5. கு²த்³த³கவத்து²க்க²ந்த⁴கம்

கு²த்³த³கவத்து²கதா²

243. கு²த்³த³கவத்து²க்க²ந்த⁴கே – மல்லமுட்டி²காதி முட்டி²கமல்லா. கா³மமுத்³த³வாதி ச²விராக³மண்ட³னானுயுத்தா நாக³ரிகமனுஸ்ஸா. கா³மமோத்³த³வாதிபி பாடோ²; ஏஸேவத்தோ². த²ம்பே⁴தி ந்ஹானதித்தே² நிக²ணித்வா ட²பிதத்த²ம்பே⁴.

குட்டேதி இட்ட²காஸிலாதா³ருகுட்டானம் அஞ்ஞதரஸ்மிம். அட்டானே ந்ஹாயந்தீதி ஏத்த² அட்டானம் நாம ருக்க²ம் ப²லகம் விய தச்சே²த்வா அட்ட²பதா³காரேன ராஜியோ சி²ந்தி³த்வா ந்ஹானதித்தே² நிக²ணந்தி, தத்த² சுண்ணானி ஆகிரித்வா மனுஸ்ஸா காயம் க⁴ம்ஸந்தி. க³ந்த⁴ப்³ப³ஹத்த²கேனாதி ந்ஹானதித்தே² ட²பிதேன தா³ருமயஹத்தே²ன, தேன கிர சுண்ணானி க³ஹேத்வா மனுஸ்ஸா ஸரீரம் க⁴ம்ஸந்தி. குருவிந்த³கஸுத்தியாதி குருவிந்த³கபாஸாணசுண்ணானி லாகா²ய ப³ந்தி⁴த்வா கதகு³ளிககலாபகோ வுச்சதி, தம் உபோ⁴ஸு அந்தேஸு க³ஹேத்வா ஸரீரம் க⁴ம்ஸந்தி. விக்³க³ய்ஹ பரிகம்மம் காராபேந்தீதி அஞ்ஞமஞ்ஞம் ஸரீரேன ஸரீரம் க⁴ம்ஸந்தி. மல்லகம் நாம மகரத³ந்தகே சி²ந்தி³த்வா மல்லகமூலஸண்டா²னேன கதம் மல்லகந்தி வுச்சதி, இத³ம் கி³லானஸ்ஸாபி ந வட்டதி.

244. அகதமல்லகம் நாம த³ந்தே அச்சி²ந்தி³த்வா கதம், இத³ம் அகி³லானஸ்ஸேவ ந வட்டதி; இட்ட²காக²ண்ட³ம் பன கபாலக²ண்ட³ம் வா வட்டதி. உக்காஸிகந்தி வத்த²வட்டிம்; தஸ்மா ந்ஹாயந்தஸ்ஸ யஸ்ஸ கஸ்ஸசி ந்ஹானஸாடகவட்டியா பிட்டி²ம் க⁴ம்ஸிதும் வட்டதி. புது²பாணிகந்தி ஹத்த²பரிகம்மம் வுச்சதி, தஸ்மா ஸப்³பே³ஸம் ஹத்தே²ன பிட்டி²பரிகம்மம் காதும் வட்டதி.

245. வல்லிகாதி கண்ணதோ நிக்க²ந்தமுத்தோலம்ப³காதீ³னம் ஏதம் அதி⁴வசனம்; ந கேவலஞ்ச வல்லிகா ஏவ, யம்கிஞ்சி கண்ணபிளந்த⁴னம் அந்தமஸோ தாலபண்ணம்பி ந வட்டதி. பாமங்க³ந்தி யம்கிஞ்சி பலம்ப³கஸுத்தம். கண்ட²ஸுத்தகந்தி யம்கிஞ்சி கீ³வூபக³ஆப⁴ரணம். கடிஸுத்தகந்தி யம்கிஞ்சி கடிபிளந்த⁴னம் அந்தமஸோ ஸுத்ததந்துமத்தம்பி. ஓவட்டிகந்தி வலயம். காயூராதீ³னி பாகடானேவ, அக்க²கானம் ஹேட்டா² பா³ஹாப⁴ரணம் யம்கிஞ்சி ஆப⁴ரணம் ந வட்டதி.

246. து³மாஸிகம் வா து³வங்கு³லம் வாதி ஏத்த² ஸசே கேஸா அந்தோத்³வேமாஸே த்³வங்கு³லம் பாபுணந்தி, அந்தோத்³வேமாஸேவ சி²ந்தி³தப்³பா³. த்³வங்கு³லேஹி அதிக்காமேதும் ந வட்டதி. ஸசேபி ந தீ³கா⁴, த்³வேமாஸதோ ஏகதி³வஸம்பி அதிக்காமேதும் ந வட்டதியேவ; ஏவமயம் உப⁴யேனபி உக்கட்ட²பரிச்சே²தோ³வ வுத்தோ, ததோ ஓரம் பன நவட்டனபா⁴வோ நாம நத்தி².

கோச்சே²ன ஓஸண்டே²ந்தீதி கோச்சே²ன ஓலிகி²த்வா ஸன்னிஸீதா³பேந்தி. ப²ணகேனாதி த³ந்தமயாதீ³ஸு யேன கேனசி. ஹத்த²ப²ணகேனாதி ஹத்தே²னேவ ப²ணகிச்சம் கரோந்தா அங்கு³லீஹி ஓஸண்டே²ந்தி. ஸித்த²தேலகேனாதி மது⁴ஸித்த²கனிய்யாஸாதீ³ஸு யேன கேனசி சிக்கலேன. உத³கதேலகேனாதி உத³கமிஸ்ஸகேன தேலேன. மண்ட³னத்தா²ய ஸப்³ப³த்த² து³க்கடம், உத்³த⁴லோமேன பன அனுலோமனிபாதனத்த²ம் ஹத்த²ம் தேமேத்வா ஸீஸம் புஞ்சி²தப்³ப³ம். உண்ஹாபி⁴தத்தரஜஸிரானம்பி அல்லஹத்தே²ன புஞ்சி²தும் வட்டதி.

247. ந பி⁴க்க²வே ஆதா³ஸே வா உத³கபத்தே வாதி ஏத்த² கம்ஸபத்தாதீ³னிபி யேஸு முக²னிமித்தம் பஞ்ஞாயதி, ஸப்³பா³னி ஆதா³ஸஸங்க²மேவ க³ச்ச²ந்தி. கஞ்ஜியாதீ³னிபி ச உத³கபத்தஸங்க²மேவ. தஸ்மா யத்த² கத்த²சி ஓலோகேந்தஸ்ஸ து³க்கடம். ஆபா³த⁴பச்சயாதி ‘‘ஸஞ்ச²வி நு கோ² மே வணோ, உதா³ஹு ந தாவா’’தி ஜானனத்த²ம்; ‘‘ஜிண்ணோ நு கோ²ம்ஹி நோ’’தி ஏவம் ஆயுஸங்கா²ரம் ஓலோகனத்த²ம்பி வட்டதீதி வுத்தம்.

முக²ம் ஆலிம்பந்தீதி விப்பஸன்னச²விராக³கரேஹி முகா²லேபனேஹி ஆலிம்பந்தி. உம்மத்³தே³ந்தீதி நானாஉம்மத்³த³னேஹி உம்மத்³தே³ந்தி. சுண்ணேந்தீதி முக²சுண்ணகேன மக்கே²ந்தி. மனோஸிலிகாய முக²ம் லஞ்சே²ந்தீதி மனோஸிலாய திலகாதீ³னி லஞ்ச²னானி கரோந்தி, தானி ஹரிதாலாதீ³ஹிபி ந வட்டந்தியேவ. அங்க³ராகா³த³யோ பாகடாயேவ. ஸப்³ப³த்த² து³க்கடம்.

