1. அவிஜ்ஜாவக்³கோ³

1-2. அவிஜ்ஜாஸுத்தாதி³வண்ணனா

1-2. மஹாவக்³க³ஸ்ஸ பட²மே புப்³ப³ங்க³மாதி ஸஹஜாதவஸேன ச உபனிஸ்ஸயவஸேன சாதி த்³வீஹாகாரேஹி புப்³ப³ங்க³மா. ஸமாபத்தியாதி ஸமாபஜ்ஜனாய ஸபா⁴வபடிலாபா⁴ய, உப்பத்தியாதி அத்தோ². அன்வதே³வ அஹிரிகம் அனோத்தப்பந்தி ஸா பனேஸா யதே³தம் அலஜ்ஜனாகாரஸண்டி²கம் அஹிரிகம், அபா⁴யனாகாரஸண்டி²தஞ்ச அனோத்தப்பம், ஏதம் அனுதே³வ ஸஹேவ ஏகதோவ, ந வினா தேன உப்பஜ்ஜதீதி அத்தோ². அவிஜ்ஜாக³தஸ்ஸாதி அவிஜ்ஜாய உபக³தஸ்ஸ ஸமன்னாக³தஸ்ஸ. மிச்சா²தி³ட்டீ²தி அயாதா²வதி³ட்டி² அனிய்யானிகதி³ட்டி². பஹோதீதி ஹோதி உப்பஜ்ஜதி. மிச்சா²ஸங்கப்பாதீ³ஸுபி அயாதா²வஅனிய்யானிகவஸேனேவ மிச்சா²பா⁴வோ வேதி³தப்³போ³. இதி இமானி அட்ட²பி அகுஸலத⁴ம்மஸமாபத்தியா மிச்ச²த்தஅங்கா³னி நாம ஹோந்தி. தானி பன ந ஏகக்க²ணே ஸப்³பா³னி லப்³ப⁴ந்தி, நானக்க²ணே லப்³ப⁴ந்தி.

கத²ம்? யதா³ ஹி தி³ட்டி²ஸம்பயுத்தசித்தம் காயவிஞ்ஞத்திம் ஸமுட்டா²பேந்தம் உப்பஜ்ஜதி, ததா³ மிச்சா²தி³ட்டி² மிச்சா²ஸங்கப்போ மிச்சா²வாயாமோ மிச்சா²ஸதி மிச்சா²ஸமாதி⁴ மிச்சா²கம்மந்தோதி ச² அங்கா³னி ஹோந்தி. யதா³ தி³ட்டி²விப்பயுத்தம், ததா³ மிச்சா²தி³ட்டி²வஜ்ஜானி பஞ்ச. யதா³ தானேவ த்³வே வசீவிஞ்ஞத்திம் ஸமுட்டா²பேந்தி, ததா³ மிச்சா²கம்மந்தட்டா²னே மிச்சா²வாசாய ஸத்³தி⁴ம் தானேவ ச² வா பஞ்ச வா. அயம் ஆஜீவோ நாம குப்பமானோ காயவசீத்³வாரேஸுயேவ அஞ்ஞதரஸ்மிம் குப்பதி, ந மனோத்³வாரே. தஸ்மா யதா³ ஆஜீவஸீஸேன தானேவ சித்தானி காயவசீவிஞ்ஞத்தியோ ஸமுட்டா²பேந்தி, ததா³ காயகம்மம் மிச்சா²ஜீவோ நாம ஹோதி, ததா² வசீகம்மந்தி மிச்சா²ஜீவஸ்ஸ வஸேன தானேவ ச² வா பஞ்ச வா. யதா³ பன விஞ்ஞத்திம் அஸமுட்டா²பேத்வா தானி சித்தானி உப்பஜ்ஜந்தி, ததா³ மிச்சா²தி³ட்டி²மிச்சா²ஸங்கப்பமிச்சா²வாயாமமிச்சா²ஸதிமிச்சா²ஸமாதி⁴வஸேன பஞ்ச வா, மிச்சா²ஸங்கப்பாதி³வஸேன சத்தாரி வா ஹோந்தீதி ஏவம் ந ஏகக்க²ணே ஸப்³பா³னி லப்³ப⁴ந்தி, நானக்க²ணே லப்³ப⁴ந்தீதி.

ஸுக்கபக்கே² விஜ்ஜாதி கம்மஸ்ஸகதஞாணம். இஹாபி ஸஹஜாதவஸேன ச உபனிஸ்ஸயவஸேன சாதி த்³வீஹாகாரேஹி புப்³ப³ங்க³மதா வேதி³தப்³பா³. ஹிரோத்தப்பந்தி ஹிரீ ச ஓத்தப்பஞ்ச. தத்த² லஜ்ஜனாகாரஸண்டி²தா ஹிரீ, பா⁴யனாகாரஸண்டி²தம் ஓத்தப்பம். அயமேத்த² ஸங்கே²போ, வித்தா²ரோ பன விஸுத்³தி⁴மக்³கே³ வுத்தோவ. விஜ்ஜாக³தஸ்ஸாதி விஜ்ஜாய உபக³தஸ்ஸ ஸமன்னாக³தஸ்ஸ. வித்³த³ஸுனோதி விது³னோ பண்டி³தஸ்ஸ. ஸம்மாதி³ட்டீ²தி யாதா²வதி³ட்டி² நிய்யானிகதி³ட்டி². ஸம்மாகம்மந்தாதீ³ஸுபி ஏஸேவ நயோ. இதி குஸலத⁴ம்மஸமாபத்தியா இமானி அட்ட²ங்கா³னி ஹோந்தி, தானி லோகியமக்³க³க்க²ணே ந ஏகதோ ஸப்³பா³னி லப்³ப⁴ந்தி, லோகுத்தரமக்³க³க்க²ணே பன லப்³ப⁴ந்தி. தானி ச கோ² பட²மஜ்ஜா²னிகமக்³கே³, து³தியஜ்ஜா²னிகாதீ³ஸு பன ஸம்மாஸங்கப்பவஜ்ஜானி ஸத்தேவ ஹோந்தி.

