4. படிபத்திவக்³க³வண்ணனா

31-40. சதுத்தே² மிச்சா²படிபத்திந்தி அயாதா²வபடிபத்திம். மிச்சா²படிபன்னந்தி அயாதா²வபடிபன்னம். இதி ஏகம் ஸுத்தம் த⁴ம்மவஸேன கதி²தம், ஏகம் புக்³க³லவஸேன. அபாரா பாரந்தி வட்டதோ நிப்³பா³னம். பாரகா³மினோதி ஏத்த² யேபி பாரங்க³தா, யேபி க³ச்ச²ந்தி, யேபி க³மிஸ்ஸந்தி, ஸப்³பே³ பாரகா³மினோத்வேவ வேதி³தப்³பா³.

தீரமேவானுதா⁴வதீதி வட்டமேவ அனுதா⁴வதி, வட்டே விசரதி. கண்ஹந்தி அகுஸலத⁴ம்மம். ஸுக்கந்தி குஸலத⁴ம்மம். ஓகா அனோகந்தி வட்டதோ நிப்³பா³னம். ஆக³ம்மாதி ஆரப்³ப⁴ ஸந்தா⁴ய படிச்ச. பரியோத³பேய்யாதி பரிஸுத்³த⁴ம் கரேய்ய. சித்தக்லேஸேஹீதி சித்தம் கிலிஸ்ஸாபேந்தேஹி நீவரணேஹி. ஸம்போ³தி⁴யங்கே³ஸூதி ஸத்தஸு போ³ஜ்ஜ²ங்கே³ஸு.

ஸாமஞ்ஞத்த²ந்தி நிப்³பா³னம். தஞ்ஹி ஸாமஞ்ஞேன உபக³ந்தப்³ப³தோ ஸாமஞ்ஞத்தோ²தி வுச்சதி. ப்³ரஹ்மஞ்ஞந்தி ஸேட்ட²பா⁴வம். ப்³ரஹ்மஞ்ஞத்த²ந்தி நிப்³பா³னம் ப்³ரஹ்மஞ்ஞேன உபக³ந்தப்³ப³தோ. யத்த² யத்த² பன ஹேட்டா² ச இமேஸு ச தீஸு ஸுத்தேஸு ‘‘ராக³க்க²யோ’’தி ஆக³தம், தத்த² தத்த² அரஹத்தம்பி வட்டதியேவாதி வத³ந்தி.

படிபத்திவக்³கோ³ சதுத்தோ².