10. சேதியஸுத்தவண்ணனா

822. த³ஸமே நிஸீத³னந்தி சம்மக²ண்ட³ம் அதி⁴ப்பேதம். உதே³னம் சேதியந்தி உதே³னயக்க²ஸ்ஸ சேதியட்டா²னே கதவிஹாரோ வுச்சதி. கோ³தமகாதீ³ஸுபி ஏஸேவ நயோ. பா⁴விதாதி வட்³டி⁴தா. ப³ஹுலீகதாதி புனப்புனம் கதா. யானீகதாதி யுத்தயானம் விய கதா. வத்து²கதாதி பதிட்டா²னட்டே²ன வத்து² விய கதா. அனுட்டி²தாதி அதி⁴ட்டி²தா. பரிசிதாதி ஸமந்ததோ சிதா ஸுவட்³டி⁴தா. ஸுஸமாரத்³தா⁴தி ஸுட்டு² ஸமாரத்³தா⁴.

இதி அனியமேன கதே²த்வா புன நியமேத்வா த³ஸ்ஸேந்தோ ததா²க³தஸ்ஸ கோ²திஆதி³மாஹ. ஏத்த² ச கப்பந்தி ஆயுகப்பம், தஸ்மிம் தஸ்மிம் காலே யம் மனுஸ்ஸானம் ஆயுப்பமாணம், தம் பரிபுண்ணம் கரோந்தோ திட்டே²ய்ய. கப்பாவஸேஸம் வாதி ‘‘அப்பம் வா பி⁴ய்யோ’’தி வுத்தவஸ்ஸஸததோ அதிரேகம் வா. மஹாஸீவத்தே²ரோ பனாஹ ‘‘பு³த்³தா⁴னம் அட்டா²னே க³ஜ்ஜிதம் நாம நத்தி². யதே²வ ஹி வேளுவகா³மகே உப்பன்னம் மாரணந்திகவேத³னம் த³ஸ மாஸே விக்க²ம்பே⁴ஸி, ஏவம் புனப்புனம் தம் ஸமாபத்திம் ஸமாபஜ்ஜித்வா த³ஸ த³ஸ மாஸேபி விக்க²ம்பே⁴ந்தோ இமம் ப⁴த்³த³கப்பமேவ திட்டே²ய்யா’’தி.

கஸ்மா பன ந டி²தோதி? உபாதி³ண்ணகஸரீரம் நாம க²ண்டி³ச்சாதீ³ஹி அபி⁴பு⁴ய்யதி, பு³த்³தா⁴ நாம க²ண்டி³ச்சாதி³பா⁴வம் அபத்வாவ பஞ்சமே ஆயுகோட்டா²ஸே ப³ஹுஜனஸ்ஸ பியமனாபகாலேயேவ பரினிப்³பா³யந்தி. பு³த்³தா⁴னுபு³த்³தே⁴ஸு ச மஹாஸாவகேஸு பரினிப்³பு³தேஸு ஏககேன கா²ணுகேன விய டா²தப்³ப³ம் ஹோதி, த³ஹரஸாமணேரபரிவாரிதேன வா, ததோ – ‘‘அஹோ பு³த்³தா⁴னம் பரிஸா’’தி ஹீளேதப்³ப³தம் ஆபஜ்ஜேய்ய, தஸ்மா ந டி²தோதி. ஏவம் வுத்தேபி ஸோ பன ந ருச்சதி, ‘‘ஆயுகப்போ’’தி இத³மேவ அட்ட²கதா²யம் நியமிதம்.