248. ந பி⁴க்க²வே நச்சம் வாதிஆதீ³ஸு யம்கிஞ்சி நச்சம் அந்தமஸோ மோரனச்சம்பி த³ஸ்ஸனாய க³ச்ச²ந்தஸ்ஸ து³க்கடம். ஸயம்பி நச்சந்தஸ்ஸ வா நச்சாபேந்தஸ்ஸ வா து³க்கடமேவ. கீ³தம்பி யம்கிஞ்சி நடகீ³தம் வா ஸாது⁴கீ³தம் வா அந்தமஸோ த³ந்தகீ³தம்பி ‘‘யம் கா³யிஸ்ஸாமா’’தி புப்³ப³பா⁴கே³ ஓகூஜந்தா கரோந்தி, ஏதம்பி ந வட்டதி. ஸயம் கா³யந்தஸ்ஸாபி கா³யாபேந்தஸ்ஸாபி து³க்கடமேவ. வாதி³தம்பி யம்கிஞ்சி ந வட்டதி. யம் பன நிட்டு²ப⁴ந்தோ வா ஸாஸங்கே வா டி²தோ அச்ச²ரிகம் வா போ²டேதி, பாணிம் வா பஹரதி, தத்த² அனாபத்தி. ஸப்³ப³ம் அந்தராராமே டி²தஸ்ஸ பஸ்ஸதோ அனாபத்தி. ‘‘பஸ்ஸிஸ்ஸாமீ’’தி விஹாரதோ விஹாரம் க³ச்ச²ந்தஸ்ஸ ஆபத்தியேவ. ஆஸனஸாலாய நிஸின்னோ பஸ்ஸதி, அனாபத்தி. ‘‘பஸ்ஸிஸ்ஸாமீ’’தி உட்ட²ஹித்வா க³ச்ச²தோ ஆபத்தி. வீதி²யம் ட²த்வா கீ³வம் பரிவத்தேத்வா பஸ்ஸதோபி ஆபத்தியேவ.

249. ஸரகுத்திந்தி ஸரகிரியம். ப⁴ங்கோ³ ஹோதீதி அலத்³த⁴ம் உப்பாதே³தும் ந ஸக்கோதி; லத்³த⁴ம் ஸமாபஜ்ஜிதும். பச்சி²மா ஜனதாதி அம்ஹாகம் ஆசரியாபி உபஜ்ஜா²யாபி ஏவம் கா³யிம்ஸூதி பச்சி²மோ ஜனோ தி³ட்டா²னுக³திம் ஆபஜ்ஜதி; ததே²வ கா³யதி. ந பி⁴க்க²வே ஆயதகேனாதி ஏத்த² ஆயதகோ நாம தம் தம் வத்தம் பி⁴ந்தி³த்வா அக்க²ரானி வினாஸேத்வா பவத்தோ. த⁴ம்மே பன ஸுத்தந்தவத்தம் நாம அத்தி², ஜாதகவத்தம் நாம அத்தி², கா³தா²வத்தம் நாம அத்தி², தம் வினாஸேத்வா அதிதீ³க⁴ம் காதும் ந வட்டதி. சதுரஸ்ஸேன வத்தேன பரிமண்ட³லானி பத³ப்³யஞ்ஜனானி த³ஸ்ஸேதப்³பா³னி. ஸரப⁴ஞ்ஞந்தி ஸரேன ப⁴ணனம். ஸரப⁴ஞ்ஞே கிர தரங்க³வத்ததோ⁴தகவத்தக³லிதவத்தாதீ³னி த்³வத்திம்ஸ வத்தானி அத்தி². தேஸு யம் இச்ச²தி, தம் காதும் லப⁴தி. ஸப்³பே³ஸம் பத³ப்³யஞ்ஜனம் அவினாஸேத்வா விகாரம் அகத்வா ஸமணஸாருப்பேன சதுரஸ்ஸேன நயேன பவத்தனம்யேவ லக்க²ணம்.

பா³ஹிரலோமிம் உண்ணிந்தி உண்ணலோமானி ப³ஹி கத்வா உண்ணபாவாரம் பாருபந்தி; ததா² தா⁴ரேந்தஸ்ஸ து³க்கடம். லோமானி அந்தோ கத்வா பாருபிதும் வட்டதி. ஸமணகப்பகதா² பூ⁴தகா³மஸிக்கா²பத³வண்ணனாயம் வுத்தா.

251. ந பி⁴க்க²வே அத்தனோ அங்க³ஜாதந்தி அங்க³ஜாதம் சி²ந்த³ந்தஸ்ஸேவ து²ல்லச்சயம். அஞ்ஞம் பன கண்ணனாஸாஅங்கு³லிஆதி³ம் யம்கிஞ்சி சி²ந்த³ந்தஸ்ஸ தாதி³ஸம் வா து³க்க²ம் உப்பாதே³ந்தஸ்ஸ து³க்கடம். அஹிகீடத³ட்டா²தீ³ஸு பன அஞ்ஞஆபா³த⁴பச்சயா வா லோஹிதம் வா மோசேந்தஸ்ஸ சி²ந்த³ந்தஸ்ஸ வா அனாபத்தி.

252. சந்த³னக³ண்டி² உப்பன்னா ஹோதீதி சந்த³னக⁴டிகா உப்பன்னா ஹோதி. ஸோ கிர உத்³த⁴ஞ்ச அதோ⁴ ச ஜாலானி பரிக்கி²பாபேத்வா க³ங்கா³ய நதி³யா கீளதி, தஸ்ஸ நதீ³ஸோதேன வுய்ஹமானா சந்த³னக³ண்டி² ஆக³ந்த்வா ஜாலே லக்³கா³, தமஸ்ஸ புரிஸா ஆஹரித்வா அத³ம்ஸு; ஏவம் ஸா உப்பன்னா ஹோதி. இத்³தி⁴பாடிஹாரியந்தி ஏத்த² விகுப்³ப³னித்³தி⁴பாடிஹாரியம் படிக்கி²த்தம், அதி⁴ட்டா²னித்³தி⁴ பன அப்படிக்கி²த்தாதி வேதி³தப்³பா³.

ந பி⁴க்க²வே ஸோவண்ணமயோ பத்தோதிஆதீ³ஸு ஸசேபி கி³ஹீ ப⁴த்தக்³கே³ ஸுவண்ணதட்டிகாதீ³ஸு ப்³யஞ்ஜனம் கத்வா உபனாமேந்தி, ஆமஸிதும்பி ந வட்டதி. ப²லிகமயகாசமயகம்ஸமயானி பன தட்டிகாதீ³னி பா⁴ஜனானி புக்³க³லிகபரிபோ⁴கே³னேவ ந வட்டந்தி, ஸங்கி⁴கபரிபோ⁴கே³ன வா கி³ஹிவிகடானி வா வட்டந்தி. ‘‘தம்ப³லோஹமயோபி பத்தோவ ந வட்டதி, தா²லகம் பன வட்டதீ’’தி இத³ம் ஸப்³ப³ம் குருந்தி³யம் வுத்தம். மணிமயோதி ஏத்த² பன இந்த³னீலாதி³மணிமயோ வுத்தோ. கம்ஸமயோதி ஏத்த² வட்டலோஹமயோபி ஸங்க³ஹிதோ.

