7. கோ³த³த்தஸுத்தவண்ணனா

349. ஸத்தமே நானத்தா² சேவ நானாப்³யஞ்ஜனா சாதி ப்³யஞ்ஜனம்பி நேஸம் நானம், அத்தோ²பி. தத்த² ப்³யஞ்ஜனஸ்ஸ நானதா பாகடா. அத்தோ² பன அப்பமாணா சேதோவிமுத்தி பூ⁴மந்தரதோ மஹக்³க³தா ஹோதி ரூபாவசரா, ஆரம்மணதோ ஸத்தபண்ணத்திஆரம்மணா. ஆகிஞ்சஞ்ஞா பூ⁴மந்தரதோ மஹக்³க³தா அரூபாவசரா, ஆரம்மணதோ நவத்தப்³பா³ரம்மணா. ஸுஞ்ஞதா பூ⁴மந்தரதோ காமாவசரா, ஆரம்மணதோ ஸங்கா²ராரம்மணா. விபஸ்ஸனா ஹி ஏத்த² ஸுஞ்ஞதாதி அதி⁴ப்பேதா. அனிமித்தா பூ⁴மந்தரதோ லோகுத்தரா, ஆரம்மணதோ நிப்³பா³னாரம்மணா.

ராகோ³ கோ² ப⁴ந்தே பமாணகரணோதிஆதீ³ஸு யதா² பப்³ப³தபாதே³ பூதிபண்ணகஸடஉத³கம் நாம ஹோதி காளவண்ணம், ஓலோகேந்தானம் ப்³யாமஸதக³ம்பீ⁴ரம் விய கா²யதி, யட்டி²ம் வா ரஜ்ஜும் வா க³ஹேத்வா மினந்தஸ்ஸ பிட்டி²பாதோ³த்த²ரணமத்தம்பி ந ஹோதி; ஏவமேவ யாவ ராகா³த³யோ நுப்பஜ்ஜந்தி, தாவ புக்³க³லம் ஸஞ்ஜானிதும் ந ஸக்கா ஹோதி, ஸோதாபன்னோ விய ஸகதா³கா³மீ விய அனாகா³மீ விய ச கா²யதி. யதா³ பனஸ்ஸ ராகா³த³யோ உப்பஜ்ஜந்தி, ததா³ ரத்தோ து³ட்டோ² மூள்ஹோதி பஞ்ஞாயதி. இதி தே ‘‘ஏத்தகோ அய’’ந்தி புக்³க³லஸ்ஸ பமாணம் த³ஸ்ஸேந்தாவ உப்பஜ்ஜந்தீதி பமாணகரணா நாம வுத்தா.

யாவதா கோ² ப⁴ந்தே அப்பமாணா சேதோவிமுத்தியோதி யத்தகா அப்பமாணா சேதோவிமுத்தியோ. கித்தகா பன தா? சத்தாரோ ப்³ரஹ்மவிஹாரா, சத்தாரோ மக்³கா³, சத்தாரி ப²லானீதி த்³வாத³ஸ. தத்ர ப்³ரஹ்மவிஹாரா ப²ரணஅப்பமாணதாய அப்பமாணா, ஸேஸா பமாணகாரகானம் கிலேஸானம் அபா⁴வேன நிப்³பா³னம்பி அப்பமாணமேவ, சேதோவிமுத்தி பன ந ஹோதி, தஸ்மா ந க³ஹிதம். அகுப்பாதி அரஹத்தப²லசேதோவிமுத்தி. ஸா ஹி தாஸம் ஸப்³ப³ஜேட்டி²கா, தஸ்மா ‘‘அக்³க³மக்கா²யதீ’’தி வுத்தா. ராகோ³ கோ² ப⁴ந்தே கிஞ்சனந்தி ராகோ³ உப்பஜ்ஜித்வா புக்³க³லம் கிஞ்சதி மத்³த³தி பலிபு³ந்த⁴தி, தஸ்மா கிஞ்சனந்தி வுத்தோ. மனுஸ்ஸா கிர கோ³ணேஹி க²லம் மத்³தா³பேந்தா ‘‘கிஞ்சேஹி கபில கிஞ்சேஹி காளகா’’தி வத³ந்தி. ஏவம் மத்³த³னட்டோ² கிஞ்சனட்டோ²தி வேதி³தப்³போ³. தோ³ஸமோஹேஸுபிஏஸேவ நயோ.