தத்த² யோ ஏவம் வதே³ய்ய ‘‘யஸ்மா மஜ்ஜி²மனிகாயம்ஹி மஹாஸளாயதனிகஸுத்தே (ம. நி. 3.431) ‘யா ததா²பூ⁴தஸ்ஸ தி³ட்டி², ஸாஸ்ஸ ஹோதி ஸம்மாதி³ட்டி². யோ ததா²பூ⁴தஸ்ஸ, ஸங்கப்போ, ஸ்வாஸ்ஸ ஹோதி ஸம்மாஸங்கப்போ. யோ ததா²பூ⁴தஸ்ஸ வாயாமோ, ஸ்வாஸ்ஸ ஹோதி ஸம்மாவாயாமோ. யா ததா²பூ⁴தஸ்ஸ ஸதி, ஸ்வாஸ்ஸ ஹோதி ஸம்மாஸதி. யோ ததா²பூ⁴தஸ்ஸ ஸமாதி⁴, ஸ்வாஸ்ஸ ஹோதி ஸம்மாஸமாதி⁴. புப்³பே³வ கோ² பனஸ்ஸ காயகம்மம் வசீகம்மம் ஆஜீவோ ச ஸுபரிஸுத்³தோ⁴’தி வுத்தம் தஸ்மா பஞ்சங்கி³கோபி லோகுத்தரமக்³கோ³ ஹோதீ’’தி ஸோ வத்தப்³போ³ – தஸ்மிம்யேவ ஸுத்தே ‘‘ஏவமஸ்ஸாயம் அரியோ அட்ட²ங்கி³கோ மக்³கோ³ பா⁴வனாபாரிபூரிம் க³ச்ச²தீ’’தி இத³ம் கஸ்மா ந பஸ்ஸஸி? யம் பனேதம் ‘‘புப்³பே³வ கோ² பனஸ்ஸா’’தி வுத்தம், தம் பப்³ப³ஜிததி³வஸதோ பட்டா²ய பரிஸுத்³த⁴பா⁴வத³ஸ்ஸனத்த²ம். பப்³ப³ஜிததி³வஸதோ பட்டா²ய ஹி பரிஸுத்³தா⁴னி காயகம்மாதீ³னி லோகுத்தரமக்³க³க்க²ணே அதிபரிஸுத்³தா⁴னி ஹோந்தீதி அயமத்தோ² தீ³பிதோ.

யம்பி அபி⁴த⁴ம்மே வுத்தம் ‘‘தஸ்மிம் கோ² பன ஸமயே பஞ்சங்கி³கோ மக்³கோ³ ஹோதீ’’தி (விப⁴. 212), தம் ஏகம் கிச்சந்தரம் த³ஸ்ஸேதும் வுத்தம். யஸ்மிஞ்ஹி காலே மிச்சா²கம்மந்தம் பஹாய ஸம்மாகம்மந்தம் பூரேதி, தஸ்மிம் காலே மிச்சா²வாசா வா மிச்சா²ஜீவோ வா ந ஹோதி, தி³ட்டி² ஸங்கப்போ வாயாமோ ஸதி ஸமாதீ⁴தி இமேஸுயேவ பஞ்சஸு காரகங்கே³ஸு ஸம்மாகம்மந்தோ பூரதி. விரதிவஸேன ஹி ஸம்மாகம்மந்தோ பூரதி நாம. ஸம்மாவாசாஸம்மாஆஜீவேஸுபி ஏஸேவ நயோ. இதி இமம் கிச்சந்தரம் த³ஸ்ஸேதும் ஏவம் வுத்தம். லோகியமக்³க³க்க²ணே ச பஞ்சேவ ஹோந்தி, விரதி பன அனியதா. தஸ்மா ‘‘ச²அங்கி³கோ’’தி அவத்வா ‘‘பஞ்சங்கி³கோ’’த்வேவ வுத்தம். ‘‘யா ச, பி⁴க்க²வே, அரியசித்தஸ்ஸ அனாஸவசித்தஸ்ஸ அரியமக்³க³ஸமங்கி³னோ அரியமக்³க³ம் பா⁴வயதோ தீஹி காயது³ச்சரிதேஹி ஆரதி விரதி படிவிரதி வேரமணீ அகிரியா அகரணம், அயம் பி⁴க்க²வே ஸம்மாகம்மந்தோ அரியோ அனாஸவோ லோகுத்தரமக்³கோ³’’தி (ம. நி. 3.139). ஏவம் பன மஹாசத்தாலீஸகஸுத்தாதீ³ஸு அனேகேஸு ஸுத்தேஸு ஸம்மாகம்மந்தாதீ³னஞ்ச லோகுத்தரமக்³க³ஸ்ஸ அங்க³பா⁴வஸித்³தி⁴தோ அட்ட²ங்கி³கோவ லோகுத்தரமக்³கோ³ ஹோதீதி வேதி³தப்³போ³தி. இமஸ்மிம் ஸுத்தே அயம் அட்ட²ங்கி³கோ மக்³கோ³ லோகியலோகுத்தரமிஸ்ஸகோவ கதி²தோ. து³தியம் கோஸலஸம்யுத்தே வுத்தமேவ.

3. ஸாரிபுத்தஸுத்தவண்ணனா

3. ததியே ஸகலமித³ம் ப⁴ந்தேதி ஆனந்த³த்தே²ரோ ஸாவகபாரமீஞாணஸ்ஸ மத்த²கம் அப்பத்ததாய ஸகலம்பி மக்³க³ப்³ரஹ்மசரியம் கல்யாணமித்தஸன்னிஸ்ஸயேன லப்³ப⁴தீதி ந அஞ்ஞாஸி, த⁴ம்மஸேனாபதி பன ஸாவகபாரமீஞாணஸ்ஸ மத்த²கே டி²தத்தா அஞ்ஞாஸி, தஸ்மா ஏவமாஹ. தேனேவஸ்ஸ ப⁴க³வா ஸாது⁴ ஸாதூ⁴தி ஸாது⁴காரமதா³ஸி.

4. ஜாணுஸ்ஸோணிப்³ராஹ்மணஸுத்தவண்ணனா

4. சதுத்தே² ஸப்³ப³ஸேதேன வளவாபி⁴ரதே²னாதி ஸகலஸேதேன சதூஹி வளவாஹி யுத்தரதே²ன. ஸோ கிர ஸப்³போ³ ஸசக்கபஞ்ஜரகுப்³ப³ரோ ரஜதபரிக்கி²த்தோ ஹோதி. ரதோ² ச நாமேஸ து³விதோ⁴ ஹோதி – யோத⁴ரதோ², அலங்காரரதோ²தி. தத்த² யோத⁴ரதோ² சதுரஸ்ஸஸண்டா²னோ ஹோதி நாதிமஹா த்³வின்னம் திண்ணம் வா ஜனானம் க³ஹணஸமத்தோ². அலங்காரரதோ² மஹா ஹோதி தீ³க⁴தோ தீ³கோ⁴ புது²லதோ புது²லோ ச, தத்த² ச²த்தக்³கா³ஹகோ வாலபீ³ஜனிக்³கா³ஹகோ தாலவண்டக்³கா³ஹகோதி ஏவம் அட்ட² வா த³ஸ வா ஸுகே²னேவ டா²தும் வா நிஸீதி³தும் வா நிபஜ்ஜிதும் வா ஸக்கோந்தி. அயம்பி அலங்காரரதோ²யேவ.