யதா² தம் மாரேன பரியுட்டி²தசித்தோதி ஏத்த² தந்தி நிபாதமத்தம். யதா² மாரேன பரியுட்டி²தசித்தோ அஜ்ஜோ²த்த²டசித்தோ அஞ்ஞோபி கோசி புது²ஜ்ஜனோ படிவிஜ்ஜி²தும் ந ஸக்குணேய்ய, ஏவமேவ நாஸக்கி² படிவிஜ்ஜி²துந்தி அத்தோ². மாரோ ஹி யஸ்ஸ ஸப்³பே³ன ஸப்³ப³ம் த்³வாத³ஸ விபல்லாஸா அப்பஹீனா, தஸ்ஸ சித்தம் பரியுட்டா²தி. தே²ரஸ்ஸ ச சத்தாரோ விபல்லாஸா அப்பஹீனா, தேனஸ்ஸ மாரோ சித்தம் பரியுட்டா²ஸி. ஸோ பன சித்தபரியுட்டா²னம் கரோந்தோ கிம் கரோதீதி? பே⁴ரவம் ரூபாரம்மணம் வா த³ஸ்ஸேதி, ஸத்³தா³ரம்மணம் வா ஸாவேதி, ததோ ஸத்தா தம் தி³ஸ்வா வா ஸுத்வா வா ஸதிம் விஸ்ஸஜ்ஜேத்வா விவடமுகா² ஹோந்தி, தேஸம் முகே²ன ஹத்த²ம் பவேஸேத்வா ஹத³யம் மத்³த³தி, தே விஸஞ்ஞீ ஹுத்வா திட்ட²ந்தி. தே²ரஸ்ஸ பனேஸ முகே² ஹத்த²ம் பவேஸேதும் கிம் ஸக்கி²ஸ்ஸதி? பே⁴ரவாரம்மணம் பன த³ஸ்ஸேதி, தம் தி³ஸ்வா தே²ரோ நிமித்தோபா⁴ஸம் ந படிவிஜ்ஜி². ஜானந்தோயேவ ப⁴க³வா கிமத்த²ம் யாவததியகம் ஆமந்தேஸீதி. பரதோ ‘‘திட்ட²து, ப⁴ந்தே, ப⁴க³வா’’தி யாசிதே ‘‘துய்ஹேவேதம் து³க்கடம், துய்ஹேவேதம் அபரத்³த⁴’’ந்தி தோ³ஸாரோபனேன ஸோகதனுகரணத்த²ம்.

மாரோ பாபிமாதி ஏத்த² ஸத்தே அனத்தே² நியோஜேந்தோ மாரேதீதி மாரோ. பாபிமாதி தஸ்ஸேவ வேவசனம். ஸோ ஹி பாபத⁴ம்மஸமன்னாக³தத்தா ‘‘பாபிமா’’தி வுச்சதி. கண்ஹோ, அந்தகோ, நமுசி, பமத்தப³ந்தூ⁴திபி தஸ்ஸேவ நாமானி. பா⁴ஸிதா கோ² பனேஸாதி அயஞ்ஹி ப⁴க³வதோ ஸம்போ³தி⁴பத்தியா அட்ட²மே ஸத்தாஹே போ³தி⁴மண்ட³ம்யேவ ஆக³ந்த்வா – ‘‘ப⁴க³வா யத³த்த²ம் தும்ஹேஹி பாரமியோ பூரிதா, ஸோ வோ அத்தோ² அனுப்பத்தோ, படிவித்³த⁴ம் ஸப்³ப³ஞ்ஞுதஞ்ஞாணம், கிம் வோ லோகவிசரணேனா’’தி வத்வா யதா² அஜ்ஜ, ஏவமேவ – ‘‘பரினிப்³பா³து தா³னி, ப⁴ந்தே, ப⁴க³வா, பரினிப்³பா³து, ஸுக³தோ,’’தி யாசி. ப⁴க³வா சஸ்ஸ ‘‘ந தாவாஹ’’ந்திஆதீ³னி வத்வா படிக்கி²பி. தம் ஸந்தா⁴ய ‘‘பா⁴ஸிதா கோ² பனேஸா, ப⁴ந்தே,’’திஆதி³மாஹ.

தத்த² வியத்தாதி மக்³க³வஸேன ப்³யத்தா. ததே²வ வினீதா. ததா² விஸாரதா³. ப³ஹுஸ்ஸுதாதி தேபிடகவஸேன ப³ஹு ஸுதமேதேஸந்தி ப³ஹுஸ்ஸுதா. ததே³வ த⁴ம்மம் தா⁴ரேந்தீதி த⁴ம்மத⁴ரா. அத² வா பரியத்திப³ஹுஸ்ஸுதா சேவ படிவேத⁴ப³ஹுஸ்ஸுதா ச, பரியத்திபடிவேத⁴த⁴ம்மானம்யேவ தா⁴ரணதோ த⁴ம்மத⁴ராதி ஏவமேத்த² அத்தோ² த³ட்ட²ப்³போ³. த⁴ம்மானுத⁴ம்மப்படிபன்னாதி அரியத⁴ம்மஸ்ஸ அனுத⁴ம்மபூ⁴தம் விபஸ்ஸனாத⁴ம்மம் படிபன்னா. ஸாமீசிப்படிபன்னாதி அனுச்ச²விகபடிபத³ம் படிபன்னா. அனுத⁴ம்மசாரினோதி அனுத⁴ம்மசரணஸீலா. ஸகம் ஆசரியகந்தி அத்தனோ ஆசரியவாத³ம். ஆசிக்கி²ஸ்ஸந்தீதிஆதீ³னி ஸப்³பா³னி அஞ்ஞமஞ்ஞஸ்ஸேவ வேவசனானி. ஸஹத⁴ம்மேனாதி ஸஹேதுகேன ஸகாரணேன வசனேன. ஸப்பாடிஹாரியந்தி யாவ நிய்யானிகம் கத்வா த⁴ம்மம் தே³ஸேஸ்ஸந்தி.

