7. மிக³ஜாலவக்³கோ³

1. பட²மமிக³ஜாலஸுத்தவண்ணனா

63. மிக³ஜாலவக்³க³ஸ்ஸ பட²மே சக்கு²விஞ்ஞேய்யாதி சக்கு²விஞ்ஞாணேன பஸ்ஸிதப்³பா³. ஸோதவிஞ்ஞேய்யாதீ³ஸுபி ஏஸேவ நயோ. இட்டா²தி பரியிட்டா² வா ஹோந்து மா வா, இட்டா²ரம்மணபூ⁴தாதி அத்தோ². கந்தாதி கமனீயா. மனாபாதி மனவட்³ட⁴னகா. பியரூபாதி பியஜாதிகா. காமூபஸம்ஹிதாதி ஆரம்மணம் கத்வா உப்பஜ்ஜமானேன காமேன உபஸம்ஹிதா ரஜனீயாதி ரஞ்ஜனீயா, ராகு³ப்பத்திகாரணபூ⁴தாதி அத்தோ². நந்தீ³தி தண்ஹானந்தீ³. ஸம்யோகோ³தி ஸம்யோஜனம். நந்தி³ஸம்யோஜனஸம்யுத்தோதி நந்தீ³ப³ந்த⁴னேன ப³த்³தோ⁴. அரஞ்ஞவனபத்தா²னீதி அரஞ்ஞானி ச வனபத்தா²னி ச. தத்த² கிஞ்சாபி அபி⁴த⁴ம்மே நிப்பரியாயேன ‘‘நிக்க²மித்வா ப³ஹி இந்த³கீ²லா ஸப்³ப³மேதம் அரஞ்ஞ’’ந்தி (விப⁴. 529) வுத்தம், ததா²பி யம் தம் ‘‘பஞ்சத⁴னுஸதிகம் பச்சி²ம’’ந்தி (பாரா. 654) அரஞ்ஞகங்க³னிப்பா²த³கம் ஸேனாஸனம் வுத்தம், ததே³வ அதி⁴ப்பேதந்தி வேதி³தப்³ப³ம். வனபத்த²ந்தி கா³மந்தம் அதிக்கமித்வா மனுஸ்ஸானம் அனுபசாரட்டா²னம், யத்த² ந கஸீயதி ந வபீயதி. வுத்தம்பி சேதம் –

‘‘வனபத்த²ந்தி தூ³ரானமேதம் ஸேனாஸனானம் அதி⁴வசனம். வனபத்த²ந்தி வனஸண்டா³னமேதம், வனபத்த²ந்தி பி⁴ம்ஸனகானமேதம், வனபத்த²ந்தி ஸலோமஹம்ஸானமேதம், வனபத்த²ந்தி பரியந்தானமேதம், வனபத்த²ந்தி அமனுஸ்ஸூபசாரானம் ஸேனாஸனானமேதம் அதி⁴வசன’’ந்தி (விப⁴. 531).

ஏத்த² ச பரியந்தானந்தி இமம் ஏகம் பரியாயம் ட²பேத்வா ஸேஸபரியாயேஹி வனபத்தா²னி வேதி³தப்³பா³னி. பந்தானீதி பரியந்தானி அதிதூ³ரானி. அப்பஸத்³தா³னீதி உது³க்க²லமுஸலதா³ரகஸத்³தா³தீ³னம் அபா⁴வேன அப்பஸத்³தா³னி. அப்பனிக்³கோ⁴ஸானீதி தேஸம் தேஸம் நின்னாத³மஹானிக்³கோ⁴ஸஸ்ஸ அபா⁴வேன அப்பனிக்³கோ⁴ஸானி. விஜனவாதானீதி ஸஞ்சரணஜனஸ்ஸ ஸரீரவாதவிரஹிதானி. மனுஸ்ஸராஹஸ்ஸேய்யகானீதி மனுஸ்ஸானம் ரஹோகம்மஸ்ஸ அனுச்ச²விகானி. படிஸல்லானஸாருப்பானீதி நிலீயனஸாருப்பானி.

2. து³தியமிக³ஜாலஸுத்தவண்ணனா

64. து³தியே நந்தி³னிரோதா⁴ து³க்க²னிரோதோ⁴தி தண்ஹானந்தி³யா நிரோதே⁴ன வட்டது³க்க²ஸ்ஸ நிரோதோ⁴.