253. லிகி²துந்தி தனுகரணத்தா²யேதம் வுத்தம். பகதிமண்ட³லந்தி மகரத³ந்தச்சி²ன்னகமண்ட³லமேவ.

254. ஆவட்டித்வாதி அஞ்ஞமஞ்ஞம் பஹரித்வா. பத்தாதா⁴ரகந்தி ஏத்த² ‘‘த³ந்தவல்லிவேத்தாதீ³ஹி கதே பூ⁴மிஆதா⁴ரகே தயோ, தா³ருஆதா⁴ரகே த்³வே பத்தே உபரூபரி ட²பேதும் வட்டதீ’’தி குருந்தி³யம் வுத்தம். மஹாஅட்ட²கதா²யம் பன வுத்தம் – ‘‘பூ⁴மிஆதா⁴ரகே திண்ணம் பத்தானம் அனோகாஸோ, த்³வே ட²பேதும் வட்டதி. தா³ருஆதா⁴ரகத³ண்டா³தா⁴ரகேஸுபி ஸுஸஜ்ஜிதேஸு ஏஸேவ நயோ. ப⁴மகோடிஸதி³ஸோ பன தா³ருஆதா⁴ரகோ தீஹி த³ண்ட³கேஹி ப³த்³தோ⁴ த³ண்ட³காதா⁴ரோ ச ஏகஸ்ஸபி பத்தஸ்ஸ அனோகாஸோ, தத்த² ட²பேத்வாபி ஹத்தே²ன க³ஹேத்வா ஏவ நிஸீதி³தப்³ப³ம். பூ⁴மியம் பன நிக்குஜ்ஜித்வா ஏகமேவ ட²பேதப்³ப³’’ந்தி.

மிட்³ட⁴ந்தேதி ஆலிந்த³கமிட்³டி⁴காதீ³னம் அந்தே. ஸசே பன பரிவத்தேத்வா தத்தே²வ பதிட்டா²தி, ஏவரூபாய வித்தி²ண்ணாய மிட்³டி⁴யா ட²பேதும் வட்டதி. பரிப⁴ண்ட³ந்தேதி பா³ஹிரபஸ்ஸே கதாய தனுகமிட்³டி⁴காய அந்தே. மிட்³டி⁴யம் வுத்தனயேனேவேத்தா²பி வினிச்ச²யோ வேதி³தப்³போ³.

சோளகந்தி யம் பத்த²ரித்வா பத்தோ ட²பீயதி; தஸ்மிம் பன அஸதி கடஸாரகே வா தட்டிகாய வா மத்திகாபரிப⁴ண்ட³கதாய பூ⁴மியா வா யத்த² ந து³ஸ்ஸதி, ததா²ரூபாய வாலிகாய வா ட²பேதும் வட்டதி. பம்ஸுரஜாதீ³ஸு பன க²ரபூ⁴மியம் வா ட²பேந்தஸ்ஸ து³க்கடம். பத்தமாளகம் இட்ட²காஹி வா தா³ரூஹி வா காதும் வட்டதி. பத்தகுண்டோ³லிகாதி மஹாமுக²குண்ட³ஸண்டா²னா ப⁴ண்ட³குக்க²லிகா வுச்சதி. யோ லக்³கே³ய்யாதி யத்த² கத்த²சி லக்³கே³ந்தஸ்ஸ து³க்கடமேவ. சீவரவம்ஸேபி ப³ந்தி⁴த்வா ட²பேதும் ந வட்டதி. ப⁴ண்ட³கட்ட²பனத்த²மேவ வா கதம் ஹோது நிஸீத³னஸயனத்த²ம் வா யத்த² கத்த²சி மஞ்சே வா பீடே² வா ட²பேந்தஸ்ஸ து³க்கடம், அஞ்ஞேன பன ப⁴ண்ட³கேன ஸத்³தி⁴ம் ப³ந்தி⁴த்வா ட²பேதும் வட்டதி. அடனியம் ப³ந்தி⁴த்வா ஓலம்பே³தும் வா வட்டதி, ப³ந்தி⁴த்வாபி உபரி ட²பேதும் ந வட்டதியேவ. ஸசே பன மஞ்சோ வா பீட²ம் வா உக்கி²பித்வா சீவரவம்ஸாதீ³ஸு அட்டகச²ன்னேன ட²பிதம் ஹோதி, தத்த² ட²பேதும் வட்டதி. அம்ஸவத்³த⁴னகேன அம்ஸகூடே லக்³கே³த்வா அங்கே ட²பேதும் வட்டதி. ச²த்தே ப⁴த்தபூரோபி அம்ஸகூடே லக்³கி³தபத்தோபி ட²பேதும் ந வட்டதி, ப⁴ண்ட³கேன பன ஸத்³தி⁴ம் ப³ந்தி⁴த்வா வா அட்டகம் கத்வா வா ட²பிதே யோ கோசி ட²பேதும் வட்டதி.

255. பத்தஹத்தே²னாதி ஏத்த² ந கேவலம் யஸ்ஸ பத்தோ ஹத்தே², ஸோ ஏவ பத்தஹத்தோ², ந கேவலஞ்ச கவாடமேவ பணாமேதும் ந லப⁴தி; அபிச கோ² பன ஹத்தே² வா பிட்டி²பாதே³ வா யத்த² கத்த²சி ஸரீராவயவே பத்தஸ்மிம் ஸதி ஹத்தே²ன வா பாதே³ன வா ஸீஸேன வா யேன கேனசி ஸரீராவயவேன கவாடம் வா பணாமேதும் க⁴டிகம் வா உக்கி²பிதும் ஸூசிம் வா குஞ்சிகாய அபாபுரிதும் ந லப⁴தி. அம்ஸகூடே பன பத்தம் லக்³கே³த்வா யதா²ஸுக²ம் அவாபுரிதும் லப⁴தி.

தும்ப³கடாஹந்தி லாபு³கடாஹம் வுச்சதி, தம் பரிஹரிதும் ந வட்டதி. லபி⁴த்வா பன தாவகாலிகம் பரிபு⁴ஞ்ஜிதும் வட்டதி. க⁴டிகடாஹேபி ஏஸேவ நயோ. க⁴டிகடாஹந்தி க⁴டிகபாலம். அபு⁴ம் மேதி உத்ராஸவசனமேதம். ஸப்³ப³பம்ஸுகூலிகேனாதி ஏத்த² சீவரஞ்ச மஞ்சபீட²ஞ்ச பம்ஸுகூலம் வட்டதி, அஜ்ஜோ²ஹரணீயம் பன தி³ன்னகமேவ க³ஹேதப்³ப³ம்.