ஸேதா ஸுத³ம் அஸ்ஸாதி தா வளவா பகதியா ஸேதவண்ணாவ. ஸேதாலங்காராதி பஸாத⁴னம் தாஸம் ரஜதமயம் அஹோஸி. ஸேதோ ரதோ²தி ரதோ²பி வுத்தனயேனேவ ரஜதபரிக்கி²த்தத்தா தத்த² தத்த² த³ந்தகம்மக²சிதத்தா ச ஸேதோவ. ஸேதபரிவாரோதி யதா² அஞ்ஞே ரதா² ஸீஹசம்மபரிவாராபி ஹோந்தி, ப்³யக்³க⁴சம்மபரிவாராபி பண்டு³கம்ப³லபரிவாராபி ஹோந்தி, ந ஏவம் ஏஸ. ஏஸ பன க⁴னது³கூலேன பரிவாரிதோ அஹோஸி. ஸேதா ரஸ்மியோதி ரஸ்மியோபி ரஜதபனாளிஸுபரிக்கி²த்தா. ஸேதா பதோத³லட்டீ²தி பதோத³லட்டி²பி ரஜதபரிக்கி²த்தா.

ஸேதம் ச²த்தந்தி ரத²மஜ்ஜே² உஸ்ஸாபிதச²த்தம்பி ஸேதமேவ அஹோஸி. ஸேதம் உண்ஹீஸந்தி அட்ட²ங்கு³லவித்தா²ரோ ரஜதமயோ உண்ஹீஸபட்டோ ஸேதோ. ஸேதானி வத்தா²னீதி வத்தா²னிபி ஸேதானி பே²ணபுஞ்ஜவண்ணானி. தேஸு நிவாஸனம் பஞ்சஸதக்³க⁴னகம், உத்தராஸங்கோ³ ஸஹஸ்ஸக்³க⁴னகோ. ஸேதா உபாஹனாதி உபாஹனா நாம மக்³கா³ருள்ஹஸ்ஸ வா ஹோந்தி அடவிம் வா பவிஸந்தஸ்ஸ. அயம் பன ரத²ம் அபி⁴ருள்ஹோ, தேனஸ்ஸ தத³னுச்ச²விகோ ரஜதபடிஸேவிதோ பாதா³லங்காரோ நாம ஏஸ ஏவம் வுத்தோதி வேதி³தப்³போ³. ஸேதாய ஸுத³ம் வாலபீ³ஜனியாதி ப²லிகமயத³ண்டா³ய ஸேதசமரவாலபீ³ஜனியா. ந கேவலஞ்ச ஏத்தகமேவஸ்ஸ ஸேதம் அஹோஸி, ஸோ பன ப்³ராஹ்மணோ ஸேதவிலேபனம் விலிம்பி, ஸேதமாலம் பிளந்தி⁴, த³ஸஸு அங்கு³லீஸு அங்கு³லிமுத்³தி³கா கண்ணேஸு குண்ட³லானீதி ஏவமாதி³ அலங்காரோபிஸ்ஸ ரஜதமயோவ அஹோஸி. பரிவாரப்³ராஹ்மணாபிஸ்ஸ த³ஸஸஹஸ்ஸமத்தா ததே²வ ஸேதவத்த²விலேபனமாலாலங்காரா அஹேஸும்.

யம் பனேதம் ஸாவத்தி²யா நிய்யாயந்தந்தி வுத்தம், தத்ராயம் நிய்யாயனவிபா⁴வனா – ஸோ கிர ச²ன்னம் ச²ன்னம் மாஸானம் ஏகவாரம் நக³ரம் பத³க்கி²ணம் கரோதி – ‘‘இதோ ஏத்தகேஹி தி³வஸேஹி நக³ரம் பத³க்கி²ணம் கரிஸ்ஸதீ’’தி புரேதரமேவ கோ⁴ஸனா கயிரதி. தம் ஸுத்வா யே நக³ரதோ ந பக்கந்தா, தே ந பக்கமந்தி. யேபி பக்கந்தா, தேபி ‘‘புஞ்ஞவதோ ஸிரிஸம்பத்திம் பஸ்ஸிஸ்ஸாமா’’தி ஆக³ச்ச²ந்தி. யம் தி³வஸம் ப்³ராஹ்மணோ நக³ரம் அனுவிசரதி, ததா³ பாதோவ நக³ரவீதி²யோ ஸம்மஜ்ஜித்வா வாலிகம் ஓகிரித்வா லாஜபஞ்சமேஹி புப்பே²ஹி விப்பகிரித்வா புண்ணக⁴டே ட²பேத்வா கத³லியோ ச த⁴ஜே ச உஸ்ஸாபேத்வா ஸகலனக³ரம் தூ⁴பிதவாஸிதம் கரோந்தி.

ப்³ராஹ்மணோ பாதோவ ஸீஸம் ந்ஹாயித்வா புரேப⁴த்தம் பு⁴ஞ்ஜித்வா வுத்தனயேனேவ ஸேதவத்தா²தீ³ஹி அத்தானம் அலங்கரித்வா பாஸாதா³ ஓருய்ஹ ரத²ம் அபி⁴ருஹதி. அத² நம் தே ப்³ராஹ்மணா ஸப்³ப³ஸேதவத்த²விலேபனமாலாலங்காரா ஸேதச்ச²த்தானி க³ஹேத்வா பரிவாரேந்தி. ததோ மஹாஜனஸ்ஸ ஸன்னிபாதத்த²ம் பட²மம்யேவ தருணதா³ரகானம் ப²லாப²லானி விகிரந்தி, தத³னந்தரம் மாஸகரூபாதீ³னி, தத³னந்தரம் கஹாபணே விகிரந்தி. மஹாஜனோ ஸன்னிபததி, உக்குட்டி²யோ சேவ சேலுக்கே²பா ச வத்தந்தி. அத² ப்³ராஹ்மணோ மங்க³லிகஸோவத்தி²காதீ³ஸு மங்க³லானி சேவ ஸுவத்தி²யோ ச கரோந்தேஸு மஹாஸம்பத்தியா நக³ரம் அனுவிசரதி. புஞ்ஞவந்தா மனுஸ்ஸா ஏகபூ⁴மிகாதி³பாஸாதே³ ஆருய்ஹ ஸுகபத்தஸதி³ஸானி வாதபானகவாடானி விவரித்வா ஓலோகேந்தி. ப்³ராஹ்மணோபி அத்தனோ யஸஸிரிஸம்பத்தியா நக³ரம் அஜ்ஜோ²த்த²ரந்தோ விய த³க்கி²ணத்³வாராபி⁴முகோ² ஹோதி. தம் ஸந்தா⁴யேதம் வுத்தம்.