3-5. பட²மஸமித்³தி⁴மாரபஞ்ஹாஸுத்தாதி³வண்ணனா

65-67. ததியே ஸமித்³தீ⁴தி அத்தபா⁴வஸ்ஸ ஸமித்³த⁴தாய ஏவம் லத்³த⁴னாமோ. தஸ்ஸ கிர தே²ரஸ்ஸ அத்தபா⁴வோ அபி⁴ரூபோ அஹோஸி பாஸாதி³கோ, உக்கி²த்தமாலாபுடோ விய அலங்கதமாலாக³ப்³போ⁴ விய ச ஸப்³பா³காரபாரிபூரியா ஸமித்³தோ⁴. தஸ்மா ஸமித்³தி⁴த்வேவ ஸங்க²ம் க³தோ. மாரோதி மரணம் புச்ச²தி. மாரபஞ்ஞத்தீதி மாரோதி பஞ்ஞத்தி நாமம் நாமதே⁴ய்யம். அத்தி² தத்த² மாரோ வா மாரபஞ்ஞத்தி வாதி தத்த² மரணம் வா மரணந்தி இத³ம் நாமம் வா அத்தீ²தி த³ஸ்ஸேதி. சதுத்த²ம் உத்தானமேவ, ததா² பஞ்சமம்.

6. ஸமித்³தி⁴லோகபஞ்ஹாஸுத்தவண்ணனா

68. ச²ட்டே² லோகோதி லுஜ்ஜனபலுஜ்ஜனட்டே²ன லோகோ. இதி மிக³ஜாலத்தே²ரஸ்ஸ ஆயாசனஸுத்ததோ பட்டா²ய பஞ்சஸுபி ஸுத்தேஸு வட்டவிவட்டமேவ கதி²தம்.

7. உபஸேனஆஸீவிஸஸுத்தவண்ணனா

69. ஸத்தமே ஸீதவனேதி ஏவம்னாமகே ஸுஸானவனே. ஸப்பஸோண்டி³கபப்³பா⁴ரேதி ஸப்பப²ணஸதி³ஸதாய ஏவம்லத்³த⁴னாமே பப்³பா⁴ரே. உபஸேனஸ்ஸாதி த⁴ம்மஸேனாபதினோ கனிட்ட²பா⁴திகஉபஸேனத்தே²ரஸ்ஸ. ஆஸீவிஸோ பதிதோ ஹோதீதி தே²ரோ கிர கதப⁴த்தகிச்சோ மஹாசீவரம் க³ஹேத்வா லேணச்சா²யாய மந்த³மந்தே³ன வாதபானவாதேன பீ³ஜியமானோ நிஸீதி³த்வா து³பட்டனிவாஸனே ஸூசிகம்மம் கரோதி. தஸ்மிம் க²ணே லேணச்ச²த³னே த்³வே ஆஸீவிஸபோதகா கீளந்தி. தேஸு ஏகோ பதித்வா தே²ரஸ்ஸ அம்ஸகூடே அவத்தா²ஸி. ஸோ ச பு²ட்ட²விஸோ ஹோதி. தஸ்மா பதிதட்டா²னதோ பட்டா²ய தே²ரஸ்ஸ காயே தீ³பஸிகா² விய வட்டிம் பரியாதி³யமானமேவஸ்ஸ விஸம் ஓதிண்ணம். தே²ரோ விஸஸ்ஸ ததா²க³மனம் தி³ஸ்வா கிஞ்சாபி தம் பதிதமத்தமேவ யதா²பரிச்சே²தே³ன க³தம், அத்தனோ பன இத்³தி⁴ப³லேன ‘‘அயம் அத்தபா⁴வோ லேணே மா வினஸ்ஸதூ’’தி அதி⁴ட்ட²ஹித்வா பி⁴க்கூ² ஆமந்தேஸி. புராயம் காயோ இதே⁴வ விகிரதீதி யாவ ந விகிரதி, தாவ நம் ப³ஹித்³தா⁴ நீஹரதா²தி அத்தோ². அஞ்ஞத²த்தந்தி அஞ்ஞதா²பா⁴வம். இந்த்³ரியானம் வா விபரிணாமந்தி சக்கு²ஸோதாதீ³னம் இந்த்³ரியானம் பகதிவிஜஹனபா⁴வம். தத்தே²வ விகிரீதி ப³ஹி நீஹரித்வா ட²பிதட்டா²னே மஞ்சகஸ்மிம்யேவ விகிரி.

