஸ த⁴ம்மம் தே³ஸேந்தி…பே… பரினிப்³பா³தி அனாஸவோதி.

296. ஆவிஞ்ச²னச்சி²த்³த³ம் ஆவிஞ்ச²னரஜ்ஜுந்தி ஏத்த² ரஜ்ஜு நாம ஸசேபி தீ³பினங்கு³ட்டே²ன கதா ஹோதி, வட்டதியேவ; ந காசி ந வட்டதி. தீணி தாளானீதி திஸ்ஸோ குஞ்சிகாயோ. யந்தகம் ஸூசிகந்தி ஏத்த² யம் யம் ஜானாதி தம் தம் யந்தகம், தஸ்ஸ விவரணஸூசிகஞ்ச காதும் வட்டதி. வேதி³காவாதபானம் நாம சேதியே வேதி³காஸதி³ஸம். ஜாலவாதபானம் நாம ஜாலகப³த்³த⁴ம். ஸலாகவாதபானம் நாம த²ம்ப⁴கவாதபானம். சக்கலிகந்தி ஏத்த² சோளகபாத³புஞ்ச²னம் ப³ந்தி⁴தும் அனுஜானாமீதி அத்தோ². வாதபானபி⁴ஸீதி வாதபானப்பமாணேன பி⁴ஸிம் கத்வா ப³ந்தி⁴தும் அனுஜானாமீதி அத்தோ². மிட்³டி⁴ந்தி மிட்³ட⁴கம். பி³த³லமஞ்சகந்தி வேத்தமஞ்சம்; வேளுவிலீவேஹி வா வீதம்.

297. ஆஸந்தி³கோதி சதுரஸ்ஸபீட²ம் வுச்சதி. உச்சகம்பி ஆஸந்தி³கந்தி வசனதோ ஏகதோபா⁴கே³ன தீ³க⁴பீட²மேவ ஹி அட்ட²ங்கு³லபாத³கம் வட்டதி, சதுரஸ்ஸஆஸந்தி³கோ பன பமாணாதிக்கந்தோபி வட்டதீதி வேதி³தப்³போ³. ஸத்தங்கோ³ நாம தீஸு தி³ஸாஸு அபஸ்ஸயம் கத்வா கதமஞ்சோ, அயம்பி பமாணாதிக்கந்தோ வட்டதி. ப⁴த்³த³பீட²ந்தி வேத்தமயம் பீட²ம் வுச்சதி. பீடி²காதி பிலோதிகாப³த்³த⁴பீட²மேவ. ஏளகபாத³பீட²ம் நாம தா³ருபட்டிகாய உபரி பாதே³ ட²பேத்வா போ⁴ஜனப²லகம் விய கதபீட²ம் வுச்சதி. ஆமலகவட்டிகபீட²ம் நாம ஆமலகாகாரேன யோஜிதம் ப³ஹுபாத³கபீட²ம். இமானி தாவ பாளியம் ஆக³தபீடா²னி. தா³ருமயம் பன ஸப்³ப³ம் பீட²ம் வட்டதீதி அயமேத்த² வினிச்ச²யோ. கோச்ச²ந்தி உஸிரமயம் வா முஞ்ஜபப்³ப³ஜமயம் வா.

அட்ட²ங்கு³லபரமம் மஞ்சபடிபாத³கந்தி ஏத்த² மனுஸ்ஸானம் பமாணங்கு³லமேவ அட்ட²ங்கு³லம். சிமிலிகா நாம பரிகம்மகதாய பூ⁴மியா ச²விஸம்ரக்க²ணத்தா²ய அத்த²ரணம் வுச்சதி. ருக்க²தூலந்தி ஸிம்ப³லிருக்கா²தீ³னம் யேஸம் கேஸஞ்சி ருக்கா²னம் தூலம். லதாதூலந்தி கீ²ரவல்லிஆதீ³னம் யாஸம் காஸஞ்சி வல்லீனம் தூலம். போடகிதூலந்தி போடகிதிணாதீ³னம் யேஸம் கேஸஞ்சி திணஜாதிகானம் அந்தமஸோ உச்சு²னளாதீ³னம்பி தூலம். ஏதேஹி தீஹி ஸப்³ப³பூ⁴தகா³மா ஸங்க³ஹிதா ஹோந்தி. ருக்க²வல்லிதிணஜாதியோ ஹி முஞ்சித்வா அஞ்ஞோ பூ⁴தகா³மோ நாம நத்தி², தஸ்மா யஸ்ஸ கஸ்ஸசி பூ⁴தகா³மஸ்ஸ தூலம் பி³ம்போ³ஹனே வட்டதி, பி⁴ஸிம் பன பாபுணித்வா ஸப்³ப³ம்பேதம் அகப்பியதூலந்தி வுச்சதி. ந கேவலஞ்ச பி³ம்போ³ஹனே ஏதம் தூலமேவ, ஹம்ஸமோராதீ³னம் ஸப்³ப³ஸகுணானம் ஸீஹாதீ³னம் ஸப்³ப³சதுப்பதா³னஞ்ச லோமம்பி வட்டதி. பியங்கு³புப்ப²ப³குளபுப்பா²தி³ பன யம்கிஞ்சி புப்ப²ம் ந வட்டதி. தமாலபத்தம் ஸுத்³த⁴மேவ ந வட்டதி, மிஸ்ஸகம் பன வட்டதி. பி⁴ஸீனம் அனுஞ்ஞாதம் பஞ்சவித⁴ம் உண்ணாதி³தூலம்பி வட்டதி.

அத்³த⁴காயிகானீதி உபட்³ட⁴காயப்பமாணானி, யேஸு கடிதோ பட்டா²ய யாவ ஸீஸம் உபத³ஹந்தி. ஸீஸப்பமாணம் நாம யஸ்ஸ வித்தா²ரதோ தீஸு கண்ணேஸு த்³வின்னம் கண்ணானம் அந்தரம் மினீயமானம் வித³த்தி² சேவ சதுரங்கு³லஞ்ச ஹோதி, மஜ்ஜ²ட்டா²னம் முட்டி²ரதனம் ஹோதி. தீ³க⁴தோ பன தி³யட்³ட⁴ரதனம் வா த்³விரதனம் வாதி குருந்தி³யம் வுத்தம். அயம் ஸீஸப்பமாணஸ்ஸ உக்கட்ட²பரிச்சே²தோ³. இதோ உத்³த⁴ம் ந வட்டதி, ஹேட்டா² பன வட்டதி. அகி³லானஸ்ஸ ஸீஸுபதா⁴னஞ்ச பாது³பதா⁴னஞ்சாதி த்³வயமேவ வட்டதி. கி³லானஸ்ஸ பி³ம்போ³ஹனானி ஸந்த²ரித்வா உபரி பச்சத்த²ரணம் கத்வா நிபஜ்ஜிதும்பி வட்டதி. ‘‘யானி பன பி⁴ஸீனம் அனுஞ்ஞாதானி பஞ்ச கப்பியதூலானி, தேஹி பி³ம்போ³ஹனம் மஹந்தம்பி வட்டதீ’’தி பு²ஸ்ஸதே³வத்தே²ரோ ஆஹ. வினயத⁴ரஉபதிஸ்ஸத்தே²ரோ பன ‘‘பி³ம்போ³ஹனம் கரிஸ்ஸாமீ’தி கப்பியதூலம் வா அகப்பியதூலம் வா பக்கி²பித்வா கரோந்தஸ்ஸ பமாணமேவ வட்டதீ’’தி ஆஹ.

பஞ்ச பி⁴ஸியோதி பஞ்சஹி உண்ணாதீ³ஹி பூரிதபி⁴ஸியோ. தூலக³ணனாய ஹி ஏதாஸம் க³ணனா வுத்தா. தத்த² உண்ணக்³க³ஹணேன ந கேவலம் ஏளகலோமமேவ க³ஹிதம், ட²பேத்வா மனுஸ்ஸலோமம் யம்கிஞ்சி கப்பியாகப்பியமம்ஸஜாதீனம் பக்கி²சதுப்பதா³னம் லோமம், ஸப்³ப³ம் இத⁴ உண்ணக்³க³ஹணேனேவ க³ஹிதம். தஸ்மா ச²ன்னம் சீவரானம் ச²ன்னம் அனுலோமசீவரானஞ்ச அஞ்ஞதரேன பி⁴ஸிச்ச²விம் கத்வா தம் ஸப்³ப³ம் பக்கி²பித்வா பி⁴ஸிம் காதும் வட்டதி. ஏளகலோமானி பன அபக்கி²பித்வா கம்ப³லமேவ சதுக்³கு³ணம் வா பஞ்சகு³ணம் வா பக்கி²பித்வா கதாபி உண்ணபி⁴ஸிஸங்க்²யமேவ க³ச்ச²தி.

சோளபி⁴ஸிஆதீ³ஸு யம்கிஞ்சி நவசோளம் வா புராணசோளம் வா ஸம்ஹரித்வா வா அந்தோ பக்கி²பித்வா வா கதா சோளபி⁴ஸி, யம்கிஞ்சி வாகம் பக்கி²பித்வா கதா வாகபி⁴ஸி, யம்கிஞ்சி திணம் பக்கி²பித்வா கதா திணபி⁴ஸி, அஞ்ஞத்ர ஸுத்³த⁴தமாலபத்தம் யம்கிஞ்சி பண்ணம் பக்கி²பித்வா கதா பண்ணபி⁴ஸீதி வேதி³தப்³பா³. தமாலபத்தம் பன அஞ்ஞேன மிஸ்ஸமேவ வட்டதி, ஸுத்³த⁴ம் ந வட்டதி. பி⁴ஸியா பமாணனியமோ நத்தி², மஞ்சபி⁴ஸி பீட²பி⁴ஸி பூ⁴மத்த²ரணபி⁴ஸி சங்கமனபி⁴ஸி பாத³புஞ்ச²னபி⁴ஸீதி ஏதாஸம் அனுரூபதோ ஸல்லக்கே²த்வா அத்தனோ ருசிவஸேன பமாணம் காதப்³ப³ம். யம் பனேதம் உண்ணாதி³பஞ்சவித⁴தூலம்பி பி⁴ஸியம் வட்டதி, தம் ‘‘மஸூரகேபி வட்டதீ’’தி குருந்தி³யம் வுத்தம். ஏதேன மஸூரகம் பரிபு⁴ஞ்ஜிதும் வட்டதீதி ஸித்³த⁴ம் ஹோதி.

மஞ்சபி⁴ஸிம் பீடே² ஸந்த²ரந்தீதி மஞ்சபி⁴ஸிம் பீடே² அத்த²ரந்தி; அத்த²ரணத்தா²ய ஹரந்தீதி யுஜ்ஜதி. உல்லோகம் அகரித்வாதி ஹேட்டா² சிமிலிகம் அத³த்வா. போ²ஸிதுந்தி ரஜனேன வா ஹலித்³தி³யா வா உபரி பு²ஸிதானி தா³தும். ப⁴த்திகம்மந்தி பி⁴ஸிச்ச²வியா உபரி ப⁴த்திகம்மம். ஹத்த²ப⁴த்திந்தி பஞ்சங்கு³லிப⁴த்திம்.

298. இக்காஸந்தி ருக்க²னிய்யாஸம் வா ஸிலேஸம் வா. பிட்ட²மத்³த³ந்தி பிட்ட²க²லிம். குண்ட³கமத்திகந்தி குண்ட³கமிஸ்ஸகமத்திகம். ஸாஸபகுட்டந்தி ஸாஸபபிட்ட²ம். ஸித்த²தேலகந்தி விலீனமது⁴ஸித்த²கம். அச்சுஸ்ஸன்னம் ஹோதீதி பி³ந்து³ பி³ந்து³ ஹுத்வா திட்ட²தி. பச்சுத்³த⁴ரிதுந்தி புஞ்சி²தும். க³ண்டு³மத்திகந்தி க³ண்டு³ப்பாத³கூ³த²மத்திகம். கஸாவந்தி ஆமலகஹரீதகானம் கஸாவம்.

299. ந பி⁴க்க²வே படிபா⁴னசித்தந்தி ஏத்த² ந கேவலம் இத்தி²புரிஸரூபமேவ, திரச்சா²னரூபம்பி அந்தமஸோ க³ண்டு³ப்பாத³ரூபம்பி பி⁴க்கு²னோ ஸயம் காதும் வா ‘‘கரோஹீ’’தி வத்தும் வா ந வட்டதி, ‘‘உபாஸக த்³வாரபாலம் கரோஹீ’’தி வத்தும்பி ந லப்³ப⁴தி. ஜாதகபகரணஅஸதி³ஸதா³னாதீ³னி பன பஸாத³னீயானி நிப்³பி³தா³படிஸம்யுத்தானி வா வத்தூ²னி பரேஹி காராபேதும் லப்³ப⁴தி. மாலாகம்மாதீ³னி ஸயம்பி காதும் லப்³ப⁴தி.

300. அளகமந்தா³தி ஏகங்க³ணா மனுஸ்ஸாபி⁴கிண்ணா. தயோ க³ப்³பே⁴தி ஏத்த² ஸிவிகாக³ப்³போ⁴தி சதுரஸ்ஸக³ப்³போ⁴. நாளிகாக³ப்³போ⁴தி வித்தா²ரதோ தி³கு³ணதிகு³ணாயாமோ தீ³க⁴க³ப்³போ⁴. ஹம்மியக³ப்³போ⁴தி ஆகாஸதலே கூடாகா³ரக³ப்³போ⁴ வா முண்ட³ச்ச²த³னக³ப்³போ⁴ வா.

கலங்கபாத³கந்தி ருக்க²ம் விஜ்ஜி²த்வா தத்த² கா²ணுகே ஆகோடேத்வா கதம், தம் ஆஹரிமம் பி⁴த்திபாத³ம் ஜிண்ணகுட்டபாத³ஸ்ஸ உபத்த²ம்ப⁴னத்த²ம் பூ⁴மியம் பதிட்டா²பேதும் அனுஜானாமீதி அத்தோ². பரித்தாணகிடிகந்தி வஸ்ஸபரித்தாணத்த²ம் கிடிகம். உத்³த³ஸுத⁴ந்தி வச்ச²ககோ³மயேன சேவ சா²ரிகாய ச ஸத்³தி⁴ம் மத்³தி³தமத்திகம்.

ஆளிந்தோ³ நாம பமுக²ம் வுச்சதி. பக⁴னம் நாம யம் நிக்க²மந்தா ச பவிஸந்தா ச பாதே³ஹி ஹனந்தி, தஸ்ஸ விஹாரத்³வாரே உப⁴தோ குட்டம் நீஹரித்வா கதபதே³ஸஸ்ஸேதம் அதி⁴வசனம், ‘‘பகா⁴ன’’ந்திபி வுச்சதி. பகுட்டந்தி மஜ்ஜே² க³ப்³ப⁴ஸ்ஸ ஸமந்தா பரியாகா³ரோ வுச்சதி. ‘‘பகுட’’ந்திபி பாடோ². ஓஸாரகந்தி அனாளிந்த³கே விஹாரே வம்ஸம் த³த்வா ததோ த³ண்ட³கே ஓஸாரேத்வா கதச²த³னபமுக²ம். ஸம்ஸாரணகிடிகோ நாம சக்கலயுத்தோ கிடிகோ.

301. பானீயபா⁴ஜனந்தி பிவந்தானம் பானீயதா³னபா⁴ஜனம். உளுங்கோ ச தா²லகஞ்ச பானீயஸங்க²ஸ்ஸ அனுலோமானி.

303. அபேஸீதி தீ³க⁴தா³ரும்ஹி கா²ணுகே பவேஸேத்வா கண்டகஸாகா²ஹி வினந்தி⁴த்வா கதம் த்³வாரத²கனகம். பலிகோ⁴தி கா³மத்³வாரேஸு விய சக்கயுத்தம் த்³வாரத²கனகம்.

305. அஸ்ஸதரீஹி யுத்தா ரதா² அஸ்ஸதரீரதா². ஆமுத்தமணிகுண்ட³லாதி ஆமுத்தமணிகுண்ட³லானி.

பரினிப்³பு³தோதி கிலேஸபரினிப்³பா³னேன பரினிப்³பு³தோ. ஸீதிபூ⁴தோதி கிலேஸாதபாபா⁴வேன ஸீதிபூ⁴தோ. நிரூபதீ⁴தி கிலேஸுபதி⁴அபா⁴வேன நிரூபதீ⁴தி வுச்சதி.

ஸப்³பா³ ஆஸத்தியோ சே²த்வாதி ரூபாதீ³ஸு வா விஸயேஸு ஸப்³ப³ப⁴வேஸு வா பத்த²னாயோ சி²ந்தி³த்வா. ஹத³யே த³ரந்தி சித்தே கிலேஸத³ரத²ம் வினேத்வா. வேய்யாயிகந்தி வயகரணம் வுச்சதி.

307. ஆதே³ய்யவாசோதி தஸ்ஸ வசனம் ப³ஹூ ஜனா ஆதி³யிதப்³ப³ம் ஸோதப்³ப³ம் மஞ்ஞந்தீதி அத்தோ². ஆராமே அகம்ஸூதி யே ஸத⁴னா, தே அத்தனோ த⁴னேன அகம்ஸு. யே மந்த³த⁴னா சேவ அத⁴னா ச, தேஸம் த⁴னம் அதா³ஸி. இதி ஸோ ஸதஸஹஸ்ஸகஹாபணே ஸதஸஹஸ்ஸக்³க⁴னகஞ்ச ப⁴ண்ட³ம் த³த்வா பஞ்சசத்தாலீஸயோஜனிகே அத்³தா⁴னே யோஜனே யோஜனே விஹாரபதிட்டா²னம் கத்வா ஸாவத்தி²ம் அக³மாஸி.

கோடிஸந்த²ரம் ஸந்த²ராபேஸீதி கஹாபணகோடியா கஹாபணகோடிம் படிபாதே³த்வா ஸந்த²ரி. யே தத்த² ருக்கா² வா போக்க²ரணியோ வா தேஸம் பரிக்கே²பப்பமாணம் க³ஹேத்வா அஞ்ஞஸ்மிம் டா²னே ஸந்த²ரித்வா அதா³ஸி. ஏவமஸ்ஸ அட்டா²ரஸகோடிகம் நிதா⁴னம் பரிக்க²யம் அக³மாஸி.

குமாரஸ்ஸ ஏதத³ஹோஸீதி க³ஹபதினோ ஏவம் ப³ஹுத⁴னம் சஜந்தஸ்ஸாபி முக²ஸ்ஸ விப்பஸன்னாகாரம் தி³ஸ்வா ஏதம் அஹோஸி. கோட்ட²கம் மாபேஸீதி ஸத்தபூ⁴மிகம் த்³வாரகோட்ட²கபாஸாத³ம் மாபேஸி.

அத² கோ² அனாத²பிண்டி³கோ க³ஹபதி ஜேதவனே விஹாரே காராபேஸி…பே… மண்ட³பே காராபேஸீதி அபராஹிபி அட்டா²ரஸஹி கோடீஹி ஏதே விஹாராத³யோ காராபேஸி அட்ட²கரீஸப்பமாணாய பூ⁴மியா. விபஸ்ஸிஸ்ஸ ஹி ப⁴க³வதோ புனப்³ப³ஸுமித்தோ க³ஹபதி யோஜனப்பமாணம் பூ⁴மிம் ஸுவண்ணிட்ட²காஸந்த²ரேன கிணித்வா விஹாரம் காராபேஸி. ஸிகி²ஸ்ஸ பன ஸிரிவட்³டோ⁴ க³ஹபதி திகா³வுதப்பமாணம் ஸுவண்ணயட்டி²ஸந்த²ரேன, வேஸ்ஸபு⁴ஸ்ஸ ஸோத்தி²ஜோ க³ஹபதி அட்³ட⁴யோஜனப்பமாணம் ஸுவண்ணபா²லஸந்த²ரேன, ககுஸந்த⁴ஸ்ஸ பன அச்சுதோ க³ஹபதி கா³வுதப்பமாணம் ஸுவண்ணஹத்தி²பத³ஸந்த²ரேன, கோணாக³மனஸ்ஸ உக்³கோ³ க³ஹபதி அட்³ட⁴கா³வுதப்பமாணம் ஸுவண்ணிட்ட²காஸந்த²ரேன, கஸ்ஸபஸ்ஸ ஸுமங்க³லோ க³ஹபதி வீஸதிஉஸப⁴ப்பமாணம் ஸுவண்ணகச்ச²பஸந்த²ரேன, அம்ஹாகம் ப⁴க³வதோ ஸுத³த்தோ க³ஹபதி அட்ட²கரீஸப்பமாணம் பூ⁴மிம் கஹாபணஸந்த²ரேன கிணித்வா விஹாரம் காராபேஸீதி; ஏவம் அனுபுப்³பே³ன பரிஹாயந்தி ஸம்பத்தியோதி அலமேவ ஸப்³ப³ஸம்பத்தீஸு விரஜ்ஜிதும் அலம் விமுச்சிதுந்தி.

308. க²ண்ட³ந்தி பி⁴ன்னோகாஸோ. பு²ல்லந்தி ப²லிதோகாஸோ. படிஸங்க²ரிஸ்ஸதீதி பாகதிகம் கரிஸ்ஸதி. லத்³த⁴னவகம்மேன பன பி⁴க்கு²னா வாஸிப²ரஸுனிகா²த³னாதீ³னி க³ஹேத்வா ஸயம் ந காதப்³ப³ம், கதாகதம் ஜானிதப்³ப³ம்.

310. பிட்டி²தோ பிட்டி²தோ க³ந்த்வாதி தே²ரோ கிர கி³லானே படிஜக்³க³ந்தோ ஜிண்ணே வுட்³டே⁴ ஸங்க³ண்ஹந்தோ ஸப்³ப³பச்ச²தோ ஆக³ச்ச²தி. இத³மஸ்ஸ சாரித்தம். தேன வுத்தம் – ‘‘பிட்டி²தோ பிட்டி²தோ க³ந்த்வா’’தி. அக்³கா³ஸனந்தி தே²ராஸனம். அக்³கோ³த³கந்தி த³க்கி²ணோத³கம். அக்³க³பிண்ட³ந்தி ஸங்க⁴த்தே²ரபிண்ட³ம். அந்தரா ஸத்தீ²னம் கரித்வாதி சதுன்னம் பாதா³னம் அந்தரே கரித்வா.