சலகானீதி சப்³பே³த்வா அபவித்³தா⁴மிஸானி. அட்டி²கானீதி மச்ச²மம்ஸஅட்டி²கானி. உச்சி²ட்டோ²த³கந்தி முக²விக்கா²லனோத³கம். ஏதேஸு யம்கிஞ்சி பத்தேன நீஹரந்தஸ்ஸ து³க்கடம். பத்தம் படிக்³க³ஹம் கத்வா ஹத்த²ம் தோ⁴விதும்பி ந லப⁴தி. ஹத்த²தோ⁴தபாத³தோ⁴தஉத³கம்பி பத்தே ஆகிரித்வா நீஹரிதும் ந வட்டதி. அனுச்சி²ட்ட²ம் ஸுத்³த⁴பத்தம் உச்சி²ட்ட²ஹத்தே²ன க³ண்ஹிதும் ந வட்டதி, வாமஹத்தே²ன பனேத்த² உத³கம் ஆஸிஞ்சித்வா ஏகம் உத³கக³ண்டு³ஸம் க³ஹேத்வா உச்சி²ட்ட²ஹத்தே²ன க³ண்ஹிதும் வட்டதி. ஏத்தாவதாபி ஹி ஸோ உச்சி²ட்ட²பத்தோ ஹோதி, ஹத்த²ம் பன ப³ஹி உத³கேன விக்கா²லேத்வா க³ஹேதும் வட்டதி. மச்ச²மம்ஸப²லாப²லாதீ³னி கா²த³ந்தோ யம் தத்த² அட்டி²ம் வா சலகம் வா ச²ட்³டே³துகாமோ ஹோதி, தம் பத்தே ட²பேதும் ந லப⁴தி. யம் பன படிகா²தி³துகாமோ ஹோதி, தம் பத்தே ட²பேதும் லப⁴தி. அட்டி²ககண்டகாதீ³னி தத்தே²வ கத்வா ஹத்தே²ன லுஞ்சித்வா கா²தி³தும் வட்டதி. முக²தோ நீஹடம் பன யம்கிஞ்சி புன கா²தி³துகாமோ ஹோதி, தம் பத்தே ட²பேதும் ந லப⁴தி. ஸிங்கி³வேரனாளிகேரக²ண்டா³னி ட³ம்ஸித்வா புன ட²பேதும் லப⁴தி.

256. நமதகந்தி ஸத்த²கவேட²னகம் பிலோதிகக²ண்ட³ம். த³ண்ட³ஸத்த²கந்தி பிப்ப²லகம் வா அஞ்ஞம்பி வா யம்கிஞ்சி த³ண்ட³ம் யோஜேத்வா கதஸத்த²கம்.

கண்ணகிதா ஹோந்தீதி மலக்³க³ஹிதா ஹோந்தி. கிண்ணேன பூரேதுந்தி கிண்ணசுண்ணேன பூரேதும். ஸத்துயாதி ஹலித்³தி³மிஸ்ஸகேன பிட்ட²சுண்ணேன. ஸரிதகந்தி பாஸாணசுண்ணம் வுச்சதி; தேன பூரேதும் அனுஜானாமீதி அத்தோ². மது⁴ஸித்த²கேன ஸாரேதுந்தி மது⁴ஸித்த²கேன மக்கே²தும். ஸரிதகம் பரிபி⁴ஜ்ஜதீதி தம் மக்கி²தமது⁴ஸித்த²கம் பி⁴ஜ்ஜதி. ஸரிதஸிபாடிகந்தி மது⁴ஸித்த²கபிலோதிகம்; ஸத்த²கோஸகஸிபாடியா பன ஸரிதஸிபாடிகாய அனுலோமாதி குருந்தி³யம் வுத்தம். கதி²னந்தி நிஸ்ஸேணிம்பி தத்த² அத்த²ரிதப்³ப³கடஸாரககிலஞ்ஜானம் அஞ்ஞதரம்பி. கதி²னரஜ்ஜுந்தி யாய து³பட்டசீவரம் ஸிப்³ப³ந்தா கதி²னே சீவரம்பி ப³ந்த⁴ந்தி. கதி²னம் நப்பஹோதீதி தீ³க⁴ஸ்ஸ பி⁴க்கு²னோ பமாணேன கதம் கதி²னம்; தத்த² ரஸ்ஸஸ்ஸ பி⁴க்கு²னோ சீவரம் பத்த²ரியமானம் நப்பஹோதி, அந்தோயேவ ஹோதி; த³ண்ட³கே ந பாபுணாதீதி அத்தோ². த³ண்ட³கதி²னந்தி தஸ்ஸ மஜ்ஜே² இதரஸ்ஸ பி⁴க்கு²னோ பமாணேன அஞ்ஞம் நிஸ்ஸேணிம் ப³ந்தி⁴தும் அனுஜானாமீதி அத்தோ².

பி³த³லகந்தி த³ண்ட³கதி²னப்பமாணேன கடஸாரகஸ்ஸ பரியந்தே படிஸம்ஹரித்வா து³கு³ணகரணம். ஸலாகந்தி து³பட்டசீவரஸ்ஸ அந்தரே பவேஸனஸலாகம். வினந்த⁴னரஜ்ஜுந்தி மஹானிஸ்ஸேணியா ஸத்³தி⁴ம் கு²த்³த³கம் நிஸ்ஸேணிம் வினந்தி⁴தும் ரஜ்ஜும். வினந்த⁴னஸுத்தந்தி கு²த்³த³கனிஸ்ஸேணியா சீவரம் வினந்தி⁴தும் ஸுத்தகம். வினந்தி⁴த்வா சீவரம் ஸிப்³பே³துந்தி தேன ஸுத்தகேன தத்த² சீவரம் வினந்தி⁴த்வா ஸிப்³பி³தும். விஸமா ஹோந்தீதி காசி கு²த்³த³கா ஹோந்தி, காசி மஹந்தா. களிம்ப⁴கந்தி பமாணஸஞ்ஞாகரணம் யம்கிஞ்சி தாலபண்ணாதி³ம். மோக⁴ஸுத்தகந்தி வட்³ட⁴கீனம் தா³ரூஸு காளஸுத்தேன விய ஹலித்³தி³ஸுத்தேன ஸஞ்ஞாகரணம். அங்கு³லியா படிக்³க³ண்ஹந்தீதி ஸூசிமுக²ம் அங்கு³லியா படிச்ச²ந்தி. படிக்³க³ஹந்தி அங்கு³லிகோஸகம்.

257. ஆவேஸனவித்த²கம் நாம யம்கிஞ்சி பாதிசங்கோடகாதி³. உச்சவத்து²கந்தி பம்ஸும் ஆகிரித்வா உச்சவத்து²கம் காதும் அனுஜானாமீதி அத்தோ². ஓகு³ம்பே²த்வா உல்லித்தாவலித்தம் காதுந்தி ச²த³னம் ஓது⁴னித்வா க⁴னத³ண்ட³கம் கத்வா அந்தோ சேவ ப³ஹி ச மத்திகாய லிம்பிதுந்தி அத்தோ². கோ³க⁴ம்ஸிகாயாதி வேளும் வா ருக்க²த³ண்ட³ம் வா அந்தோகத்வா தேன ஸத்³தி⁴ம் ஸங்க⁴ரிதுந்தி அத்தோ². ப³ந்த⁴னரஜ்ஜுந்தி ததா² ஸங்க⁴ரிதஸ்ஸ ப³ந்த⁴னரஜ்ஜும்.

258. கடச்சு²பரிஸ்ஸாவனம் நாம தீஸு த³ண்ட³கேஸு வினந்தி⁴த்வா கதம்.