8. உபவாணஸந்தி³ட்டி²கஸுத்தவண்ணனா

70. அட்ட²மே ரூபப்படிஸம்வேதீ³தி நீலபீதாதி³பே⁴த³ம் ஆரம்மணம் வவத்தா²பேந்தோ ரூபம் படிஸம்விதி³தம் கரோதி, தஸ்மா ரூபப்படிஸம்வேதீ³ நாம ஹோதி. ரூபராக³ப்படிஸம்வேதீ³தி கிலேஸஸ்ஸ அத்தி²பா⁴வேனேவ பன ரூபராக³ம் படிஸம்விதி³தம் கரோதி நாம, தஸ்மா ரூபராக³ப்படிஸம்வேதீ³தி வுச்சதி. ஸந்தி³ட்டி²கோதிஆதீ³னி விஸுத்³தி⁴மக்³கே³ வுத்தத்தா²னேவ. நோ ச ரூபராக³ப்படிஸம்வேதீ³தி கிலேஸஸ்ஸ நத்தி²பா⁴வேனேவ ந ரூபராக³ம் படிஸம்விதி³தம் கரோதி நாம, தஸ்மா ‘‘நோ ச ரூபராக³ப்படிஸம்வேதீ³’’தி வுச்சதி. இமஸ்மிம் ஸுத்தே ஸேகா²ஸேகா²னம் பச்சவேக்க²ணா கதி²தா.

9. பட²மச²ப²ஸ்ஸாயதனஸுத்தவண்ணனா

71. நவமே ப²ஸ்ஸாயதனானந்தி ப²ஸ்ஸாகரானம். அவுஸிதந்தி அவுட்ட²ம். ஆரகாதி தூ³ரே. ஏத்தா²ஹம், ப⁴ந்தே, அனஸ்ஸஸந்தி, ப⁴ந்தே, அஹம் ஏத்த² அனஸ்ஸஸிம், நட்டோ² நாம அஹந்தி வத³தி. ப⁴க³வா – ‘‘அயம் பி⁴க்கு² ‘அஹம் நாம இமஸ்மிம் ஸாஸனே நட்டோ²’தி வத³தி, கின்னு க்²வஸ்ஸ அஞ்ஞேஸு தா⁴துகம்மட்டா²ன-கஸிணகம்மட்டா²னாதீ³ஸு அபி⁴யோகோ³ அத்தீ²’’தி சிந்தேத்வா, தம்பி அபஸ்ஸந்தோ – ‘‘கதரம் நு கோ² கம்மட்டா²னம் இமஸ்ஸ ஸப்பாயம் ப⁴விஸ்ஸதீ’’தி சிந்தேஸி. ததோ ‘‘ஆயதனகம்மட்டா²னமேவ ஸப்பாய’’ந்தி தி³ஸ்வா தம் கதே²ந்தோ தம் கிம் மஞ்ஞஸி பி⁴க்கூ²திஆதி³மாஹ. ஸாதூ⁴தி தஸ்ஸ ப்³யாகரணே ஸம்பஹம்ஸனம். ஏஸேவந்தோ து³க்க²ஸ்ஸாதி அயமேவ வட்டது³க்க²ஸ்ஸந்தோ பரிச்சே²தோ³, நிப்³பா³னந்தி அத்தோ².

10. து³தியச²ப²ஸ்ஸாயதனஸுத்தவண்ணனா

72. த³ஸமே அனஸ்ஸஸந்தி நஸ்ஸஸிம், நட்டோ² நாமம்ஹி இச்சேவ அத்தோ². ஆயதிம் அபுனப்³ப⁴வாயாதி ஏத்த² ஆயதிம் அபுனப்³ப⁴வோ நாம நிப்³பா³னம், நிப்³பா³னத்தா²ய பஹீனம் ப⁴விஸ்ஸதீதி அத்தோ².

11. ததியச²ப²ஸ்ஸாயதனஸுத்தவண்ணனா

73. ஏகாத³ஸமே அனஸ்ஸஸந்தி நட்டோ², பனஸ்ஸஸந்தி அதினட்டோ². ஸேஸம் வுத்தனயேனேவ வேதி³தப்³ப³ந்தி.

மிக³ஜாலவக்³கோ³ ஸத்தமோ.