315. பதிட்டா²பேஸீதி அட்டா²ரஸகோடிபரிச்சாக³ம் கத்வா பதிட்டா²பேஸி. ஏவம் ஸப்³பா³பி சதுபண்ணாஸகோடியோ பரிச்சஜி.

விஹாரானுஜானனகதா² நிட்டி²தா.

ஆஸனப்படிபா³ஹனாதி³கதா²

316. விப்பகதபோ⁴ஜனோதி அந்தரக⁴ரே வா விஹாரே வா அரஞ்ஞே வா யத்த² கத்த²சி பு⁴ஞ்ஜமானோ பி⁴க்கு² அனிட்டி²தே போ⁴ஜனே ந வுட்டா²பேதப்³போ³. அந்தரக⁴ரே பச்சா² ஆக³தேன பி⁴க்க²ம் க³ஹேத்வா க³ந்தப்³ப³ம். ஸசே மனுஸ்ஸா வா பி⁴க்கூ² வா ‘‘பவிஸதா²’’தி வத³ந்தி, ‘‘மயி பவிஸந்தே பி⁴க்கூ² உட்ட²ஹிஸ்ஸந்தீ’’தி வத்தப்³ப³ம். ‘‘ஏத², ப⁴ந்தே, ஆஸனம் அத்தீ²’’தி வுத்தேன பன பவிஸிதப்³ப³ம். ஸசே கோசி கிஞ்சி ந வத³தி, ஆஸனஸாலம் க³ந்த்வா அதிஸமீபம் அக³ந்த்வா ஸபா⁴க³ட்டா²னே டா²தப்³ப³ம். ஓகாஸே கதே ‘‘பவிஸதா²’’தி வுத்தேன பன பவிஸிதப்³ப³ம். ஸசே பன யம் ஆஸனம் தஸ்ஸ பாபுணாதி, தத்த² அபு⁴ஞ்ஜந்தோ பி⁴க்கு² நிஸின்னோ ஹோதி, தம் உட்டா²பேதும் வட்டதி. யாகு³க²ஜ்ஜகாதீ³ஸு பன யம்கிஞ்சி பிவித்வா வா கா²தி³த்வா வா யாவ அஞ்ஞோ ஆக³ச்ச²தி, தாவ நிஸின்னம் ரித்தஹத்த²ம்பி வுட்டா²பேதும் ந வட்டதி. விப்பகதபோ⁴ஜனோயேவ ஹி ஸோ ஹோதி.

ஸசே வுட்டா²பேதீதி ஸசே ஆபத்திம் அதிக்கமித்வாபி வுட்டா²பேதியேவ. பவாரிதோ ச ஹோதீதி யம் ஸோ வுட்டா²பேதி, அயஞ்ச பி⁴க்கு² பவாரிதோ ச ஹோதி, தேன வத்தப்³போ³ – ‘‘க³ச்ச² உத³கம் ஆஹராஹீ’’தி. வுட்³ட⁴தரஞ்ஹி பி⁴க்கு²ம் ஆணாபேதும் இத³மேவ ஏகம் டா²னந்தி. ஸசே ஸோ உத³கம்பி ந ஆஹரதி, ததோ யஞ்ச நவகதரேன கத்தப்³ப³ம், தம் த³ஸ்ஸேந்தோ ‘‘ஸாது⁴கம் ஸித்தா²னீ’’திஆதி³மாஹ.

கி³லானஸ்ஸ பதிரூபம் ஸேய்யந்தி ஏத்த² யோ காஸப⁴க³ந்த³ராதிஸாராதீ³ஹி கி³லானோ ஹோதி, கே²ளமல்லகவச்சகபாலாதீ³னி ட²பேதப்³பா³னி ஹோந்தி. குட்டி² வா ஹோதி, ஸேனாஸனம் தூ³ஸேதி; ஏவரூபஸ்ஸ ஹேட்டா²பாஸாத³பண்ணஸாலாதீ³ஸு அஞ்ஞதரம் ஏகமந்தம் ஸேனாஸனம் தா³தப்³ப³ம். யஸ்மிம் வஸந்தே ஸேனாஸனம் ந து³ஸ்ஸதி, தஸ்ஸ வரஸேய்யாபி தா³தப்³பா³வ. யோபி ஸினேஹபானவிரேசனனத்து²கம்மாதீ³ஸு யம்கிஞ்சி பே⁴ஸஜ்ஜம் கரோதி, ஸப்³போ³ ஸோ கி³லானோயேவ, தஸ்ஸாபி ஸல்லக்கே²த்வா பதிரூபம் ஸேனாஸனம் தா³தப்³ப³ம். லேஸகப்பேனாதி அப்பகேன ஸீஸாபா³தா⁴தி³மத்தேன. பி⁴க்கூ² க³ணேத்வாதி ‘‘ஏத்தகா நாம பி⁴க்கூ²’’தி விஹாரே பி⁴க்கூ²னம் பரிச்சே²த³ம் ஞத்வா.

ஆஸனப்படிபா³ஹனாதி³கதா² நிட்டி²தா.

ஸேனாஸனக்³கா³ஹகதா²

318. ஸேய்யாதி மஞ்சட்டா²னானி வுச்சந்தி. ஸேய்யக்³கே³னாதி ஸேய்யாபரிச்சே²தே³ன, வஸ்ஸூபனாயிகதி³வஸே காலம் கோ⁴ஸேத்வா ஏகமஞ்சட்டா²னம் ஏகஸ்ஸ பி⁴க்கு²னோ கா³ஹேதும் அனுஜானாமீதி அத்தோ². ஸேய்யக்³கே³ன கா³ஹேந்தாதி ஸேய்யாபரிச்சே²தே³ன கா³ஹியமானா. ஸேய்யா உஸ்ஸாரயிம்ஸூதி மஞ்சட்டா²னானி அதிரேகானி அஹேஸும். விஹாரக்³கா³தீ³ஸுபி ஏஸேவ நயோ. அனுபா⁴க³ந்தி புன அபரம்பி பா⁴க³ம் தா³தும். அதிமந்தே³ஸு ஹி பி⁴க்கூ²ஸு ஏகேகஸ்ஸ பி⁴க்கு²னோ த்³வே தீணி பரிவேணானி தா³தப்³பா³னி. ந அகாமா தா³தப்³போ³தி அனிச்சா²ய ந தா³தப்³போ³. தத்த² வஸ்ஸூபனாயிகதி³வஸே க³ஹிதே அனுபா⁴கே³ பச்சா² ஆக³தானம் ந அத்தனோ அருசியா ஸோ அனுபா⁴கோ³ தா³தப்³போ³. ஸசே பன யேன க³ஹிதோ, ஸோ ச அத்தனோ ருசியா தம் அனுபா⁴க³ம் வா பட²மபா⁴க³ம் வா தே³தி, வட்டதி.

நிஸ்ஸீமே டி²தஸ்ஸாதி உபசாரஸீமதோ ப³ஹி டி²தஸ்ஸ. அந்தோ உபசாரஸீமாய பன தூ³ரே டி²தஸ்ஸாபி லப்³ப⁴தியேவ. ஸேனாஸனம் க³ஹேத்வாதி வஸ்ஸூபனாயிகதி³வஸே க³ஹேத்வா. ஸப்³ப³காலம் படிபா³ஹந்தீதி சதுமாஸச்சயேன உதுகாலேபி படிபா³ஹந்தி. தீஸு ஸேனாஸனக்³கா³ஹேஸு புரிமகோ ச பச்சி²மகோ சாதி இமே த்³வே கா³ஹா தா²வரா.

அந்தராமுத்தகே அயம் வினிச்ச²யோ – ஏகஸ்மிம் விஹாரே மஹாலாப⁴ஸேனாஸனம் ஹோதி. ஸேனாஸனஸாமிகா வஸ்ஸூபக³தம் பி⁴க்கு²ம் ஸப்³ப³பச்சயேஹி ஸக்கச்சம் உபட்ட²ஹித்வா பவாரேத்வா க³மனகாலே ப³ஹும் ஸமணபரிக்கா²ரம் தே³ந்தி. மஹாதே²ரா தூ³ரதோபி ஆக³ந்த்வா வஸ்ஸூபனாயிகதி³வஸே தம் க³ஹேத்வா பா²ஸும் வஸித்வா வுத்த²வஸ்ஸா லாப⁴ம் க³ண்ஹித்வா பக்கமந்தி. ஆவாஸிகா ‘‘மயம் ஏத்து²ப்பன்னம் லாப⁴ம் ந லபா⁴ம, நிச்சம் ஆக³ந்துகமஹாதே²ராவ லப⁴ந்தி, தேயேவ நம் ஆக³ந்த்வா படிஜக்³கி³ஸ்ஸந்தீ’’தி பலுஜ்ஜந்தம்பி ந ஓலோகேந்தி. ப⁴க³வா தஸ்ஸ படிஜக்³க³னத்த²ம் ‘‘அபரஜ்ஜுக³தாய பவாரணாய ஆயதிம் வஸ்ஸாவாஸத்தா²ய அந்தராமுத்தகோ கா³ஹேதப்³போ³’’தி ஆஹ.

தம் கா³ஹேந்தேன ஸங்க⁴த்தே²ரோ வத்தப்³போ³ – ‘‘ப⁴ந்தே அந்தராமுத்தகஸேனாஸனம் க³ண்ஹதா²’’தி. ஸசே க³ண்ஹாதி, தா³தப்³ப³ம்; நோ சே ஏதேனேவ உபாயேன அனுதே²ரம் ஆதி³ம் கத்வா யோ க³ண்ஹாதி, தஸ்ஸ அந்தமஸோ ஸாமணேரஸ்ஸாபி தா³தப்³ப³ம். தேன தம் ஸேனாஸனம் அட்ட²மாஸே படிஜக்³கி³தப்³ப³ம். ச²த³னபி⁴த்திபூ⁴மீஸு யம் கிஞ்சி க²ண்ட³ம் வா பு²ல்லம் வா ஹோதி, தம் ஸப்³ப³ம் படிஸங்க²ரிதப்³ப³ம். உத்³தே³ஸபரிபுச்சா²தீ³ஹி தி³வஸம் கே²பேத்வா ரத்திம் தத்த² வஸிதும்பி வட்டதி. ரத்திம் பரிவேணே வஸித்வா தத்த² தி³வஸம் கே²பேதும்பி வட்டதி. ரத்திந்தி³வம் தத்தே²வ வஸிதும்பி வட்டதி. உதுகாலே ஆக³தானம் வுட்³டா⁴னம் ந படிபா³ஹிதப்³ப³ம். வஸ்ஸூபனாயிகதி³வஸே பன ஸம்பத்தே ஸசே ஸங்க⁴த்தே²ரோ ‘‘மய்ஹம் இத³ம் ஸேனாஸனம் தே³தா²’’தி வத³தி, ந லப⁴தி. ‘‘ப⁴ந்தே, இத³ம் அந்தராமுத்தகம் க³ஹேத்வா அட்ட²மாஸே ஏகேன பி⁴க்கு²னா படிஜக்³கி³த’’ந்தி வத்வா ந தா³தப்³ப³ம். அட்ட²மாஸே படிஜக்³க³கபி⁴க்கு²ஸ்ஸேவ க³ஹிதம் ஹோதி.

யஸ்மிம் பன ஸேனாஸனே ஏகஸம்வச்ச²ரே த்³விக்க²த்தும் பச்சயே தே³ந்தி ச²மாஸச்சயேன ச²மாஸச்சயேன, தம் அந்தராமுத்தகம் ந கா³ஹேதப்³ப³ம். யஸ்மிம் வா திக்க²த்தும் தே³ந்தி சதுமாஸச்சயேன சதுமாஸச்சயேன, யஸ்மிம் வா சதுக்க²த்தும் தே³ந்தி தேமாஸச்சயேன தேமாஸச்சயேன, தம் அந்தராமுத்தகம் ந கா³ஹேதப்³ப³ம். பச்சயேனேவ ஹி தம் படிஜக்³க³னம் லபி⁴ஸ்ஸதி. யஸ்மிம் பன ஏகஸம்வச்ச²ரே ஸகிதே³வ ப³ஹுபச்சயே தே³ந்தி, ஏதம் அந்தராமுத்தகம் கா³ஹேதப்³ப³ந்தி. அயம் தாவ அந்தோவஸ்ஸே வஸ்ஸூபனாயிகதி³வஸேன பாளியம் ஆக³தஸேனாஸனக்³கா³ஹகதா².

அயம் பன ஸேனாஸனக்³கா³ஹோ நாம து³விதோ⁴ ஹோதி – உதுகாலே ச வஸ்ஸாவாஸே ச. தத்த² உதுகாலே தாவ கேசி ஆக³ந்துகா பி⁴க்கூ² புரேப⁴த்தம் ஆக³ச்ச²ந்தி, கேசி பச்சா²ப⁴த்தம் பட²மயாமம் வா மஜ்ஜி²மயாமம் வா பச்சி²மயாமம் வா யே யதா³ ஆக³ச்ச²ந்தி, தேஸம் ததா³வ பி⁴க்கூ² உட்டா²பேத்வா ஸேனாஸனம் தா³தப்³ப³ம். அகாலோ நாம நத்தி². ஸேனாஸனபஞ்ஞாபகேன பன பண்டி³தேன ப⁴விதப்³ப³ம், ஏகம் வா த்³வே வா மஞ்சட்டா²னானி ட²பேதப்³பா³னி. ஸசே விகாலே ஏகோ வா த்³வே வா தே²ரா ஆக³ச்ச²ந்தி, தே வத்தப்³பா³ – ‘‘ப⁴ந்தே, ஆதி³தோ பட்டா²ய வுட்டா²பியமானே ஸப்³பே³பி பி⁴க்கூ² உப்³ப⁴ண்டி³கா ப⁴விஸ்ஸந்தி, தும்ஹே அம்ஹாகம் வஸனட்டா²னேயேவ வஸதா²’’தி.

ப³ஹூஸு பன ஆக³தேஸு வுட்டா²பேத்வா படிபாடியா தா³தப்³ப³ம். ஸசே ஏகேகம் பரிவேணம் பஹோதி, ஏகேகம் பரிவேணம் தா³தப்³ப³ம். தத்த² அக்³கி³ஸாலதீ³க⁴ஸாலமண்ட³லமாலாத³யோ ஸப்³பே³பி தஸ்ஸேவ பாபுணந்தி. ஏவம் அப்பஹோந்தே பாஸாத³க்³கே³ன தா³தப்³ப³ம். பாஸாதே³ஸு அப்பஹோந்தேஸு ஓவரகக்³கே³ன தா³தப்³ப³ம். ஓவரகேஸு அப்பஹோந்தேஸு ஸேய்யக்³கே³ன தா³தப்³ப³ம். ஸேய்யக்³கே³ஸு அப்பஹோந்தேஸு மஞ்சட்டா²னேன தா³தப்³ப³ம். மஞ்சட்டா²னே அப்பஹோந்தே ஏகபீட²கட்டா²னவஸேன தா³தப்³ப³ம். பி⁴க்கு²னோ பன டி²தோகாஸமத்தம் ந கா³ஹேதப்³ப³ம். ஏதஞ்ஹி ஸேனாஸனம் நாம ந ஹோதி. பீட²கட்டா²னே பன அப்பஹோந்தே ஏகம் மஞ்சட்டா²னம் வா பீட²கட்டா²னம் வா வாரேன வாரேன க³ஹேத்வா ‘‘ப⁴ந்தே, விஸ்ஸமதா²’’தி திண்ணம் ஜனானம் தா³தப்³ப³ம், ந ஹி ஸக்கா ஸீதஸமயே ஸப்³ப³ரத்திம் அஜ்ஜோ²காஸே வஸிதும். மஹாதே²ரேன பட²மயாமம் விஸ்ஸமித்வா நிக்க²மித்வா து³தியத்தே²ரஸ்ஸ வத்தப்³ப³ம் – ‘‘ஆவுஸோ, இத⁴ பவிஸாஹீ’’தி. ஸசே மஹாதே²ரோ நித்³தா³க³ருகோ ஹோதி, காலம் ந ஜானாதி, உக்காஸித்வா த்³வாரம் ஆகோடேத்வா ‘‘ப⁴ந்தே, காலோ ஜாதோ, ஸீதம் அனுத³ஹதீ’’தி வத்தப்³ப³ம். தேன நிக்க²மித்வா ஓகாஸோ தா³தப்³போ³, அதா³தும் ந லப⁴தி. து³தியத்தே²ரேனபி மஜ்ஜி²மயாமம் விஸ்ஸமித்வா புரிமனயேனேவ இதரஸ்ஸ தா³தப்³ப³ம். நித்³தா³க³ருகோ வுத்தனயேனேவ வுட்டா²பேதப்³போ³. ஏவம் ஏகரத்திம் ஏகமஞ்சட்டா²னம் திண்ணம் தா³தப்³ப³ம். ஜம்பு³தீ³பே பன ஏகச்சே பி⁴க்கூ² ‘‘ஸேனாஸனம் நாம மஞ்சட்டா²னம் வா பீட²ட்டா²னம் வா கிஞ்சிதே³வ கஸ்ஸசி ஸப்பாயம் ஹோதி, கஸ்ஸசி அஸப்பாய’’ந்தி ஆக³ந்துகா ஹோந்து வா மா வா, தே³வஸிகம் ஸேனாஸனம் கா³ஹேந்தி. அயம் உதுகாலே ஸேனாஸனக்³கா³ஹோ நாம.

வஸ்ஸாவாஸே பன அத்தி² ஆக³ந்துகவத்தம், அத்தி² ஆவாஸிகவத்தம், ஆக³ந்துகேன தாவ ஸகட்டா²னம் முஞ்சித்வா அஞ்ஞத்த² க³ந்த்வா வஸிதுகாமேன வஸ்ஸூபனாயிகதி³வஸமேவ தத்த² ந க³ந்தப்³ப³ம். வஸனட்டா²னம் வா ஹி தத்ர ஸம்பா³த⁴ம் ப⁴வேய்ய, பி⁴க்கா²சாரோ வா ந ஸம்பஜ்ஜேய்ய, தேன ந பா²ஸும் விஹரேய்ய. தஸ்மா ‘‘இதா³னி மாஸமத்தேன வஸ்ஸூபனாயிகா ப⁴விஸ்ஸதீ’’தி தம் விஹாரம் பவிஸிதப்³ப³ம். தத்த² மாஸமத்தம் வஸந்தோ ஸசே உத்³தே³ஸத்தி²கோ உத்³தே³ஸஸம்பத்திம் ஸல்லக்கே²த்வா, ஸசே கம்மட்டா²னிகோ கம்மட்டா²னஸப்பாயதம் ஸல்லக்கே²த்வா, ஸசே பச்சயத்தி²கோ பச்சயலாப⁴ம் ஸல்லக்கே²த்வா அந்தோவஸ்ஸே ஸுக²ம் வஸிஸ்ஸதி.

ஸகட்டா²னதோ ச தத்த² க³ச்ச²ந்தேன ந கோ³சரகா³மோ க⁴ட்டேதப்³போ³, ந தத்த² மனுஸ்ஸா வத்தப்³பா³ – ‘‘தும்ஹே நிஸ்ஸாய ஸலாகப⁴த்தாதீ³னி வா யாகு³க²ஜ்ஜகாதீ³னி வா வஸ்ஸாவாஸிகம் வா நத்தி², அயம் சேதியஸ்ஸ பரிக்கா²ரோ, அயம் உபோஸதா²கா³ரஸ்ஸ, இத³ம் தாளஞ்சேவ ஸூசி ச ஸம்படிச்ச²த² தும்ஹாகம் விஹார’’ந்தி. ஸேனாஸனம் பன ஜக்³கி³த்வா தா³ருப⁴ண்ட³மத்திகாப⁴ண்டா³னி படிஸாமேத்வா க³மியவத்தம் பூரேத்வா க³ந்தப்³ப³ம். ஏவம் க³ச்ச²ந்தேனாபி த³ஹரேஹி பத்தசீவரப⁴ண்டி³காயோ உக்கி²பாபேத்வா தேலனாளிகத்தரத³ண்டா³தீ³னி கா³ஹாபேத்வா ச²த்தம் பக்³க³ய்ஹ அத்தானம் த³ஸ்ஸேந்தேன கா³மத்³வாரேனேவ ந க³ந்தப்³ப³ம், படிச்ச²ன்னேன அடவிமக்³கே³ன க³ந்தப்³ப³ம். அடவிமக்³கே³ அஸதி கு³ம்பா³தீ³னி மத்³த³ந்தேன ந க³ந்தப்³ப³ம், க³மியவத்தம் பன பூரேத்வா விதக்கம் சி²ந்தி³த்வா ஸுத்³த⁴சித்தேன க³மனவத்தேனேவ க³ந்தப்³ப³ம். ஸசே பன கா³மத்³வாரேன மக்³கோ³ ஹோதி, க³ச்ச²ந்தஞ்ச நம் ஸபரிவாரம் தி³ஸ்வா மனுஸ்ஸா ‘‘அம்ஹாகம் தே²ரோ வியா’’தி உபதா⁴வித்வா ‘‘குஹிம், ப⁴ந்தே, ஸப்³ப³பரிக்கா²ரே க³ஹேத்வா க³ச்ச²தா²’’தி வத³ந்தி, தேஸு சே ஏகோ ஏவம் வத³தி – ‘‘வஸ்ஸூபனாயிககாலோ நாமாயம், யத்த² அந்தோவஸ்ஸே நிப³த்³த⁴பி⁴க்கா²சாரோ ப⁴ண்ட³படிச்சா²த³னஞ்ச லப்³ப⁴தி, தத்த² பி⁴க்கூ² க³ச்ச²ந்தீ’’தி. தஸ்ஸ சே ஸுத்வா தே மனுஸ்ஸா ‘‘ப⁴ந்தே, இமஸ்மிம்பி கா³மே ஜனோ பு⁴ஞ்ஜதி சேவ நிவாஸேதி ச, மா அஞ்ஞத்த² க³ச்ச²தா²’’தி வத்வா மித்தாமச்சே பக்கோஸாபேத்வா ஸப்³பே³ ஸம்மந்தயித்வா விஹாரே நிப³த்³த⁴வத்தஞ்ச ஸலாகப⁴த்தாதீ³னி ச வஸ்ஸாவாஸிகஞ்ச பட்ட²பேத்வா ‘‘இதே⁴வ ப⁴ந்தே வஸதா²’’தி யாசந்தி, ஸப்³ப³ம் ஸாதி³தும் வட்டதி. ஸப்³ப³ஞ்ஹேதம் கப்பியஞ்சேவ அனவஜ்ஜஞ்ச. குருந்தி³யம் பன ‘‘‘குஹிம் க³ச்ச²தா²’தி வுத்தே ‘அஸுகட்டா²ன’ந்தி வத்வா, ‘கஸ்மா தத்த² க³ச்ச²தா²’தி வுத்தே ‘காரணம் ஆசிக்கி²தப்³ப³’’’ந்தி வுத்தம். உப⁴யம்பி பனேத்த² ஸுத்³த⁴சித்தத்தாவ அனவஜ்ஜம். இத³ம் ஆக³ந்துகவத்தம் நாம.