259. யோ ந த³தே³ய்யாதி அபரிஸ்ஸாவனகஸ்ஸேவ யோ ந த³தா³தி, தஸ்ஸ ஆபத்தி. யோ பன அத்தனோ ஹத்தே² பரிஸ்ஸாவனே விஜ்ஜமானேபி யாசதி, தஸ்ஸ ந அகாமா தா³தப்³ப³ம். த³ண்ட³பரிஸ்ஸாவனந்தி ரஜகானம் கா²ரபரிஸ்ஸாவனம் விய சதூஸு பாதே³ஸு ப³த்³த⁴னிஸ்ஸேணிகாய ஸாடகம் ப³ந்தி⁴த்வா மஜ்ஜே²த³ண்ட³கே உத³கம் ஆஸிஞ்சிதப்³ப³ம், தம் உபோ⁴பி கோட்டா²ஸே பூரேத்வா பரிஸ்ஸவதி. ஓத்த²ரகம் நாம யம் உத³கே ஓத்த²ரித்வா க⁴டகேன உத³கம் க³ண்ஹந்தி, தஞ்ஹி சதூஸு த³ண்ட³கேஸு வத்த²ம் ப³ந்தி⁴த்வா உத³கே சத்தாரோ கா²ணுகே நிக²ணித்வா தேஸு ப³ந்தி⁴த்வா ஸப்³ப³பரியந்தே உத³கதோ மோசேத்வா மஜ்ஜே² ஓத்த²ரித்வா க⁴டேன உத³கம் க³ண்ஹந்தி. மகஸகுடிகாதி சீவரகுடிகா வுச்சதி.

260. அபி⁴ஸன்னகாயாதி ஸேம்ஹாதி³தோ³ஸுஸ்ஸன்னகாயா. அக்³க³ளவட்டி நாம த்³வாரபா³ஹாய ஸமப்பமாணோயேவ அக்³க³ளத்த²ம்போ⁴ வுச்சதி, யத்த² தீணி சத்தாரி சி²த்³தா³னி கத்வா ஸூசியோ தே³ந்தி. கபிஸீஸகம் நாம த்³வாரபா³ஹம் விஜ்ஜி²த்வா தத்த² பவேஸிதோ அக்³க³ளபாஸகோ வுச்சதி. ஸூசிகாதி தத்த² மஜ்ஜே² சி²த்³த³ம் கத்வா பவேஸிதா. க⁴டிகாதி உபரி யோஜிதா. மண்ட³லிகம் காதுந்தி நீசவத்து²கம் சினிதும். தூ⁴மனேத்தந்தி தூ⁴மனிக்க²மனசி²த்³த³ம். வாஸேதுந்தி க³ந்தே⁴ன வாஸேதும். உத³கட்டா²னந்தி உத³கத்த²பனட்டா²னம். தத்த² க⁴டேன உத³கம் ட²பேத்வா ஸராவகேன வளஞ்ஜேதப்³ப³ம். கோட்ட²கோதி த்³வாரகோட்ட²கோ.

261. திஸ்ஸோ படிச்சா²தி³யோதி ஏத்த² ஜந்தாக⁴ரபடிச்சா²தி³ ச உத³கபடிச்சா²தி³ ச பரிகம்மம் கரோந்தஸ்ஸேவ வட்டதி, ஸேஸேஸு அபி⁴வாத³னாதீ³ஸு ந வட்டதி. வத்த²படிச்சா²தி³ ஸப்³ப³கம்மேஸு வட்டதி. உத³கம் ந ஹோதீதி ந்ஹானோத³கம் ந ஹோதி.

262. துலந்தி பண்ணிகானம் விய உத³கஉப்³பா³ஹனகதுலம். கரகடகோ வுச்சதி கோ³ணே வா யோஜேத்வா ஹத்தே²ஹி வா க³ஹேத்வா தீ³க⁴வரத்தாதீ³ஹி ஆகட்³ட⁴னயந்தம். சக்கவட்டகந்தி அரஹடக⁴டியந்தம். சம்மக²ண்ட³ம் நாம துலாய வா கரகடகே வா யோஜேதப்³ப³கம் சம்மபா⁴ஜனம். பாகடா ஹோதீதி அபரிக்கி²த்தா ஹோதி. உத³கபுஞ்ச²னீதி த³ண்ட³மயாபி விஸாணமயாபி தா³ருமயாபி வட்டதி, தஸ்ஸா அஸதி சோளகேனாபி உத³கம் பச்சுத்³த⁴ரிதும் வட்டதி.

263. உத³கமாதிகந்தி உத³கஸ்ஸ ஆக³மனமாதிகம். நில்லேக²ஜந்தாக⁴ரம் நாம ஆவித்³த⁴பக்க²பாஸகம் வுச்சதி, கோ³பானஸீனம் உபரி மண்ட³லே பக்க²பாஸகே ட²பேத்வா கதகூடச்ச²த³னஸ்ஸேதம் நாமம். சாதுமாஸம் நிஸீத³னேனாதி நிஸீத³னேன சத்தாரோ மாஸே ந விப்பவஸிதப்³ப³ந்தி அத்தோ².

264. புப்பா²பி⁴கிண்ணேஸூதி புப்பே²ஹி ஸந்த²தேஸு. நமதகம் நாம ஏளகலோமேஹி கதம் அவாயிமம் சம்மக²ண்ட³பரிஹாரேன பரிபு⁴ஞ்ஜிதப்³ப³ம். ஆஸித்தகூபதா⁴னம் நாம தம்ப³லோஹேன வா ரஜதேன வா கதாய பேளாய ஏதம் அதி⁴வசனம், படிக்கி²த்தத்தா பன தா³ருமயாபி ந வட்டதி. மளோரிகாதி த³ண்ட³தா⁴ரகோ வுச்சதி. யட்டி²ஆதா⁴ரகபண்ணாதா⁴ரகபச்சி²கபிட்டா²னிபி ஏத்தே²வ பவிட்டா²னி. ஆதா⁴ரகஸங்கே²பக³மனதோ ஹி பட்டா²ய சி²த்³த³ம் வித்³த⁴ம்பி அவித்³த⁴ம்பி வட்டதியேவ. ஏகபா⁴ஜனேதி ஏத்த² ஸசே ஏகோ பி⁴க்கு² பா⁴ஜனதோ ப²லம் வா பூவம் வா க³ஹேத்வா க³ச்ச²தி, தஸ்மிம் அபக³தே இதரஸ்ஸ ஸேஸகம் பு⁴ஞ்ஜிதும் வட்டதி. இதரஸ்ஸாபி தஸ்மிம் கீ²ணே புன க³ஹேதும் வட்டதி.

265. அட்ட²ஹங்கே³ஹீதி ஏத்த² ஏகேகேனபி அங்கே³ன ஸமன்னாக³தஸ்ஸ அந்தோஸீமாய வா நிஸ்ஸீமம் க³ந்த்வா நதீ³ஆதீ³ஸு வா நிக்குஜ்ஜிதும் வட்டதியேவ. ஏவம் நிக்குஜ்ஜிதே பன பத்தே தஸ்ஸ கே³ஹே கோசி தே³ய்யத⁴ம்மோ ந க³ஹேதப்³போ³ – ‘‘அஸுகஸ்ஸ கே³ஹே பி⁴க்க²ம் மா க³ண்ஹித்தா²’’தி அஞ்ஞேஸு விஹாரேஸுபி பேஸேதப்³ப³ம். உக்குஜ்ஜனகாலே பன யாவததியம் யாசாபேத்வா ஹத்த²பாஸம் விஜஹாபேத்வா ஞத்திது³தியகம்மேன உக்குஜ்ஜிதப்³போ³.

