7. பட²மகே³லஞ்ஞஸுத்தவண்ணனா

255. ஸத்தமே யேன கி³லானஸாலா தேனுபஸங்கமீதி ‘‘ஸதே³வகே லோகே அக்³க³புக்³க³லோ ததா²க³தோபி கி³லானுபட்டா²னம் க³ச்ச²தி, உபட்டா²தப்³ப³யுத்தகா நாம கி³லானாதி பி⁴க்கூ² ஸத்³த³ஹித்வா ஓகப்பேத்வா கி³லானே உபட்டா²தப்³பே³ மஞ்ஞிஸ்ஸந்தீ’’தி ச ‘‘யே தத்த² கம்மட்டா²னஸப்பாயா, தேஸம் கம்மட்டா²னம் கதே²ஸ்ஸாமீ’’தி ச சிந்தேத்வா உபஸங்கமி. காயே காயானுபஸ்ஸீதிஆதீ³ஸு யம் வத்தப்³ப³ம், தம் பரதோ வக்கா²ம. அனிச்சானுபஸ்ஸீதி அனிச்சதம் அனுபஸ்ஸந்தோ. வயானுபஸ்ஸீதி வயம் அனுபஸ்ஸந்தோ. விராகா³னுபஸ்ஸீதி விராக³ம் அனுபஸ்ஸந்தோ. நிரோதா⁴னுபஸ்ஸீதி நிரோத⁴ம் அனுபஸ்ஸந்தோ. படினிஸ்ஸக்³கா³னுபஸ்ஸீதி படினிஸ்ஸக்³க³ம் அனுபஸ்ஸந்தோ.

ஏத்தாவதா கிம் த³ஸ்ஸிதம் ஹோதி? இமஸ்ஸ பி⁴க்கு²னோ ஆக³மனீயபடிபதா³, ஸதிபட்டா²னாபி ஹி புப்³ப³பா⁴கா³யேவ, ஸம்பஜஞ்ஞேபி அனிச்சானுபஸ்ஸனா வயானுபஸ்ஸனா விராகா³னுபஸ்ஸனாதி ச இமாபி திஸ்ஸோ அனுபஸ்ஸனா புப்³ப³பா⁴கா³யேவ, நிரோதா⁴னுபஸ்ஸனாபி படினிஸ்ஸக்³கா³னுபஸ்ஸனாபி இமா த்³வே மிஸ்ஸகா. ஏத்தாவதா இமஸ்ஸ பி⁴க்கு²னோ பா⁴வனாகாலோ த³ஸ்ஸிதோதி. ஸேஸம் வுத்தனயமேவ.