4. பாதாலஸுத்தவண்ணனா

252. சதுத்தே² பாதாலோதி பாதஸ்ஸ அலம் பரியத்தோ, நத்தி² ஏத்த² பதிட்டா²தி பாதாலோ. அஸந்தம் அவிஜ்ஜமானந்தி அஸம்பூ⁴தத்தம் அபஞ்ஞாயமானத்தம். ஏவம் வாசம் பா⁴ஸதீதி அத்தி² மஹாஸமுத்³தே³ பாதாலோதி ஏவம் வாசம். ஸோ ஹி யம் தம் ப³லவாமுக²ம் மஹாஸமுத்³த³ஸ்ஸ உத³கம் வேகே³ன பக்க²ந்தி³த்வா சக்கவாளம் வா ஸினேரும் வா ஆஹச்ச யோஜனத்³வியோஜனத³ஸயோஜனப்பமாணம்பி உக்³க³ந்த்வா புன மஹாஸமுத்³தே³ பததி, யஸ்ஸ பதிதட்டா²னே மஹானரகபபாதோ விய ஹோதி, யம் லோகே ப³லவாமுக²ந்தி வுச்சதி. தம் ஸந்தா⁴ய ஏவம் வத³தி.

யஸ்மா பன தத்த² ததா²ரூபானம் மச்ச²கச்ச²பதே³வதா³னவானம் பதிட்டா²பி ஹோதி ஸுக²னிவாஸோபி, தஸ்மா அஸந்தம் அஸம்விஜ்ஜமானம் தம் தம் வாசம் பா⁴ஸதி நாம. யஸ்மா பன ஸப்³ப³புது²ஜ்ஜனா ஸாரீரிகாய து³க்க²வேத³னாய பதிட்டா²தும் ந ஸக்கோந்தி, தஸ்மா பாதஸ்ஸ அலந்தி அத்தே²ன அயமேவ பாதாலோதி த³ஸ்ஸேந்தோ ஸாரீரிகானம் கோ² ஏதம் பி⁴க்க²வேதிஆதி³மாஹ.

பாதாலே ந பச்சுட்டா²ஸீதி பாதாலஸ்மிம் ந பதிட்டா²ஸி. கா³த⁴ந்தி பதிட்ட²ம். அக்கந்த³தீதி அனிப³த்³த⁴ம் விப்பலாபம் விலபந்தோ கந்த³தி. து³ப்³ப³லோதி து³ப்³ப³லஞாணோ. அப்பதா²மகோதி ஞாணதா²மஸ்ஸ பரித்ததாய பரித்ததா²மகோ. இமஸ்மிம் ஸுத்தே அரியஸாவகோதி ஸோதாபன்னோ. ஸோதாபன்னோ ஹி ஏத்த² து⁴ரம், ப³லவவிபஸ்ஸகோ ந திக்க²பு³த்³தி⁴ உப்பன்னம் வேத³னம் அனனுவத்தித்வா பதிட்டா²தும் ஸமத்தோ² யோகா³வசரோபி வட்டதி.