தமேனம் ஜனோ தி³ஸ்வாதி மஹாஜனோ தம் ரத²ம் தி³ஸ்வா. ப்³ரஹ்மந்தி ஸேட்டா²தி⁴வசனமேதம். ப்³ரஹ்மம் வத போ⁴ யானந்தி ஸேட்ட²யானஸதி³ஸம் வத போ⁴ யானந்தி அயமேத்த² அத்தோ². இமஸ்ஸேவ கோ² ஏதந்தி, ஆனந்த³, மனுஸ்ஸா நாம வண்ணபா⁴ணகானம் த⁴னம் த³த்வா அத்தனோ தா³ரிகானம் வண்ணகீ³தம் கா³யாபேந்தி ‘‘அபி⁴ரூபோ ஹோதி த³ஸ்ஸனீயோ மஹத்³த⁴னோ மஹாபோ⁴கோ³’’தி, ந ச தேன வண்ணப⁴ணனமத்தேன அபி⁴ரூபா வா ஹோந்தி மஹத்³த⁴னா வா, ஏவமேவ மஹாஜனோ ப்³ராஹ்மணஸ்ஸ ரத²ம் தி³ஸ்வா – ‘‘ப்³ரஹ்மம் வத போ⁴ யான’’ந்தி கிஞ்சாபி ஏவம் வண்ணம் ப⁴ணதி, ந பனேதம் யானம் வண்ணப⁴ணனமத்தேனேவ ப்³ரஹ்மயானம் நாம ஹோதி. லாமகஞ்ஹி ஏதம் ச²வம். பரமத்தே²ன பன இமஸ்ஸேவ கோ² ஏதம், ஆனந்த³, அரியஸ்ஸ அட்ட²ங்கி³கஸ்ஸ மக்³க³ஸ்ஸ அதி⁴வசனம். அயஞ்ஹி ஸப்³ப³தோ³ஸவிக³மேன ஸேட்டோ², இமினா ச அரியா நிப்³பா³னம் யந்தீதி ப்³ரஹ்மயானம் இதிபி, த⁴ம்மபூ⁴தத்தா யானத்தா ச த⁴ம்மயானம் இதிபி, அனுத்தரத்தா கிலேஸஸங்கா³மஸ்ஸ ச விஜிதத்தா அனுத்தரோ ஸங்கா³மவிஜயோ இதிபி வத்தும் வட்டதி.

இதா³னிஸ்ஸ நித்³தோ³ஸபா⁴வஞ்சேவ ஸங்கா³மவிஜயபா⁴வஞ்ச த³ஸ்ஸேந்தோ ராக³வினயபரியோஸானாதிஆதி³மாஹ. தத்த² ராக³ம் வினயமானா பரியோஸாபேதி பரியோஸானம் க³ச்ச²தி நிப்ப²ஜ்ஜதீதி ராக³வினயபரியோஸானா. ஏஸ நயோ ஸப்³ப³த்த².

யஸ்ஸ ஸத்³தா⁴ ச பஞ்ஞா சாதி யஸ்ஸ அரியமக்³க³யானஸ்ஸ ஸத்³தா⁴னுஸாரிவஸேன ஸத்³தா⁴, த⁴ம்மானுஸாரிவஸேன பஞ்ஞாதி இமே த்³வே த⁴ம்மா ஸதா³ து⁴ரம் யுத்தா, தத்ரமஜ்ஜ²த்ததாயுகே³ யுத்தாதி அத்தோ². ஹிரீ ஈஸாதி அத்தனா ஸத்³தி⁴ம் அதி⁴விட்டே²ன ப³ஹித்³தா⁴ஸமுட்டா²னேன ஓத்தப்பேன ஸத்³தி⁴ம் அஜ்ஜ²த்தஸமுட்டா²னா ஹிரீ யஸ்ஸ மக்³க³ரத²ஸ்ஸ ஈஸா. மனோ யோத்தந்தி விபஸ்ஸனாசித்தஞ்ச மக்³க³சித்தஞ்ச யோத்தம். யதா² ஹி ரத²ஸ்ஸ வாகாதி³மயம் யோத்தம் கோ³ணே ஏகாப³த்³தே⁴ கரோதி ஏகஸங்க³ஹிதே, ஏவம் மக்³க³ரத²ஸ்ஸ லோகியவிபஸ்ஸனாசித்தம் அதிரேகபஞ்ஞாஸ, லோகுத்தரவிபஸ்ஸனாசித்தம் அதிரேகஸட்டி² குஸலத⁴ம்மே ஏகாப³த்³தே⁴ ஏகஸங்க³ஹே கரோதி. தேன வுத்தம் ‘‘மனோ யோத்த’’ந்தி. ஸதி ஆரக்க²ஸாரதீ²தி மக்³க³ஸம்பயுத்தா ஸதி ஆரக்க²ஸாரதி². யதா² ஹி ரத²ஸ்ஸ ஆரக்கோ² ஸாரதி² நாம யோக்³கி³யோ. து⁴ரம் வாஹேதி யோஜேதி அக்க²ம் அப்³ப⁴ஞ்ஜதி ரத²ம் பேஸேதி ரத²யுத்தகே நிப்³பி³ஸேவனே கரோதி, ஏவம் மக்³க³ரத²ஸ்ஸ ஸதி. அயஞ்ஹி ஆரக்க²பச்சுபட்டா²னா சேவ குஸலாகுஸலானஞ்ச த⁴ம்மானம் க³தியோ ஸமன்வேஸதீதி வுத்தா.

