1. ஸீவகஸுத்தவண்ணனா

269. ததியவக்³க³ஸ்ஸ பட²மே மோளியஸீவகோதி ஸீவகோதி தஸ்ஸ நாமம். சூளா பனஸ்ஸ அத்தி², தஸ்மா மோளியஸீவகோதி வுச்சதி. பரிப்³பா³ஜகோதி ச²ன்னபரிப்³பா³ஜகோ. பித்தஸமுட்டா²னானீதி பித்தபச்சயானி. வேத³யிதானீதி வேத³னா. தத்த² பித்தபச்சயா திஸ்ஸோ வேத³னா உப்பஜ்ஜந்தி. கத²ம்? ஏகச்சோ ஹி ‘‘பித்தம் மே குபிதம் து³ஜ்ஜானம் கோ² பன ஜீவித’’ந்தி தா³னம் தே³தி, ஸீலம் ஸமாதி³யதி உபோஸத²கம்மம் கரோதி, ஏவமஸ்ஸ குஸலவேத³னா உப்பஜ்ஜதி. ஏகச்சோ ‘‘பித்தபே⁴ஸஜ்ஜம் கரிஸ்ஸாமீ’’தி பாணம் ஹனதி, அதி³ன்னம் ஆதி³யதி, முஸா ப⁴ணதி, த³ஸ து³ஸ்ஸீல்யகம்மானி கரோதி, ஏவமஸ்ஸ அகுஸலவேத³னா உப்பஜ்ஜதி. ஏகச்சோ ‘‘ஏத்தகேனபி மே பே⁴ஸஜ்ஜகரணேன பித்தம் ந வூபஸம்மதி, அலம் யம் ஹோதி. தம் ஹோதூ’’தி மஜ்ஜ²த்தோ காயிகவேத³னம் அதி⁴வாஸேந்தோ நிபஜ்ஜதி, ஏவம் அஸ்ஸ அப்³யாகதவேத³னா உப்பஜ்ஜதி.

ஸாமம்பி கோ² ஏதந்தி தம் தம் பித்தவிகாரம் தி³ஸ்வா அத்தனாபி ஏதம் வேதி³தப்³ப³ம். ஸச்சஸம்மதந்தி பூ⁴தஸம்மதம். லோகோபி ஹிஸ்ஸ ஸரீரே ஸப³லவண்ணதாதி³பித்தவிகாரம் தி³ஸ்வா ‘‘பித்தமஸ்ஸ குபித’’ந்தி ஜானாதி. தஸ்மாதி யஸ்மா ஸாமஞ்ச விதி³தம் லோகஸ்ஸ ச ஸச்சஸம்மதம் அதிதா⁴வந்தி, தஸ்மா. ஸேம்ஹஸமுட்டா²னாதீ³ஸுபி ஏஸேவ நயோ. ஏத்த² பன ஸன்னிபாதிகானீதி திண்ணம்பி பித்தாதீ³னம் கோபேன ஸமுட்டி²தானி. உதுபரிணாமஜானீதி விஸபா⁴க³உதுதோ ஜாதானி. ஜங்க³லதே³ஸவாஸீனஞ்ஹி அனுபதே³ஸே வஸந்தானம் விஸபா⁴கோ³ உது உப்பஜ்ஜதி, அனுபதே³ஸவாஸீனஞ்ச ஜங்க³லதே³ஸேதி ஏவம் மலயஸமுத்³த³தீராதி³வஸேனாபி உதுவிஸபா⁴க³தா உப்பஜ்ஜதியேவ. ததோ ஜாதாதி உதுபரிணாமஜாதானி நாம.

விஸமபரிஹாரஜானீதி மஹாபா⁴ரவஹனஸுதா⁴கோட்டனாதி³தோ வா அவேலாய சரந்தஸ்ஸ ஸப்பட³ம்ஸகூபபாதாதி³தோ வா விஸமபரிஹாரதோ ஜாதானி. ஓபக்கமிகானீதி ‘‘அயம் சோரோ வா பாரதா³ரிகோ வா’’தி க³ஹேத்வா ஜண்ணுககப்பரமுக்³க³ராதீ³ஹி நிப்போத²னஉபக்கமம் பச்சயம் கத்வா உப்பன்னானி. ஏதம் ப³ஹி உபக்கமம் லபி⁴த்வா கோசி வுத்தனயேனேவ குஸலம் கரோதி, கோசி அகுஸலம், கோசி அதி⁴வாஸேந்தோ நிபஜ்ஜதி. கம்மவிபாகஜானீதி கேவலம் கம்மவிபாகதோ, ஜாதானி. தேஸுபி ஹி உப்பன்னேஸு வுத்தனயேனேவ கோசி குஸலம் கரோதி, கோசி அகுஸலம், கோசி அதி⁴வாஸேந்தோ நிபஜ்ஜதி. ஏவம் ஸப்³ப³வாரேஸு திவிதா⁴வ வேத³னா ஹோந்தி.

தத்த² புரிமேஹி ஸத்தஹி காரணேஹி உப்பன்னா ஸாரீரிகா வேத³னா ஸக்கா படிபா³ஹிதும், கம்மவிபாகஜானம் பன ஸப்³ப³பே⁴ஸஜ்ஜானிபி ஸப்³ப³பரித்தானிபி நாலம் படிகா⁴தாய. இமஸ்மிம் ஸுத்தே லோகவோஹாரோ நாம கதி²தோதி.