இத³ம் பன ஆவாஸிகவத்தம் – படிகச்சேவ ஹி ஆவாஸிகேஹி விஹாரோ ஜக்³கி³தப்³போ³. க²ண்ட³பு²ல்லபடிஸங்க²ரணபரிப⁴ண்டா³னி காதப்³பா³னி. ரத்திட்டா²னதி³வாட்டா²னவச்சகுடிபஸ்ஸாவட்டா²னானி பதா⁴னக⁴ரவிஹாரமக்³கோ³தி இமானி ஸப்³பா³னி படிஜக்³கி³தப்³பா³னி, சேதியே ஸுதா⁴கம்மம் முத்³த³வேதி³காய தேலமக்க²னம் மஞ்சபீட²படிஜக்³க³னந்தி இத³ம்பி ஸப்³ப³ம் காதப்³ப³ம் – ‘‘வஸ்ஸம் வஸிதுகாமா ஆக³ந்த்வா உத்³தே³ஸபரிபுச்சா²கம்மட்டா²னானுயோகா³தீ³னி கரோந்தா ஸுக²ம் வஸிஸ்ஸந்தீ’’தி. கதபரிகம்மேஹி ஆஸாள்ஹீஜுண்ஹபஞ்சமிதோ பட்டா²ய வஸ்ஸாவாஸிகம் புச்சி²தப்³ப³ம். கத்த² புச்சி²தப்³ப³ம்? யதோ பகதியா லப்³ப⁴தி. யேஹி பன ந தி³ன்னபுப்³ப³ம், தே புச்சி²தும் ந வட்டதி. கஸ்மா புச்சி²தப்³ப³ம்? கதா³சி ஹி மனுஸ்ஸா தே³ந்தி, கதா³சி து³ப்³பி⁴க்கா²தீ³ஹி உபத்³து³தா ந தே³ந்தி. தத்த² யே ந த³ஸ்ஸந்தி, தே அபுச்சி²த்வா வஸ்ஸாவாஸிகே கா³ஹிதே கா³ஹிதபி⁴க்கூ²னம் லாப⁴ந்தராயோ ஹோதி, தஸ்மா புச்சி²த்வாவ கா³ஹேதப்³ப³ம், புச்ச²ந்தேன ‘‘தும்ஹாகம் வஸ்ஸாவாஸிகக்³கா³ஹககாலோ உபகட்டோ²’’தி வத்தப்³ப³ம். ஸசே வத³ந்தி ‘‘ப⁴ந்தே, இமம் ஸம்வச்ச²ரம் சா²தகாதீ³ஹி உபத்³து³தம்ஹ, ந ஸக்கோம தா³து’’ந்தி வா ‘‘யம் மயம் புப்³பே³ தே³ம, ததோ ஊனதரம் த³ஸ்ஸாமா’’தி வா ‘‘இதா³னி கப்பாஸோ ஸுலபோ⁴, யம் புப்³பே³ தே³ம, ததோ ப³ஹுதரம் த³ஸ்ஸாமா’’தி வா வத³ந்தி, தம் ஸல்லக்கே²த்வா தத³னுரூபேன நயேன தேஸம் தேஸம் ஸேனாஸனே பி⁴க்கூ²னம் வஸ்ஸாவாஸிகம் கா³ஹேதப்³ப³ம்.

ஸசே மனுஸ்ஸா வத³ந்தி – ‘‘யஸ்ஸ அம்ஹாகம் வஸ்ஸாவாஸிகம் பாபுணாதி, ஸோ தேமாஸம் பானீயம் உபட்டா²பேது, விஹாரமக்³க³ம் ஜக்³க³து, சேதியங்க³ணபோ³தி⁴யங்க³ணானி ஜக்³க³து, போ³தி⁴ருக்கே² உத³கம் ஆஸிஞ்சதூ’’தி, யஸ்ஸ தம் பாபுணாதி, தஸ்ஸ ஆசிக்கி²தப்³ப³ம். யோ பன கா³மோ படிக்கம்ம யோஜனத்³வியோஜனந்தரே ஹோதி, தத்ர சே குலானி உபனிக்கே²பம் ட²பேத்வா விஹாரே வஸ்ஸாவாஸிகம் தே³ந்தியேவ, தானி குலானி அபுச்சி²த்வாபி தேஸம் ஸேனாஸனே வத்தம் கத்வா வஸந்தஸ்ஸ வஸ்ஸாவாஸிகம் கா³ஹேதப்³ப³ம். ஸசே பன தேஸம் ஸேனாஸனே பம்ஸுகூலிகோ வஸதி, ஆக³தஞ்ச தம் தி³ஸ்வா ‘‘தும்ஹாகம் வஸ்ஸாவாஸிகம் தே³மா’’தி வத³ந்தி, தேன ஸங்க⁴ஸ்ஸ ஆசிக்கி²தப்³ப³ம். ஸசே தானி குலானி ஸங்க⁴ஸ்ஸ தா³தும் ந இச்ச²ந்தி, ‘‘தும்ஹாகம்யேவ தே³மா’’தி வத³ந்தி, ஸபா⁴கோ³ பி⁴க்கு² ‘‘வத்தம் கத்வா க³ண்ஹாஹீ’’தி வத்தப்³போ³. பம்ஸுகூலிகஸ்ஸ பனேதம் ந வட்டதி, இதி ஸத்³தா⁴தே³ய்யே தா³யகமனுஸ்ஸா புச்சி²தப்³பா³.

தத்ருப்பாதே³ பன கப்பியகாரகா புச்சி²தப்³பா³. கத²ம் புச்சி²தப்³பா³? ‘‘கிம், ஆவுஸோ, ஸங்க⁴ஸ்ஸ ப⁴ண்ட³படிச்சா²த³னம் ப⁴விஸ்ஸதீ’’தி. ஸசே வத³ந்தி – ‘‘ப⁴விஸ்ஸதி, ப⁴ந்தே, ஏகேகஸ்ஸ நவஹத்த²ம் ஸாடகம் த³ஸ்ஸாம, வஸ்ஸாவாஸிகம் கா³ஹேதா²’’தி, கா³ஹேதப்³ப³ம். ஸசேபி வத³ந்தி – ‘‘ஸாடகம் நத்தி²; வத்து² பன அத்தி², கா³ஹேத², ப⁴ந்தே’’தி, வத்து²ம்ஹி ஸந்தேபி கா³ஹேதும் வட்டதியேவ. கப்பியகாரகானஞ்ஹி ஹத்தே² ‘‘கப்பியப⁴ண்ட³ம் பரிபு⁴ஞ்ஜதா²’’தி தி³ன்னவத்து²தோ யம் யம் கப்பம், தம் தம் ஸப்³ப³ம் பரிபு⁴ஞ்ஜிதும் அனுஞ்ஞாதம்.

யம் பனேத்த² பிண்ட³பாதத்தா²ய கி³லானபச்சயத்தா²ய வா உத்³தி³ஸ்ஸ தி³ன்னம், தம் சீவரே உபனாமேந்தேஹி ஸங்க⁴ஸுட்டு²தாய அபலோகேத்வா உபனாமேதப்³ப³ம். ஸேனாஸனத்தா²ய உத்³தி³ஸ்ஸ தி³ன்னம் க³ருப⁴ண்ட³ம் ஹோதி, சீவரவஸேனேவ சதுபச்சயவஸேன வா தி³ன்னம் சீவரே உபனாமேந்தானம் அபலோகனகம்மகிச்சம் நத்தி², அபலோகனகம்மம் கரோந்தேஹி ச புக்³க³லவஸேனேவ காதப்³ப³ம், ஸங்க⁴வஸேன ந காதப்³ப³ம். ஜாதரூபரஜதவஸேனாபி ஆமகத⁴ஞ்ஞவஸேன வா அபலோகனகம்மம் ந வட்டதி. கப்பியப⁴ண்ட³வஸேன சீவரதண்டு³லாதி³வஸேனேவ ச வட்டதி. தம் பன ஏவம் கத்தப்³ப³ம் – ‘‘இதா³னி ஸுபி⁴க்க²ம் ஸுலப⁴பிண்ட³ம், பி⁴க்கூ² சீவரேன கிலமந்தி, ஏத்தகம் நாம தண்டு³லபா⁴க³ம் பி⁴க்கூ²னம் சீவரம் காதும் ருச்சதீ’’தி. ‘‘கி³லானபச்சயோ ஸுலபோ⁴ கி³லானோ வா நத்தி², ஏத்தகம் நாம தண்டு³லபா⁴க³ம் பி⁴க்கூ²னம் சீவரம் காதும் ருச்சதீ’’தி.

ஏவம் சீவரபச்சயம் ஸல்லக்கே²த்வா ஸேனாஸனஸ்ஸ காலே கோ⁴ஸிதே ஸன்னிபதிதே ஸங்கே⁴ ஸேனாஸனக்³கா³ஹகோ ஸம்மன்னிதப்³போ³. ஸம்மன்னந்தேன ச த்³வே ஸம்மன்னிதப்³பா³தி வுத்தம். ஏவஞ்ஹி நவகோ வுட்³ட⁴தரஸ்ஸ, வுட்³டோ⁴ ச நவகஸ்ஸ கா³ஹேஸ்ஸதி. மஹந்தே பன மஹாவிஹாரஸதி³ஸே விஹாரே தயோ சத்தாரோ ஜனா ஸம்மன்னிதப்³பா³. குருந்தி³யம் பன ‘‘அட்ட²பி ஸோளஸபி ஜனே ஸம்மன்னிதும் வட்டதீ’’தி வுத்தம். தேஸம் ஸம்முதி கம்மவாசாயபி அபலோகனேனபி வட்டதியேவ.

தேஹி ஸம்மதேஹி பி⁴க்கூ²ஹி ஸேனாஸனம் ஸல்லக்கே²தப்³ப³ம், சேதியக⁴ரம் போ³தி⁴க⁴ரம் ஆஸனக⁴ரம் ஸம்முஞ்ஜனிஅட்டோ தா³ருஅட்டோ வச்சகுடி இட்ட²கஸாலா வட்³ட⁴கிஸாலா த்³வாரகோட்ட²கோ பானீயமாளோ மக்³கோ³ போக்க²ரணீதி ஏதானி ஹி அஸேனாஸனானி, விஹாரோ அட்³ட⁴யோகோ³ பாஸாதோ³ ஹம்மியம் கு³ஹா மண்ட³போ ருக்க²மூலம் வேளுகு³ம்போ³தி இமானி ஸேனாஸனானி, தானி கா³ஹேதப்³பா³னி. கா³ஹேந்தேன ச ‘‘பட²மம் பி⁴க்கூ² க³ணேதும், பி⁴க்கூ² க³ணேத்வா ஸேய்யா க³ணேது’’ந்தி ஏத்த² வுத்தனயேன கா³ஹேதப்³பா³னி. ஸசே ஸங்கி⁴கோ ச ஸத்³தா⁴தே³ய்யோ சாதி த்³வே சீவரபச்சயா ஹோந்தி, தேஸு யம் பி⁴க்கூ² பட²மம் க³ண்ஹிதும் இச்ச²ந்தி, தம் கா³ஹேத்வா தஸ்ஸ டி²திகதோ பட்டா²ய இதரோ கா³ஹேதப்³போ³.

ஸசே பன பி⁴க்கூ²னம் அப்பதாய பரிவேணக்³கே³ன ஸேனாஸனே கா³ஹியமானே ஏகம் பரிவேணம் மஹாலாப⁴ம் ஹோதி, த³ஸ வா த்³வாத³ஸ வா சீவரானி லப⁴ந்தி, தம் விஜடேத்வா அஞ்ஞேஸு அலாப⁴கேஸு ஆவாஸேஸு பக்கி²பித்வா அஞ்ஞேஸம்பி பி⁴க்கூ²னம் கா³ஹேதப்³ப³ந்தி மஹாஸுமத்தே²ரோ ஆஹ. மஹாபது³மத்தே²ரோ பனாஹ – ‘‘ந ஏவம் காதப்³ப³ம், மனுஸ்ஸா ஹி அத்தனோ ஆவாஸஜக்³க³னத்தா²ய பச்சயம் தே³ந்தி, தஸ்மா அஞ்ஞேஹி பி⁴க்கூ²ஹி தத்த² பவிஸிதப்³ப³’’ந்தி. ஸசே பனேத்த² மஹாதே²ரோ படிக்கோஸதி – ‘‘மாவுஸோ, ஏவம் கா³ஹேத², ப⁴க³வதோ அனுஸிட்டி²ம் கரோத², வுத்தஞ்ஹேதம் ப⁴க³வதா – ‘அனுஜானாமி, பி⁴க்க²வே, பரிவேணக்³கே³ன கா³ஹேது’’’ந்தி தஸ்ஸ படிக்கோஸனாய அட்ட²த்வா ‘‘ப⁴ந்தே பி⁴க்கூ² ப³ஹூ, பச்சயோ மந்தோ³, ஸங்க³ஹம் காதும் வட்டதீ’’தி தம் ஸஞ்ஞாபேத்வா கா³ஹேதப்³ப³மேவ.

கா³ஹேந்தேன ச ஸம்மதேன பி⁴க்கு²னா மஹாதே²ரஸ்ஸ ஸந்திகம் க³ந்த்வா ஏவம் வத்தப்³ப³ம் – ‘‘ப⁴ந்தே, தும்ஹாகம் ஸேனாஸனம் பாபுணாதி, க³ண்ஹத² பச்சயம் தா⁴ரேதா²’’தி. ‘‘அஸுககுலஸ்ஸ பச்சயோ அஸுகஸேனாஸனஞ்ச மய்ஹம் பாபுணாதி, ஆவுஸோ’’தி, ‘‘பாபுணாதி, ப⁴ந்தே, க³ண்ஹத² ந’’ந்தி, ‘‘க³ண்ஹாமி, ஆவுஸோ’’தி, க³ஹிதம் ஹோதி. ஸசே பன ‘‘க³ஹிதம் வோ, ப⁴ந்தே’’தி வுத்தே ‘‘க³ஹிதம் மே’’தி வா ‘‘க³ண்ஹிஸ்ஸத², ப⁴ந்தே’’தி வுத்தே ‘‘க³ண்ஹிஸ்ஸாமீ’’தி வா வத³தி, ‘‘அக³ஹிதம் ஹோதீ’’தி மஹாஸுமத்தே²ரோ ஆஹ. மஹாபது³மத்தே²ரோ பனாஹ – ‘‘அதீதானாக³தவசனம் வா ஹோது, வத்தமானவசனம் வா, ஸதுப்பாத³மத்தஆலயகரணமத்தமேவ சேத்த² பமாணம், தஸ்மா க³ஹிதமேவ ஹோதீ’’தி.

யோபி பம்ஸுகூலிகோ பி⁴க்கு² ஸேனாஸனம் க³ஹேத்வா பச்சயம் விஸ்ஸஜ்ஜேதி, அயம்பி ந அஞ்ஞஸ்மிம் ஆவாஸே பக்கி²பிதப்³போ³. தஸ்மிம்யேவ பரிவேணே அக்³கி³ஸாலாய வா தீ³க⁴ஸாலாய வா ருக்க²மூலே வா அஞ்ஞஸ்ஸ கா³ஹேதும் வட்டதி. பம்ஸுகூலிகோ ‘‘வஸாமீ’’தி ஸேனாஸனம் ஜக்³கி³ஸ்ஸதி, இதரோ ‘‘பச்சயம் க³ண்ஹாமீ’’தி, ஏவம் த்³வீஹி காரணேஹி ஸேனாஸனம் ஸுஜக்³கி³ததரம் ப⁴விஸ்ஸதி. மஹாபச்சரியம் பன வுத்தம் – ‘‘பம்ஸுகூலிகே வாஸத்தா²ய ஸேனாஸனம் க³ண்ஹந்தே ஸேனாஸனக்³கா³ஹாபகேன வத்தப்³ப³ம் – ‘ப⁴ந்தே, இத⁴ பச்சயோ அத்தி², ஸோ கிம் காதப்³போ³’தி. தேன ‘ஹேட்டா² அஞ்ஞம் கா³ஹாபேஹீ’தி வத்தப்³போ³. ஸசே பன கிஞ்சி அவத்வாவ வஸதி, வுத்த²வஸ்ஸஸ்ஸ ச பாத³மூலே ட²பேத்வா ஸாடகம் தே³ந்தி, வட்டதி. அத² வஸ்ஸாவாஸிகம் தே³மாதி வத³ந்தி, தஸ்மிம் ஸேனாஸனே வஸ்ஸம்வுத்த²பி⁴க்கூ²னம் பாபுணாதீ’’தி. யேஸம் பன ஸேனாஸனம் நத்தி²; கேவலம் பச்சயமேவ தே³ந்தி, தேஸம் பச்சயம் அவஸ்ஸாவாஸிகே ஸேனாஸனே கா³ஹேதும் வட்டதி.

மனுஸ்ஸா தூ²பம் கத்வா வஸ்ஸாவாஸிகம் கா³ஹாபேந்தி, தூ²போ நாம அஸேனாஸனம், தஸ்ஸ ஸமீபே ருக்கே² வா மண்ட³பே வா உபனிப³ந்தி⁴த்வா கா³ஹாபேதப்³ப³ம். தேன பி⁴க்கு²னா சேதியம் படிஜக்³கி³தப்³ப³ம். போ³தி⁴ருக்க²போ³தி⁴க⁴ரஆஸனக⁴ரஸம்முஞ்ஜனிஅட்டதா³ருஅட்டவச்சகுடித்³வாரகோட்ட²கபானீயமாளகத³ந்தகட்ட²மாளகேஸுபி ஏஸேவ நயோ. போ⁴ஜனஸாலா பன ஸேனாஸனமேவ, தஸ்மா தம் ஏகஸ்ஸ வா ப³ஹூனம் வா பரிச்சி²ந்தி³த்வா கா³ஹேதும் வட்டதீதி ஸப்³ப³மித³ம் வித்தா²ரேன மஹாபச்சரியம் வுத்தம்.

ஸேனாஸனக்³கா³ஹாபகேன பன பாடிபத³அருணதோ பட்டா²ய யாவ புன அருணம் ந பி⁴ஜ்ஜதி தாவ கா³ஹேதப்³ப³ம், இத³ஞ்ஹி ஸேனாஸனக்³கா³ஹஸ்ஸ கே²த்தம். ஸசே பாதோவ கா³ஹிதே ஸேனாஸனே அஞ்ஞோ விதக்கசாரிகோ பி⁴க்கு² ஆக³ந்த்வா ஸேனாஸனம் யாசதி, ‘‘க³ஹிதம், ப⁴ந்தே, ஸேனாஸனம், வஸ்ஸூபக³தோ ஸங்கோ⁴, ரமணீயோ விஹாரோ, ருக்க²மூலாதீ³ஸு யத்த² இச்ச²த² தத்த² வஸதா²’’தி வத்தப்³போ³. வஸ்ஸூபக³தேஹி அந்தோவஸ்ஸே நிப³த்³த⁴வத்தம் ட²பேத்வா வஸ்ஸூபக³தா பி⁴க்கூ² ‘‘ஸம்முஞ்ஜனியோ ப³ந்த⁴தா²’’தி வத்தப்³பா³. ஸுலபா⁴ சே த³ண்ட³கா சேவ ஸலாகாயோ ச ஹோந்தி, ஏகேகேன ச² பஞ்ச முட்டி²ஸம்முஞ்ஜனியோ, த்³வே திஸ்ஸோ யட்டி²ஸம்முஞ்ஜனியோ வா ப³ந்தி⁴தப்³பா³. து³ல்லபா⁴ சே ஹோந்தி, த்³வே திஸ்ஸோ முட்டி²ஸம்முஞ்ஜனியோ ஏகா யட்டி²ஸம்முஞ்ஜனீ ப³ந்தி⁴தப்³பா³. ஸாமணேரேஹி பஞ்ச பஞ்ச உக்கா கோட்டேதப்³பா³. வஸனட்டா²னே கஸாவபரிப⁴ண்ட³ம் காதப்³ப³ம்.