ரதோ²தி அரியஅட்ட²ங்கி³கமக்³க³ரதோ². ஸீலபரிக்கா²ரோதி சதுபாரிஸுத்³தி⁴ஸீலாலங்காரோ. ஜா²னக்கோ²தி விபஸ்ஸனாஸம்பயுத்தானம் பஞ்சன்னம் ஜா²னங்கா³னம் வஸேன ஜா²னமயஅக்கோ². சக்கவீரியோதி வீரியசக்கோ, காயிகசேதஸிகஸங்கா²தானி த்³வே வீரியானி அஸ்ஸ சக்கானீதி அத்தோ². உபேக்கா² து⁴ரஸமாதீ⁴தி து⁴ரஸ்ஸ ஸமாதி⁴, உன்னதோனதாகாரஸ்ஸ அபா⁴வேன த்³வின்னம்பி யுக³பதே³ஸானம் ஸமதாதி அத்தோ². அயஞ்ஹி தத்ரமஜ்ஜ²த்துபேக்கா² சித்துப்பாத³ஸ்ஸ லீனுத்³த⁴ச்சபா⁴வம் ஹரித்வா பயோக³மஜ்ஜ²த்தே சித்தம் ட²பேதி, தஸ்மா இமஸ்ஸ மக்³க³ரத²ஸ்ஸ ‘‘து⁴ரஸமாதீ⁴’’தி வுத்தா. அனிச்சா² பரிவாரணந்தி பா³ஹிரகரத²ஸ்ஸ ஸீஹசம்மாதீ³னி விய இமஸ்ஸாபி அரியமக்³க³ரத²ஸ்ஸ அலோப⁴ஸங்கா²தா அனிச்சா² பரிவாரணம் நாம.

அப்³யாபாதோ³தி மேத்தா ச மேத்தாபுப்³ப³பா⁴கோ³ ச. அவிஹிம்ஸாதி கருணா ச கருணாபுப்³ப³பா⁴கோ³ ச. விவேகோதி காயவிவேகாதி³ திவித⁴விவேகோ. யஸ்ஸ ஆவுத⁴ந்தி யஸ்ஸ அரியமக்³க³ரதே² டி²தஸ்ஸ குலபுத்தஸ்ஸ ஏதம் பஞ்சவித⁴ம் ஆவுத⁴ம். யதா² ஹி ரதே² டி²தோ பஞ்சஹி ஆவுதே⁴ஹி ஸபத்தே விஜ்ஜ²தி, ஏவம் யோகா³வசரோபி இமஸ்மிம் லோகியலோகுத்தரமக்³க³ரதே² டி²தோ மேத்தாய தோ³ஸம் விஜ்ஜ²தி, கருணாய விஹிம்ஸம், காயவிவேகேன க³ணஸங்க³ணிகம், சித்தவிவேகேன கிலேஸஸங்க³ணிகம், உபதி⁴விவேகேன ஸப்³பா³குஸலம் விஜ்ஜ²தி. தேனஸ்ஸேதம் பஞ்சவித⁴ம் ‘‘ஆவுத⁴’’ந்தி வுத்தம். திதிக்கா²தி து³ருத்தானம் து³ராக³தானம் வசனபதா²னம் அதி⁴வாஸனக்க²ந்தி. சம்மஸன்னாஹோதி ஸன்னத்³த⁴சம்மோ. யதா² ஹி ரதே² டி²தோ ரதி²கோ படிமுக்கசம்மோ ஆக³தாக³தே ஸரே க²மதி, ந நம் தே விஜ்ஜ²ந்தி, ஏவம் அதி⁴வாஸனக்க²ந்திஸமன்னாக³தோ பி⁴க்கு² ஆக³தாக³தே வசனபதே² க²மதி, ந நம் தே விஜ்ஜ²ந்தி. தஸ்மா ‘‘திதிக்கா² சம்மஸன்னாஹோ’’தி வுத்தோ. யோக³க்கே²மாய வத்ததீதி சதூஹி யோகே³ஹி கே²மாய நிப்³பா³னாய வத்ததி, நிப்³பா³னாபி⁴முகோ² க³ச்ச²தியேவ, ந திட்ட²தி ந பி⁴ஜ்ஜதீதி அத்தோ².

ஏதத³த்தனி ஸம்பூ⁴தந்தி ஏதம் மக்³க³யானம் அத்தனோ புரிஸகாரம் நிஸ்ஸாய லத்³த⁴த்தா அத்தனி ஸம்பூ⁴தம் நாம ஹோதி. ப்³ரஹ்மயானம் அனுத்தரந்தி அஸதி³ஸம் ஸேட்ட²யானம். நிய்யந்தி தீ⁴ரா லோகம்ஹாதி யேஸம் ஏதம் யானம் அத்தி², தே தீ⁴ரா பண்டி³தபுரிஸா லோகம்ஹா நிய்யந்தி க³ச்ச²ந்தி. அஞ்ஞத³த்தூ²தி ஏகம்ஸேன. ஜயம் ஜயந்தி ராகா³த³யோ ஸபத்தே ஜினந்தா ஜினந்தா.

5-6. கிமத்தி²யஸுத்தாதி³வண்ணனா

5-6. பஞ்சமே அயமேவாதி ஏவஸத்³தோ³ நியமத்தோ². தேன அஞ்ஞம் மக்³க³ம் படிக்கி²பதி. இமஸ்மிம் ஸுத்தே வட்டது³க்க²ஞ்சேவ மிஸ்ஸகமக்³கோ³ ச கதி²தோ. ச²ட்ட²ம் உத்தானமேவ.

7. து³தியஅஞ்ஞதரபி⁴க்கு²ஸுத்தவண்ணனா

7. ஸத்தமே நிப்³பா³னதா⁴துயா கோ² ஏதம் பி⁴க்கு² அதி⁴வசனந்தி அஸங்க²தாய அமதாய நிப்³பா³னதா⁴துயா ஏதம் அதி⁴வசனம். ஆஸவானம் க²யோ தேன வுச்சதீதி அபிச தேன ராகா³தி³வினயேன ஆஸவானம் க²யோதிபி வுச்சதி. ஆஸவக்க²யோ நாம அரஹத்தம், அரஹத்தஸ்ஸாபி ஏதம் ராக³வினயோதிஆதி³ நாமமேவாதி தீ³பேதி. ஏதத³வோசாதி ‘‘ஸத்தா²ரா நிப்³பா³னதா⁴தூதி வத³ந்தேன அமதம் நிப்³பா³னம் கதி²தம், மக்³கோ³ பனஸ்ஸ ந கதி²தோ. தம் கதா²பேஸ்ஸாமீ’’தி அனுஸந்தி⁴குஸலதாய புச்ச²ந்தோ ஏதம் அவோச.