268. புரக்க²த்வாதி அக்³க³தோ கத்வா. ஸம்ஹரந்தூதி ஸம்ஹரியந்து. சேலபடிகந்தி சேலஸந்த²ரம். ஸோ கிர ‘‘ஸசே அஹம் புத்தம் லச்சா²மி, அக்கமிஸ்ஸதி மே ப⁴க³வா சேலபடிக’’ந்தி இமினா அஜ்ஜா²ஸயேன ஸந்த²ரி, அப⁴ப்³போ³ சேஸ புத்தலாபா⁴ய; தஸ்மா ப⁴க³வா ந அக்கமி. யதி³ அக்கமேய்ய, பச்சா² புத்தம் அலப⁴ந்தோ ‘‘நாயம் ஸப்³ப³ஞ்ஞூ’’தி தி³ட்டி²ம் க³ண்ஹேய்ய. இத³ம் தாவ ப⁴க³வதோ அனக்கமனே காரணம். யஸ்மா பன பி⁴க்கூ²பி யே அஜானந்தா அக்கமேய்யும், தே கி³ஹீனம் பரிபூ⁴தா ப⁴வேய்யும்; தஸ்மா பி⁴க்கூ² பரிப⁴வதோ மோசேதும் ஸிக்கா²பத³ம் பஞ்ஞபேஸி. இத³ம் ஸிக்கா²பத³பஞ்ஞாபனே காரணம்.

மங்க³லத்தா²ய யாசியமானேனாதி அபக³தக³ப்³பா⁴ வா ஹோது க³ருக³ப்³பா⁴ வா, ஏவரூபேஸு டா²னேஸு மங்க³லத்தா²ய யாசியமானேன அக்கமிதும் வட்டதி. தோ⁴தபாத³கம் நாம பாத³தோ⁴வனட்டா²னே தோ⁴தேஹி பாதே³ஹி அக்கமனத்தா²ய பச்சத்த²ரணம் அத்த²தம் ஹோதி, தம் அக்கமிதும் வட்டதி.

269. கதகம் நாம பது³மகண்ணிகாகாரம் பாத³க⁴ம்ஸனத்த²ம் கண்டகே உட்டா²பேத்வா கதம். தம் வட்டம் வா ஹோது சதுரஸ்ஸாதி³பே⁴த³ம் வா, பா³ஹுலிகானுயோக³த்தா படிக்கி²த்தமேவ, நேவ படிக்³க³ஹேதும் ந பரிபு⁴ஞ்ஜிதும் வட்டதி. ஸக்க²ராதி பாஸாணோ வுச்சதி; பாஸாணபே²ணகோபி வட்டதி. விதூ⁴பனந்தி வீஜனீ வுச்சதி. தாலவண்டம் பன தாலபண்ணேஹி வா கதம் ஹோது வேளுத³ந்தவிலீவேஹி வா மோரபிஞ்சே²ஹி வா சம்மவிகதீஹி வா ஸப்³ப³ம் வட்டதி. மகஸபீ³ஜனீ த³ந்தமயவிஸாணமயத³ண்ட³காபி வட்டதி, வாகமயபீ³ஜனியா கேதகபாரோஹகுந்தாலபண்ணாதி³மயாபி ஸங்க³ஹிதா.

270. கி³லானஸ்ஸ ச²த்தந்தி ஏத்த² யஸ்ஸ காயடா³ஹோ வா பித்தகோபோ வா ஹோதி, சக்கு² வா து³ப்³ப³லம், அஞ்ஞோ வா கோசி ஆபா³தோ⁴ வினா ச²த்தேன உப்பஜ்ஜதி, தஸ்ஸ கா³மே வா அரஞ்ஞே வா ச²த்தம் வட்டதி. வஸ்ஸே பன சீவரகு³த்தத்த²ம் வாளமிக³சோரப⁴யேஸு ச அத்தகு³த்தத்த²ம்பி வட்டதி. ஏகபண்ணச்ச²த்தம் பன ஸப்³ப³த்தே²வ வட்டதி.

அஸிஸ்ஸாதி அஸி அஸ்ஸ. விஜ்ஜோதலதீதி விஜ்ஜோததி. த³ண்ட³ஸம்முதிந்தி ஏத்த² பமாணயுத்தோ சதுஹத்தோ²யேவ த³ண்டோ³ ஸம்மன்னித்வா தா³தப்³போ³. ததோ ஊனாதிரித்தோ வினாபி ஸம்முதியா ஸப்³பே³ஸம் வட்டதி. ஸிக்கா பன அகி³லானஸ்ஸ ந வட்டதி, கி³லானஸ்ஸாபி ஸம்மன்னித்வாவ தா³தப்³பா³.

273. ரோமந்த²கஸ்ஸாதி ஏத்த² ட²பேத்வா ரோமந்த²கம் ஸேஸானம் ஆக³தம் உக்³கா³ரம் முகே² ஸந்தா⁴ரேத்வா கி³லந்தானம் ஆபத்தி. ஸசே பன அஸந்தா⁴ரிதமேவ பரக³லம் க³ச்ச²தி, வட்டதி.

யம் தி³ய்யமானந்தி யம் தா³யகேஹி தி³ய்யமானம் படிக்³க³ஹிதபா⁴ஜனதோ ப³ஹி பதிதம், தம் பி⁴க்கு²னா ஸாமம் க³ஹேத்வா பரிபு⁴ஞ்ஜிதும் அனுஜானாமீதி அத்தோ². இத³ம் போ⁴ஜனவக்³கே³ வண்ணிதமேவ.

274. குப்பம் கரிஸ்ஸாமீதி ஸத்³த³ம் கரிஸ்ஸாமி. நகா²தீ³ஹி நக²ச்சே²த³னே ஆபத்தி நத்தி², அனுரக்க²ணத்த²ம் பன நக²ச்சே²த³னம் அனுஞ்ஞாதம். வீஸதிமட்ட²ந்தி வீஸதிபி நகே² லிகி²தமட்டே² காராபேந்தி. மலமத்தந்தி நக²தோ மலமத்தம் அபகட்³டி⁴தும் அனுஜானாமீதி அத்தோ².

275. கு²ரஸிபாடிகந்தி கு²ரகோஸகம். மஸ்ஸும் கப்பாபேந்தீதி கத்தரியா மஸ்ஸும் சே²தா³பேந்தி. மஸ்ஸும் வட்³டா⁴பேந்தீதி மஸ்ஸும் தீ³க⁴ம் காரேந்தி. கோ³லோமிகந்தி ஹனுகம்ஹி தீ³க⁴ம் கத்வா ட²பிதம் ஏளகமஸ்ஸு வுச்சதி. சதுரஸ்ஸகந்தி சதுகோணம். பரிமுக²ந்தி உரே லோமஸம்ஹரணம். அட்³ட⁴து³கந்தி உத³ரே லோமராஜிட்ட²பனம். ஆபத்தி து³க்கடஸ்ஸாதி மஸ்ஸுகப்பாபனாதீ³ஸு ஸப்³ப³த்த² ஆபத்தி து³க்கடஸ்ஸ. ஆபா³த⁴ப்பச்சயா ஸம்பா³தே⁴ லோமந்தி க³ண்ட³வணருதி⁴ஆதி³ஆபா³த⁴ப்பச்சயா. கத்தரிகாயாதி க³ண்ட³வணருதி⁴ஸீஸரோகா³பா³த⁴ப்பச்சயா. ஸக்க²ராதீ³ஹி நாஸிகாலோமக்³கா³ஹாபனே ஆபத்தி நத்தி². அனுரக்க²ணத்த²ம் பன ஸண்டா³ஸோ அனுஞ்ஞாதோ. ந பி⁴க்க²வே பலிதம் கா³ஹாபேதப்³ப³ந்தி ஏத்த² யம் ப⁴முகாய வா நலாடே வா தா³டி²காய வா உக்³க³ந்த்வா பீ³ப⁴ச்ச²ம் டி²தம், தாதி³ஸம் லோமம் பலிதம் வா அபலிதம் வா கா³ஹாபேதும் வட்டதி.

