8. கி³லானவக்³கோ³

1-5. பட²மகி³லானஸுத்தாதி³வண்ணனா

74-78. கி³லானவக்³க³ஸ்ஸ பட²மே அமுகஸ்மிந்தி அஸுகஸ்மிம். அயமேவ வா பாடோ². அப்பஞ்ஞாதோதி அஞ்ஞாதோ அபாகடோ. நவோபி ஹி கோசி பஞ்ஞாதோ ஹோதி ராஹுலத்தே²ரோ விய ஸுமனஸாமணேரோ விய ச, அயம் பன நவோ சேவ அபஞ்ஞாதோ ச. ஸேஸமேத்த² வுத்தனயமேவாதி. ததா² இதோ பரேஸு சதூஸு.

6. பட²மஅவிஜ்ஜாபஹானஸுத்தவண்ணனா

79. ச²ட்டே² அனிச்சதோ ஜானதோதி து³க்கா²னத்தவஸேன ஜானதோபி பஹீயதியேவ, இத³ம் பன அனிச்சலக்க²ணம் த³ஸ்ஸேத்வா வுத்தே பு³ஜ்ஜ²னகஸ்ஸ அஜ்ஜா²ஸயேன வுத்தம்.

7. து³தியஅவிஜ்ஜாபஹானஸுத்தவண்ணனா

80. ஸத்தமே ஸப்³பே³ த⁴ம்மாதி ஸப்³பே³ தேபூ⁴மகத⁴ம்மா. நாலம் அபி⁴னிவேஸாயாதி அபி⁴னிவேஸபராமாஸக்³கா³ஹேன க³ண்ஹிதும் ந யுத்தா. ஸப்³ப³னிமித்தானீதி ஸப்³பா³னி ஸங்கா²ரனிமித்தானி. அஞ்ஞதோ பஸ்ஸதீதி யதா² அபரிஞ்ஞாதாபி⁴னிவேஸோ ஜனோ பஸ்ஸதி, ததோ அஞ்ஞதோ பஸ்ஸதி. அபரிஞ்ஞாதாபி⁴னிவேஸோ ஹி ஜனோ ஸப்³ப³னிமித்தானிபி அத்ததோ பஸ்ஸதி. பரிஞ்ஞாதாபி⁴னிவேஸோ பன அனத்ததோ பஸ்ஸதி, நோ அத்ததோதி ஏவம் இமஸ்மிம் ஸுத்தே அனத்தலக்க²ணமேவ கதி²தம்.

8. ஸம்ப³ஹுலபி⁴க்கு²ஸுத்தவண்ணனா

81. அட்ட²மே இத⁴ நோதி ஏத்த² நோ-காரோ நிபாதமத்தமேவ. ஸேஸம் உத்தானத்த²மேவ. கேவலம் இத⁴ து³க்க²லக்க²ணம் கதி²தந்தி வேதி³தப்³ப³ம்.

9. லோகபஞ்ஹாஸுத்தவண்ணனா

82. நவமே லுஜ்ஜதீதி பலுஜ்ஜதி பி⁴ஜ்ஜதி. இத⁴ அனிச்சலக்க²ணம் கதி²தம்.

10. ப²க்³கு³னபஞ்ஹாஸுத்தவண்ணனா

83. த³ஸமே சி²ன்னபபஞ்சேதி தண்ஹாபபஞ்சஸ்ஸ சி²ன்னத்தா சி²ன்னபபஞ்சே. சி²ன்னவடுமேதி தண்ஹாவடுமஸ்ஸேவ சி²ன்னத்தா சி²ன்னவடுமே. கிம் புச்சா²மீதி புச்ச²தி? அதிக்கந்தபு³த்³தே⁴ஹி பரிஹரிதானி சக்கு²ஸோதாதீ³னி புச்சா²மீதி புச்ச²தி. அத² வா ஸசே மக்³கே³ பா⁴விதேபி அனாக³தே சக்கு²ஸோதாதி³வட்டம் வட்³டே⁴ய்ய, தம் புச்சா²மீதி புச்ச²தீதி.

கி³லானவக்³கோ³ அட்ட²மோ.