4. நீவரணவக்³கோ³

3-4. உபக்கிலேஸஸுத்தாதி³வண்ணனா

214-215. சதுத்த²வக்³க³ஸ்ஸ ததியே ந ச பப⁴ஸ்ஸரந்தி ந ச பபா⁴வந்தம். பப⁴ங்கு³ சாதி பபி⁴ஜ்ஜனஸபா⁴வம். அயோதி காளலோஹம். ட²பேத்வா இத⁴ வுத்தானி சத்தாரி அவஸேஸம் லோஹம் நாம. ஸஜ்ஜூ²தி ரஜதம். சித்தஸ்ஸாதி சதுபூ⁴மகசித்தஸ்ஸ. லோகியஸ்ஸ தாவ உபக்கிலேஸோ ஹோது, லோகுத்தரஸ்ஸ கத²ம் ஹோதீதி? உப்பஜ்ஜிதும் அப்பதா³னேன. யத³க்³கே³ன ஹி உப்பஜ்ஜிதும் ந தே³ந்தி, தத³க்³கே³னேவ தே லோகியஸ்ஸாபி லோகுத்தரஸ்ஸாபி உபக்கிலேஸா நாம ஹோந்தி. பப⁴ங்கு³ சாதி ஆரம்மணே சுண்ணவிசுண்ணபா⁴வூபக³மனேன பி⁴ஜ்ஜனஸபா⁴வம். அனாவரணா அனீவரணாதி குஸலத⁴ம்மே ந ஆவரந்தீதி அனாவரணா, ந நீவரந்தி ந படிச்சா²தே³ந்தீதி அனீவரணா. சேதஸோ அனுபக்கிலேஸாதி சதுபூ⁴மகசித்தஸ்ஸ அனுபக்கிலேஸா.

8. ஆவரணனீவரணஸுத்தவண்ணனா

219. அட்ட²மே பஞ்ஞாய து³ப்³ப³லீகரணாதி பஞ்ஞாய மந்த³பா⁴வகரா. நீவரணானஞ்ஹி அபி⁴ண்ஹுப்பாதே³ ஸதி அந்தரந்தரா உப்பஜ்ஜமானா பஞ்ஞா து³ப்³ப³லா ஹோதி மந்தா³ அவிஸதா³.

பஞ்ச நீவரணா தஸ்மிம் ஸமயே ந ஹோந்தி. ஸத்தபோ³ஜ்ஜ²ங்கா³ தஸ்மிம் ஸமயே பா⁴வனாபாரிபூரிம் க³ச்ச²ந்தீதி அரியஸாவகஸ்ஸ ஹி ஸப்பாயத⁴ம்மஸ்ஸவனம் ஸுணந்தஸ்ஸ பஞ்ச நீவரணா தூ³ரே ஹோந்தி. ஸோ ஸசே தஸ்மிம்யேவ டா²னே விஸேஸம் நிப்³ப³த்தேதும் ஸக்கோதி, ஏவமஸ்ஸ ஸத்த போ³ஜ்ஜ²ங்கா³ பா⁴வனாபாரிபூரிம் க³ச்ச²ந்தி. நோ சே ஸக்கோதி, ததோ வுட்டா²ய ரத்திட்டா²னதி³வாட்டா²னம் க³தோ தமேவ பீதிம் அவிஜஹந்தோ பஞ்ச நீவரணே விக்க²ம்பே⁴த்வா விஸேஸம் நிப்³ப³த்தேஸ்ஸதி. தத்த² அஸக்கோந்தோபி யாவ ஸத்ததி³வஸப்³ப⁴ந்தரா தமேவ பீதிம் அவிஜஹந்தோ நீவரணே விக்க²ம்பே⁴த்வா விஸேஸம் நிப்³ப³த்தேஸ்ஸதீதி இத³ம் ஸந்தா⁴யேதம் வுத்தம். த⁴ம்மஸ்ஸவனவஸேன ஸகிம் பீதிபாமோஜ்ஜபக்கி²யா படிலத்³த⁴போ³ஜ்ஜ²ங்கா³ ஹி கம்மாராமதாதீ³னி ஆக³ம்ம நஸ்ஸந்தி, ததா²ரூபம் பன உதுஸப்பாயாதி³ம் லபி⁴த்வா புன உப்பஜ்ஜந்தாபி தஸ்மிம் ஸமயே பா⁴வனாபாரிபூரிம் க³ச்ச²ந்தி இச்சேவ வுச்சதி.

9. ருக்க²ஸுத்தவண்ணனா

220. நவமே அஜ்ஜா²ருஹாதி அபி⁴ருஹனகா. கச்ச²கோதி அட்டி²கச்ச²கோ. கபித்த²னோதி மக்கடத²னஸதி³ஸப²லோ விஜாதபிலக்கோ².

10. நீவரணஸுத்தவண்ணனா

221. த³ஸமே அந்த⁴கரணாதி அந்த⁴பா⁴வகரணா. அசக்கு²கரணாதி பஞ்ஞாசக்கு²ஸ்ஸ அகரணா. பஞ்ஞானிரோதி⁴காதி பஞ்ஞாய நிரோத⁴னா. விகா⁴தபக்கி²யாதி து³க்க²பக்கி²கா. அனிப்³பா³னஸம்வத்தனிகாதி நிப்³பா³னத்தா²ய அஸம்வத்தனிகா. ஸேஸம் ஸப்³ப³த்த² உத்தானத்த²மேவ. ஸகலேபி இமஸ்மிம் வக்³கே³ மிஸ்ஸகபோ³ஜ்ஜ²ங்கா³வ கதி²தாதி.

நீவரணவக்³கோ³.