277. கம்ஸபத்த²ரிகாதி கம்ஸப⁴ண்ட³வாணிஜா. ப³ந்த⁴னமத்தந்தி வாஸிகத்தரயட்டி²ஆதீ³னம் ப³ந்த⁴னமத்தம்.

278. ந பி⁴க்க²வே அகாயப³ந்த⁴னேனாதி ஏத்த² அப³ந்தி⁴த்வா நிக்க²மந்தேன யத்த² ஸரதி, தத்த² ப³ந்தி⁴தப்³ப³ம். ஆஸனஸாலாய ப³ந்தி⁴ஸ்ஸாமீதி க³ந்தும் வட்டதி. ஸரித்வா யாவ ந ப³ந்த⁴தி, ந தாவ பிண்டா³ய சரிதப்³ப³ம். கலாபு³கம் நாம ப³ஹுரஜ்ஜுகம். தே³ட்³டு³ப⁴கம் நாம உத³கஸப்பஸீஸஸதி³ஸம். முரஜம் நாம முரஜவட்டிஸண்டா²னம் வேடே²த்வா கதம். மத்³த³வீணம் நாம பாமங்க³ஸண்டா²னம். ஈதி³ஸஞ்ஹி ஏகம்பி ந வட்டதி, பகே³வ ப³ஹூனி. பட்டிகம் ஸூகரந்தகந்தி ஏத்த² பகதிவீதா வா மச்ச²கண்டகவாயிமா வா பட்டிகா வட்டதி, ஸேஸா குஞ்ஜரச்சி²காதி³பே⁴தா³ ந வட்டந்தி. ஸூகரந்தகம் நாம குஞ்ஜிகாகோஸகஸண்டா²னம் ஹோதி. ஏகரஜ்ஜுகம் பன முத்³தி³ககாயப³ந்த⁴னஞ்ச ஸூகரந்தகம் அனுலோமேதி. அனுஜானாமி பி⁴க்க²வே முரஜம் மத்³த³வீணந்தி இத³ம் த³ஸாஸுயேவ அனுஞ்ஞாதம். பாமங்க³த³ஸா சேத்த² சதுன்னம் உபரி ந வட்டதி. ஸோப⁴ணம் நாம வேடே²த்வா முக²வட்டிஸிப்³ப³னம். கு³ணகம் நாம முதி³ங்க³ஸண்டா²னேன ஸிப்³ப³னம்; ஏவம் ஸிப்³பி³தா ஹி அந்தா தி²ரா ஹோந்தி. பவனந்தோதி பாஸந்தோ வுச்சதி.

280. ஹத்தி²ஸோண்ட³கம் நாம நாபி⁴மூலதோ ஹத்தி²ஸோண்ட³ஸண்டா²னம் ஓலம்ப³கம் கத்வா நிவத்த²ம் சோளிகஇத்தீ²னம் நிவாஸனம் விய. மச்ச²வாளகம் நாம ஏகதோ த³ஸந்தம் ஏகதோ பாஸந்தம் ஓலம்பே³த்வா நிவத்த²ம். சதுகண்ணகம் நாம உபரி த்³வே, ஹேட்ட²தோ த்³வேதி ஏவம் சத்தாரோ கண்ணே த³ஸ்ஸேத்வா நிவத்த²ம். தாலவண்டகம் நாம தாலவண்டாகாரேன ஸாடகம் ஓலம்பே³த்வா நிவாஸனம். ஸதவலிகம் நாம தீ³க⁴ஸாடகம் அனேகக்க²த்தும் ஓப⁴ஞ்ஜித்வா ஓவட்டிகம் கரோந்தேன நிவத்த²ம், வாமத³க்கி²ணபஸ்ஸேஸு வா நிரந்தரம் வலியோ த³ஸ்ஸேத்வா நிவத்த²ம். ஸசே பன ஜாணுதோ பட்டா²ய ஏகா வா த்³வே வா வலியோ பஞ்ஞாயந்தி, வட்டதி.

ஸம்வேல்லியம் நிவாஸேந்தீதி மல்லகம்மகாராத³யோ விய கச்ச²ம் ப³ந்தி⁴த்வா நிவாஸேந்தி; ஏவம் நிவாஸேதும் கி³லானஸ்ஸபி மக்³க³ப்படிபன்னஸ்ஸபி ந வட்டதி. யம்பி மக்³க³ம் க³ச்ச²ந்தா ஏகம் வா த்³வே வா கோணே உக்கி²பித்வா அந்தரவாஸகஸ்ஸ உபரி லக்³கே³ந்தி, அந்தோ வா ஏகம் காஸாவம் ததா² நிவாஸேத்வா ப³ஹி அபரம் நிவாஸேந்தி, ஸப்³ப³ம் ந வட்டதி. கி³லானோ பன அந்தோ காஸாவஸ்ஸ ஓவட்டிகம் த³ஸ்ஸேத்வா அபரம் உபரி நிவாஸேதும் லப⁴தி. அகி³லானேன த்³வே நிவாஸேந்தேன ஸகு³ணம் கத்வா நிவாஸேதப்³பா³னி. இதி யஞ்ச இத⁴ படிக்கி²த்தம், யஞ்ச ஸேகி²யவண்ணனாயம்; தம் ஸப்³ப³ம் வஜ்ஜேத்வா நிப்³பி³காரம் திமண்ட³லம் படிச்சா²தே³ந்தேன பரிமண்ட³லம் நிவாஸேதப்³ப³ம். யம்கிஞ்சி விகாரம் கரோந்தோ து³க்கடா ந முச்சதி. ந பி⁴க்க²வே கி³ஹிபாருதம் பாருபிதப்³ப³ந்தி ஏவம் படிக்கி²த்தம் கி³ஹிபாருதம் அபாருபித்வா, உபோ⁴ கண்ணே ஸமம் கத்வா பாருபனம் பரிமண்ட³லபாருபனம் நாம, தம் பாருபிதப்³ப³ம்.

