10. மணிசூளகஸுத்தவண்ணனா

362. த³ஸமே தம் பரிஸம் ஏதத³வோசாதி தஸ்ஸ கிர ஏவம் அஹோஸி ‘‘குலபுத்தா பப்³ப³ஜந்தா புத்ததா³ரஞ்சேவ ஜாதரூபரஜதஞ்ச பஹாயேவ பப்³ப³ஜந்தி, ந ச ஸக்கா யம் பஹாய பப்³ப³ஜிதா, தம் தேஹி க³ஹேது’’ந்தி நயக்³கா³ஹே ட²த்வா ‘‘மா அய்யோ’’திஆதி³வசனம் அவோச. ஏகம்ஸேனேதந்தி ஏதம் பஞ்சகாமகு³ணகப்பனம் அஸ்ஸமணத⁴ம்மோ அஸக்யபுத்தியத⁴ம்மோதி ஏகம்ஸேன தா⁴ரேய்யாஸி.

திணந்தி ஸேனாஸனச்ச²த³னதிணம். பரியேஸிதப்³ப³ந்தி திணச்ச²த³னே வா இட்ட²கச்ச²த³னே வா கே³ஹே பலுஜ்ஜந்தே யேஹி தம் காரிதம், தேஸம் ஸந்திகம் க³ந்த்வா ‘‘தும்ஹேஹி காரிதஸேனாஸனம் ஓவஸ்ஸதி, ந ஸக்கா தத்த² வஸிது’’ந்தி ஆசிக்கி²தப்³ப³ம். மனுஸ்ஸா ஸக்கோந்தா கரிஸ்ஸந்தி, அஸக்கோந்தா ‘‘தும்ஹே வட்³ட⁴கிம் க³ஹேத்வா காராபேத², மயம் தே ஸஞ்ஞாபேஸ்ஸாமா’’தி வக்க²ந்தி. ஏவம் வுத்தே காரேத்வா தேஸம் ஆசிக்கி²தப்³ப³ம். மனுஸ்ஸா வட்³ட⁴கீனம் தா³தப்³ப³ம் த³ஸ்ஸந்தி. ஸசே ஆவாஸஸாமிகா நத்தி², அஞ்ஞேஸம்பி பி⁴க்கா²சாரவத்தேன ஆரோசேத்வா காரேதும் வட்டதி. இத³ம் ஸந்தா⁴ய ‘‘பரியேஸிதப்³ப³’’ந்தி வுத்தம்.

தா³ருந்தி ஸேனாஸனே கோ³பானஸிஆதீ³ஸு பலுஜ்ஜமானேஸு தத³த்தா²ய தா³ரும். ஸகடந்தி கி³ஹிவிகதம் கத்வா தாவகாலிகஸகடம். ந கேவலஞ்ச ஸகடமேவ, அஞ்ஞம்பி வாஸிப²ரஸுகுத்³தா³லாதி³உபகரணம் ஏவம் பரியேஸிதும் வட்டதி. புரிஸோதி ஹத்த²கம்மவஸேன புரிஸோ பரியேஸிதப்³போ³. யம்கிஞ்சி ஹி புரிஸம் ‘‘ஹத்த²கம்மம், ஆவுஸோ, கத்வா த³ஸ்ஸஸீ’’தி வத்வா ‘‘த³ஸ்ஸாமி, ப⁴ந்தே,’’தி வுத்தே ‘‘இத³ஞ்சித³ஞ்ச கரோஹீ’’தி யம் இச்ச²தி, தம் காரேதும் வட்டதி. ந த்வேவாஹம், கா³மணி, கேனசி பரியாயேனாதி ஜாதரூபரஜதம் பனாஹம் கேனசிபி காரணேன பரியேஸிதப்³ப³ந்தி ந வதா³மி.