5. சக்கவத்திவக்³கோ³

1. விதா⁴ஸுத்தவண்ணனா

222. பஞ்சமவக்³க³ஸ்ஸ பட²மே திஸ்ஸோ விதா⁴தி தயோ மானகோட்டா²ஸா, மானோயேவ வா. ததா² ததா² வித³ஹனதோ ஹி மானோவ விதா⁴தி வுச்சதி.

2. சக்கவத்திஸுத்தவண்ணனா

223. து³தியே ரஞ்ஞோ, பி⁴க்க²வே, சக்கவத்திஸ்ஸாதி ஏத்த² அத்தனோ ஸிரிஸம்பத்தியா ராஜதி, சதூஹி வா ஸங்க³ஹவத்தூ²ஹி லோகம் ரஞ்ஜேதீதி ராஜா, தஸ்ஸ ரஞ்ஞோ. ‘‘பவத்தது ப⁴வம் சக்கரதன’’ந்தி புஞ்ஞானுபா⁴வேன அப்³பு⁴க்³க³தாய வாசாய சோதே³ந்தோ சக்கம் வத்தேதீதி சக்கவத்தீ, தஸ்ஸ சக்கவத்திஸ்ஸ. பாதுபா⁴வாதி பாதுபா⁴வேன. ஸத்தன்னந்தி க³ணனபரிச்சே²தோ³. ரதனானந்தி பரிச்சி²ன்னஅத்த²த³ஸ்ஸனம். வசனத்தோ² பனேத்த² ரதிஜனனட்டே²ன ரதனம். அபிச –

‘‘சித்தீகதம் மஹக்³க⁴ஞ்ச, அதுலம் து³ல்லப⁴த³ஸ்ஸனம்;

அனோமஸத்தபரிபோ⁴க³ம், ரதனம் தேன வுச்சதீ’’தி.

சக்கரதனஸ்ஸ ச நிப்³ப³த்தகாலதோ பட்டா²ய அஞ்ஞம் தே³வட்டா²னம் நாம ந ஹோதி, ஸப்³பே³வ க³ந்த⁴புப்பா²தீ³ஹி தஸ்ஸேவ பூஜஞ்ச அபி⁴வாத³னாதீ³னி ச கரோந்தீதி சித்தீகதட்டே²ன ரதனம். சக்கரதனஸ்ஸ ச ‘‘ஏத்தகம் நாம த⁴னம் அக்³க⁴தீ’’தி அக்³கோ⁴ நத்தி², இதி மஹக்³க⁴ட்டே²னாபி ரதனம். சக்கரதனஞ்ச அஞ்ஞேஹி லோகே விஜ்ஜமானரதனேஹி அஸதி³ஸந்தி அதுலட்டே²ன ரதனம். யஸ்மா பன யஸ்மிம் கப்பே பு³த்³தா⁴ உப்பஜ்ஜந்தி, தஸ்மிம்யேவ சக்கவத்தினோ, பு³த்³தா⁴ ச கதா³சி கரஹசி உப்பஜ்ஜந்தி, தஸ்மா து³ல்லப⁴த³ஸ்ஸனட்டே²ன ரதனம். ததே³தம் ஜாதிரூபகுலஇஸ்ஸரியாதீ³ஹி அனோமஸ்ஸ உளாரஸத்தஸ்ஸேவ உப்பஜ்ஜதி, ந அஞ்ஞஸ்ஸாதி அனோமஸத்தபரிபோ⁴க³ட்டே²னாபி ரதனம். யதா² ச சக்கரதனம், ஏவம் ஸேஸானிபீதி. தேன வுத்தம் –

‘‘சித்தீகதம் மஹக்³க⁴ஞ்ச, அதுலம் து³ல்லப⁴த³ஸ்ஸனம்;

அனோமஸத்தபரிபோ⁴க³ம், ரதனம் தேன வுச்சதீ’’தி.