வத்தம் கரோந்தேஹி பன ‘‘ந உத்³தி³ஸிதப்³ப³ம், ந உத்³தி³ஸாபேதப்³ப³ம், ந ஸஜ்ஜா²யோ காதப்³போ³, ந பப்³பா³ஜேதப்³ப³ம், ந உபஸம்பாதே³தப்³ப³ம், ந நிஸ்ஸயோ தா³தப்³போ³, ந த⁴ம்மஸவனம் காதப்³ப³ம், ஸப்³பே³வ ஹி ஏதே பபஞ்சா. நிப்பபஞ்சா ஹுத்வா ஸமணத⁴ம்மமேவ கரிஸ்ஸாமா’’தி வா ‘‘ஸப்³பே³ தேரஸ து⁴தங்கா³னி ஸமாதி³யந்து, ஸேய்யம் அகப்பேத்வா டா²னசங்கமேஹி வீதினாமேந்து, மூக³ப்³ப³தம் க³ண்ஹந்து, ஸத்தாஹகரணீயேன க³தாபி பா⁴ஜனீயப⁴ண்ட³ம் லப⁴ந்தூ’’தி வா ஏவரூபம் அத⁴ம்மிகவத்தம் ந காதப்³ப³ம். ஏவம் பன காதப்³ப³ம் – பரியத்தித⁴ம்மோ நாம திவித⁴ம்பி ஸத்³த⁴ம்மம் பதிட்டா²பேதி; தஸ்மா ஸக்கச்சம் உத்³தி³ஸத², உத்³தி³ஸாபேத², ஸஜ்ஜா²யம் கரோத², பதா⁴னக⁴ரே வஸந்தானம் ஸங்க⁴ட்டனம் அகத்வா அந்தோவிஹாரே நிஸீதி³த்வா உத்³தி³ஸத², உத்³தி³ஸாபேத², ஸஜ்ஜா²யம் கரோத², த⁴ம்மஸவனம் ஸமித்³த⁴ம் கரோத², பப்³பா³ஜேந்தா ஸோதே⁴த்வா பப்³பா³ஜேத², ஸோதே⁴த்வா உபஸம்பாதே³த², ஸோதே⁴த்வா நிஸ்ஸயம் தே³த², ஏகோபி ஹி குலபுத்தோ பப்³ப³ஜ்ஜம் உபஸம்பத³ஞ்ச லபி⁴த்வா ஸகலஸாஸனம் பதிட்டா²பேதி, அத்தனோ தா²மேன யத்தகானி ஸக்கோத² தத்தகானி து⁴தங்கா³னி ஸமாதி³யத². அந்தோவஸ்ஸம் நாமேதம் ஸகலதி³வஸம் ரத்தியா ச பட²மபச்சி²மயாமேஸு அப்பமத்தேஹி ப⁴விதப்³ப³ம், வீரியம் ஆரபி⁴தப்³ப³ம். போராணகமஹாதே²ராபி ஸப்³ப³பலிபோ³தே⁴ சி²ந்தி³த்வா அந்தோவஸ்ஸே ஏகசாரிகவத்தம் பூரயிம்ஸு, ப⁴ஸ்ஸே மத்தம் ஜானித்வா த³ஸவத்து²ககத²ம் த³ஸஅஸுப⁴த³ஸானுஸ்ஸதிஅட்ட²திம்ஸாரம்மணகத²ஞ்ச காதும் வட்டதி, ஆக³ந்துகானம் வத்தம் காதும் ஸத்தாஹகரணீயேன க³தானம் அபலோகேத்வா தா³தும் வட்டதீதி ஏவரூபம் வத்தம் காதப்³ப³ம்.

அபிச பி⁴க்கூ² ஓவதி³தப்³பா³ – ‘‘விக்³கா³ஹிகபிஸுணப²ருஸவசனானி மா வத³த², தி³வஸே தி³வஸே ஸீலானி ஆவஜ்ஜேந்தா சதுராரக்க²ம் அஹாபேந்தா மனஸிகாரப³ஹுலா விஹரதா²’’தி. த³ந்தகட்ட²கா²த³னவத்தம் ஆசிக்கி²தப்³ப³ம், சேதியம் வா போ³தி⁴ம் வா வந்த³ந்தேன க³ந்த⁴மாலம் வா பூஜேந்தேன பத்தம் வா த²விகாய பக்கி²பந்தேன ந கதே²தப்³ப³ம், பி⁴க்கா²சாரவத்தம் ஆசிக்கி²தப்³ப³ம் – ‘‘அந்தோகா³மே மனுஸ்ஸேஹி ஸத்³தி⁴ம் பச்சயஸஞ்ஞுத்தகதா² வா விஸபா⁴க³கதா² வா ந கதே²தப்³பா³, ரக்கி²திந்த்³ரியேஹி ப⁴விதப்³ப³ம், க²ந்த⁴கவத்தஞ்ச ஸேகி²யவத்தஞ்ச பூரேதப்³ப³’’ந்தி ஏவரூபா ப³ஹுகாபி நிய்யானிககதா² ஆசிக்கி²தப்³பா³தி.

பச்சி²மவஸ்ஸூபனாயிகதி³வஸே பன ஸசே காலம் கோ⁴ஸேத்வா ஸன்னிபதிதே ஸங்கே⁴ கோசி த³ஸஹத்த²ம் வத்த²ம் ஆஹரித்வா வஸ்ஸாவாஸிகம் தே³தி, ஆக³ந்துகோ ஸசே பி⁴க்கு² ஸங்க⁴த்தே²ரோ ஹோதி, தஸ்ஸ தா³தப்³ப³ம். நவகோ சே ஹோதி, ஸம்மதேன பி⁴க்கு²னா ஸங்க⁴த்தே²ரோ வத்தப்³போ³ – ‘‘ஸசே ப⁴ந்தே இச்ச²த², பட²மபா⁴க³ம் முஞ்சித்வா இத³ம் வத்த²ம் க³ண்ஹதா²’’தி, அமுஞ்சந்தஸ்ஸ ந தா³தப்³ப³ம். ஸசே பன புப்³பே³ கா³ஹிதம் முஞ்சித்வா க³ண்ஹாதி, தா³தப்³ப³ம். ஏதேனேவுபாயேன து³தியத்தே²ரதோ பட்டா²ய பரிவத்தேத்வா பத்தட்டா²னே ஆக³ந்துகஸ்ஸ தா³தப்³ப³ம். ஸசே பட²மவஸ்ஸூபக³தா த்³வே தீணி சத்தாரி பஞ்ச வா வத்தா²னி அலத்து²ம், லத்³த⁴ம் லத்³த⁴ம் ஏதேனேவுபாயேன விஸ்ஸஜ்ஜாபேத்வா யாவ ஆக³ந்துகஸ்ஸ ஸமகம் ஹோதி, தாவ தா³தப்³ப³ம். தேன பன ஸமகே லத்³தே⁴ அவஸிட்டோ² அனுபா⁴கோ³ தே²ராஸனே தா³தப்³போ³. பச்சுப்பன்னே லாபே⁴ ஸதி டி²திகாய கா³ஹேதும் கதிகம் காதும் வட்டதி.

ஸசே து³ப்³பி⁴க்க²ம் ஹோதி, த்³வீஸுபி வஸ்ஸூபனாயிகாஸு வஸ்ஸூபக³தா பி⁴க்கூ² பி⁴க்கா²ய கிலமந்தா ‘‘ஆவுஸோ, இத⁴ வஸந்தா ஸப்³பே³வ கிலமாம, ஸாது⁴ வத த்³வேபா⁴கா³ ஹோம, யேஸம் ஞாதிபவாரிதட்டா²னானி அத்தி², தே தத்த² வஸித்வா பவாரணாய ஆக³ந்த்வா அத்தனோ பத்தம் வஸ்ஸாவாஸிகம் க³ண்ஹந்தூ’’தி வத³ந்தி, தேஸு யே தத்த² வஸித்வா பவாரணாய ஆக³ச்ச²ந்தி, தேஸம் அபலோகேத்வா வஸ்ஸாவாஸிகம் தா³தப்³ப³ம். ஸாதி³யந்தாபி ஹி தே நேவ வஸ்ஸாவாஸிகஸ்ஸ ஸாமினோ, கீ²யந்தாபி ச ஆவாஸிகா நேவ அதா³தும் லப⁴ந்தி. குருந்தி³யம் பன வுத்தம் – ‘‘கதிகவத்தம் காதப்³ப³ம் – ‘ஸப்³பே³ஸம் நோ இத⁴ யாகு³ப⁴த்தம் நப்பஹோதி, ஸபா⁴க³ட்டா²னே வஸித்வா ஆக³ச்ச²த², தும்ஹாகம் பத்தம் வஸ்ஸாவாஸிகம் லபி⁴ஸ்ஸதா²’தி. தஞ்சே ஏகோ படிபா³ஹதி, ஸுபடிபா³ஹிதம்; நோ சே படிபா³ஹதி, கதிகா ஸுகதா. பச்சா² தேஸம் தத்த² வஸித்வா ஆக³தானம் அபலோகேத்வா தா³தப்³ப³ம், அபலோகனகாலே படிபா³ஹிதும் ந லப்³ப⁴தீ’’தி. புனபி வுத்தம் – ‘‘ஸசே வஸ்ஸூபக³தேஸு ஏகச்சானம் வஸ்ஸாவாஸிகே அபாபுணந்தே பி⁴க்கூ² கதிகம் கரோந்தி – ‘சி²ன்னவஸ்ஸானம் வஸ்ஸாவாஸிகஞ்ச இதா³னி உப்பஜ்ஜனகவஸ்ஸாவாஸிகஞ்ச இமேஸம் தா³தும் ருச்சதீ’தி ஏவம் கதிகாய கதாய கா³ஹிதஸதி³ஸமேவ ஹோதி, உப்பன்னுப்பன்னம் தேஸமேவ தா³தப்³ப³’’ந்தி.

தேமாஸம் பானீயம் உபட்டா²பேத்வா விஹாரமக்³க³சேதியங்க³ணபோ³தி⁴யங்க³ணானி ஜக்³கி³த்வா போ³தி⁴ருக்கே² உத³கம் ஸிஞ்சித்வா பக்கந்தோபி விப்³ப⁴ந்தோபி வஸ்ஸாவாஸிகம் லப⁴தியேவ. ப⁴தினிவிட்ட²ஞ்ஹி தேன கதம். ஸங்கி⁴கம் பன அபலோகனகம்மம் கத்வா கா³ஹிதம் அந்தோவஸ்ஸே விப்³ப⁴ந்தோபி லப⁴தேவ. பச்சயவஸேன கா³ஹிதம் பன ந லப⁴தீதி வத³ந்தி.

ஸசே வுத்த²வஸ்ஸோ தி³ஸம்க³மிகோ பி⁴க்கு² ஆவாஸிகஸ்ஸ ஹத்த²தோ கிஞ்சிதே³வ கப்பியப⁴ண்ட³ம் க³ஹேத்வா ‘‘அஸுககுலே மய்ஹம் வஸ்ஸாவாஸிகம் பத்தம், தம் க³ண்ஹதா²’’தி வத்வா க³தட்டா²னே விப்³ப⁴மதி, வஸ்ஸாவாஸிகம் ஸங்கி⁴கம் ஹோதி. ஸசே பன மனுஸ்ஸே ஸம்முகா² ஸம்படிச்சா²பேத்வா க³ச்ச²தி, லப⁴தி. ‘‘இத³ம் வஸ்ஸாவாஸிகம் அம்ஹாகம் ஸேனாஸனே வுத்த²பி⁴க்கு²னோ தே³மா’’தி வுத்தே, யஸ்ஸ கா³ஹிதம் தஸ்ஸேவ ஹோதி. ஸசே பன ஸேனாஸனஸாமிகஸ்ஸ பியகம்யதாய புத்ததீ⁴தாத³யோ ப³ஹூனி வத்தா²னி ஆஹரித்வா ‘‘அம்ஹாகம் ஸேனாஸனே தே³மா’’தி தே³ந்தி, தத்த² வஸ்ஸூபக³தஸ்ஸ ஏகமேவ வத்த²ம் தா³தப்³ப³ம், ஸேஸானி ஸங்கி⁴கானி ஹோந்தி, வஸ்ஸாவாஸிகட்டி²திகாய கா³ஹேதப்³பா³னி. டி²திகாய அஸதி தே²ராஸனதோ பட்டா²ய கா³ஹேதப்³பா³னி. ஸேனாஸனே வஸ்ஸூபக³தம் பி⁴க்கு²ம் நிஸ்ஸாய உப்பன்னேன சித்தப்பஸாதே³ன ப³ஹூனி வத்தா²னி ஆஹரித்வா ‘‘ஸேனாஸனஸ்ஸ தே³மா’’தி தி³ன்னேஸுபி ஏஸேவ நயோ. ஸசே பன பாத³மூலே ட²பேத்வா ‘‘ஏதஸ்ஸ பி⁴க்கு²னோ தே³மா’’தி வத³ந்தி, தஸ்ஸேவ ஹோந்தி.

ஏகஸ்ஸ கே³ஹே த்³வே வஸ்ஸாவாஸிகானி – பட²மபா⁴கோ³ ஸாமணேரஸ்ஸ கா³ஹிதோ ஹோதி, து³தியோ தே²ராஸனே. ஸோ ஏகம் த³ஸஹத்த²ம், ஏகம் அட்ட²ஹத்த²ம் ஸாடகம் பேஸேதி ‘‘வஸ்ஸாவாஸிகம் பத்தபி⁴க்கூ²னம் தே³தா²’’தி விசினித்வா வரபா⁴க³ம் ஸாமணேரஸ்ஸ த³த்வா அனுபா⁴கோ³ தே²ராஸனே தா³தப்³போ³. ஸசே பன உபோ⁴பி க⁴ரம் நேத்வா போ⁴ஜேத்வா ஸயமேவ பாத³மூலே ட²பேதி, யம் யஸ்ஸ தி³ன்னம், ததே³வ தஸ்ஸ ஹோதி.

இதோ பரம் மஹாபச்சரியம் ஆக³தனயோ ஹோதி – ‘‘ஏகஸ்ஸ க⁴ரே த³ஹரஸாமணேரஸ்ஸ வஸ்ஸாவாஸிகம் பாபுணாதி, ஸோ சே புச்ச²தி – ‘அம்ஹாகம் வஸ்ஸாவாஸிகம் கஸ்ஸ பத்த’ந்தி, ‘ஸாமணேரஸ்ஸா’தி அவத்வா ‘தா³னகாலே ஜானிஸ்ஸஸீ’தி வத்வா தா³னதி³வஸே ஏகம் மஹாதே²ரம் பேஸேத்வா நீஹராபேதப்³ப³ம். ஸசே யஸ்ஸ வஸ்ஸாவாஸிகம் பத்தம், ஸோ விப்³ப⁴மதி வா காலம் வா கரோதி, மனுஸ்ஸா சே புச்ச²ந்தி – ‘கஸ்ஸ அம்ஹாகம் வஸ்ஸாவாஸிகம் பத்த’ந்தி, தேஸம் யதா²பூ⁴தம் ஆசிக்கி²தப்³ப³ம். ஸசே தே வத³ந்தி – ‘தும்ஹாகம் தே³மா’தி, தஸ்ஸ பி⁴க்கு²னோ பாபுணாதி. அத² ஸங்க⁴ஸ்ஸ வா க³ணஸ்ஸ வா தே³ந்தி, ஸங்க⁴ஸ்ஸ வா க³ணஸ்ஸ வா பாபுணாதி. ஸசே வஸ்ஸூபக³தா ஸுத்³த⁴பம்ஸுகூலிகாயேவ ஹோந்தி, ஆனேத்வா தி³ன்னம் வஸ்ஸாவாஸிகம் ஸேனாஸனபரிக்கா²ரம் வா கத்வா ட²பேதப்³ப³ம், பி³ம்போ³ஹனாதீ³னி வா காதப்³பா³னீ’’தி. இத³ம் நேவாஸிகவத்தம்.

ஸேனாஸனக்³கா³ஹகதா² நிட்டி²தா.

உபனந்த³வத்து²கதா²

319. உபனந்த³வத்து²ஸ்மிம் – தத்த² தயா மோக⁴புரிஸ க³ஹிதம் இத⁴ முத்தம், இத⁴ தயா க³ஹிதம் தத்ர முத்தந்தி ஏத்த² அயமத்தோ² – யம் தயா தத்த² ஸேனாஸனம் க³ஹிதம், தம் தே க³ண்ஹந்தேனேவ இத⁴ முத்தம் ஹோதி. ‘‘இத⁴ தா³னாஹம், ஆவுஸோ, முஞ்சாமீ’’தி வத³ந்தேன பன தம் தத்ராபி முத்தம். ஏவம் த்வம் உப⁴யத்த² பரிபா³ஹிரோதி.

அயம் பனேத்த² வினிச்ச²யோ – க³ஹணேன க³ஹணம் படிப்பஸ்ஸம்ப⁴தி, க³ஹணேன ஆலயோ படிப்பஸ்ஸம்ப⁴தி, ஆலயேன க³ஹணம் படிப்பஸ்ஸம்ப⁴தி, ஆலயேன ஆலயோ படிப்பஸ்ஸம்ப⁴தி. கத²ம்? இதே⁴கச்சோ வஸ்ஸூபனாயிகதி³வஸே ஏகஸ்மிம் விஹாரே ஸேனாஸனம் க³ஹேத்வா ஸாமந்தவிஹாரம் க³ந்த்வா தத்ராபி க³ண்ஹாதி, தஸ்ஸ இமினா க³ஹணேன புரிமம் க³ஹணம் படிப்பஸ்ஸம்ப⁴தி. அபரோ ‘‘இத⁴ வஸிஸ்ஸாமீ’’தி ஆலயமத்தம் கத்வா ஸாமந்தவிஹாரம் க³ந்த்வா தத்த² ஸேனாஸனம் க³ண்ஹாதி, தஸ்ஸ இமினா க³ஹணேன புரிமோ ஆலயோ படிப்பஸ்ஸம்ப⁴தி. ஏகோ ‘‘இத⁴ வஸிஸ்ஸாமீ’’தி ஸேனாஸனம் வா க³ஹேத்வா ஆலயம் வா கத்வா ஸாமந்தவிஹாரம் க³ந்த்வா ‘‘இதே⁴வ தா³னி வஸிஸ்ஸாமீ’’தி ஆலயம் கரோதி, இச்சஸ்ஸ ஆலயேன வா க³ஹணம் ஆலயேன வா ஆலயோ படிப்பஸ்ஸம்ப⁴தி, ஸப்³ப³த்த² பச்சி²மே க³ஹணே வா ஆலயே வா திட்ட²தி. யோ பன ‘‘ஏகஸ்மிம் விஹாரே ஸேனாஸனம் க³ஹேத்வா அஞ்ஞஸ்மிம் விஹாரே வஸிஸ்ஸாமீ’’தி க³ச்ச²தி, தஸ்ஸ உபசாரஸீமாதிக்கமே ஸேனாஸனக்³கா³ஹோ படிப்பஸ்ஸம்ப⁴தி. யதி³ பன ‘‘தத்த² பா²ஸு ப⁴விஸ்ஸதி, வஸிஸ்ஸாமி; நோ சே, ஆக³மிஸ்ஸாமீ’’தி க³ந்த்வா அபா²ஸுபா⁴வம் ஞத்வா பச்சாக³ச்ச²தி, வட்டதி.

320. திவஸ்ஸந்தரேனாதி ஏத்த² திவஸ்ஸந்தரோ நாம யோ த்³வீஹி வஸ்ஸேஹி மஹந்ததரோ வா த³ஹரதரோ வா ஹோதி. யோ பன ஏகேன வஸ்ஸேன மஹந்ததரோ வா த³ஹரதரோ வா ஹோதி, யோ வா ஸமானவஸ்ஸோ, தத்த² வத்தப்³ப³மேவ நத்தி². இமே ஸப்³பே³ ஏகஸ்மிம் மஞ்சே வா பீடே² வா த்³வே த்³வே ஹுத்வா நிஸீதி³தும் லப⁴ந்தி. யம் திண்ணம் பஹோதி, தம் ஸம்ஹாரிமம் வா ஹோது அஸம்ஹாரிமம் வா, ததா²ரூபே அபி ப²லகக²ண்டே³ அனுபஸம்பன்னேனாபி ஸத்³தி⁴ம் நிஸீதி³தும் வட்டதி.

ஹத்தி²னக²கந்தி ஹத்தி²கும்பே⁴ பதிட்டி²தம்; ஏவம் கதஸ்ஸ கிரேதம் நாமம். ஸப்³ப³ம் பாஸாத³பரிபோ⁴க³ந்தி ஸுவண்ணரஜதாதி³விசித்ரானி கவாடானி மஞ்சபீடா²னி தாலவண்டானி ஸுவண்ணரஜதமயபானீயக⁴டபானீயஸராவானி யம்கிஞ்சி சித்தகம்மகதம், ஸப்³ப³ம் வட்டதி. ‘‘பாஸாத³ஸ்ஸ தா³ஸிதா³ஸம் கே²த்தவத்து²ம் கோ³மஹிம்ஸம் தே³மா’’தி வத³ந்தி, பாடேக்கம் க³ஹணகிச்சம் நத்தி², பாஸாதே³ படிக்³க³ஹிதே படிக்³க³ஹிதமேவ ஹோதி. கோ³னகாதீ³னி ஸங்கி⁴கவிஹாரே வா புக்³க³லிகவிஹாரே வா மஞ்சபீட²கேஸு அத்த²ரித்வா பரிபு⁴ஞ்ஜிதும் ந வட்டந்தி. த⁴ம்மாஸனே பன கி³ஹிவிகடனிஹாரேன லப்³ப⁴ந்தி, தத்ராபி நிபஜ்ஜிதும் ந வட்டதி.

உபனந்த³வத்து²கதா² நிட்டி²தா.