8. விப⁴ங்க³ஸுத்தவண்ணனா

8. அட்ட²மே கதமா ச பி⁴க்க²வே ஸம்மாதி³ட்டீ²தி ஏகேன பரியாயேன அட்ட²ங்கி³கமக்³க³ம் விப⁴ஜித்வா புன அபரேன பரியாயேன விப⁴ஜிதுகாமோ இத³ம் தே³ஸனம் ஆரபி⁴. தத்த² து³க்கே² ஞாணந்தி ஸவனஸம்மஸனபடிவேத⁴பச்சவேக்க²ணவஸேன சதூஹாகாரேஹி உப்பன்னம் ஞாணம். ஸமுத³யேபி ஏஸேவ நயோ. ஸேஸேஸு பன த்³வீஸு ஸம்மஸனஸ்ஸ அபா⁴வா திவித⁴மேவ வட்டதி. ஏவமேதம் ‘‘து³க்கே² ஞாண’’ந்திஆதி³னா சதுஸச்சகம்மட்டா²னம் த³ஸ்ஸிதம்.

தத்த² புரிமானி த்³வே ஸச்சானி வட்டம், பச்சி²மானி விவட்டம். தேஸு பி⁴க்கு²னோ வட்டே கம்மட்டா²னாபி⁴னிவேஸோ ஹோதி, விவட்டே நத்தி² அபி⁴னிவேஸோ. புரிமானி ஹி த்³வே ஸச்சானி ‘‘பஞ்சக்க²ந்தா⁴ து³க்க²ம், தண்ஹா ஸமுத³யோ’’தி ஏவம் ஸங்கே²பேன ச, ‘‘கதமே பஞ்சக்க²ந்தா⁴ ரூபக்க²ந்தோ⁴’’திஆதி³னா நயேன வித்தா²ரேன ச ஆசரியஸந்திகே உக்³க³ண்ஹித்வா வாசாய புனப்புனம் பரிவத்தேந்தோ யோகா³வசரோ கம்மம் கரோதி. இதரேஸு பன த்³வீஸு ஸச்சேஸு – ‘‘நிரோத⁴ஸச்சம் இட்ட²ம் கந்தம் மனாபம், மக்³க³ஸச்சம் இட்ட²ம் கந்தம் மனாப’’ந்தி ஏவம் ஸவனேனேவ கம்மம் கரோதி. ஸோ ஏவம் கரோந்தோ சத்தாரி ஸச்சானி ஏகபடிவேதே⁴ன படிவிஜ்ஜ²தி, ஏகாபி⁴ஸமயேன அபி⁴ஸமேதி. து³க்க²ம் பரிஞ்ஞாபடிவேதே⁴ன படிவிஜ்ஜ²தி, ஸமுத³யம் பஹானபடிவேதே⁴ன, நிரோத⁴ம் ஸச்சி²கிரியபடிவேதே⁴ன, மக்³க³ம் பா⁴வனாபடிவேதே⁴ன படிவிஜ்ஜ²தி. து³க்க²ம் பரிஞ்ஞாபி⁴ஸமயேன…பே… மக்³க³ம் பா⁴வனாபி⁴ஸமயேன அபி⁴ஸமேதி.

ஏவமஸ்ஸ புப்³ப³பா⁴கே³ த்³வீஸு ஸச்சேஸு உக்³க³ஹபரிபுச்சா²ஸவனதா⁴ரணஸம்மஸனபடிவேதோ⁴ ஹோதி, த்³வீஸு ஸவனபடிவேதோ⁴யேவ. அபரபா⁴கே³ தீஸு கிச்சதோ படிவேதோ⁴ ஹோதி, நிரோதே⁴ ஆரம்மணபடிவேதோ⁴. பச்சவேக்க²ணா பன பத்தஸச்சஸ்ஸ ஹோதி. இமஸ்ஸ பி⁴க்கு²னோ புப்³பே³ பரிக்³க³ஹதோ – ‘‘து³க்க²ம் பரிஜானாமி, ஸமுத³யம் பஜஹாமி, நிரோத⁴ம் ஸச்சி²கரோமி, மக்³க³ம் பா⁴வேமீ’’தி ஆபோ⁴க³ஸமன்னாஹாரமனஸிகாரபச்சவேக்க²ணா நத்தி², பரிக்³க³ஹதோ பட்டா²ய ஹோதி. அபரபா⁴கே³ பன து³க்க²ம் பரிஞ்ஞாதமேவ ஹோதி…பே… மக்³கோ³ பா⁴விதோவ ஹோதி.

தத்த² த்³வே ஸச்சானி து³த்³த³ஸத்தா க³ம்பீ⁴ரானி, த்³வே க³ம்பீ⁴ரத்தா து³த்³த³ஸானி. து³க்க²ஸச்சஞ்ஹி உப்பத்திதோ பாகடம், கா²ணுகண்டகபஹாராதீ³ஸு ‘‘அஹோ து³க்க²’’ந்தி வத்தப்³ப³தம்பி ஆபஜ்ஜதி. ஸமுத³யம்பி கா²தி³துகாமதாபு⁴ஞ்ஜிதுகாமதாதி³வஸேன உப்பத்திதோ பாகடம். லக்க²ணபடிவேத⁴தோ பன உப⁴யம்பி க³ம்பீ⁴ரம். இதி தானி து³த்³த³ஸத்தா க³ம்பீ⁴ரானி. இதரேஸம் த்³வின்னம் த³ஸ்ஸனத்தா²ய பயோகோ³ ப⁴வக்³க³க்³க³ஹணத்த²ம் ஹத்த²பஸாரணம் விய அவீசிபு²ஸனத்த²ம் பாத³பஸாரணம் விய ஸததா⁴ பி⁴ன்னஸ்ஸ வாலஸ்ஸ கோடியா கோடிம் படிபாத³னம் விய ச ஹோதி. இதி தானி க³ம்பீ⁴ரத்தா து³த்³த³ஸானி. ஏவம் து³த்³த³ஸத்தா க³ம்பீ⁴ரேஸு க³ம்பீ⁴ரத்தா ச து³த்³த³ஸேஸு சதூஸு ஸச்சேஸு உக்³க³ஹாதி³வஸேன இத³ம் ‘‘து³க்கே² ஞாண’’ந்திஆதி³ வுத்தம். படிவேத⁴க்க²ணே பன ஏகமேவ தம் ஞாணம் ஹோதி.