ஆகிஞ்சஞ்ஞா சேதோவிமுத்தியோ நாம நவ த⁴ம்மா ஆகிஞ்சஞ்ஞாயதனம் மக்³க³ப²லானி ச. தத்த² ஆகிஞ்சஞ்ஞாயதனம் கிஞ்சனம் ஆரம்மணம் அஸ்ஸ நத்தீ²தி ஆகிஞ்சஞ்ஞம். மக்³க³ப²லானி கிஞ்சனானம் மத்³த³னபலிபு³ந்த⁴னகிலேஸானம் நத்தி²தாய ஆகிஞ்சஞ்ஞானி, நிப்³பா³னம்பி ஆகிஞ்சஞ்ஞம், சேதோவிமுத்தி பன ந ஹோதி, தஸ்மா ந க³ஹிதம்.

ராகோ³ கோ² ப⁴ந்தே நிமித்தகரணோதிஆதீ³ஸு யதா² நாம த்³வின்னம் குலானம் ஸதி³ஸா த்³வே வச்ச²கா ஹோந்தி. யாவ தேஸம் லக்க²ணம் ந கதம் ஹோதி, தாவ ‘‘அயம் அஸுககுலஸ்ஸ வச்ச²கோ, அயம் அஸுககுலஸ்ஸா’’தி ந ஸக்கா ஹோதி ஜானிதும். யதா³ பன தேஸம் திஸூலாதீ³ஸு அஞ்ஞதரம் லக்க²ணம் கதம் ஹோதி, ததா³ ஸக்கா ஹோதி ஜானிதும். ஏவமேவ யாவ புக்³க³லஸ்ஸ ராகோ³ நுப்பஜ்ஜதி, தாவ ந ஸக்கா ஹோதி ஜானிதும் ‘‘அரியோ வா புது²ஜ்ஜனோ வா’’தி. ராகோ³ பனஸ்ஸ உப்பஜ்ஜமானோவ ‘‘ஸராகோ³ நாம அயம் புக்³க³லோ’’தி ஸஞ்ஜானனனிமித்தம் கரோந்தோ விய உப்பஜ்ஜதி, தஸ்மா நிமித்தகரணோதி வுத்தோ. தோ³ஸமோஹேஸுபி ஏஸேவ நயோ.

அனிமித்தா சேதோவிமுத்தியோ நாம தேரஸ த⁴ம்மா விபஸ்ஸனா, சத்தாரோ ஆருப்பா, சத்தாரோ மக்³கா³, சத்தாரி ப²லானி. தத்த² விபஸ்ஸனா நிச்சனிமித்தம் ஸுக²னிமித்தம் அத்தனிமித்தம் உக்³கா⁴டேதீதி அனிமித்தா நாம. சத்தாரோ ஆருப்பா ரூபனிமித்தஸ்ஸ அபா⁴வா அனிமித்தா நாம. மக்³க³ப²லானி நிமித்தகரானம் கிலேஸானம் அபா⁴வேன அனிமித்தானி, நிப்³பா³னம்பி அனிமித்தமேவ, தம் பன சேதோவிமுத்தி ந ஹோதி, தஸ்மா ந க³ஹிதம். அத² கஸ்மா ஸுஞ்ஞதா சேதோவிமுத்தி ந க³ஹிதாதி? ஸா ‘‘ஸுஞ்ஞா ராகே³னா’’திஆதி³வசனதோ ஸப்³ப³த்த² அனுபவிட்டா²வ, தஸ்மா விஸும் ந க³ஹிதாதி.

ஏகத்தா²தி ஆரம்மணவஸேன ஏகத்தா² ‘‘அப்பமாணம் ஆகிஞ்சஞ்ஞம் ஸுஞ்ஞதம் அனிமித்த’’ந்தி ஹி ஸப்³பா³னேதானி நிப்³பா³னஸ்ஸேவ நாமானி. இதி இமினா பரியாயேன ஏகத்தா². அஞ்ஞஸ்மிம் பன டா²னே அப்பமாணாபி ஹோதி, அஞ்ஞஸ்மிம் ஆகிஞ்சஞ்ஞா, அஞ்ஞஸ்மிம் ஸுஞ்ஞதா, அஞ்ஞஸ்மிம் அனிமித்தாதி இமினா பரியாயேன நானாப்³யஞ்ஜனாதி.