அவிஸ்ஸஜ்ஜியவத்து²கதா²

321. பஞ்சிமானீதி ராஸிவஸேன பஞ்ச, ஸரூபவஸேன பனேதானி ப³ஹூனி ஹோந்தி. தத்த² ஆராமோ நாம புப்பா²ராமோ வா ப²லாராமோ வா. ஆராமவத்து² நாம தேஸம்யேவ ஆராமானம் அத்தா²ய பரிச்சி²ந்தி³த்வா ட²பிதோகாஸோ; தேஸு வா ஆராமேஸு வினட்டே²ஸு தேஸம் போராணகபூ⁴மிபா⁴கோ³. விஹாரோ நாம யம்கிஞ்சி பாஸாதா³தி³ஸேனாஸனம். விஹாரவத்து² நாம தஸ்ஸ பதிட்டா²னோகாஸோ. மஞ்சோ நாம – மஸாரகோ, பு³ந்தி³காப³த்³தோ⁴, குளீரபாத³கோ ஆஹச்சபாத³கோதி இமேஸம் புப்³பே³ வுத்தானம் சதுன்னம் மஞ்சானம் அஞ்ஞதரோ. பீட²ம் நாம மஸாரகாதீ³னம்யேவ சதுன்னம் பீடா²னம் அஞ்ஞதரம். பி⁴ஸி நாம உண்ணபி⁴ஸிஆதீ³னம் பஞ்சன்னம் அஞ்ஞதரா. பி³ம்போ³ஹனம் நாம வுத்தப்பகாரானம் பி³ம்போ³ஹனானம் அஞ்ஞதரம். லோஹகும்பீ⁴ நாம காளலோஹேன வா தம்ப³லோஹேன வா யேன கேனசி லோஹேன கதா கும்பீ⁴. லோஹபா⁴ணகாதீ³ஸுபி ஏஸேவ நயோ. ஏத்த² பன பா⁴ணகந்தி அரஞ்ஜரோ வுச்சதி. வாரகோதி க⁴டோ. கடாஹம் கடாஹமேவ. வாஸிஆதீ³ஸு வல்லிஆதீ³ஸு ச து³விஞ்ஞேய்யம் நாம நத்தி². ஏவம் –

த்³விஸங்க³ஹானி த்³வே ஹோந்தி, ததியம் சதுஸங்க³ஹம்;

சதுத்த²ம் நவகோட்டா²ஸம், பஞ்சமம் அட்ட²பே⁴த³னம்.

இதி பஞ்சஹி ராஸீஹி, பஞ்சனிம்மலலோசனோ;

பஞ்சவீஸவித⁴ம் நாதோ², க³ருப⁴ண்ட³ம் பகாஸயி.

தத்ராயம் வினிச்ச²யகதா² – இத³ஞ்ஹி ஸப்³ப³ம்பி க³ருப⁴ண்ட³ம் இத⁴ அவிஸ்ஸஜ்ஜியம், கீடாகி³ரிவத்து²ஸ்மிம் ‘‘அவேப⁴ங்கி³ய’’ந்தி வுத்தம். பரிவாரே பன –

‘‘அவிஸ்ஸஜ்ஜியம் அவேப⁴ங்கி³யம், பஞ்ச வுத்தா மஹேஸினா;

விஸ்ஸஜ்ஜேந்தஸ்ஸ பரிபு⁴ஞ்ஜந்தஸ்ஸ அனாபத்தி,

பஞ்ஹா மேஸா குஸலேஹி சிந்திதா’’தி. (பரி. 479) –

ஆக³தம். தஸ்மா மூலச்சே²ஜ்ஜவஸேன அவிஸ்ஸஜ்ஜியம் அவேப⁴ங்கி³யஞ்ச பரிவத்தனவஸேன பன விஸ்ஸஜ்ஜேந்தஸ்ஸ பரிபு⁴ஞ்ஜந்தஸ்ஸ ச அனாபத்தீதி ஏவமேத்த² அதி⁴ப்பாயோ வேதி³தப்³போ³.

தத்ராயம் அனுபுப்³பி³கதா² – இத³ம் தாவ பஞ்சவித⁴ம்பி சீவரபிண்ட³பாதபே⁴ஸஜ்ஜத்தா²ய உபனேதும் ந வட்டதி. தா²வரேன ச தா²வரம் க³ருப⁴ண்டே³ன ச க³ருப⁴ண்ட³ம் பரிவத்தேதும் வட்டதி. தா²வரே பன கே²த்தம் வத்து² தளாகம் மாதிகாதி ஏவரூபம் பி⁴க்கு²ஸங்க⁴ஸ்ஸ விசாரேதும் வா ஸம்படிச்சி²தும் வா அதி⁴வாஸேதும் வா ந வட்டதி, கப்பியகாரகேஹேவ விசாரிததோ கப்பியப⁴ண்ட³ம் வட்டதி. ஆராமேன பன ஆராமம் ஆராமவத்து²ம் விஹாரம் விஹாரவத்து²ந்தி இமானி சத்தாரி பரிவத்தேதும் வட்டதி.

தத்ராயம் பரிவத்தனனயோ – ஸங்க⁴ஸ்ஸ நாளிகேராராமோ தூ³ரே ஹோதி, கப்பியகாரகா வா ப³ஹுதரம் கா²த³ந்தி. யம்பி ந கா²த³ந்தி, ததோ ஸகடவேதனம் த³த்வா அப்பமேவ ஹரந்தி. அஞ்ஞேஸம் பன தஸ்ஸ ஆராமஸ்ஸ அவிதூ³ரகா³மவாஸீனம் மனுஸ்ஸானம் விஹாரஸ்ஸ ஸமீபே ஆராமோ ஹோதி, தே ஸங்க⁴ம் உபஸங்கமித்வா ஸகேன ஆராமேன தம் ஆராமம் யாசந்தி, ஸங்கே⁴ன ‘‘ருச்சதி ஸங்க⁴ஸ்ஸா’’தி அபலோகேத்வா ஸம்படிச்சி²தப்³போ³. ஸசேபி பி⁴க்கூ²னம் ருக்க²ஸஹஸ்ஸம் ஹோதி, மனுஸ்ஸானம் பஞ்ச ஸதானி, ‘‘தும்ஹாகம் ஆராமோ கு²த்³த³கோ’’தி ந வத்தப்³ப³ம். கிஞ்சாபி ஹி அயம் கு²த்³த³கோ, அத² கோ² இதரதோ ப³ஹுதரம் ஆயம் தே³தி. ஸசேபி ஸமகமேவ தே³தி; ஏவம்பி இச்சி²திச்சி²தக்க²ணே பரிபு⁴ஞ்ஜிதும் ஸக்காதி க³ஹேதப்³ப³மேவ. ஸசே பன மனுஸ்ஸானம் ப³ஹுதரா ருக்கா² ஹோந்தி, ‘‘நனு தும்ஹாகம் ப³ஹுதரா ருக்கா²’’தி வத்தப்³ப³ம். ஸசே ‘‘அதிரேகம் அம்ஹாகம் புஞ்ஞம் ஹோது, ஸங்க⁴ஸ்ஸ தே³மா’’தி வத³ந்தி, ஜானாபேத்வா ஸம்படிச்சி²தும் வட்டதி. பி⁴க்கூ²னம் ருக்கா² ப²லதா⁴ரினோ, மனுஸ்ஸானம் ருக்கா² ந தாவ ப²லம் க³ண்ஹந்தி, கிஞ்சாபி ந க³ண்ஹந்தி, ந சிரேன க³ண்ஹிஸ்ஸந்தீதி ஸம்படிச்சி²தப்³ப³மேவ. மனுஸ்ஸானம் ருக்கா² ப²லதா⁴ரினோ, பி⁴க்கூ²னம் ந தாவ ப²லம் க³ண்ஹந்தி, ‘‘நனு தும்ஹாகம் ருக்கா² ப²லதா⁴ரினோ’’தி வத்தப்³ப³ம். ஸசே ‘‘க³ண்ஹத², ப⁴ந்தே, அம்ஹாகம் புஞ்ஞம் ப⁴விஸ்ஸதீ’’தி தே³ந்தி, ஜானாபேத்வா ஸம்படிச்சி²தும் வட்டதி; ஏவம் ஆராமேன ஆராமோ பரிவத்தேதப்³போ³. ஏதேனேவ நயேன ஆராமவத்து²பி விஹாரோபி விஹாரவத்து²பி ஆராமேன பரிவத்தேதப்³ப³ம். ஆராமவத்து²னா ச மஹந்தேன வா கு²த்³த³கேன வா ஆராமஆராமவத்து² விஹாரவிஹாரவத்தூ²னி.

கத²ம் விஹாரேன விஹாரோ பரிவத்தேதப்³போ³? ஸங்க⁴ஸ்ஸ அந்தோகா³மே கே³ஹம் ஹோதி, மனுஸ்ஸானம் விஹாரமஜ்ஜே² பாஸாதோ³, உபோ⁴பி அக்³கே⁴ன ஸமகா, ஸசே மனுஸ்ஸா தேன பாஸாதே³ன தம் கே³ஹம் யாசந்தி, ஸம்படிச்சி²தும் வட்டதி. பி⁴க்கூ²னம் சே மஹக்³க⁴தரம் கே³ஹம் ஹோதி, ‘‘மஹக்³க⁴தரம் அம்ஹாகம் கே³ஹ’’ந்தி வுத்தே ‘‘கிஞ்சாபி மஹக்³க⁴தரம், பப்³ப³ஜிதானம் அஸாருப்பம், ந ஸக்கா தத்த² பப்³ப³ஜிதேஹி வஸிதும், இத³ம் பன ஸாருப்பம் க³ண்ஹதா²’’தி வத³ந்தி; ஏவம்பி ஸம்படிச்சி²தும் வட்டதி. ஸசே பன மனுஸ்ஸானம் மஹக்³க⁴ம் ஹோதி, ‘‘நனு தும்ஹாகம் கே³ஹம் மஹக்³க⁴’’ந்தி வத்தப்³ப³ம். ‘‘ஹோது, ப⁴ந்தே, அம்ஹாகம் புஞ்ஞம் ப⁴விஸ்ஸதி, க³ண்ஹதா²’’தி வுத்தே பன ஸம்படிச்சி²தும் வட்டதி. ஏவம் விஹாரேன விஹாரோ பரிவத்தேதப்³போ³. ஏதேனேவ நயேன விஹாரவத்து²பி ஆராமோபி ஆராமவத்து²பி விஹாரேன பரிவத்தேதப்³ப³ம். விஹாரவத்து²னா ச மஹக்³கே⁴ன வா அப்பக்³கே⁴ன வா விஹாரவிஹாரவத்து²ஆராமஆராமவத்தூ²னி. ஏவம் தாவ தா²வரேன தா²வரபரிவத்தனம் வேதி³தப்³ப³ம்.

க³ருப⁴ண்டே³ன க³ருப⁴ண்ட³பரிவத்தனே பன மஞ்சபீட²ம் மஹந்தம் வா ஹோது கு²த்³த³கம் வா, அந்தமஸோ சதுரங்கு³லபாத³கம் வா கா³மதா³ரகேஹி பம்ஸ்வாகா³ரகேஸு கீளந்தேஹி கதம்பி ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ம் ஹோதி. ஸசேபி ராஜராஜமஹாமத்தாத³யோ ஏகப்பஹாரேனேவ மஞ்சஸதம் வா மஞ்சஸஹஸ்ஸம் வா தே³ந்தி, ஸப்³பே³ கப்பியமஞ்சா ஸம்படிச்சி²தப்³பா³, ஸம்படிச்சி²த்வா வுட்³ட⁴படிபாடியா ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி தா³தப்³பா³, புக்³க³லிகவஸேன ந தா³தப்³பா³. அதிரேகமஞ்சே ப⁴ண்டா³கா³ராதீ³ஸு பஞ்ஞபேத்வா பத்தசீவரம் நிக்கி²பிதும்பி வட்டதி. ப³ஹிஸீமாய ‘‘ஸங்க⁴ஸ்ஸ தே³மா’’தி தி³ன்னமஞ்சோ ஸங்க⁴த்தே²ரஸ்ஸ வஸனட்டா²னே தா³தப்³போ³. தத்த² சே ப³ஹூ மஞ்சா ஹோந்தி, மஞ்சேன கம்மம் நத்தி²; யஸ்ஸ வஸனட்டா²னே கம்மம் அத்தி², தத்த² ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி தா³தப்³போ³. மஹக்³கே⁴ன ஸதக்³க⁴னகேன வா ஸஹஸ்ஸக்³க⁴னகேன வா ஸதஸஹஸ்ஸக்³க⁴னகேன வா மஞ்சேன அஞ்ஞம் மஞ்சஸதம் லப⁴தி, பரிவத்தேத்வா க³ஹேதப்³ப³ம். ந கேவலம் மஞ்சேன மஞ்சோயேவ, ஆராமஆராமவத்து²விஹாரவிஹாரவத்து²பீட²பி⁴ஸிபி³ம்போ³ஹனானிபி பரிவத்தேதும் வட்டந்தி. ஏஸ நயோ பீட²பி⁴ஸிபி³ம்போ³ஹனேஸுபி. ஏதேஸு ஹி கப்பியாகப்யியம் வுத்தனயமேவ. தத்த² அகப்பியம் ந பரிபு⁴ஞ்ஜிதப்³ப³ம், கப்பியம் ஸங்கி⁴கபரிபோ⁴கே³ன பரிபு⁴ஞ்ஜிதப்³ப³ம். அகப்பியம் வா மஹக்³க⁴ம் கப்பியம் வா பரிவத்தேத்வா வுத்தவத்தூ²னி க³ஹேதப்³பா³னி. அக³ருப⁴ண்டு³பக³ம் பன பி⁴ஸிபி³ம்போ³ஹனம் நாம நத்தி².

லோஹகும்பீ⁴ லோஹபா⁴ணகம் லோஹகடாஹந்தி இமானி தீணி மஹந்தானி வா ஹோந்து கு²த்³த³கானி வா அந்தமஸோ பஸதமத்தஉத³கக³ண்ஹனகானிபி க³ருப⁴ண்டா³னியேவ. லோஹவாரகோ பன காளலோஹதம்ப³லோஹவட்டலோஹகம்ஸலோஹானம் யேன கேனசி கதோ ஸீஹளதீ³பே பாத³க³ண்ஹனகோ பா⁴ஜேதப்³போ³. பாதோ³ ச நாம மக³த⁴னாளியா பஞ்சனாளிமத்தம் க³ண்ஹாதி, ததோ அதி⁴கக³ண்ஹனகோ க³ருப⁴ண்ட³ம். இமானி தாவ பாளியம் ஆக³தானி லோஹபா⁴ஜனானி.

பாளியம் பன அனாக³தானிபி பி⁴ங்கா³ரபடிக்³க³ஹஉளுங்கத³ப்³பி³கடச்சு²பாதிதட்டகஸரகஸமுக்³க³அங்கா³ரகபல்லதூ⁴மகடச்சு²ஆதீ³னி கு²த்³த³கானி வா மஹந்தானி வா ஸப்³பா³னி க³ருப⁴ண்டா³னி. பத்தோ, அயதா²லகம், தம்ப³லோஹதா²லகந்தி இமானி பன பா⁴ஜனீயானி. கம்ஸலோஹவட்டலோஹபா⁴ஜனவிகதி ஸங்கி⁴கபரிபோ⁴கே³ன வா கி³ஹிவிகடா வா வட்டதி, புக்³க³லிகபரிபோ⁴கே³ன ந வட்டதி. கம்ஸலோஹாதி³பா⁴ஜனம் ஸங்க⁴ஸ்ஸ தி³ன்னம்பி ஹி பாரிஹாரியம் ந வட்டதி. ‘‘கி³ஹிவிகடனிஹாரேனேவ பரிபு⁴ஞ்ஜிதப்³ப³’’ந்தி மஹாபச்சரியம் வுத்தம்.

ட²பேத்வா பன பா⁴ஜனவிகதிம் அஞ்ஞஸ்மிம்பி கப்பியலோஹப⁴ண்டே³ – அஞ்ஜனீ, அஞ்ஜனிஸலாகா, கண்ணமலஹரணீ, ஸூசி, பண்ணஸூசி, கு²த்³த³கோ, பிப்ப²லகோ, கு²த்³த³கம், ஆரகண்டகம், குஞ்சிகா, தாளம், கத்தரயட்டி² வேத⁴கோ, நத்து²தா³னம், பி⁴ந்தி³வாலோ, லோஹகூடோ, லோஹகுட்டி, லோஹகு³ளோ, லோஹபிண்டி³, லோஹசக்கலிகம், அஞ்ஞம்பி விப்பகதலோஹப⁴ண்ட³ம் பா⁴ஜனீயம். தூ⁴மனேத்தபா²லதீ³பருக்க²தீ³பகபல்லகஓலம்ப³கதீ³பஇத்தி²புரிஸதிரச்சா²னக³தரூபகானி பன அஞ்ஞானி வா பி⁴த்திச்ச²த³னகவாடாதீ³ஸு உபனேதப்³பா³னி, அந்தமஸோ லோஹகி²லகம் உபாதா³ய ஸப்³பா³னி லோஹப⁴ண்டா³னி க³ருப⁴ண்டா³னியேவ ஹோந்தி, அத்தனா லத்³தா⁴னிபி பரிஹரித்வா புக்³க³லிகபரிபோ⁴கே³ன ந பரிபு⁴ஞ்ஜிதப்³பா³னி, ஸங்கி⁴கபரிபோ⁴கே³ன வா கி³ஹிவிகடானி வா வட்டந்தி. திபுப⁴ண்டே³பி ஏஸேவ நயோ. கீ²ரபாஸாணமயானி தட்டகஸரகாதீ³னி க³ருப⁴ண்டா³னியேவ.

க⁴டகோ பன தேலபா⁴ஜனம் வா பாத³க³ண்ஹனகதோ அதிரேகமேவ க³ருப⁴ண்ட³ம். ஸுவண்ணரஜதஹாரகூடஜாதிப²லிகபா⁴ஜனானி கி³ஹிவிகடானிபி ந வட்டந்தி, பகே³வ ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வா. ஸேனாஸனபரிபோ⁴கே³ பன ஆமாஸம்பி அனாமாஸம்பி ஸப்³ப³ம் வட்டதி.

வாஸிஆதீ³ஸு யாய வாஸியா ட²பேத்வா த³ண்ட³கட்ட²ச்சே²த³னம் வா உச்சு²தச்ச²னம் வா அஞ்ஞம் மஹாகம்மம் காதும் ந ஸக்கா, அயம் பா⁴ஜனீயா. ததோ மஹத்தரீ யேன கேனசி ஆகாரேன கதா வாஸி க³ருப⁴ண்ட³மேவ. ப²ரஸு பன அந்தமஸோ வேஜ்ஜானம் ஸிராவேத⁴னப²ரஸுபி க³ருப⁴ண்ட³மேவ. குடா²ரியம் ப²ரஸுஸதி³ஸோ ஏவ வினிச்ச²யோ. யா பன ஆவுத⁴ஸங்கே²பேன கதா, அயம் அனாமாஸா. குதா³லோ அந்தமஸோ சதுரங்கு³லமத்தோபி க³ருப⁴ண்ட³மேவ. நிகா²த³னம் சதுரஸ்ஸமுக²ம் வா ஹோது தோ³ணிமுக²ம் வா வங்கம் வா உஜுகம் வா, அந்தமஸோ ஸம்முஞ்ஜனித³ண்ட³கவேத⁴னம்பி த³ண்ட³ப³த்³த⁴ம் சே, க³ருப⁴ண்ட³மேவ. ஸம்முஞ்ஜனித³ண்ட³க²ணனகம் பன அத³ண்ட³கம் ப²லமத்தமேவ, யம் ஸக்கா ஸிபாடிகாய பக்கி²பித்வா பரிஹரிதும், தம் பா⁴ஜனீயம். ஸிக²ரம்பி நிகா²த³னேனேவ ஸங்க³ஹிதம். யேஹி மனுஸ்ஸேஹி விஹாரே வாஸிஆதீ³னி தி³ன்னானி ஹோந்தி, தே ச க⁴ரே த³ட்³டே⁴ வா சோரேஹி வா விலுத்தே ‘‘தே³த² நோ, ப⁴ந்தே, உபகரணே, புன பாகதிகே கரிஸ்ஸாமா’’தி வத³ந்தி, தா³தப்³பா³. ஸசே ஆஹரந்தி, ந வாரேதப்³பா³; அனாஹரந்தாபி ந சோதே³தப்³பா³.

கம்மாரதட்டகாரசுந்த³காரனளகாரமணிகாரபத்தப³ந்த⁴கானம் அதி⁴கரணிமுட்டி²கஸண்டா³ஸதுலாதீ³னி ஸப்³பா³னி லோஹமயஉபகரணானி ஸங்கே⁴ தி³ன்னகாலதோ பட்டா²ய க³ருப⁴ண்டா³னி. திபுகோட்டகஸுவண்ணகாரசம்மகாரஉபகரணேஸுபி ஏஸேவ நயோ. அயம் பன விஸேஸோ – திபுகோட்டகஉபகரணேஸுபி திபுச்சே²த³னஸத்த²கம், ஸுவண்ணகாரஉபகரணேஸு ஸுவண்ணச்சே²த³னஸத்த²கம், சம்மகாரஉபகரணேஸு கதபரிகம்மசம்மசி²த்³த³னகம் கு²த்³த³கஸத்த²கந்தி இமானி பா⁴ஜனீயப⁴ண்டா³னி. நஹாபிததுன்னகாரஉபகரணேஸுபி ட²பேத்வா மஹாகத்தரிம் மஹாஸண்டா³ஸம் மஹாபிப்ப²லகஞ்ச ஸப்³ப³ம் பா⁴ஜனீயம். மஹாகத்தரிஆதீ³னி க³ருப⁴ண்டா³னி.

வல்லிஆதீ³ஸு வேத்தவல்லிஆதி³கா யா காசி அட்³ட⁴பா³ஹுப்பமாணா வல்லி ஸங்க⁴ஸ்ஸ தி³ன்னா வா தத்த²ஜாதகா வா ரக்கி²தகோ³பிதா க³ருப⁴ண்ட³ம் ஹோதி, ஸா ஸங்க⁴கம்மே ச சேதியகம்மே ச கதே ஸசே அதிரேகா ஹோதி, புக்³க³லிககம்மேபி உபனேதும் வட்டதி; அரக்கி²தா பன க³ருப⁴ண்ட³மேவ ந ஹோதி. ஸுத்தமகசிவாகனாளிகேரஹீரசம்மமயா ரஜ்ஜுகா வா யோத்தானி வா வாகே ச நாளிகேரஹீரே ச வட்டேத்வா கதா ஏகவட்டா வா த்³விவட்டா வா ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ம். ஸுத்தம் பன அவட்டேத்வா தி³ன்னம் மகசிவாகனாளிகேரஹீரா ச பா⁴ஜனீயா. யேஹி பனேதானி ரஜ்ஜுகயோத்தாதீ³னி தி³ன்னானி ஹோந்தி, தே அத்தனோ கரணீயேன ஹரந்தா ந வாரேதப்³பா³.