நேக்க²ம்மஸங்கப்பாதீ³ஸு காமபச்சனீகட்டே²ன காமதோ நிஸ்ஸடபா⁴வேன வா, காமம் ஸம்மஸந்தஸ்ஸ உப்பன்னோதி வா, காமபத³கா⁴தம் காமவூபஸமம் கரோந்தோ உப்பன்னோதி வா, காமவிவித்தந்தே உப்பன்னோதி வா நேக்க²ம்மஸங்கப்போ. ஸேஸபத³த்³வயேபி ஏஸேவ நயோ. ஸப்³பே³பி ச தே நேக்க²ம்மஸங்கப்பாத³யோ காமப்³யாபாத³விஹிம்ஸாவிரமணஸஞ்ஞானம் நானத்தா புப்³ப³பா⁴கே³ நானா, மக்³க³க்க²ணே பன இமேஸு தீஸு டா²னேஸு உப்பன்னஸ்ஸ அகுஸலஸங்கப்பஸ்ஸ பத³ச்சே²த³தோ அனுப்பத்திஸாத⁴னவஸேன மக்³க³ங்க³ம் பூரயமானோ ஏகோவ குஸலஸங்கப்போ உப்பஜ்ஜதி. அயம் ஸம்மாஸங்கப்போ நாம.

முஸாவாதா³ வேரமணீஆத³யோபி முஸாவாதா³தீ³ஹி விரமணஸஞ்ஞானம் நானத்தா புப்³ப³பா⁴கே³ நானா, மக்³க³க்க²ணே பன இமேஸு சதூஸு டா²னேஸு உப்பன்னாய அகுஸலது³ஸ்ஸீல்யசேதனாய பத³ச்சே²த³தோ அனுப்பத்திஸாத⁴னவஸேன மக்³க³ங்க³ம் பூரயமானா ஏகாவ குஸலவேரமணீ உப்பஜ்ஜதி. அயம் ஸம்மாவாசா நாம.

பாணாதிபாதா வேரமணீ ஆத³யோபி பாணாதிபாதாதீ³ஹி விரமணஸஞ்ஞானம் நானத்தா புப்³ப³பா⁴கே³ நானா, மக்³க³க்க²ணே பன இமேஸு தீஸு டா²னேஸு உப்பன்னாய அகுஸலது³ஸ்ஸீல்யசேதனாய அகிரியதோ பத³ச்சே²த³தோ அனுப்பத்திஸாத⁴னவஸேன மக்³க³ங்க³ம் பூரயமானா ஏகாவ குஸலவேரமணீ உப்பஜ்ஜதி. அயம் ஸம்மாகம்மந்தோ நாம.

மிச்சா²ஆஜீவந்தி கா²த³னீயபோ⁴ஜனீயாதீ³னம் அத்தா²ய பவத்திதம் காயவசீது³ச்சரிதம். பஹாயாதி வஜ்ஜேத்வா. ஸம்மாஆஜீவேனாதி பு³த்³த⁴பஸத்தே²ன ஆஜீவேன. ஜீவிகம் கப்பேதீதி ஜீவிதவுத்திம் பவத்தேதி. ஸம்மாஜீவோபி குஹனாதீ³ஹி விரமணஸஞ்ஞானம் நானத்தா புப்³ப³பா⁴கே³ நானா. மக்³க³க்க²ணே பன இமேஸுயேவ ஸத்தஸு டா²னேஸு உப்பன்னாய மிச்சா²ஜீவது³ஸ்ஸீல்யசேதனாய பத³ச்சே²த³தோ அனுப்பத்திஸாத⁴னவஸேன மக்³க³ங்க³ம் பூரயமானா ஏகாவ குஸலவேரமணீ உப்பஜ்ஜதி. அயம் ஸம்மாஆஜீவோ நாம.

அனுப்பன்னானந்தி ஏகஸ்மிம் ப⁴வே ததா²ரூபே வா ஆரம்மணே அத்தனோ ந உப்பன்னானம், பரஸ்ஸ பன உப்பஜ்ஜமானே தி³ஸ்வா – ‘‘அஹோ வத மே ஏவரூபா பாபகா த⁴ம்மா ந உப்பஜ்ஜேய்யு’’ந்தி ஏவம் அனுப்பன்னானம் பாபகானம் அகுஸலானம் த⁴ம்மானம் அனுப்பாதா³ய. ச²ந்த³ந்தி தேஸம் அகுஸலானம் அனுப்பாத³கபடிபத்திஸாத⁴கம் வீரியச்ச²ந்த³ம் ஜனேதி. வாயமதீதி வாயாமம் கரோதி. வீரியம் ஆரப⁴தீதி வீரியம் பவத்தேதி. சித்தம் பக்³க³ண்ஹாதீதி வீரியேன சித்தம் பக்³க³ஹிதம் கரோதி. பத³ஹதீதி ‘‘காமம் தசோ ச ந்ஹாரு ச அட்டி² ச அவஸிஸ்ஸதூ’’தி (ம. நி. 2.184) பதா⁴னம் பவத்தேதி. உப்பன்னானந்தி ஸமுதா³சாரவஸேன அத்தனோ உப்பன்னபுப்³பா³னம். இதா³னி தாதி³ஸே ந உப்பாதே³ஸ்ஸாமீதி தேஸம் பஹானாய ச²ந்த³ம் ஜனேதி.

அனுப்பன்னானம் குஸலானந்தி அபடிலத்³தா⁴னம் பட²மஜ்ஜா²னாதீ³னம். உப்பன்னானந்தி தேஸம்யேவ படிலத்³தா⁴னம். டி²தியாதி புனப்புனம் உப்பத்திபப³ந்த⁴வஸேன டி²தத்த²ம். அஸம்மோஸாயாதி அவினாஸத்த²ம். பி⁴ய்யோபா⁴வாயாதி உபரிபா⁴வாய. வேபுல்லாயாதி விபுலபா⁴வாய. பாரிபூரியாதி பா⁴வனாய பரிபூரணத்த²ம். அயம்பி ஸம்மாவாயாமோ அனுப்பன்னானம் அகுஸலானம் அனுப்பாத³னாதி³சித்தனானத்தா புப்³ப³பா⁴கே³ நானா. மக்³க³க்க²ணே பன இமேஸுயேவ சதூஸு டா²னேஸு கிச்சஸாத⁴னவஸேன மக்³க³ங்க³ம் பூரயமானம் ஏகமேவ குஸலவீரியம் உப்பஜ்ஜதி. அயம் ஸம்மாவாயாமோ நாம.

