3. மாதுகா³மஸம்யுத்தம்

1. பட²மபேய்யாலவக்³கோ³

1-2. மாதுகா³மஸுத்தாதி³வண்ணனா

280-281. மாதுகா³மஸம்யுத்தஸ்ஸ பட²மே அங்கே³ஹீதி அகு³ணங்கே³ஹி. ந ச ரூபவாதி ந ரூபஸம்பன்னோ விரூபோ து³த்³த³ஸிகோ. ந ச போ⁴க³வாதி ந போ⁴க³ஸம்பன்னோ நித்³த⁴னோ. ந ச ஸீலவாதி ந ஸீலஸம்பன்னோ து³ஸ்ஸீலோ. அலஸோ சாதி கந்தனபசனாதீ³னி கம்மானி காதும் ந ஸக்கோதி, குஸீதோ ஆலஸியோ நிஸின்னட்டா²னே நிஸின்னோவ, டி²தடா²னே டி²தோவ நித்³தா³யதி ஏவ. பஜஞ்சஸ்ஸ ந லப⁴தீதி அஸ்ஸ புரிஸஸ்ஸ குலவம்ஸபதிட்டா²பகம் புத்தம் ந லப⁴தி, வஞ்ஜி²த்தீ² நாம ஹோதி. ஸுக்கபக்கோ² வுத்தவிபரியாயேன வேதி³தப்³போ³. து³தியம் பட²மே வுத்தனயேனேவ பரிவத்தேதப்³ப³ம்.

3. ஆவேணிகது³க்க²ஸுத்தவண்ணனா

282. ததியே ஆவேணிகானீதி பாடிபுக்³க³லிகானி புரிஸேஹி அஸாதா⁴ரணானி. பாரிசரியந்தி பரிசாரிகபா⁴வம்.

4. தீஹித⁴ம்மேஹிஸுத்தாதி³வண்ணனா

283-303. சதுத்தே² மச்சே²ரமலபரியுட்டி²தேனாதி புப்³ப³ண்ஹஸமயஸ்மிஞ்ஹி மாதுகா³மோ கீ²ரத³தி⁴ஸங்கோ³பனரந்த⁴னபசனாதீ³னி காதும் ஆரத்³தோ⁴, புத்தகேஹிபி யாசியமானோ கிஞ்சி தா³தும் ந இச்ச²தி. தேனேதம் வுத்தம் ‘‘புப்³ப³ண்ஹஸமயம் மச்சே²ரமலபரியுட்டி²தேன சேதஸா’’தி. மஜ்ஜ²ன்ஹிகஸமயே பன மாதுகா³மோ கோதா⁴பி⁴பூ⁴தோவ ஹோதி, அந்தோக⁴ரே கலஹம் அலப⁴ந்தோ படிவிஸ்ஸகக⁴ரம்பி க³ந்த்வா கலஹம் கரோதி, ஸாமிகஸ்ஸ ச டி²தனிஸின்னட்டா²னானி விலோகேந்தோ விசரதி. தேன வுத்தம் ‘‘மஜ்ஜ²ன்ஹிகஸமயம் இஸ்ஸாபரியுட்டி²தேன சேதஸா’’தி. ஸாயன்ஹே பனஸ்ஸா அஸத்³த⁴ம்மபடிஸேவனாய சித்தம் நமதி. தேன வுத்தம் ‘‘ஸாயன்ஹஸமயம் காமராக³பரியுட்டி²தேன சேதஸா’’தி. பஞ்சமாதீ³னி உத்தானத்தா²னேவ.

3. ப³லவக்³கோ³

1. விஸாரத³ஸுத்தவண்ணனா

304. த³ஸமே ரூபப³லந்திஆதீ³ஸு ரூபஸம்பத்தி ரூபப³லம், போ⁴க³ஸம்பத்தி போ⁴க³ப³லம், ஞாதிஸம்பத்தி ஞாதிப³லம், புத்தஸம்பத்தி புத்தப³லம், ஸீலஸம்பத்தி ஸீலப³லம். பஞ்சஸீலத³ஸஸீலானி அக²ண்டா³னி கத்வா ரக்க²ந்தஸ்ஸ ஹி ஸீலஸம்பத்தியேவ ஸீலப³லம் நாம ஹோதி. இமானி கோ² பி⁴க்க²வே பஞ்ச ப³லானீதி இமானி பஞ்ச உபத்த²ம்ப⁴னட்டே²ன ப³லானி நாம வுச்சந்தி.

2-10. பஸய்ஹஸுத்தாதி³வண்ணனா

305-313. பஸய்ஹாதி அபி⁴ப⁴வித்வா. அபி⁴பு⁴ய்ய வத்ததீதி அபி⁴ப⁴வதி அஜ்ஜோ²த்த²ரதி. நேவ ரூபப³லம் தாயதீதி நேவ ரூபப³லம் தாயிதும் ரக்கி²தும் ஸக்கோதி. நாஸேந்தேவ நம், குலே ந வாஸேந்தீதி ‘‘து³ஸ்ஸீலா ஸம்பி⁴ன்னாசாரா அதிக்கந்தமரியாதா³’’தி கீ³வாயம் க³ஹேத்வா நீஹரந்தி, ந தஸ்மிம் குலே வாஸேந்தி. வாஸேந்தேவ நம் குலே, ந நாஸேந்தீதி ‘‘கிம் ரூபேன போ⁴கா³தீ³ஹி வா, பரிஸுத்³த⁴ஸீலா ஏஸா ஆசாரஸம்பன்னா’’தி ஞத்வா ஞாதகா தஸ்மிம் குலே வாஸேந்தியேவ, ந நாஸேந்தி. ஸேஸம் ஸப்³ப³த்த² உத்தானத்த²மேவாதி.

மாதுகா³மஸம்யுத்தவண்ணனா நிட்டி²தா.