ப்³ரஹ்மசரியந்தி ஸிக்க²த்தயஸங்க³ஹிதம் ஸகலம் ஸாஸனப்³ரஹ்மசரியம். இத்³த⁴ந்தி ஸமித்³த⁴ம் ஜா²னஸ்ஸாத³வஸேன. பீ²தந்தி வுட்³டி⁴பத்தம் ஸப்³ப³பாலிபு²ல்லம் விய அபி⁴ஞ்ஞாஸம்பத்திவஸேன. வித்தா²ரிகந்தி வித்த²தம் தஸ்மிம் தஸ்மிம் தி³ஸாபா⁴கே³ பதிட்டி²தவஸேன. பா³ஹுஜஞ்ஞந்தி ப³ஹூஹி ஞாதம் படிவித்³த⁴ம் மஹாஜனாபி⁴ஸமயவஸேன. புது²பூ⁴தந்தி ஸப்³பா³காரேன புது²லபா⁴வபத்தம். கத²ம்? யாவ தே³வமனுஸ்ஸேஹி ஸுப்பகாஸிதம், யத்தகா விஞ்ஞுஜாதிகா தே³வா சேவ மனுஸ்ஸா ச அத்தி², ஸப்³பே³ஹி ஸுட்டு² பகாஸிதந்தி அத்தோ².

அப்போஸ்ஸுக்கோதி நிராலயோ. த்வஞ்ஹி பாபிம அட்ட²மஸத்தாஹதோ பட்டா²ய ‘‘பரினிப்³பா³து தா³னி, ப⁴ந்தே, ப⁴க³வா, பரினிப்³பா³து ஸுக³தோ’’தி விரவந்தோ ஆஹிண்டி³த்த², அஜ்ஜ தா³னி பட்டா²ய விக³துஸ்ஸாஹோ ஹோஹி, மா மய்ஹம் பரினிப்³பா³னத்த²ம் வாயாமம் கரோஹீதி வத³தி.

ஸதோ ஸம்பஜானோ ஆயுஸங்கா²ரம் ஓஸ்ஸஜீதி ஸதிம் ஸூபட்டி²தம் கத்வா ஞாணேன பரிச்சி²ந்தி³த்வா ஆயுஸங்கா²ரம் விஸ்ஸஜி பஜஹி. தத்த² ந ப⁴க³வா ஹத்தே²ன லேட்³டு³ம் விய ஆயுஸங்கா²ரம் ஓஸ்ஸஜி, தேமாஸமத்தமேவ பன ப²லஸமாபத்திம் ஸமாபஜ்ஜித்வா ததோ பரம் ந ஸமாபஜ்ஜிஸ்ஸாமீதி சித்தம் உப்பாதே³ஸி. தம் ஸந்தா⁴ய வுத்தம் ‘‘ஓஸ்ஸஜீ’’தி. உஸ்ஸஜீதிபி பாடோ². மஹாபூ⁴மிசாலோதி மஹந்தோ பத²விகம்போ. ததா³ கிர த³ஸஸஹஸ்ஸிலோகதா⁴து அகம்பித்த². பி⁴ம்ஸனகோதி ப⁴யஜனகோ. தே³வது³ந்து³பி⁴யோ ச ப²லிம்ஸூதி தே³வபே⁴ரியோ ப²லிம்ஸு, தே³வோ ஸுக்க²க³ஜ்ஜிதம் க³ஜ்ஜி, அகாலவிஜ்ஜுலதா நிச்ச²ரிம்ஸு, க²ணிகவஸ்ஸம் வஸ்ஸீதி வுத்தம் ஹோதி.

உதா³னம் உதா³னேஸீதி கஸ்மா உதா³னேஸி? கோசி நாம வதே³ய்ய ‘‘ப⁴க³வா பச்ச²தோ பச்ச²தோ அனுப³ந்தி⁴த்வா – ‘பரினிப்³பா³யத², ப⁴ந்தே, பரினிப்³பா³யத², ப⁴ந்தே’தி உபத்³து³தோ ப⁴யேன ஆயுஸங்கா²ரம் விஸ்ஸஜ்ஜேஸீ’’தி. தஸ்ஸோகாஸோ மா ஹோதூதி. பீ⁴தஸ்ஸ ஹி உதா³னம் நாம நத்தீ²தி பீதிவேக³விஸ்ஸட்ட²ம் உதா³னேஸி.

