3. மிச்ச²த்தவக்³க³வண்ணனா

21-30. ததியவக்³க³ஸ்ஸ பட²மே மிச்ச²த்தந்தி மிச்சா²ஸபா⁴வம். ஸம்மத்தந்தி ஸம்மாஸபா⁴வம். மிச்சா²படிபத்தாதி⁴கரணஹேதூதி மிச்சா²படிபத்திகரணஹேது. யஸ்மா மிச்சா²படிபத்திம் கரோதி, தஸ்மாதி அத்தோ². நாராத⁴கோதி ந ஸம்பாத³கோ. ஞாயம் த⁴ம்மந்தி அரியமக்³க³த⁴ம்மம். மிச்சா²ஞாணீதி மிச்சா²விஞ்ஞாணோ மிச்சா²பச்சவேக்க²ணோ. மிச்சா²விமுத்தீதி அயாதா²வவிமுத்தி, அனிய்யானிகவிமுத்தி. இமேஸு ததியாதீ³ஸு சதூஸு ஸுத்தேஸு வட்டவிவட்டம் கதி²தம், பச்சி²மேஸு பனேத்த² த்³வீஸு புக்³க³லோ புச்சி²தோ த⁴ம்மோ விப⁴த்தோ, ஏவம் த⁴ம்மேன புக்³க³லோ த³ஸ்ஸிதோதி. ஸுப்பவத்தியோதி ஸுப்பவத்தனியோ. யதா² இச்சி²திச்சி²தம் தி³ஸம் பவத்தேந்தோ தா⁴வதி, ஏவம் பவத்தேதும் ஸக்கா ஹோதீதி அத்தோ². ஸஉபனிஸம் ஸபரிக்கா²ரந்தி ஸப்பச்சயம் ஸபரிவாரம். ஸேஸம் ஸப்³ப³த்த² உத்தானத்த²மேவாதி.

மிச்ச²த்தவக்³கோ³ ததியோ.