9. அஸங்க²தஸம்யுத்தம்

1. பட²மவக்³கோ³

1-11. காயக³தாஸதிஸுத்தாதி³வண்ணனா

366-376. அஸங்க²தஸம்யுத்தே அஸங்க²தந்தி அகதம். ஹிதேஸினாதி ஹிதம் ஏஸந்தேன. அனுகம்பகேனாதி அனுகம்பமானேன. அனுகம்பம் உபாதா³யாதி அனுகம்பம் சித்தேன பரிக்³க³ஹேத்வா, படிச்சாதிபி வுத்தம் ஹோதி. கதம் வோ தம் மயாதி தம் மயா இமம் அஸங்க²தஞ்ச அஸங்க²தமக்³க³ஞ்ச தே³ஸேந்தேன தும்ஹாகம் கதம். ஏத்தகமேவ ஹி அனுகம்பகஸ்ஸ ஸத்து² கிச்சம், யதி³த³ம் அவிபரீதத⁴ம்மதே³ஸனா. இதோ பரம் பன படிபத்தி நாம ஸாவகானம் கிச்சம். தேனாஹ ஏதானி, பி⁴க்க²வே, ருக்க²மூலானி…பே… அம்ஹாகம் அனுஸாஸனீதி இமினா ருக்க²மூலஸேனாஸனம் த³ஸ்ஸேதி. ஸுஞ்ஞாகா³ரானீதி இமினா ஜனவிவித்தம் டா²னம். உப⁴யேன ச யோகா³னுரூபம் ஸேனாஸனம் ஆசிக்க²தி, தா³யஜ்ஜம் நிய்யாதேதி.

ஜா²யதா²தி ஆரம்மணூபனிஜ்ஜா²னேன அட்ட²திம்ஸாரம்மணானி, லக்க²ணூபனிஜ்ஜா²னேன ச அனிச்சாதி³தோ க²ந்தா⁴யதனாதீ³னி உபனிஜ்ஜா²யத², ஸமத²ஞ்ச விபஸ்ஸனஞ்ச வட்³டே⁴தா²தி வுத்தம் ஹோதி. மா பமாத³த்தா²தி மா பமஜ்ஜித்த². மா பச்சா² விப்படிஸாரினோ அஹுவத்தா²தி யே ஹி புப்³பே³ த³ஹரகாலே அரோக³காலே ஸத்தஸப்பாயாதி³ஸம்பத்திகாலே ஸத்து² ஸம்முகீ²பா⁴வகாலே ச யோனிஸோமனஸிகாரரஹிதா ரத்திந்தி³வம் மங்குலப⁴த்தம் ஹுத்வா ஸேய்யஸுக²ம் மித்³த⁴ஸுக²ம் அனுபோ⁴ந்தா பமஜ்ஜந்தி, தே பச்சா² ஜராகாலே ரோக³காலே மரணகாலே விபத்திகாலே ஸத்து² பரினிப்³பு³தகாலே ச தம் புப்³பே³ பமாத³விஹாரம் அனுஸ்ஸரந்தா ஸப்படிஸந்தி⁴காலகிரியஞ்ச பா⁴ரியம் ஸம்பஸ்ஸமானா விப்படிஸாரினோ ஹோந்தி. தும்ஹே பன தாதி³ஸா மா அஹுவத்தா²தி த³ஸ்ஸேந்தோ ஆஹ ‘‘மா பச்சா² விப்படிஸாரினோ அஹுவத்தா²’’தி.

அயம் வோ அம்ஹாகம் அனுஸாஸனீதி அயம் அம்ஹாகம் ஸந்திகா ‘‘ஜா²யத² மா பமாத³த்தா²’’தி தும்ஹாகம் அனுஸாஸனீ, ஓவாதோ³தி வுத்தம் ஹோதி.

2. து³தியவக்³கோ³

1-33. அஸங்க²தஸுத்தாதி³வண்ணனா

377-409. காயே காயானுபஸ்ஸீதிஆதீ³ஸு யம் வத்தப்³ப³ம், தம் பரதோ வக்கா²ம.

அனதந்திஆதீ³ஸு தண்ஹானதியா அபா⁴வேன அனதம். சதுன்னம் ஆஸவானம் அபா⁴வேன அனாஸவம். பரமத்த²ஸச்சதாய ஸச்சம். வட்டஸ்ஸ பரபா⁴க³ட்டே²ன பாரம். ஸண்ஹட்டே²ன நிபுணம். ஸுட்டு² து³த்³த³ஸதாய ஸுது³த்³த³ஸம். ஜராய அஜரிதத்தா அஜஜ்ஜரம். தி²ரட்டே²ன து⁴வம். அபலுஜ்ஜனதாய அபலோகிதம். சக்கு²விஞ்ஞாணேன அபஸ்ஸிதப்³ப³த்தா அனித³ஸ்ஸனம். தண்ஹாமானதி³ட்டி²பபஞ்சானம் அபா⁴வேன நிப்பபஞ்சம்.

ஸந்தபா⁴வட்டே²ன ஸந்தம். மரணாபா⁴வேன அமதம். உத்தமட்டே²ன பணீதம். ஸஸ்ஸிரிகட்டே²ன ஸிவம். நிருபத்³த³வதாய கே²மம். தண்ஹாக்க²யஸ்ஸ பச்சயத்தா தண்ஹக்க²யம்.

விம்ஹாபனீயட்டே²ன அச்ச²ரம் பஹரிதப்³ப³யுத்தகந்தி அச்ச²ரியம். அபூ⁴தமேவ பூ⁴தம் அஜாதம் ஹுத்வா அத்தீ²தி வா அப்³பு⁴தம். நித்³து³க்க²த்தா அனீதிகம். நித்³து³க்க²ஸபா⁴வத்தா அனீதிகத⁴ம்மம். வானாபா⁴வேன நிப்³பா³னம். ப்³யாப³ஜ்ஜா²பா⁴வேனேவ அப்³யாப³ஜ்ஜ²ம். விராகா³தி⁴க³மஸ்ஸ பச்சயதோ விராக³ம். பரமத்த²ஸுத்³தி⁴தாய ஸுத்³தி⁴. தீஹி ப⁴வேஹி முத்ததாய முத்தி. காமாலயானம் அபா⁴வேன அனாலயம். பதிட்ட²ட்டே²ன தீ³பம். அல்லீயிதப்³ப³யுத்தட்டே²ன லேணம். தாயனட்டே²ன தாணம். ப⁴யஸரணட்டே²ன ஸரணம், ப⁴யனாஸனந்தி அத்தோ². பரம் அயனம் க³தி பதிட்டா²தி பராயணம். ஸேஸமேத்த² வுத்தனயமேவாதி.

அஸங்க²தஸம்யுத்தவண்ணனா நிட்டி²தா.