தத்த² யம்கிஞ்சி ஸேதபடபாருதம் பரிப்³பா³ஜகபாருதம் ஏகஸாடகபாருதம் ஸோண்ட³பாருதம் அந்தேபுரிகபாருதம் மஹாஜேட்ட²கபாருதம் குடிபவேஸகபாருதம் ப்³ராஹ்மணபாருதம் பாளிகாரகபாருதந்தி ஏவமாதி³ பரிமண்ட³லலக்க²ணதோ அஞ்ஞதா² பாருதம், ஸப்³ப³மேதம் கி³ஹிபாருதம் நாம. தஸ்மா யதா² ஸேதபடா அட்³ட⁴பாலகனிக³ண்டா² பாருபந்தி, யதா² ச ஏகச்சே பரிப்³பா³ஜகா உரம் விவரித்வா த்³வீஸு அம்ஸகூடேஸு பாவுரணம் ட²பேந்தி, யதா² ச ஏகஸாடகா மனுஸ்ஸா நிவத்த²ஸாடகஸ்ஸ ஏகேனந்தேன பிட்டி²ம் பாருபித்வா உபோ⁴ கண்ணே உபோ⁴ஸு அம்ஸகூடேஸு ட²பேந்தி, யதா² ச ஸுராஸோண்டா³த³யோ ஸாடகேன கீ³வம் பரிக்கி²பந்தா உபோ⁴ அந்தே உத³ரே வா ஓலம்பே³ந்தி; பிட்டி²யம் வா கி²பந்தி, யதா² ச அந்தேபுரிகாயோ அக்கி²தாரகமத்தம் த³ஸ்ஸேத்வா ஓகு³ண்டி²கம் பாருபந்தி, யதா² ச மஹாஜேட்டா² தீ³க⁴ஸாடகம் நிவாஸேத்வா தஸ்ஸேவ ஏகேனந்தேன ஸகலஸரீரம் பாருபந்தி, யதா² ச கஸ்ஸகா கே²த்தகுடிம் பவிஸந்தா ஸாடகம் பலிவேடே²த்வா உபகச்ச²கே பக்கி²பித்வா தஸ்ஸேவ ஏகேனந்தேன ஸரீரம் பாருபந்தி, யதா² ச ப்³ராஹ்மணா உபி⁴ன்னம் உபகச்ச²கானம் அந்தரேன ஸாடகம் பவேஸேத்வா அம்ஸகூடேஸு பக்கி²பந்தி, யதா² ச பாளிகாரகோ பி⁴க்கு² ஏகம்ஸபாருபனேன பாருதம் வாமபா³ஹும் விவரித்வா சீவரம் அம்ஸகூடம் ஆரோபேதி; ஏவம் அபாருபித்வா ஸப்³பே³பி ஏதே அஞ்ஞே ச ஏவரூபே பாருபனதோ³ஸே வஜ்ஜேத்வா நிப்³பி³காரம் பரிமண்ட³லம் பாருபிதப்³ப³ம். ததா² அபாருபித்வா ஆராமே வா அந்தரக⁴ரே வா அனாத³ரேன யம்கிஞ்சி விகாரம் கரோந்தஸ்ஸ து³க்கடம்.

281. முண்ட³வட்டீதி யதா² ரஞ்ஞோ குஹிஞ்சி க³ச்ச²தோ பரிக்கா²ரப⁴ண்ட³வஹனமனுஸ்ஸாதி அதி⁴ப்பாயோ. அந்தராகாஜந்தி மஜ்ஜே² லக்³கே³த்வா த்³வீஹி வஹிதப்³ப³பா⁴ரம்.

282. அசக்கு²ஸ்ஸந்தி சக்கூ²னம் ஹிதம் ந ஹோதி; பரிஹானிம் ஜனேதி. நச்சா²தே³தீதி ந ருச்சதி. அட்ட²ங்கு³லபரமந்தி மனுஸ்ஸானம் பமாணங்கு³லேன அட்ட²ங்கு³லபரமம். அதிமடாஹகந்தி அதிகு²த்³த³கம்.

283. தா³யம் ஆலிம்பேந்தீதி திணவனாதீ³ஸு அக்³கி³ம் தே³ந்தி. படக்³கி³ந்தி படிஅக்³கி³ம். பரித்தந்தி அப்பஹரிதகரணேன வா பரிகா²க²ணனேன வா பரித்தாணம். ஏத்த² பன அனுபஸம்பன்னே ஸதி ஸயம் அக்³கி³ம் தா³தும் ந லப⁴தி, அஸதி அக்³கி³ம்பி தா³தும் லப⁴தி, பூ⁴மிம் தச்சே²த்வா திணானிபி ஹரிதும், பரிக²ம்பி க²ணிதும், அல்லஸாக²ம் ப⁴ஞ்ஜித்வாபி அக்³கி³ம் நிப்³பா³பேதும் லப⁴தி, ஸேனாஸனம் பத்தம் வா அப்பத்தம் வா ததா² நிப்³பா³பேதும் லப⁴தியேவ. உத³கேன பன கப்பியேனேவ லப⁴தி, ந இதரேன.

284. ஸதி கரணீயேதி ஸுக்க²கட்டா²தி³க்³க³ஹணகிச்சே ஸதி. போரிஸியந்தி புரிஸப்பமாணம். ஆபதா³ஸூதி வாளமிகா³த³யோ வா தி³ஸ்வா மக்³க³மூள்ஹோ வா தி³ஸா ஓலோகேதுகாமோ ஹுத்வா த³வடா³ஹம் வா உத³கோக⁴ம் வா ஆக³ச்ச²ந்தம் தி³ஸ்வா ஏவரூபாஸு ஆபதா³ஸு அதிஉச்சம்பி ருக்க²ம் ஆரோஹிதும் வட்டதி.

285. கல்யாணவாக்கரணாதி மது⁴ரஸத்³தா³. ச²ந்த³ஸோ ஆரோபேமாதி வேத³ம் விய ஸக்கதபா⁴ஸாய வாசனாமக்³க³ம் ஆரோபேம. ஸகாய நிருத்தியாதி ஏத்த² ஸகா நிருத்தி நாம ஸம்மாஸம்பு³த்³தே⁴ன வுத்தப்பகாரோ மாக³தி⁴கோ வோஹாரோ.

286. லோகாயதம் நாம ஸப்³ப³ம் உச்சி²ட்ட²ம், ஸப்³ப³ம் அனுச்சி²ட்ட²ம், ஸேதோ காகோ, காளோ ப³கோ; இமினா ச இமினா ச காரணேனாதி ஏவமாதி³னிரத்த²ககாரணபடிஸம்யுத்தம் தித்தி²யஸத்த²ம்.

288. அந்தரா அஹோஸீதி அந்தரிதா அஹோஸி படிச்ச²ன்னா.

289. ஆபா³த⁴ப்பச்சயாதி யஸ்ஸ ஆபா³த⁴ஸ்ஸ லஸுணம் பே⁴ஸஜ்ஜம்; தப்பச்சயாதி அத்தோ².

290. பஸ்ஸாவபாது³கந்தி ஏத்த² பாது³கா இட்ட²காஹிபி ஸிலாஹிபி தா³ரூஹிபி காதும் வட்டதி. வச்சபாது³காயபி ஏஸேவ நயோ. பரிவேணந்தி வச்சகுடிபரிக்கே²பப்³ப⁴ந்தரம்.

293. யதா²த⁴ம்மோ காரேதப்³போ³தி து³க்கடவத்து²ம்ஹி து³க்கடேன பாசித்தியவத்து²ம்ஹி பாசித்தியேன காரேதப்³போ³. பஹரணத்த²ம் கதம் பஹரணீதி வுச்சதி, யஸ்ஸ கஸ்ஸசி ஆவுத⁴ஸங்கா²தஸ்ஸேதம் அதி⁴வசனம், தம் ட²பேத்வா அஞ்ஞம் ஸப்³ப³ம் லோஹப⁴ண்ட³ம் அனுஜானாமீதி அத்தோ². கதகஞ்ச கும்ப⁴காரிகஞ்சாதி ஏத்த² கதகம் வுத்தமேவ. கும்ப⁴காரிகஞ்சாதி த⁴னியஸ்ஸேவ ஸப்³ப³மத்திகாமயகுடி வுச்சதி. ஸேஸம் ஸப்³ப³த்த² உத்தானமேவாதி.

கு²த்³த³கவத்து²கதா² நிட்டி²தா.

கு²த்³த³கவத்து²க்க²ந்த⁴கவண்ணனா நிட்டி²தா.