பாதுபா⁴வோ ஹோதீதி நிப்³ப³த்தி ஹோதி. தத்ராயம் யோஜனா – சக்கவத்திஸ்ஸ பாதுபா⁴வா ஸத்தன்னம் ரதனானம் பாதுபா⁴வோதி அயுத்தம். உப்பன்னஞ்ஹி சக்கம் வத்தேத்வா ஸோ சக்கவத்தீ நாம ஹோதீதி நாயுத்தம். கஸ்மா? சக்கவத்தனனியமாபேக்க²தாய. யோ ஹி நியமேன சக்கம் வத்தேஸ்ஸதி, ஸோ படிஸந்தி⁴தோ பபு⁴தி ‘‘சக்கவத்தி பாதுபூ⁴தோ’’தி வத்தப்³ப³தம் ஆபஜ்ஜதி. லத்³த⁴னாமஸ்ஸ ச புரிஸஸ்ஸ மூலுப்பத்திவசனதோபி யுத்தமேவேதம். யோ ஹி ஏஸ சக்கவத்தீதி லத்³த⁴னாமோ ஸத்தவிஸேஸோ, தஸ்ஸ படிஸந்தி⁴ஸங்கா²தோ பாதுபா⁴வோதி அயமேத்த² அத்தோ². தஸ்ஸ ஹி பாதுபா⁴வா ரதனானி பாதுப⁴வந்தி. பாதுபூ⁴தேஹி பன தேஹி ஸத்³தி⁴ம் பரிபக்கே புஞ்ஞஸம்பா⁴ரே ஸோ ஸம்யுஜ்ஜதி, ததா³ லோகஸ்ஸ தேஸு பாதுபா⁴வசித்தம் உப்பஜ்ஜதி. ப³ஹுலவசனதோ சாபி யுத்தமேவேதம். யதா³ ஹி லோகஸ்ஸ தேஸு பாதுபா⁴வஸஞ்ஞா உப்பஜ்ஜதி, ததா³ ஏகமேவ பட²மம், பச்சா² இதரானி ச² பாதுப⁴வந்தீதி ப³ஹுலவசனதோ சாபி ஏதம் யுத்தம். பாதுபா⁴வஸ்ஸ ச அத்த²பே⁴த³தோபி யுத்தமேவேதம். ந கேவலஞ்ஹி பாதுபூ⁴தமேவ பாதுபா⁴வோ, பாதுபா⁴வயதீதி பாதுபா⁴வோ. அயம் பாதுபா⁴வஸ்ஸ அத்த²பே⁴தோ³. யஸ்மா யோ ஸோ புஞ்ஞஸம்பா⁴ரோ ராஜானம் சக்கவத்திம் படிஸந்தி⁴வஸேன பாதுபா⁴வயதி, தஸ்மா ரஞ்ஞோ சக்கவத்திஸ்ஸ பாதுபா⁴வா. ந கேவலஞ்ஹி சக்கவத்தியேவ, இமானி பன ஸத்த ரதனானிபி பாதுப⁴வந்தீதி அயமேத்த² அத்தோ². யதே²வ ஹி ஸோ புஞ்ஞஸம்பா⁴ரோ ரஞ்ஞோ ஜனகஹேது, ஏவம் ரதனானம்பி பரியாயேன உபனிஸ்ஸயஹேதூதி யுத்தமேவேதம் ‘‘ரஞ்ஞோ, பி⁴க்க²வே, சக்கவத்திஸ்ஸ பாதுபா⁴வா ஸத்தன்னம் ரதனானம் பாதுபா⁴வோ ஹோதீ’’தி.

இதா³னி தேஸம் ரதனானம் ஸரூபவஸேன த³ஸ்ஸனத்த²ம் கதமேஸம் ஸத்தன்னம் சக்கரதனஸ்ஸாதிஆதி³மாஹ. தத்த² சக்கரதனஸ்ஸாதிஆதீ³ஸு அயம் ஸங்கே²பாதி⁴ப்பாயோ – த்³விஸஹஸ்ஸதீ³பபரிவாரானம் சதுன்னம் மஹாதீ³பானம் ஸிரிவிப⁴வம் க³ஹேத்வா தா³தும் ஸமத்த²ஸ்ஸ சக்கரதனஸ்ஸ பாதுபா⁴வோ ஹோதி, ததா² புரேப⁴த்தமேவ ஸாக³ரபரியந்தம் பத²விம் அனுபரியாயனஸமத்த²ஸ்ஸ வேஹாஸங்க³மஸ்ஸ ஹத்தி²ரதனஸ்ஸ, தாதி³ஸஸ்ஸேவ அஸ்ஸரதனஸ்ஸ, சதுரங்க³ஸமன்னாக³தேபி அந்த⁴காரே யோஜனப்பமாணம் அந்த⁴காரம் வித⁴மித்வா ஆலோகத³ஸ்ஸனஸமத்த²ஸ்ஸ மணிரதனஸ்ஸ, ச²ப்³பி³த⁴ம் தோ³ஸம் விவஜ்ஜேத்வா மனாபசாரினோ இத்தி²ரதனஸ்ஸ, யோஜனப்பமாணே பதே³ஸே அந்தோபத²விக³தானம் நிதீ⁴னம் த³ஸ்ஸனஸமத்த²ஸ்ஸ க³ஹபதிரதனஸ்ஸ, அக்³க³மஹேஸியா குச்சி²ம்ஹி நிப்³ப³த்தித்வா ஸகலரஜ்ஜானுஸாஸனஸமத்த²ஸ்ஸ ஜேட்ட²புத்தஸங்கா²தஸ்ஸ பரிணாயகரதனஸ்ஸ ச பாதுபா⁴வோ ஹோதீதி. அயமேத்த² ஸங்கே²போ. வித்தா²ரதோ பன தேஸம் சக்கரதனாதீ³னம் பாதுபா⁴வவிதா⁴னம் மஹாஸுத³ஸ்ஸனாதீ³ஸு ஸுத்தேஸு ஆக³தமேவ. அத்தோ²பிஸ்ஸ தேஸம் வண்ணனாய ஸம்வண்ணிதோயேவ.