யோ கோசி அந்தமஸோ அட்ட²ங்கு³லஸூசித³ண்ட³மத்தோபி வேளு ஸங்க⁴ஸ்ஸ தி³ன்னோ வா தத்த²ஜாதகோ வா ரக்கி²தகோ³பிதோ க³ருப⁴ண்ட³ம், ஸோபி ஸங்க⁴கம்மே ச சேதியகம்மே ச கதே அதிரேகோ புக்³க³லிககம்மே தா³தும் வட்டதி. பாத³க³ண்ஹனகதேலனாளி பன கத்தரயட்டி², உபாஹனத³ண்ட³கோ, ச²த்தத³ண்டோ³, ச²த்தஸலாகாதி இத³மேத்த² பா⁴ஜனீயப⁴ண்ட³ம். த³ட்³ட⁴கே³ஹமனுஸ்ஸா க³ண்ஹித்வா க³ச்ச²ந்தா ந வாரேதப்³பா³. ரக்கி²தகோ³பிதம் வேளும் க³ண்ஹந்தேன ஸமகம் வா அதிரேகம் வா தா²வரம் அந்தமஸோ தம்அக்³க⁴னகம்பி பா²திகம்மம் கத்வா க³ஹேதப்³போ³. பா²திகம்மம் அகத்வா க³ண்ஹந்தேன தத்தே²வ வளஞ்ஜேதப்³போ³, க³மனகாலே ஸங்கி⁴காவாஸே ட²பேத்வா க³ந்தப்³ப³ம். அஸதியா க³ஹேத்வா க³தேன பஹிணித்வா தா³தப்³போ³. தே³ஸந்தரம் க³தேன ஸம்பத்தவிஹாரே ஸங்கி⁴காவாஸே ட²பேதப்³போ³.

திணந்தி முஞ்ஜம் பப்³ப³ஜஞ்ச ட²பேத்வா அவஸேஸம் யம்கிஞ்சி திணம். யத்த² பன திணம் நத்தி², தத்த² பண்ணேஹி சா²தே³ந்தி; தஸ்மா பண்ணம்பி திணேனேவ ஸங்க³ஹிதம். இதி முஞ்ஜாதீ³ஸு யம்கிஞ்சி முட்டி²ப்பமாணம்பி திணம் தாலபண்ணாதீ³ஸு ச ஏகம் பண்ணம்பி ஸங்க⁴ஸ்ஸ தி³ன்னம் வா தத்த²ஜாதகம் வா ப³ஹாராமே ஸங்க⁴ஸ்ஸ திணவத்து²தோ ஜாததிணம் வா ரக்கி²தகோ³பிதம் க³ருப⁴ண்ட³ம் ஹோதி, தம்பி ஸங்க⁴கம்மே ச சேதியகம்மே ச கதே அதிரேகம் புக்³க³லிககம்மே தா³தும் வட்டதி. த³ட்³ட⁴கே³ஹமனுஸ்ஸா க³ஹேத்வா க³ச்ச²ந்தா ந வாரேதப்³பா³. அட்ட²ங்கு³லப்பமாணோபி ரித்தபோத்த²கோ க³ருப⁴ண்ட³மேவ.

மத்திகா பகதிமத்திகா வா ஹோது பஞ்சவண்ணா வா ஸுதா⁴ வா ஸஜ்ஜுரஸகங்கு³ட்ட²ஸிலேஸாதீ³ஸு வா யம்கிஞ்சி, து³ல்லப⁴ட்டா²னே ஆனேத்வா வா தி³ன்னம் தத்த²ஜாதகம் வா ரக்கி²தகோ³பிதம் தாலப²லபக்கமத்தம் க³ருப⁴ண்ட³ம் ஹோதி. தம்பி ஸங்க⁴கம்மே ச சேதியகம்மே ச நிட்டி²தே அதிரேகம் புக்³க³லிககம்மே தா³தும் வட்டதி. ஹிங்கு³ஹிங்கு³லகஹரிதாலமனோஸிலஞ்ஜனானி பன பா⁴ஜனீயப⁴ண்டா³னி.

தா³ருப⁴ண்டே³ யோ கோசி அட்ட²ங்கு³லஸூசித³ண்ட³மத்தோபி தா³ருப⁴ண்ட³கோ தா³ருது³ல்லப⁴ட்டா²னே ஸங்க⁴ஸ்ஸ தி³ன்னோ வா தத்த²ஜாதகோ வா ரக்கி²தகோ³பிதோ, அயம் க³ருப⁴ண்ட³ம் ஹோதீதி குருந்தி³யம் வுத்தம். மஹாஅட்ட²கதா²யம் பன ஸப்³ப³ம்பி தா³ருவேளுசம்மபாஸாணாதி³விகதிம் தா³ருப⁴ண்டே³ன ஸங்க³ண்ஹித்வா ‘‘தேன கோ² பன ஸமயேன ஸங்க⁴ஸ்ஸ ஆஸந்தி³கோ உப்பன்னோ ஹோதீ’’தி இதோ பட்டா²ய தா³ருப⁴ண்ட³வினிச்ச²யோ வுத்தோ.

தத்ராயம் அத்து²த்³தா⁴ரோ, ஆஸந்தி³கோ, ஸத்தங்கோ³, ப⁴த்³த³பீட²ம், பீடி²கா, ஏளகபாத³கபீட²ம், ஆமலகவட்டகபீட²ம், ப²லகம், கோச்ச²ம், பலாலபீட²கந்தி இமேஸு தாவ யம்கிஞ்சி கு²த்³த³கம் வா ஹோது மஹந்தம் வா, ஸங்க⁴ஸ்ஸ தி³ன்னம் க³ருப⁴ண்ட³ம் ஹோதி. பலாலபீடே²ன சேத்த² கத³லிபத்தாதி³பீடா²னிபி ஸங்க³ஹிதானி. ப்³யக்³க⁴சம்மஓனத்³த⁴ம்பி வாளரூபபரிக்கி²த்தம், ரதனபரிஸிப்³பி³தம், கோச்ச²கம் க³ருப⁴ண்ட³மேவ.

வங்கப²லகம், தீ³க⁴ப²லகம், சீவரதோ⁴வனப²லகம், க⁴ட்டனப²லகம், க⁴ட்டனமுக்³க³ரோ, த³ந்தகட்ட²ச்சே²த³னக³ண்டி²கா, த³ண்ட³முக்³க³ரோ, அம்ப³ணம், ரஜனதோ³ணி, உத³கபடிச்ச²கோ, தா³ருமயோ வா த³ந்தமயோ வா வேளுமயோ வா ஸபாத³கோபி அபாத³கோபி ஸமுக்³கோ³, மஞ்ஜூஸா, பாத³க³ண்ஹனகதோ அதிரேகப்பமாணோ கரண்டோ³, உத³கதோ³ணி, உத³ககடாஹம், உளுங்கோ, கடச்சு², பானீயஸராவம், பானீயஸங்கோ²தி ஏதேஸுபி யம்கிஞ்சி ஸங்கே⁴ தி³ன்னம் க³ருப⁴ண்ட³ம். ஸங்க²தா²லகம் பன பா⁴ஜனீயம், ததா² தா³ருமயோ உத³கதும்போ³.

பாத³கத²லிகமண்ட³லம் தா³ருமயம் வா ஹோது சோளபண்ணாதி³மயம் வா ஸப்³ப³ம் க³ருப⁴ண்ட³ம். ஆதா⁴ரகோ பத்தபிதா⁴னம், தாலவண்டம், பீ³ஜனீ, சங்கோடகம், பச்சி², யட்டி²ஸம்முஞ்ஜனீ முட்டி²ஸம்முஞ்ஜனீதி ஏதேஸுபி யம்கிஞ்சி கு²த்³த³கம் வா மஹந்தம் வா தா³ருவேளுபண்ணசம்மாதீ³ஸு யேன கேனசி கதம் க³ருப⁴ண்ட³மேவ.

த²ம்ப⁴துலாஸோபானப²லகாதீ³ஸு தா³ருமயம் வா பாஸாணமயம் வா யம்கிஞ்சி கே³ஹஸம்பா⁴ரரூபம், யோ கோசி கடஸாரகோ, யம்கிஞ்சி பூ⁴மத்த²ரணம், யம்கிஞ்சி அகப்பியசம்மம், ஸப்³ப³ம் ஸங்கே⁴ தி³ன்னம் க³ருப⁴ண்ட³ம், பூ⁴மத்த²ரணம் காதும் வட்டதி. ஏளகசம்மம் பன பச்சத்த²ரணக³திகம் ஹோதி, தம்பி க³ருப⁴ண்ட³மேவ. கப்பியசம்மானி பா⁴ஜனீயானி. குருந்தி³யம் பன ‘‘ஸப்³ப³ம் மஞ்சப்பமாணம் சம்மம் க³ருப⁴ண்ட³’’ந்தி வுத்தம்.

உது³க்க²லம், முஸலம், ஸுப்பம், நிஸத³ம், நிஸத³போதோ, பாஸாணதோ³ணி, பாஸாணகடாஹம், துரிவேமப⁴ஸ்தாதி³ ஸப்³ப³ம் பேஸகாராதி³ப⁴ண்ட³ம், ஸப்³ப³ம் கஸிப⁴ண்ட³ம், ஸப்³ப³ம் சக்கயுத்தகயானம் க³ருப⁴ண்ட³மேவ. மஞ்சபாதோ³, மஞ்சஅடனீ, பீட²பாதோ³, பீட²அடனீ, வாஸிப²ரஸுஆதீ³னம் த³ண்டா³தி ஏதேஸு யம்கிஞ்சி விப்பகததச்ச²னகம்மம் அனிட்டி²தமேவ பா⁴ஜனீயம், தச்சி²தமட்ட²ம் பன க³ருப⁴ண்ட³ம் ஹோதி. அனுஞ்ஞாதவாஸியா பன த³ண்டோ³ ச²த்தமுட்டி²பண்ணம் கத்தரயட்டி² உபாஹனா அரணிஸஹிதம் த⁴ம்மகரணோ பாத³க³ண்ஹனகதோ அனதிரித்தம் ஆமலகதும்ப³ம் ஆமலகக⁴டோ லாபு³கதும்ப³ம் லாபு³க⁴டோ விஸாணகதும்ப³ந்தி ஸப்³ப³மேதம் பா⁴ஜனீயம், ததோ மஹந்ததரம் க³ருப⁴ண்ட³ம்.

ஹத்தி²த³ந்தோ வா யம்கிஞ்சி விஸாணம் வா அதச்சி²தம் யதா²ஜாதமேவ பா⁴ஜனீயம், தேஹி கதமஞ்சபாதா³தீ³ஸு புரிமஸதி³ஸோயேவ வினிச்ச²யோ. தச்சி²தனிட்டி²தோபி ஹிங்கு³கரண்ட³கோ அஞ்ஜனகரண்ட³கோ க³ண்டி²கா விதோ⁴ அஞ்ஜனீ அஞ்ஜனிஸலாகா உத³கபுஞ்ச²னீதி இத³ம் ஸப்³ப³ம் பா⁴ஜனீயமேவ.

மத்திகாப⁴ண்டே³ ஸப்³ப³ம் மனுஸ்ஸானம் உபபோ⁴க³பரிபோ⁴க³ம் க⁴டபிட²ராதி³குலாலபா⁴ஜனம் பத்தகடாஹம் அங்கா³ரகடாஹம் தூ⁴மதா³னகம் தீ³பருக்க²கோ தீ³பகபல்லிகா சயனிட்ட²கா ச²த³னிட்ட²கா தூ²பிகாதி ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ம், பாத³க³ண்ஹனகதோ அனதிரித்தப்பமாணோ பன க⁴டகோ பத்தம் தா²லகம் கஞ்சனகோ குண்டி³காதி இத³மேத்த² பா⁴ஜனீயப⁴ண்ட³ம். யதா² ச மத்திகாப⁴ண்டே³; ஏவம் லோஹப⁴ண்டே³பி குண்டி³கா பா⁴ஜனீயகோட்டா²ஸமேவ ப⁴ஜதீதி அயமேத்த² அனுபுப்³பி³கதா².

அவிஸ்ஸஜ்ஜியவத்து²கதா² நிட்டி²தா.

நவகம்மதா³னகதா²

323. ப⁴ண்டி³காட்ட²பனமத்தேனாதி த்³வாரபா³ஹானம் உபரி கபோதப⁴ண்டி³கயோஜனமத்தேன. பரிப⁴ண்ட³கரணமத்தேனாதி கோ³மயபரிப⁴ண்ட³கஸாவபரிப⁴ண்ட³கரணமத்தேன. தூ⁴மகாலிகந்தி இத³ம் யாவஸ்ஸ சிதகதூ⁴மோ ந பஞ்ஞாயதி, தாவ அயம் விஹாரோ ஏதஸ்ஸேவாதி ஏவம் தூ⁴மகாலே அபலோகேத்வா கதபரியோஸிதம் விஹாரம் தே³ந்தி. விப்பகதந்தி ஏத்த² விப்பகதோ நாம யாவ கோ³பானஸியோ ந ஆரோஹந்தி. கோ³பானஸீஸு பன ஆருள்ஹாஸு ப³ஹுகதோ நாம ஹோதி, தஸ்மா ததோ பட்டா²ய ந தா³தப்³போ³, கிஞ்சிதே³வ ஸமாத³பேத்வா காரேஸ்ஸதி. கு²த்³த³கே விஹாரே கம்மம் ஓலோகேத்வா ச²ப்பஞ்சவஸ்ஸிகந்தி கம்மம் ஓலோகேத்வா சதுஹத்த²விஹாரே சதுவஸ்ஸிகம், பஞ்சஹத்தே² பஞ்சவஸ்ஸிகம், ச²ஹத்தே² ச²வஸ்ஸிகம் தா³தப்³ப³ம். அட்³ட⁴யோகோ³ பன யஸ்மா ஸத்தட்ட²ஹத்தோ² ஹோதி, தஸ்மா ஏத்த² ‘‘ஸத்தட்ட²வஸ்ஸிக’’ந்தி வுத்தம். ஸசே பன ஸோ நவஹத்தோ² ஹோதி நவவஸ்ஸிகம்பி தா³தப்³ப³ம். மஹல்லகே பன த³ஸஹத்தே² ஏகாத³ஸஹத்தே² விஹாரே வா பாஸாதே³ வா த³ஸவஸ்ஸிகம் வா ஏகாத³ஸவஸ்ஸிகம் வா தா³தப்³ப³ம். த்³வாத³ஸஹத்தே² பன ததோ அதி⁴கே வா லோஹபாஸாத³ஸதி³ஸேபி த்³வாத³ஸவஸ்ஸிகமேவ தா³தப்³ப³ம், ந ததோ உத்தரி.

நவகம்மிகோ பி⁴க்கு² அந்தோவஸ்ஸே தம் ஆவாஸம் லப⁴தி, உதுகாலே படிபா³ஹிதும் ந லப⁴தி. ஸசே ஸோ ஆவாஸோ ஜீரதி, ஆவாஸஸாமிகஸ்ஸ வா தஸ்ஸ வம்ஸே உப்பன்னஸ்ஸ வா கஸ்ஸசி கதே²தப்³ப³ம் – ‘‘ஆவாஸோ தே நஸ்ஸதி, ஜக்³க³த² ஏதம் ஆவாஸ’’ந்தி. ஸசே ஸோ ந ஸக்கோதி, பி⁴க்கூ²ஹி ஞாதீ வா உபட்டா²கே வா ஸமாத³பேத்வா ஜக்³கி³தப்³போ³. ஸசே தேபி ந ஸக்கோந்தி, ஸங்கி⁴கேன பச்சயேன ஜக்³கி³தப்³போ³. தஸ்மிம்பி அஸதி ஏகம் ஆவாஸம் விஸ்ஸஜ்ஜேத்வா அவஸேஸா ஜக்³கி³தப்³பா³. ப³ஹூ விஸ்ஸஜ்ஜேத்வா ஏகம் ஸண்டா²பேதும்பி வட்டதியேவ.

து³ப்³பி⁴க்கே² பி⁴க்கூ²ஸு பக்கந்தேஸு ஸப்³பே³ ஆவாஸா நஸ்ஸந்தி, தஸ்மா ஏகம் வா த்³வே வா தயோ வா ஆவாஸே விஸ்ஸஜ்ஜேத்வா ததோ யாகு³ப⁴த்தசீவராதீ³னி பரிபு⁴ஞ்ஜந்தேஹி ஸேஸாவாஸா ஜக்³கி³தப்³பா³யேவ. குருந்தி³யம் பன வுத்தம் ‘‘ஸங்கி⁴கே பச்சயே அஸதி ஏகோ பி⁴க்கு² ‘துய்ஹம் ஏகம் மஞ்சட்டா²னம் க³ஹேத்வா ஜக்³கா³ஹீ’தி வத்தப்³போ³. ஸசே ப³ஹுதரம் இச்ச²தி, திபா⁴க³ம் வா உபட்³ட⁴பா⁴க³ம் வா த³த்வாபி ஜக்³கா³பேதப்³ப³ம். அத² ‘த²ம்ப⁴மத்தமேவேத்த² அவஸிட்ட²ம், ப³ஹுகம்மம் காதப்³ப³’ந்தி ந இச்ச²தி, ‘துய்ஹம் புக்³க³லிகமேவ கத்வா ஜக்³க³; ஏவம்பி ஹி ஸங்க⁴ஸ்ஸ ப⁴ண்ட³கட்ட²பனட்டா²னம் நவகானஞ்ச வஸனட்டா²னம் லபி⁴ஸ்ஸதீ’தி ஜக்³கா³பேதப்³போ³. ஏவம் ஜக்³கி³தோ பன தஸ்மிம் ஜீவந்தே புக்³க³லிகோ ஹோதி, மதே ஸங்கி⁴கோயேவ. ஸசே ஸத்³தி⁴விஹாரிகானம் தா³துகாமோ ஹோதி, கம்மம் ஓலோகேத்வா திபா⁴க³ம் வா உபட்³ட⁴ம் வா புக்³க³லிகம் கத்வா ஜக்³கா³பேதப்³போ³. ஏவஞ்ஹி ஸத்³தி⁴விஹாரிகானம் தா³தும் லப⁴தி. ஏவம் ஜக்³க³னகே பன அஸதி ‘ஏகம் ஆவாஸம் விஸ்ஸஜ்ஜேத்வா’திஆதி³னா நயேன ஜக்³கா³பேதப்³போ³’’தி.

இத³ம்பி ச அஞ்ஞம் தத்தே²வ வுத்தம் – த்³வே பி⁴க்கூ² ஸங்கி⁴கம் பூ⁴மிம் க³ஹேத்வா ஸோதே⁴த்வா ஸங்கி⁴கம் ஸேனாஸனம் கரோந்தி. யேன ஸா பூ⁴மி பட²மம் க³ஹிதா, ஸோ ஸாமீ. உபோ⁴பி புக்³க³லிகம் கரோந்தி, ஸோயேவ ஸாமீ. ஸோ ஸங்கி⁴கம் கரோதி, இதரோ புக்³க³லிகம் கரோதி, அஞ்ஞம் சே ப³ஹும் ஸேனாஸனட்டா²னம் அத்தி², புக்³க³லிகம் கரோந்தோபி ந வாரேதப்³போ³. அஞ்ஞஸ்மிம் பன தாதி³ஸே படிரூபே டா²னே அஸதி தம் படிபா³ஹித்வா ஸங்கி⁴கம் கரோந்தேனேவ காதப்³ப³ம். யம் பன தஸ்ஸ தத்த² வயகம்மம் கதம், தம் தா³தப்³ப³ம். ஸசே பன கதாவாஸே வா ஆவாஸகரணட்டா²னே வா சா²யூபக³ப²லூபக³ருக்கா² ஹோந்தி, அபலோகேத்வா ஹாரேதப்³பா³. புக்³க³லிகா சே ஹோந்தி, ஸாமிகா ஆபுச்சி²தப்³பா³; நோ சே தே³ந்தி, யாவததியம் ஆபுச்சி²த்வா ‘‘ருக்க²அக்³க⁴னகமூலம் த³ஸ்ஸாமா’’தி ஹாரேதப்³பா³.

யோ பன ஸங்கி⁴கவல்லிமத்தம்பி அக்³க³ஹேத்வா ஆஹரிமேன உபகரணேன ஸங்கி⁴காய பூ⁴மியா புக்³க³லிகவிஹாரம் காரேதி, உபட்³ட⁴ம் ஸங்கி⁴கம் ஹோதி; உபட்³ட⁴ம் புக்³க³லிகம். பாஸாதோ³ சே ஹோதி, ஹேட்டா²பாஸாதோ³ ஸங்கி⁴கோ; உபரி புக்³க³லிகோ. ஸசே ஸோ ஹேட்டா²பாஸாத³ம் இச்ச²தி, தஸ்ஸ ஹோதி. அத² ஹேட்டா² ச உபரி ச இச்ச²தி, உப⁴யத்த² உபட்³ட⁴ம் லப⁴தி. த்³வே ஸேனாஸனானி காரேதி – ஏகம் ஸங்கி⁴கம், ஏகம் புக்³க³லிகம். ஸசே விஹாரே உட்டி²தேன த³ப்³ப³ஸம்பா⁴ரேன காரேதி, ததியபா⁴க³ம் லப⁴தி. ஸசே அகதட்டா²னே சயம் வா பமுக²ம் வா கரோதி, ப³ஹிகுட்டே உபட்³ட⁴ம் ஸங்க⁴ஸ்ஸ, உபட்³ட⁴ம் தஸ்ஸ. அத² மஹந்தம் விஸமம் பூரேத்வா அபதே³ பத³ம் த³ஸ்ஸேத்வா கதம் ஹோதி, அனிஸ்ஸரோ தத்த² ஸங்கோ⁴.

ஏகம் வரஸேய்யந்தி ஏத்த² நவகம்மதா³னட்டா²னே வா வஸ்ஸக்³கே³ன பத்தட்டா²னே வா யம் இச்ச²தி, தம் ஏகம் வரஸேய்யம் அனுஜானாமீதி அத்தோ².

