9. குலஸுத்தவண்ணனா

361. நவமே து³ப்³பி⁴க்கா²தி து³ல்லப⁴பி⁴க்கா². த்³வீஹிதிகாதி ‘‘ஜீவிஸ்ஸாம நு கோ² ந நு கோ²’’தி ஏவம் பவத்தஈஹிதிகா. ‘‘து³ஹிதிகா’’திபி பாடோ². அயமேவ அத்தோ². து³க்கா² ஈஹிதி ஏத்த² ந ஸக்கா கோசி பயோகோ³ ஸுகே²ன காதுந்தி து³ஹிதிகா. தத்த² தத்த² மதமனுஸ்ஸானம் விப்பகிண்ணானி ஸேதானி அட்டி²கானி ஏத்தா²தி ஸேதட்டி²கா. ஸலாகாவுத்தாதி ஸலாகமத்தவுத்தா, யம் தத்த² வுத்தம் வாபிதம், தம் ஸலாகமத்தமேவ அஹோஸி, ப²லே ந ஜனயதீதி அத்தோ².

உக்³கி³லிதுந்தி த்³வே அந்தே மோசேத்வா கதே²தும் அஸக்கோந்தோ உக்³கி³லிதும் ப³ஹி நீஹரிதும் ந ஸக்கீ²தி. ஓகி³லிதுந்தி புச்சா²ய தோ³ஸம் தி³ஸ்வா ஹாரேதும் அஸக்கோந்தோ ஓகி³லிதும் அந்தோ பவேஸேதும் ந ஸக்கீ²தி.

இதோ ஸோ கா³மணி ஏகனவுதிகப்பேதி ப⁴க³வா கத²யமானோவ யாவ நிக்க²ந்தோ நாஸிகவாதோ ந புன பவிஸதி, தாவதகேன காலேன ஏகனவுதிகப்பே அனுஸ்ஸரி ‘‘அத்தி² நு கோ² கிஞ்சி குலே பக்கபி⁴க்கா²தா³னேன உபஹதபுப்³ப³’’ந்தி பரிஜானனத்த²ம். அதே²கம்பி அபஸ்ஸந்தோ ‘‘இதோ ஸோ, கா³மணீ’’திஆதி³மாஹ. இதா³னி தா³னாதீ³னம் ஆனிஸம்ஸம் கதே²ந்தோ அத² கோ² யானி தானி குலானி அட்³டா⁴னீதி த⁴ம்மதே³ஸனம் ஆரபி⁴. தத்த² தா³னஸம்பூ⁴தானீதி தா³னேன ஸம்பூ⁴தானி நிப்³ப³த்தானி. ஸேஸபத³த்³வயேபி ஏஸேவ நயோ. ஏத்த² பன ஸச்சம் நாம ஸச்சவாதி³தா. ஸாமஞ்ஞம் நாம ஸேஸஸீலம். விகிரதீதி அயோகே³ன வளஞ்ஜேந்தோ விப்பகிரதி. வித⁴மதீதி த⁴மேந்தோ விய நாஸேதி. வித்³த⁴ம்ஸேதீதி நாஸேதி. அனிச்சதாதி ஹுத்வா அபா⁴வோ ப³ஹுனாபி காலேன ஸங்க³தானம் க²ணேனேவ அந்தரதா⁴னம்.