ஸதிஸம்போ³ஜ்ஜ²ங்க³ரதனஸ்ஸாதிஆதீ³ஸு ஸரிக்க²கதா ஏவம் வேதி³தப்³பா³ – யதே²வ ஹி சக்கவத்தினோ சக்கரதனம் ஸப்³ப³ரதனானம் புரேசரம், ஏவம் ஸதிஸம்போ³ஜ்ஜ²ங்க³ரதனம் ஸப்³பே³ஸம் சதுபூ⁴மகத⁴ம்மானம் புரேசரந்தி, புரேசரணட்டே²ன சக்கவத்திரஞ்ஞோ சக்கரதனஸதி³ஸம் ஹோதி. சக்கவத்தினோ ச ரதனேஸு மஹாகாயூபபன்னம் அச்சுக்³க³தம் விபுலம் மஹந்தம் ஹத்தி²ரதனம், இத³ம்பி த⁴ம்மவிசயஸம்போ³ஜ்ஜ²ங்க³ரதனம் மஹந்தம் த⁴ம்மகாயூபபன்னம் அச்சுக்³க³தம் விபுலம் மஹந்தந்தி ஹத்தி²ரதனஸதி³ஸம் ஹோதி. சக்கவத்தினோ அஸ்ஸரதனம் ஸீக⁴ம் லஹு ஜவம், இத³ம்பி வீரியஸம்போ³ஜ்ஜ²ங்க³ரதனம் ஸீக⁴ம் லஹு ஜவந்தி இமாய ஸீக⁴லஹுஜவதாய அஸ்ஸரதனஸதி³ஸம் ஹோதி. சக்கவத்தினோ மணிரதனம் அந்த⁴காரம் வித⁴மதி, ஆலோகம் த³ஸ்ஸேதி, இத³ம்பி பீதிஸம்போ³ஜ்ஜ²ங்க³ரதனம் தாய ஏகந்தகுஸலத்தா கிலேஸந்த⁴காரம் வித⁴மதி, ஸஹஜாதபச்சயாதி³வஸேன ஞாணாலோகம் த³ஸ்ஸேதீதி இமினா அந்த⁴காரவித⁴மனஆலோகத³ஸ்ஸனபா⁴வேன மணிரதனஸதி³ஸம் ஹோதி.

சக்கவத்தினோ இத்தி²ரதனம் காயசித்தத³ரத²ம் படிபஸ்ஸம்பே⁴தி, பரிளாஹம் வூபஸமேதி. இத³ம்பி பஸ்ஸத்³தி⁴ஸம்போ³ஜ்ஜ²ங்க³ரதனம் காயசித்தத³ரத²ம் படிபஸ்ஸம்பே⁴தி, பரிளாஹம் வூபஸமேதீதி இத்தி²ரதனஸதி³ஸம் ஹோதி. சக்கவத்தினோ க³ஹபதிரதனம் இச்சி²திச்சி²தக்க²ணே த⁴னதா³னேன விக்கே²பம் பச்சி²ந்தி³த்வா சித்தம் ஏகக்³க³ம் கரோதி, இத³ம்பி ஸமாதி⁴ஸம்போ³ஜ்ஜ²ங்க³ரதனம் யதி²ச்சி²தாதி³வஸேன அப்பனம் ஸம்பாதே³தி, விக்கே²பம் பச்சி²ந்தி³த்வா சித்தம் ஏகக்³க³ம் கரோதீதி க³ஹபதிரதனஸதி³ஸம் ஹோதி. சக்கவத்தினோ ச பரிணாயகரதனம் ஸப்³ப³த்த²கிச்சஸம்பாத³னேன அப்போஸ்ஸுக்கதம் கரோதி. இத³ம்பி உபேக்கா²ஸம்போ³ஜ்ஜ²ங்க³ரதனம் சித்துப்பாத³ம் லீனுத்³த⁴ச்சதோ மோசேத்வா பயோக³மஜ்ஜ²த்தே ட²பயமானம் அப்போஸ்ஸுக்கதம் கரோதீதி பரிணாயகரதனஸதி³ஸம் ஹோதி. இதி இமஸ்மிம் ஸுத்தே சதுபூ⁴மகோ ஸப்³ப³ஸங்கா³ஹிகத⁴ம்மபரிச்சே²தோ³ கதி²தோதி வேதி³தப்³போ³.

4-10. து³ப்பஞ்ஞஸுத்தாதி³வண்ணனா

225-231. சதுத்தே² ஏளமூகோ³தி முகே²ன வாசம் நிச்சா²ரேதும் ஸக்கோந்தோபி தோ³ஸேஹி மூகோ³ அஸம்பன்னவசனோ. ஸேஸம் ஸப்³ப³த்த² உத்தானத்த²மேவாதி.

சக்கவத்திவக்³கோ³.