ஸம்மாஸதிபி காயாதி³பரிக்³கா³ஹகசித்தானம் நானத்தா புப்³ப³பா⁴கே³ நானா, மக்³க³க்க²ணே பன இமேஸு சதூஸு டா²னேஸு கிச்சஸாத⁴னவஸேன மக்³க³ங்க³ம் பூரயமானா ஏகா ஸதி உப்பஜ்ஜதி. அயம் ஸம்மாஸதி நாம.

ஜா²னாதீ³னி புப்³ப³பா⁴கே³பி மக்³க³க்க²ணேபி நானா, புப்³ப³பா⁴கே³ ஸமாபத்திவஸேன நானா, மக்³க³க்க²ணே நானாமக்³க³வஸேன. ஏகஸ்ஸ ஹி பட²மமக்³கோ³ பட²மஜ்ஜா²னிகோ ஹோதி, து³தியமக்³கா³த³யோபி பட²மஜ்ஜா²னிகா வா து³தியாதீ³ஸு அஞ்ஞதரஜ்ஜா²னிகா வா. ஏகஸ்ஸ பட²மமக்³கோ³ து³தியாதீ³னம் அஞ்ஞதரஜ்ஜா²னிகோ ஹோதி, து³தியாத³யோபி து³தியாதீ³னம் அஞ்ஞதரஜ்ஜா²னிகா வா பட²மஜ்ஜா²னிகா வா. ஏவம் சத்தாரோபி மக்³கா³ ஜா²னவஸேன ஸதி³ஸா வா அஸதி³ஸா வா ஏகச்சஸதி³ஸா வா ஹோந்தி.

அயம் பனஸ்ஸ விஸேஸோ பாத³கஜ்ஜா²னனியமேன ஹோதி. பாத³கஜ்ஜா²னனியமேன ஹி பட²மஜ்ஜா²னலாபி⁴னோ பட²மஜ்ஜா²னா வுட்டா²ய விபஸ்ஸந்தஸ்ஸ உப்பன்னமக்³கோ³ பட²மஜ்ஜா²னிகோ ஹோதி, மக்³க³ங்க³போ³ஜ்ஜ²ங்கா³னி பனேத்த² பரிபுண்ணானேவ ஹோந்தி. து³தியஜ்ஜா²னதோ வுட்டா²ய விபஸ்ஸந்தஸ்ஸ உப்பன்னோ து³தியஜ்ஜா²னிகோ ஹோதி, மக்³க³ங்கா³னி பனேத்த² ஸத்த ஹோந்தி. ததியஜ்ஜா²னதோ வுட்டா²ய விபஸ்ஸந்தஸ்ஸ உப்பன்னோ ததியஜ்ஜா²னிகோ, மக்³க³ங்கா³னி பனேத்த² ஸத்த, போ³ஜ்ஜ²ங்கா³னி ச² ஹோந்தி. ஏஸ நயோ சதுத்த²ஜ்ஜா²னதோ பட்டா²ய யாவ நேவஸஞ்ஞானாஸஞ்ஞாயதனா.

ஆருப்பே சதுக்கபஞ்சகஜ்ஜா²னம் உப்பஜ்ஜதி, தஞ்ச லோகுத்தரம், நோ லோகியந்தி வுத்தம். ஏத்த² கத²ந்தி? ஏத்தா²பி பட²மஜ்ஜா²னாதீ³ஸு யதோ வுட்டா²ய ஸோதாபத்திமக்³க³ம் படிலபி⁴த்வா அரூபஸமாபத்திம் பா⁴வேத்வா ஸோ ஆருப்பே உப்பன்னோ, தம்ஜா²னிகாவஸ்ஸ தத்த² தயோ மக்³கா³ உப்பஜ்ஜந்தி. ஏவம் பாத³கஜ்ஜா²னமேவ நியமேதி. கேசி பன தே²ரா – ‘‘விபஸ்ஸனாய ஆரம்மணபூ⁴தா க²ந்தா⁴ நியமேந்தீ’’தி வத³ந்தி. கேசி ‘‘புக்³க³லஜ்ஜா²ஸயோ நியமேதீ’’தி வத³ந்தி. கேசி ‘‘வுட்டா²னகா³மினீவிபஸ்ஸனா நியமேதீ’’தி வத³ந்தி. தேஸம் வாத³வினிச்ச²யோ விஸுத்³தி⁴மக்³கே³ வுட்டா²னகா³மினீவிபஸ்ஸனாதி⁴காரே வுத்தனயேனேவ வேதி³தப்³போ³. அயம் வுச்சதி, பி⁴க்க²வே, ஸம்மாஸமாதீ⁴தி அயம் புப்³ப³பா⁴கே³ லோகியோ, அபரபா⁴கே³ லோகுத்தரோ ஸம்மாஸமாதீ⁴தி வுச்சதி.

9. ஸூகஸுத்தவண்ணனா

9. நவமே மிச்சா²பணிஹிதந்தி ஸூகம் நாம உத்³த⁴க்³க³ம் கத்வா ட²பிதம் ஹத்த²ம் வா பாத³ம் வா பி⁴ந்த³தி, ததா² அட்ட²பிதம் பன மிச்சா²பணிஹிதம் நாம. மிச்சா²பணிஹிதாய தி³ட்டி²யாதி மிச்சா²ட²பிதாய கம்மஸ்ஸகதபஞ்ஞாய. அவிஜ்ஜம் பி⁴ந்தி³ஸ்ஸதீதி சதுஸச்சபடிச்சா²த³கம் அவிஜ்ஜம் பி⁴ந்தி³ஸ்ஸதி. விஜ்ஜம் உப்பாதே³ஸ்ஸதீதி அரஹத்தமக்³க³விஜ்ஜம் உப்பாதே³ஸ்ஸதி. மிச்சா²பணிஹிதத்தா, பி⁴க்க²வே, தி³ட்டி²யாதி கம்மஸ்ஸகதபஞ்ஞாய சேவ மக்³க³பா⁴வனாய ச மிச்சா² ட²பிதத்தா, அப்பவத்திதத்தாதி அத்தோ². இமஸ்மிம் ஸுத்தே கம்மஸ்ஸகதஞாணம் மக்³க³னிஸ்ஸிதம் கத்வா மிஸ்ஸகமக்³கோ³ கதி²தோ.

10. நந்தி³யஸுத்தவண்ணனா

10. த³ஸமே பரிப்³பா³ஜகோதி ச²ன்னபரிப்³பா³ஜகோ. ஸேஸமேத்த² உத்தானமேவாதி.

அவிஜ்ஜாவக்³கோ³ பட²மோ.