தத்த² ஸப்³பே³ஸம் ஸோணஸிங்கா³லாதீ³னம்பி பச்சக்க²பா⁴வதோ துலிதம் பரிச்சி²ன்னந்தி துலம். கிம் தம்? காமாவசரகம்மம். ந துலம், ந வா துலம் ஸதி³ஸமஸ்ஸ அஞ்ஞம் லோகியகம்மம் அத்தீ²தி அதுலம். கிம் தம்? மஹக்³க³தகம்மம். அத² வா காமாவசரம் ரூபாவசரஞ்ச துலம், அரூபாவசரம் அதுலம். அப்பவிபாகம் துலம், ப³ஹுவிபாகம் அதுலம். ஸம்ப⁴வந்தி ஸம்ப⁴வஹேதுபூ⁴தம், பிண்ட³காரகம் ராஸிகாரகந்தி அத்தோ². ப⁴வஸங்கா²ரந்தி புனப்³ப⁴வஸ்ஸ ஸங்கா²ரம். அவஸ்ஸஜீதி விஸ்ஸஜ்ஜேஸி. முனீதி பு³த்³த⁴முனி. அஜ்ஜ²த்தரதோதி நியகஜ்ஜ²த்தரதோ. ஸமாஹிதோதி உபசாரப்பனாஸமாதி⁴வஸேன ஸமாஹிதோ. அபி⁴ந்தி³ கவசமிவாதி கவசம் விய அபி⁴ந்தி³. அத்தஸம்ப⁴வந்தி அத்தனி ஜாதகிலேஸம். இத³ம் வுத்தம் ஹோதி – ஸவிபாகட்டே²ன ஸம்ப⁴வம் ப⁴வாபி⁴ஸங்க²ணட்டே²ன ப⁴வஸங்கா²ரந்தி ச லத்³த⁴னாமம் துலாதுலஸங்கா²தம் லோகியகம்மஞ்ச ஓஸ்ஸஜி, ஸங்கா³மஸீஸே மஹாயோதோ⁴ கவசம் விய அத்தஸம்ப⁴வம் கிலேஸஞ்ச அஜ்ஜ²த்தரதோ ஸமாஹிதோ ஹுத்வா அபி⁴ந்தீ³தி.

அத² வா துலந்தி துலேந்தோ தீரேந்தோ. அதுலஞ்ச ஸம்ப⁴வந்தி நிப்³பா³னஞ்சேவ ப⁴வஞ்ச. ப⁴வஸங்கா²ரந்தி ப⁴வகா³மிகம்மம். அவஸ்ஸஜி முனீதி ‘‘பஞ்சக்க²ந்தா⁴ அனிச்சா, பஞ்சன்னம் க²ந்தா⁴னம் நிரோதோ⁴ நிப்³பா³னம் நிச்ச’’ந்திஆதி³னா நயேன துலயந்தோ பு³த்³த⁴முனி ப⁴வே ஆதீ³னவம் நிப்³பா³னே சானிஸம்ஸம் தி³ஸ்வா தம் க²ந்தா⁴னம் மூலபூ⁴தம் ப⁴வஸங்கா²ரம் ‘‘கம்மக்க²யாய ஸம்வத்ததீ’’தி ஏவம் வுத்தேன கம்மக்க²யகரேன அரியமக்³கே³ன அவஸ்ஸஜி. கத²ம்? அஜ்ஜ²த்தரதோ ஸமாஹிதோ அபி⁴ந்தி³ கவசமிவத்தஸம்ப⁴வம். ஸோ ஹி விபஸ்ஸனாவஸேன அஜ்ஜ²த்தரதோ, ஸமத²வஸேன ஸமாஹிதோதி ஏவம் புப்³ப³பா⁴க³தோ பட்டா²ய ஸமத²விபஸ்ஸனாப³லேன கவசமிவ அத்தபா⁴வம் பரியோனந்தி⁴த்வா டி²தம், அத்தனி ஸம்ப⁴வத்தா அத்தஸம்ப⁴வந்தி லத்³த⁴னாமம் ஸப்³ப³ம் கிலேஸஜாதம் அபி⁴ந்தி³. கிலேஸாபா⁴வேன ச கம்மம் அப்படிஸந்தி⁴கத்தா அவஸ்ஸட்ட²ம் நாம ஹோதீதி ஏவம் கிலேஸப்பஹானேன கம்மம் ஜஹி. பஹீனகிலேஸஸ்ஸ ப⁴யம் நாம நத்தி². தஸ்மா அபீ⁴தோவ ஆயுஸங்கா²ரம் ஓஸ்ஸஜி. அபீ⁴தபா⁴வஞாபனத்த²ஞ்ச உதா³னம் உதா³னேஸீதி வேதி³தப்³போ³.

சாபாலவக்³கோ³ பட²மோ.