4. ஜம்பு³கா²த³கஸம்யுத்தம்

1. நிப்³பா³னபஞ்ஹாஸுத்தவண்ணனா

314. ஜம்பு³கா²த³கஸம்யுத்தே ஜம்பு³கா²த³கோ பரிப்³பா³ஜகோதி ஏவம்னாமோ தே²ரஸ்ஸ பா⁴கி³னேய்யோ ச²ன்னபரிப்³பா³ஜகோ. யோ கோ² ஆவுஸோ ராக³க்க²யோதி நிப்³பா³னம் ஆக³ம்ம ராகோ³ கீ²யதி, தஸ்மா நிப்³பா³னம் ராக³க்க²யோதி வுச்சதி. தோ³ஸமோஹக்க²யேஸுபி ஏஸேவ நயோ.

யோ பன இமினாவ ஸுத்தேன கிலேஸக்க²யமத்தம் நிப்³பா³னந்தி வதே³ய்ய, ஸோ வத்தப்³போ³ ‘‘கஸ்ஸ கிலேஸானம் க²யோ, கிம் அத்தனோ, உதா³ஹு பரேஸ’’ந்தி? அத்³தா⁴ ‘‘அத்தனோ’’தி வக்க²தி. ததோ புச்சி²தப்³போ³ ‘‘கோ³த்ரபு⁴ஞாணஸ்ஸ கிம் ஆரம்மண’’ந்தி? ஜானமானோ ‘‘நிப்³பா³ன’’ந்தி வக்க²தி. கிம் பன கோ³த்ரபு⁴ஞாணக்க²ணே கிலேஸா கீ²ணா கீ²யந்தி கீ²யிஸ்ஸந்தீதி? ‘‘கீ²ணா’’தி வா ‘‘கீ²யந்தீ’’தி வா ந வத்தப்³பா³, ‘‘கீ²யிஸ்ஸந்தீ’’தி பன வத்தப்³பா³தி. கிம் பன தேஸு அகீ²ணேஸுயேவ கிலேஸேஸு கோ³த்ரபு⁴ஞாணம் கிலேஸக்க²யம் ஆரம்மணம் கரோதீதி? அத்³தா⁴ ஏவம் வுத்தே நிருத்தரோ ப⁴விஸ்ஸதி.

மக்³க³ஞாணேனாபி சேதம் யோஜேதப்³ப³ம். மக்³க³க்க²ணேபி ஹி கிலேஸா ‘‘கீ²ணா’’தி வா ‘‘கீ²யிஸ்ஸந்தீ’’தி வா ந வத்தப்³பா³, ‘‘கீ²யந்தீ’’தி பன வத்தப்³பா³, ந ச அகீ²ணேஸுயேவ கிலேஸேஸு கிலேஸக்க²யோ ஆரம்மணம் ஹோதி, தஸ்மா ஸம்படிச்சி²தப்³ப³மேதம். யம் ஆக³ம்ம ராகா³த³யோ கீ²யந்தி, தம் நிப்³பா³னம். தம் பனேதம் ‘‘ரூபினோ த⁴ம்மா அரூபினோ த⁴ம்மா’’திஆதீ³ஸு (த⁴. ஸ. து³கமாதிகா 11) து³கேஸு அரூபினோ த⁴ம்மாதி ஸங்க³ஹிதத்தா ந கிலேஸக்க²யமத்தமேவாதி.

2. அரஹத்தபஞ்ஹாஸுத்தவண்ணனா

315. அரஹத்தபஞ்ஹப்³யாகரணே யஸ்மா அரஹத்தம் ராக³தோ³ஸமோஹானம் கீ²ணந்தே உப்பஜ்ஜதி, தஸ்மா ‘‘ராக³க்க²யோ தோ³ஸக்க²யோ மோஹக்க²யோ’’தி வுத்தம்.

3-15. த⁴ம்மவாதீ³பஞ்ஹாஸுத்தாதி³வண்ணனா

316-328. தே லோகே ஸுக³தாதி தே ராகா³த³யோ பஹாய க³தத்தா ஸுட்டு² க³தாதி ஸுக³தா. து³க்க²ஸ்ஸ கோ² ஆவுஸோ பரிஞ்ஞத்த²ந்தி வட்டது³க்க²ஸ்ஸ பரிஜானனத்த²ம். து³க்க²தாதி து³க்க²ஸபா⁴வோ. து³க்க²து³க்க²தாதிஆதீ³ஸு து³க்க²ஸங்கா²தோ து³க்க²ஸபா⁴வோ து³க்க²து³க்க²தா. ஸேஸபத³த்³வயேபி ஏஸேவ நயோ.

16. து³க்கரபஞ்ஹாஸுத்தவண்ணனா

329. அபி⁴ரதீதி பப்³ப³ஜ்ஜாய அனுக்கண்ட²னதா. நசிரம் ஆவுஸோதி ஆவுஸோ த⁴ம்மானுத⁴ம்மப்படிபன்னோ பி⁴க்கு² ‘‘பாதோ அனுஸிட்டோ² ஸாயம் விஸேஸமதி⁴க³மிஸ்ஸதி, ஸாயம் அனுஸிட்டோ² பாதோ விஸேஸமதி⁴க³மிஸ்ஸதீ’’தி (ம. நி. 2.345) வுத்தத்தா க⁴டேந்தோ வாயமந்தோ நசிரஸ்ஸம் லஹுயேவ அரஹம் அஸ்ஸ, அரஹத்தே பதிட்ட²ஹேய்யாதி த³ஸ்ஸேதி. ஸேஸம் ஸப்³ப³த்த² உத்தானத்த²மேவாதி.

ஜம்பு³கா²த³கஸம்யுத்தவண்ணனா நிட்டி²தா.