பரியோஸிதே பக்கமதி தஸ்ஸேவேதந்தி புன ஆக³ந்த்வா வஸந்தஸ்ஸ அந்தோவஸ்ஸம் தஸ்ஸேவ தம்; அனாக³ச்ச²ந்தஸ்ஸ பன ஸத்³தி⁴விஹாரிகாத³யோ க³ஹேதும் ந லப⁴ந்தி.

நவகம்மதா³னகதா² நிட்டி²தா.

அஞ்ஞத்ரபடிபோ⁴க³படிக்கே²பாதி³கதா²

324. நாதிஹரந்தீதி அஞ்ஞத்ர ஹரித்வா ந பரிபு⁴ஞ்ஜந்தி. கு³த்தத்தா²யாதி யம் தத்த² மஞ்சபீடா²தி³, தஸ்ஸ கு³த்தத்தா²ய, தம் அஞ்ஞத்ர ஹரிதும் அனுஜானாமீதி அத்தோ². தஸ்மா தம் அஞ்ஞத்ர ஹரித்வா ஸங்கி⁴கபரிபோ⁴கே³ன பரிபு⁴ஞ்ஜந்தஸ்ஸ நட்ட²ம் ஸுனட்ட²ம், ஜிண்ணம் ஸுஜிண்ணம். ஸசே அரோக³ம் தஸ்மிம் விஹாரே படிஸங்க²தே புன பாகதிகம் காதப்³ப³ம். புக்³க³லிகபரிபோ⁴கே³ன பரிபு⁴ஞ்ஜதோ நட்ட²ம் வா ஜிண்ணம் வா கீ³வா ஹோதி, தஸ்மிம் படிஸங்க²தே தா³தப்³ப³மேவ. ஸசே ததோ கோ³பானஸிஆதீ³னி க³ஹேத்வா அஞ்ஞஸ்மிம் ஸங்கி⁴காவாஸே யோஜேந்தி, ஸுயோஜிதானி. புக்³க³லிகாவாஸே யோஜேந்தேஹி பன மூலம் வா தா³தப்³ப³ம், படிபாகதிகம் வா காதப்³ப³ம் ச²ட்³டி³தவிஹாரதோ மஞ்சபீடா²தீ³னி தே²ய்யசித்தேன க³ண்ஹந்தோ உத்³தா⁴ரேயேவ ப⁴ண்ட³க்³கே⁴ன காரேதப்³போ³. புன ஆவாஸிககாலே த³ஸ்ஸாமீதி க³ஹேத்வா ஸங்கி⁴கபரிபோ⁴கே³ன பரிபு⁴ஞ்ஜந்தஸ்ஸ நட்ட²ம் ஸுனட்ட²ம், ஜிண்ணம் ஸுஜிண்ணம். அரோக³ஞ்சே பாகதிகம் காதப்³ப³ம். புக்³க³லிகபரிபோ⁴கே³ன பரிபு⁴ஞ்ஜந்தஸ்ஸ நட்ட²ம் கீ³வா ஹோதி. ததோ த்³வாரவாதபானாதீ³னி ஸங்கி⁴காவாஸே வா புக்³க³லிகாவாஸே வா யோஜிதானி படிதா³தப்³பா³னியேவ.

பா²திகம்மத்தா²யாதி வட்³டி⁴கம்மத்தா²ய. பா²திகம்மஞ்சேத்த² ஸமகம் வா அதிரேகம் வா அக்³க⁴னகம் மஞ்சபீடா²தி³ஸேனாஸனமேவ வட்டதி.

சக்கலிகந்தி கம்ப³லாதீ³ஹி வேடே²த்வா கதசக்கலிகம். அல்லேஹி பாதே³ஹீதி யேஹி அக்கந்தட்டா²னே உத³கம் பஞ்ஞாயதி, ஏவரூபேஹி பாதே³ஹி பரிப⁴ண்ட³கதபூ⁴மி வா ஸேனாஸனம் வா ந அக்கமிதப்³ப³ம். ஸசே பன உத³கஸினேஹமத்தமேவ பஞ்ஞாயதி, ந உத³கம், வட்டதி. பாத³புஞ்ச²னிம் பன அல்லபாதே³ஹிபி அக்கமிதும் வட்டதியேவ. ஸஉபாஹனேன தோ⁴தபாதே³ஹி அக்கமிதப்³ப³ட்டா²னேயேவ ந வட்டதி.

சோளகேன பலிவேடே²துந்தி ஸுதா⁴பூ⁴மியம் வா பரிப⁴ண்ட³பூ⁴மியம் வா ஸசே தட்டிகா வா கடஸாரகோ வா நத்தி², சோளகேன பாதா³ வேடே²தப்³பா³, தஸ்மிம் அஸதி பண்ணம்பி அத்த²ரிதும் வட்டதி. கிஞ்சி அனத்த²ரித்வா ட²பேந்தஸ்ஸ பன து³க்கடம். யதி³ பன தத்த² நேவாஸிகா அனத்த²தாயபி பூ⁴மியா ட²பேந்தி, அதோ⁴தபாதே³ஹிபி வளஞ்ஜேந்தி, ததே²வ வளஞ்ஜேதும் வட்டதி.

ந பி⁴க்க²வே பரிகம்மகதா பி⁴த்தீதி ஸேதபி⁴த்தி வா சித்தகம்மகதா வா. ந கேவலஞ்ச பி⁴த்திமேவ, த்³வாரம்பி வாதபானம்பி அபஸ்ஸேனப²லகம்பி பாஸாணத்த²ம்ப⁴ம்பி ருக்க²த்த²ம்ப⁴ம்பி சீவரேன வா கேனசி வா அப்படிச்சா²தே³த்வா அபஸ்ஸயிதும் ந லப்³ப⁴தியேவ.

தோ⁴தபாத³காதி தோ⁴தபாத³கா ஹுத்வா தோ⁴தேஹி பாதே³ஹி அக்கமிதப்³ப³ட்டா²னே நிபஜ்ஜிதும் குக்குச்சாயந்தி. ‘‘தோ⁴தபாத³கே’’திபி பாடோ². தோ⁴தேஹி பாதே³ஹி அக்கமிதப்³ப³ட்டா²னஸ்ஸேதம் அதி⁴வசனம். பச்சத்த²ரித்வாதி பரிப⁴ண்ட³கதம் பூ⁴மிம் வா பூ⁴மத்த²ரணஸேனாஸனம் வா ஸங்கி⁴கமஞ்சபீட²ம் வா அத்தனோ ஸந்தகேன பச்சத்த²ரணேன பச்சத்த²ரித்வாவ நிபஜ்ஜிதப்³ப³ம். ஸசே நித்³தா³யதோபி பச்சத்த²ரணே ஸங்குடிதே கோசி ஸரீராவயவோ மஞ்சம் வா பீட²ம் வா பு²ஸதி, ஆபத்தியேவ. லோமேஸு பன லோமக³ணனாய ஆபத்தியேவ. பரிபோ⁴க³ஸீஸேன அபஸ்ஸயந்தஸ்ஸாபி ஏஸேவ நயோ. ஹத்த²தலபாத³தலேஹி பன பு²ஸிதும் வா அக்கமிதும் வா வட்டதி. மஞ்சபீட²ம் நீஹரந்தஸ்ஸ காயே படிஹஞ்ஞதி, அனாபத்தி.

அஞ்ஞத்ரபரிபோ⁴க³படிக்கே²பாதி³கதா² நிட்டி²தா.

ஸங்க⁴ப⁴த்தாதி³அனுஜானனகதா²

325. ந ஸக்கோந்தி ஸங்க⁴ப⁴த்தம் காதுந்தி ஸகலஸ்ஸ ஸங்க⁴ஸ்ஸ ப⁴த்தம் காதும் ந ஸக்கோந்தி. உத்³தே³ஸப⁴த்தந்திஆதீ³ஸு ‘‘ஏகம் வா த்³வே வா…பே… த³ஸ வா பி⁴க்கூ² ஸங்க⁴தோ உத்³தி³ஸித்வா தே³தா²’’தி ஏவம் உத்³தே³ஸேன லத்³த⁴பி⁴க்கூ²னம் ப⁴த்தம் காதும் இச்ச²ந்தி. அபரே ததே²வ பி⁴க்கூ² பரிச்சி²ந்தி³த்வா நிமந்தேத்வா தேஸம் ப⁴த்தம் காதும் இச்ச²ந்தி. அபரே ஸலாகாயோ சி²ந்தி³த்வா, அபரே பக்கி²கம் உபோஸதி²கம் பாடிபதி³கந்தி ஏவம் நியாமேத்வா, ஏகஸ்ஸ வா த்³வின்னம் வா…பே… த³ஸன்னம் வா பி⁴க்கூ²னம் ப⁴த்தம் காதும் இச்ச²ந்தி. இதி ஏதானி ப⁴த்தானி உத்³தே³ஸப⁴த்தம் நிமந்தனந்தி இமம் வோஹாரம் பத்தானி. யஸ்மா பன தே ஸசேபி து³ப்³பி⁴க்கே² ந ஸக்கோந்தி, ஸுபி⁴க்கே² ஜாதே பன புன ஸங்க⁴ப⁴த்தம் காதும் ஸக்கி²ஸ்ஸந்தி, தஸ்மா ப⁴க³வா தம்பி அந்தோ கத்வா ‘‘அனுஜானாமி, பி⁴க்க²வே, ஸங்க⁴ப⁴த்தம் உத்³தே³ஸப⁴த்த’’ந்திஆதி³மாஹ.

தத்த² ஸங்க⁴ப⁴த்தே டி²திகா நாம நத்தி², தஸ்மா ‘‘அம்ஹாகம் அஜ்ஜ த³ஸ த்³வாத³ஸ தி³வஸா பு⁴ஞ்ஜந்தானம் இதா³னி அஞ்ஞதோ பி⁴க்கூ² ஆனேதா²’’தி ந ஏவம் தத்த² வத்தப்³ப³ம். ‘‘புரிமதி³வஸேஸு அம்ஹேஹி ந லத்³த⁴ம், இதா³னி தம் அம்ஹாகம் கா³ஹேதா²’’தி ஏவம்பி வத்தும் ந லப்³ப⁴தி. தஞ்ஹி ஆக³தாக³தானம் பாபுணாதியேவ.

ஸங்க⁴ப⁴த்தாதி³அனுஜானனகதா² நிட்டி²தா.

உத்³தே³ஸப⁴த்தகதா²

உத்³தே³ஸப⁴த்தாதீ³ஸு பன அயம் நயோ – ரஞ்ஞா வா ராஜமஹாமத்தேன வா ஸங்க⁴தோ உத்³தி³ஸித்வா ‘‘ஏத்தகே பி⁴க்கூ² ஆனேதா²’’தி பஹிதே காலம் கோ⁴ஸேத்வா டி²திகா புச்சி²தப்³பா³. ஸசே அத்தி², ததோ பட்டா²ய கா³ஹேதப்³ப³ம்; நோ சே, தே²ராஸனதோ பட்டா²ய கா³ஹேதப்³ப³ம். உத்³தே³ஸகேன பிண்ட³பாதிகானம்பி ந அதிக்காமேதப்³ப³ம். தே பன து⁴தங்க³ம் ரக்க²ந்தா ஸயமேவ அதிக்கமிஸ்ஸந்தி; ஏவம் கா³ஹியமானே அலஸஜாதிகா மஹாதே²ரா பச்சா² ஆக³ச்ச²ந்தி, ‘‘ப⁴ந்தே, வீஸதிவஸ்ஸானம் கா³ஹியதி, தும்ஹாகம் டி²திகா அதிக்கந்தா’’தி ந வத்தப்³பா³, டி²திகம் ட²பேத்வா தேஸம் கா³ஹேத்வா பச்சா² டி²திகாய கா³ஹேதப்³ப³ம். ‘‘அஸுகவிஹாரே ப³ஹும் உத்³தே³ஸப⁴த்தம் உப்பன்ன’’ந்தி ஸுத்வா யோஜனந்தரிகவிஹாரதோபி பி⁴க்கூ² ஆக³ச்ச²ந்தி, ஸம்பத்தஸம்பத்தானம் டி²தட்டா²னதோ பட்டா²ய கா³ஹேதப்³ப³ம். அஸம்பத்தானம்பி உபசாரஸீமம் பவிட்டா²னம் அந்தேவாஸிகாதீ³ஸு க³ண்ஹந்தேஸு கா³ஹேதப்³ப³மேவ. ப³ஹிஉபசாரஸீமாய டி²தானம் கா³ஹேதா²தி வத³ந்தி, ந கா³ஹேதப்³ப³ம். ஸசே பன உபசாரஸீமம் ஓக்கந்தேஹி ஏகாப³த்³தா⁴ ஹுத்வா அத்தனோ விஹாரத்³வாரே வா அந்தோவிஹாரேயேவ வா ஹோந்தி, பரிஸாவஸேன வட்³டி⁴தா நாம ஸீமா ஹோதி, தஸ்மா கா³ஹேதப்³ப³ம். ஸங்க⁴னவகஸ்ஸ தி³ன்னேபி பச்சா² ஆக³தானம் கா³ஹேதப்³ப³மேவ. து³தியபா⁴கே³ பன தே²ராஸனம் ஆருள்ஹே புன ஆக³தானம் பட²மபா⁴கோ³ ந பாபுணாதி, து³தியபா⁴க³தோ வஸ்ஸக்³கே³ன கா³ஹேதப்³ப³ம்.

ஏகஸ்மிம் விஹாரே ஏகம் ப⁴த்துத்³தே³ஸட்டா²னம் பரிச்சி²ந்தி³த்வா கா³வுதப்பமாணாயபி உபசாரஸீமாய யத்த² கத்த²சி ஆரோசிதம் உத்³தே³ஸப⁴த்தம், தஸ்மிம்யேவ ப⁴த்துத்³தே³ஸட்டா²னே கா³ஹேதப்³ப³ம். ஏகோ ஏகஸ்ஸ பி⁴க்கு²னோ பஹிணாதி ‘‘ஸ்வேபி ஸங்க⁴தோ உத்³தி³ஸித்வா த³ஸ பி⁴க்கூ² பஹிணதா²’’தி, தேன ஸோ அத்தோ² ப⁴த்துத்³தே³ஸகஸ்ஸ ஆரோசேதப்³போ³. ஸசே தம் தி³வஸம் பமுஸ்ஸதி, து³தியதி³வஸே பாதோவ ஆரோசேதப்³போ³. அத² பமுஸ்ஸித்வாவ பிண்டா³ய பவிஸந்தோ ஸரதி, யாவ உபசாரஸீமம் நாதிக்கமதி, தாவ யா போ⁴ஜனஸாலாய பகதிட்டி²திகா, தஸ்ஸாயேவ வஸேன கா³ஹேதப்³ப³ம். ஸசேபி உபசாரஸீமம் அதிக்கந்தா பி⁴க்கூ² ச உபசாரஸீமட்ட²கேஹி ஏகாப³த்³தா⁴ ஹோந்தி, அஞ்ஞமஞ்ஞம் த்³வாத³ஸஹத்த²ந்தரம் அவிஜஹித்வா க³ச்ச²ந்தி, பகதிட்டி²திகாய வஸேன கா³ஹேதப்³ப³ம். பி⁴க்கூ²னம் பன தாதி³ஸே ஏகாப³த்³தே⁴ அஸதி ப³ஹிஉபசாரஸீமாய யஸ்மிம் டா²னே ஸரதி, தத்த² நவம் டி²திகம் கத்வா கா³ஹேதப்³ப³ம். அந்தோகா³மே ஆஸனஸாலாய ஸரந்தேன ஆஸனஸாலாய டி²திகாய கா³ஹேதப்³ப³ம். யத்த² கத்த²சி ஸரித்வா கா³ஹேதப்³ப³மேவ, அகா³ஹேதும் ந வட்டதி. ந ஹி ஏதம் து³தியதி³வஸே லப்³ப⁴தீதி.

ஸசே ஸகவிஹாரதோ அஞ்ஞம் விஹாரம் க³ச்ச²ந்தே பி⁴க்கூ² தி³ஸ்வா கோசி உத்³தே³ஸப⁴த்தம் உத்³தி³ஸாபேதி, யாவ அந்தோஉபசாரே வா உபசாரஸீமட்ட²கேஹி ஸத்³தி⁴ம் வுத்தனயேன ஏகாப³த்³தா⁴ வா ஹோந்தி, தாவ ஸகவிஹாரே டி²திகாவஸேனேவ கா³ஹேதப்³ப³ம். ப³ஹிஉபசாரே டி²தானம் தி³ன்னம் பன ‘‘ஸங்க⁴தோ ப⁴ந்தே ஏத்தகே நாம பி⁴க்கூ² உத்³தி³ஸதா²’’தி வுத்தே ஸம்பத்தானம் கா³ஹேதப்³ப³ம். தத்த² த்³வாத³ஸஹத்த²ந்தரம் அவிஜஹித்வா ஏகாப³த்³த⁴னயேன தூ³ரே டி²தாபி ஸம்பத்தாயேவாதி வேதி³தப்³ப³ம். ஸசே யம் விஹாரம் க³ச்ச²ந்தி, தத்த² பவிட்டா²னம் ஆரோசேந்தி, தஸ்ஸ விஹாரஸ்ஸ டி²திகாவஸேன கா³ஹேதப்³ப³ம். ஸசேபி கா³மத்³வாரே வா வீதி²யம் வா சதுக்கே வா அந்தரக⁴ரே வா பி⁴க்கூ² தி³ஸ்வா கோசி ஸங்கு⁴த்³தே³ஸம் ஆரோசேதி, தஸ்மிம் தஸ்மிம் டா²னே அந்தோஉபசாரக³தானம் கா³ஹேதப்³ப³ம்.

க⁴ரூபசாரோ சேத்த² ‘‘ஏகம் க⁴ரம் ஏகூபசாரம், ஏகம் க⁴ரம் நானூபசாரம், நானாக⁴ரம் ஏகூபசாரம், நானாக⁴ரம் நானூபசார’’ந்தி இமேஸம் வஸேன வேதி³தப்³போ³. தத்த² யம் ஏககுலஸ்ஸ க⁴ரம் ஏகவளஞ்ஜம் ஹோதி, தம் ஸுப்பபாதபரிச்சே²த³ஸ்ஸ அந்தோ ஏகூபசாரம் நாம. தத்து²ப்பன்னோ உத்³தே³ஸலாபோ⁴ தஸ்மிம் உபசாரே பி⁴க்கா²சாரவத்தேனபி டி²தானம் ஸப்³பே³ஸம் பாபுணாதி, ஏதம் ‘‘ஏகம் க⁴ரம் ஏகூபசாரம்’’ நாம.

யம் பன ஏகம் க⁴ரம் த்³வின்னம் ப⁴ரியானம் ஸுக²விஹாரத்தா²ய மஜ்ஜே² பி⁴த்திம் உட்டா²பேத்வா நானாத்³வாரவளஞ்ஜம் கதம், தத்து²ப்பன்னோ உத்³தே³ஸலாபோ⁴ பி⁴த்திஅந்தரிகஸ்ஸ ந பாபுணாதி, தஸ்மிம் தஸ்மிம் டா²னே நிஸின்னஸ்ஸேவ பாபுணாதி, ஏதம் ‘‘ஏகம் க⁴ரம் நானூபசாரம்’’ நாம.

யஸ்மிம் பன க⁴ரே ப³ஹூ பி⁴க்கூ² நிமந்தேத்வா அந்தோகே³ஹதோ பட்டா²ய ஏகாப³த்³தே⁴ கத்வா படிவிஸ்ஸகக⁴ரானிபி பூரேத்வா நிஸீதா³பேந்தி, தத்து²ப்பன்னோ உத்³தே³ஸலாபோ⁴ ஸப்³பே³ஸம் பாபுணாதி. யம்பி நானாகுலஸ்ஸ நிவேஸனம் மஜ்ஜே² பி⁴த்திம் அகத்வா ஏகத்³வாரேனேவ வளஞ்ஜந்தி, தத்ராபி ஏஸேவ நயோ. ஏதம் ‘‘நானாக⁴ரம் ஏகூபசாரம்’’ நாம.

யோ பன நானானிவேஸனேஸு நிஸின்னானம் பி⁴க்கூ²னம் உத்³தே³ஸலாபோ⁴ உப்பஜ்ஜதி, கிஞ்சாபி பி⁴த்திச்சி²த்³தே³ன பி⁴க்கூ² தி³ஸ்ஸந்தி, தஸ்மிம் தஸ்மிம் நிவேஸனே நிஸின்னானம்யேவ பாபுணாதி, ஏதம் ‘‘நானாக⁴ரம் நானூபசாரம்’’ நாம.

யோ பன கா³மத்³வாரவீதி²சதுக்கேஸு அஞ்ஞதரஸ்மிம் டா²னே உத்³தே³ஸப⁴த்தம் லபி⁴த்வா அஞ்ஞஸ்மிம் பி⁴க்கு²ஸ்மிம் அஸதி அத்தனோவ பாபுணாபேத்வா து³தியதி³வஸேபி தஸ்மிம்யேவ டா²னே அஞ்ஞம் லப⁴தி, தேன யம் அஞ்ஞம் நவகம் வா வுட்³ட⁴ம் வா பி⁴க்கு²ம் பஸ்ஸதி, தஸ்ஸ கா³ஹேதப்³ப³ம். ஸசே கோசி நத்தி², அத்தனோவ பாபேத்வா பு⁴ஞ்ஜிதப்³ப³ம்.

ஸசே ஆஸனஸாலாய நிஸீதி³த்வா காலம் படிமானேந்தேஸு பி⁴க்கூ²ஸு கோசி ஆக³ந்த்வா ‘‘ஸங்கு⁴த்³தே³ஸபத்தம் தே³த², உத்³தே³ஸபத்தம் தே³த², ஸங்க⁴தோ உத்³தி³ஸித்வா பத்தம் தே³த², ஸங்கி⁴கம் பத்தம் தே³தா²’’தி வா வத³தி, உத்³தே³ஸபத்தம் டி²திகாய கா³ஹேத்வா தா³தப்³ப³ம். ‘‘ஸங்கு⁴த்³தே³ஸபி⁴க்கு²ம் தே³த², ஸங்க⁴தோ உத்³தி³ஸித்வா பி⁴க்கு²ம் தே³த², ஸங்கி⁴கம் பி⁴க்கு²ம் தே³தா²’’தி வுத்தேபி ஏஸேவ நயோ.

உத்³தே³ஸகோ பனேத்த² பேஸலோ லஜ்ஜீ மேதா⁴வீ இச்சி²தப்³போ³, தேன திக்க²த்தும் டி²திகம் புச்சி²த்வா ஸசே கோசி டி²திகம் ஜானந்தோ நத்தி², தே²ராஸனதோ கா³ஹேதப்³ப³ம். ஸசே பன ‘‘அஹம் ஜானாமி, த³ஸவஸ்ஸேன லத்³த⁴’’ந்தி கோசி ப⁴ணதி, ‘‘அத்தா²வுஸோ, த³ஸவஸ்ஸா பி⁴க்கூ²’’தி புச்சி²தப்³ப³ம். ஸசே தஸ்ஸ ஸுத்வா ‘‘த³ஸவஸ்ஸம்ஹ த³ஸவஸ்ஸம்ஹா’’தி ப³ஹூ ஆக³ச்ச²ந்தி, ‘‘துய்ஹம் பாபுணாதி, துய்ஹம் பாபுணாதீ’’தி அவத்வா ‘‘ஸப்³பே³ அப்பஸத்³தா³ ஹோதா²’’தி வத்வா படிபாடியா ட²பேதப்³பா³. ட²பேத்வா ‘‘கதி இச்ச²தா²’’தி உபாஸகோ புச்சி²தப்³போ³. ‘‘ஏத்தகே நாம, ப⁴ந்தே, பி⁴க்கூ²’’தி வுத்தே ‘‘துய்ஹம் பாபுணாதி, துய்ஹம் பாபுணாதீ’’தி அவத்வா ஸப்³ப³னவகஸ்ஸ வஸ்ஸக்³க³ஞ்ச உது ச தி³வஸபா⁴கோ³ ச சா²யா ச புச்சி²தப்³பா³. ஸசே சா²யாயபி புச்சி²யமானாய அஞ்ஞோ வுட்³ட⁴தரோ ஆக³ச்ச²தி, தஸ்ஸ தா³தப்³ப³ம். அத² சா²யம் புச்சி²த்வா ‘‘துய்ஹம் பாபுணாதீ’’தி வுத்தே வுட்³ட⁴தரோ ஆக³ச்ச²தி, ந லப⁴தி. கதா²பபஞ்சேன ஹி நிஸின்னஸ்ஸாபி நித்³தா³யந்தஸ்ஸாபி கா³ஹிதம் ஸுக்³கா³ஹிதம், அதிக்கந்தம் ஸுஅதிக்கந்தம், பா⁴ஜனீயப⁴ண்ட³ஞ்ஹி நாமேதம் ஸம்பத்தஸ்ஸேவ பாபுணாதி, தத்த² ஸம்பத்தபா⁴வோ உபசாரேன பரிச்சி²ந்தி³தப்³போ³. ஆஸனஸாலாய ச அந்தோபரிக்கே²போ உபசாரோ, தஸ்மிம் டி²தஸ்ஸ லாபோ⁴ பாபுணாதீதி.

கோசி ஆஸனஸாலதோ அட்ட² உத்³தே³ஸபத்தே ஆஹராபேத்வா ஸத்த பத்தே பணீதபோ⁴ஜனானம் ஏகம் உத³கஸ்ஸ பூரேத்வா ஆஸனஸாலாயம் பஹிணாதி, க³ஹேத்வா ஆக³தா கிஞ்சி அவத்வா பி⁴க்கூ²னம் ஹத்தே²ஸு பதிட்டா²பேத்வா பக்கமந்தி. யேன யம் லத்³த⁴ம், தஸ்ஸேவ தம் ஹோதி. யேன பன உத³கம் லத்³த⁴ம், தஸ்ஸ அதிக்கந்தம்பி டி²திகம் ட²பேத்வா அஞ்ஞம் உத்³தே³ஸப⁴த்தம் கா³ஹேதப்³ப³ம். தஞ்ச லூக²ம் வா லப⁴து பணீதம் வா திசீவரபரிவாரம் வா, தஸ்ஸேவேதம். ஈதி³ஸோ ஹிஸ்ஸ புஞ்ஞவிஸேஸோ. உத³கம் பன யஸ்மா ஆமிஸம் ந ஹோதி, தஸ்மா அஞ்ஞம் உத்³தே³ஸப⁴த்தம் லப்³ப⁴தி.

ஸசே பன தே க³ஹேத்வா ஆக³தா ‘‘இத³ம் கிர ப⁴ந்தே ஸப்³ப³ம் பா⁴ஜேத்வா பு⁴ஞ்ஜதா²’’தி வத்வா க³ச்ச²ந்தி, ஸப்³பே³ஹி பா⁴ஜேத்வா பு⁴ஞ்ஜித்வா உத³கம் பாதப்³ப³ம். ஸங்க⁴தோ உத்³தி³ஸித்வா ‘‘அட்ட² மஹாதே²ரே தே³த², மஜ்ஜி²மே தே³த², நவகே தே³த², பரிபுண்ணவஸ்ஸஸாமணேரே தே³த², மஜ்ஜி²மபா⁴ணகாத³யோ தே³த², மய்ஹம் ஞாதிபி⁴க்கூ² தே³தா²’’தி வத³ந்தஸ்ஸ பன ‘‘உபாஸக, த்வம் ஏவம் வத³ஸி, டி²திகாய பன தேஸம் ந பாபுணாதீ’’தி வத்வா டி²திகாவஸேனேவ தா³தப்³பா³. த³ஹரஸாமணேரேஹி பன உத்³தே³ஸப⁴த்தேஸு லத்³தே⁴ஸு ஸசே தா³யகானம் க⁴ரே மங்க³லம் ஹோதி, ‘‘தும்ஹாகம் ஆசரியுபஜ்ஜா²யே பேஸேதா²’’தி வத்தப்³ப³ம்.

யஸ்மிம் பன உத்³தே³ஸப⁴த்தே பட²மபா⁴கோ³ ஸாமணேரானம் பாபுணாதி, அனுபா⁴கோ³ மஹாதே²ரானம், ந தத்த² ஸாமணேரா ‘‘மயம் பட²மபா⁴க³ம் லபி⁴ம்ஹா’’தி புரதோ க³ந்தும் லப⁴ந்தி, யதா²படிபாடியா ஏவ க³ந்தப்³ப³ம். ‘‘ஸங்க⁴தோ உத்³தி³ஸித்வா ‘தும்ஹே ஏதா²’தி வுத்தே ‘மய்ஹம் அஞ்ஞதா³பி ஜானிஸ்ஸஸி, டி²திகா பன ஏவம் க³ச்ச²தீ’’’தி டி²திகாவஸேனேவ கா³ஹேதப்³ப³ம். அத² ‘‘ஸங்கு⁴த்³தே³ஸபத்தம் தே³தா²’’தி வத்வா அகா³ஹிதேயேவ பத்தே யஸ்ஸ கஸ்ஸசி பத்தம் க³ஹேத்வா பூரேத்வா ஆஹரதி, ஆஹடம்பி டி²திகாய ஏவ கா³ஹேதப்³ப³ம்.

ஏகோ ‘‘ஸங்கு⁴த்³தே³ஸபத்தம் ஆஹரா’’தி பேஸிதோ ‘‘ப⁴ந்தே, ஏகம் பத்தம் தே³த², நிமந்தனப⁴த்தம் ஆஹரிஸ்ஸாமீ’’தி வத³தி, ஸோ சே உத்³தே³ஸப⁴த்தக⁴ரதோ அயம் ஆக³தோதி ஞத்வா பி⁴க்கூ²ஹி ‘‘நனு த்வம் அஸுகக⁴ரதோ ஆக³தோ’’தி வுத்தோ ‘‘ஆம, ப⁴ந்தே, ந நிமந்தனப⁴த்தம், உத்³தே³ஸப⁴த்த’’ந்தி ப⁴ணதி, டி²திகாய க³ஹேதப்³ப³ம். யோ பன ‘‘ஏகம் பத்தம் ஆஹரா’’தி வுத்தோ ‘‘‘கி’ந்தி வத்வா ஆஹராமீ’’தி வத்வா ‘‘யதா² தே ருச்சதீ’’தி வுத்தோ ஆக³ச்ச²தி, அயம் விஸ்ஸட்ட²தூ³தோ நாம. உத்³தே³ஸபத்தம் வா படிபாடிபத்தம் வா புக்³க³லிகபத்தம் வா யம் இச்ச²தி, தம் தஸ்ஸ தா³தப்³ப³ம். ஏகோ பா³லோ அப்³யத்தோ ‘‘உத்³தே³ஸபத்தம் ஆஹரா’’தி பேஸிதோ வத்தும் ந ஜானாதி, துண்ஹீபூ⁴தோ திட்ட²தி, ஸோ ‘‘கஸ்ஸ ஸந்திகம் ஆக³தோஸீ’’தி வா ‘‘கஸ்ஸ பத்தம் ஹரிஸ்ஸஸீ’’தி வா ந வத்தப்³போ³. ஏவஞ்ஹி வுத்தோ புச்சா²ஸபா⁴கே³ன ‘‘தும்ஹாகம் ஸந்திகம் ஆக³தோம்ஹீ’’தி ‘‘தும்ஹாகம் பத்தம் ஹரிஸ்ஸாமீ’’தி வா வதே³ய்ய, ததோ தம் பி⁴க்கு²ம் அஞ்ஞே பி⁴க்கூ² ஜிகு³ச்ச²ந்தா ந ஓலோகேய்யும். ‘‘குஹிம் க³ச்ச²ஸி, கிம் கரோந்தோ ஆஹிண்ட³ஸீ’’தி பன வத்தப்³போ³. தஸ்ஸ ‘‘உத்³தே³ஸபத்தத்தா²ய ஆக³தோம்ஹீ’’தி வத³ந்தஸ்ஸ கா³ஹேத்வா பத்தோ தா³தப்³போ³.

ஏகா கூடட்டி²திகா நாம ஹோதி. ரஞ்ஞோ வா ஹி ராஜமஹாமத்தஸ்ஸ வா கே³ஹே அதிபணீதானி அட்ட² உத்³தே³ஸப⁴த்தானி நிச்சம் தி³ய்யந்தி, தானி ஏகசாரிகப⁴த்தானி கத்வா பி⁴க்கூ² விஸும் டி²திகாய பரிபு⁴ஞ்ஜந்தி. ஏகச்சே பி⁴க்கூ² ‘‘ஸ்வே தா³னி அம்ஹாகம் பாபுணிஸ்ஸந்தீ’’தி அத்தனோ டி²திகம் ஸல்லக்கே²த்வா க³தா, தேஸு அனாக³தேஸுயேவ அஞ்ஞே ஆக³ந்துகா பி⁴க்கூ² ஆக³ந்த்வா ஆஸனஸாலாய நிஸீத³ந்தி; தங்க²ணஞ்ஞேவ ராஜபுரிஸா ஆக³ந்த்வா ‘‘பணீதப⁴த்தபத்தே தே³தா²’’தி வத³ந்தி. ஆக³ந்துகா டி²திகம் அஜானந்தா கா³ஹேந்தி. தங்க²ணஞ்ஞேவ ச டி²திகம் ஜானனகபி⁴க்கூ² ஆக³ந்த்வா ‘‘கிம் கா³ஹேதா²’’தி வத³ந்தி. ‘‘ராஜகே³ஹே பணீதப⁴த்த’’ந்தி. ‘‘கதிவஸ்ஸதோ பட்டா²யா’’தி? ‘‘ஏத்தகவஸ்ஸதோ நாமா’’தி. ‘‘மா கா³ஹேதா²’’தி நிவாரேத்வா டி²திகாய கா³ஹேதப்³ப³ம். கா³ஹிதே ஆக³தேஹிபி பத்ததா³னகாலே ஆக³தேஹிபி தி³ன்னகாலே ஆக³தேஹிபி ராஜகே³ஹதோ பத்தே பூரேத்வா ஆஹடகாலே ஆக³தேஹிபி ராஜா ‘‘அஜ்ஜ பி⁴க்கூ²யேவ ஆக³ச்ச²ந்தூ’’தி பேஸேத்வா பி⁴க்கூ²னம்யேவ ஹத்தே² பிண்ட³பாதம் தே³தி; ஏவம் தி³ன்னபிண்ட³பாதம் க³ஹேத்வா ஆக³தகாலே ஆக³தேஹிபி டி²திகம் ஜானனகபி⁴க்கூ²ஹி ‘‘மா பு⁴ஞ்ஜித்தா²’’தி வாரேத்வா டி²திகாயமேவ கா³ஹேதப்³ப³ம்.

அத² நே ராஜா போ⁴ஜேத்வா பத்தேபி நேஸம் பூரேத்வா தே³தி, யம் ஆஹடம் தம் டி²திகாய கா³ஹேதப்³ப³ம். ஸசே பன ‘‘மா துச்ச²ஹத்தா² க³ச்ச²ந்தூ’’தி தோ²கமேவ பத்தேஸு பக்கி²த்தம் ஹோதி, தம் ந கா³ஹேதப்³ப³ம். அத² பு⁴ஞ்ஜித்வா துச்ச²பத்தாவ ஆக³ச்ச²ந்தி, யம் தேஹி பு⁴த்தம், தம் நேஸம் கீ³வா ஹோதீதி மஹாஸுமத்தே²ரோ ஆஹ. மஹாபது³மத்தே²ரோ பனாஹ – ‘‘கீ³வாகிச்சம் ஏத்த² நத்தி², டி²திகம் பன அஜானந்தேஹி யாவ ஜானனகா ஆக³ச்ச²ந்தி, தாவ நிஸீதி³தப்³ப³ம் ஸியா; ஏவம் ஸந்தேபி பு⁴த்தம் ஸுபு⁴த்தம், இதா³னி பத்தட்டா²னேன கா³ஹேதப்³ப³’’ந்தி.

ஏகோ திசீவரபரிவாரோ ஸதக்³க⁴னகோ பிண்ட³பாதோ அவஸ்ஸிகஸ்ஸ பி⁴க்கு²னோ பத்தோ, விஹாரே ச ‘‘ஏவரூபோ பிண்ட³பாதோ அவஸ்ஸிகஸ்ஸ பத்தோ’’தி லிகி²த்வா ட²பேஸும். அத² ஸட்டி²வஸ்ஸச்சயேன அஞ்ஞோ ததா²ரூபோ பிண்ட³பாதோ உப்பன்னோ, அயம் கிம் அவஸ்ஸிகட்டி²திகாய கா³ஹேதப்³போ³, உதா³ஹு ஸட்டி²வஸ்ஸிகட்டி²திகாயாதி. ஸட்டி²வஸ்ஸிகட்டி²திகாயாதி வுத்தம், அயஞ்ஹி பி⁴க்கு² டி²திகம் க³ஹேத்வாயேவ வட்³டி⁴தோதி.

ஏகோ உத்³தே³ஸப⁴த்தம் பு⁴ஞ்ஜித்வா ஸாமணேரோ ஜாதோ, புன தம் ப⁴த்தம் ஸாமணேரட்டி²திகாய பத்தம் க³ண்ஹிதும் லப⁴தி. அயம் கிர அந்தராப⁴ட்ட²கோ நாம. யோ பன பரிபுண்ணவஸ்ஸோ ஸாமணேரோ ‘‘ஸ்வே உத்³தே³ஸப⁴த்தம் லபி⁴ஸ்ஸதீ’’தி அஜ்ஜேவ உபஸம்பஜ்ஜதி, அதிக்கந்தா தஸ்ஸ டி²திகா. ஏகஸ்ஸ பி⁴க்கு²னோ உத்³தே³ஸப⁴த்தம் பத்தம், பத்தோ சஸ்ஸ ந துச்சோ² ஹோதி, ஸோ அஞ்ஞஸ்ஸ ஸமீபே நிஸின்னஸ்ஸ பத்தம் தா³பேதி, தஞ்சே தே²ய்யாய ஹரந்தி, கீ³வா ஹோதி. ஸசே பன ஸோ பி⁴க்கு² ‘‘மய்ஹம் பத்தம் த³ம்மீ’’தி ஸயமேவ தே³தி, அஸ்ஸ கீ³வா ந ஹோதி. அதா²பி தேன ப⁴த்தேன அனத்தி²கோ ஹுத்வா ‘‘அலம் மய்ஹம், தவேதம் ப⁴த்தம் த³ம்மி, பத்தம் பேஸேத்வா ஆஹராபேஹீ’’தி அஞ்ஞம் வத³தி, யம் ததோ ஆஹரீயதி ஸப்³ப³ம் பத்தஸாமிகஸ்ஸ ஹோதி. பத்தஞ்சே தே²ய்யாய ஹரந்தி, ஸுஹடோ; ப⁴த்தஸ்ஸ தி³ன்னத்தா கீ³வா ந ஹோதி.

விஹாரே த³ஸ பி⁴க்கூ² ஹோந்தி, தேஸு நவ பிண்ட³பாதிகா, ஏகோ ஸாதி³யனகோ. ‘‘த³ஸ உத்³தே³ஸபத்தே தே³தா²’’தி வுத்தே பிண்ட³பாதிகா க³ஹேதும் ந இச்ச²ந்தி. இதரோ பி⁴க்கு² ‘‘ஸப்³பா³னி மய்ஹம் பாபுணந்தீ’’தி க³ண்ஹாதி, டி²திகா ந ஹோதி. ஏகேகம் சே பாபேத்வா க³ண்ஹாதி, டி²திகா திட்ட²தி. ஏவம் கா³ஹேத்வா த³ஸஹிபி பத்தேஹி ஆஹராபேத்வா ‘‘ப⁴ந்தே, மய்ஹம் ஸங்க³ஹம் கரோதா²’’தி நவ பத்தே பிண்ட³பாதிகானம் தே³தி, பி⁴க்கு²த³த்தியம் நாமேதம், க³ண்ஹிதும் வட்டதி.

ஸசே ஸோ உபாஸகோ ‘‘ப⁴ந்தே, க⁴ரம் ஆக³ந்தப்³ப³’’ந்தி வத³தி, ஸோ ச பி⁴க்கு² தே பி⁴க்கூ² ‘‘ஏத², ப⁴ந்தே, மய்ஹம் ஸஹாயா ஹோதா²’’தி தஸ்ஸ க⁴ரம் க³ச்ச²தி. யம் தத்த² லப⁴தி, ஸப்³ப³ம் தஸ்ஸேவ ஹோதி. இதரே தேன தி³ன்னம் லப⁴ந்தி. அத² நேஸம் க⁴ரேயேவ நிஸீதா³பேத்வா த³க்கி²ணோத³கம் த³த்வா யாகு³க²ஜ்ஜகாதீ³னி தே³ந்தி, ‘‘ப⁴ந்தே, யம் மனுஸ்ஸா தே³ந்தி, தம் க³ண்ஹதா²’’தி தஸ்ஸ பி⁴க்கு²னோ வசனேனேவ இதரேஸம் வட்டதி. பு⁴த்தாவீனம் பத்தே பூரேத்வா க³ண்ஹித்வா க³மனத்தா²ய தே³ந்தி, ஸப்³ப³ம் தஸ்ஸேவ பி⁴க்கு²னோ ஹோதி, தேன தி³ன்னம் இதரேஸம் வட்டதி.

யதி³ பன தே விஹாரேயேவ தேன பி⁴க்கு²னா ‘‘ப⁴ந்தே, மய்ஹம் பி⁴க்க²ம் க³ண்ஹத², மனுஸ்ஸானஞ்ச வசனம் காதும் வட்டதீ’’தி வுத்தா க³ச்ச²ந்தி, யம் தத்த² பு⁴ஞ்ஜந்தி சேவ நீஹரந்தி ச, ஸப்³ப³ம் தம் தஸ்ஸேவ ஸந்தகம். அதா²பி ‘‘மய்ஹம் பி⁴க்க²ம் க³ண்ஹதா²’’தி அவுத்தா ‘‘மனுஸ்ஸானம் வசனம் காதும் வட்டதீ’’தி க³ச்ச²ந்தி, தத்ர சே ஏகஸ்ஸ மது⁴ரேன ஸரேன அனுமோத³னம் கரோந்தஸ்ஸ ஸுத்வா தே²ரானஞ்ச உபஸமே பஸீதி³த்வா ப³ஹும் ஸமணபரிக்கா²ரம் தே³ந்தி, அயம் தே²ரேஸு பஸாதே³ன உப்பன்னோ ‘‘அகதபா⁴கோ³’’ நாம, தஸ்மா ஸப்³பே³ஸம் பாபுணாதி.

ஏகோ ஸங்க⁴தோ உத்³தி³ஸாபேத்வா டி²திகாய கா³ஹிதம் பத்தம் ஹரித்வா பணீதஸ்ஸ கா²த³னீயபோ⁴ஜனீயஸ்ஸ பூரேத்வா ஆஹரித்வா ‘‘இமம், ப⁴ந்தே, ஸப்³போ³ ஸங்கோ⁴ பரிபு⁴ஞ்ஜதூ’’தி தே³தி, ஸப்³பே³ஹி பா⁴ஜேத்வா பரிபு⁴ஞ்ஜிதப்³ப³ம். பத்தஸாமிகஸ்ஸ பன அதிக்கந்தம்பி டி²திகம் ட²பேத்வா அஞ்ஞம் உத்³தே³ஸப⁴த்தம் தா³தப்³ப³ம். அத² ‘‘பட²மம்யேவ ஸப்³ப³ம் ஸங்கி⁴கம் பத்தம் தே³தா²’’தி வத³தி, ஏகஸ்ஸ லஜ்ஜிபி⁴க்கு²னோ ஸந்தகோ பத்தோ தா³தப்³போ³. ஆஹரித்வா ச ‘‘ஸப்³போ³ ஸங்கோ⁴ பரிபு⁴ஞ்ஜதூ’’தி வுத்தே பா⁴ஜேத்வா பரிபு⁴ஞ்ஜிதப்³ப³ம்.