6. அவஸ்ஸுதபரியாயஸுத்தவண்ணனா

243. ச²ட்டே² நவம் ஸந்தா²கா³ரந்தி அது⁴னா காரிதம் ஸந்தா²கா³ரம், ஏகா மஹாஸாலாதி அத்தோ². உய்யோக³காலாதீ³ஸு ஹி ராஜானோ தத்த² ட²த்வா, ‘‘ஏத்தகா புரதோ க³ச்ச²ந்து, ஏத்தகா பச்சா², ஏத்தகா உபோ⁴ஹி பஸ்ஸேஹி, ஏத்தகா ஹத்தீ² அபி⁴ருஹந்து, ஏத்தகா அஸ்ஸே, ஏத்தகா ரதே²ஸு திட்ட²ந்தூ’’தி ஏவம் ஸந்த²ம் கரோந்தி, மரியாத³ம் ப³ந்த⁴ந்தி, தஸ்மா தம் டா²னம் ஸந்தா²கா³ரந்தி வுச்சதி. உய்யோக³ட்டா²னதோ ச ஆக³ந்த்வா யாவ கே³ஹேஸு அல்லகோ³மயபரிப⁴ண்டா³தீ³னி காரேந்தி, தாவ த்³வே தீணி தி³வஸானி தே ராஜானோ தத்த² ஸந்த²ரந்தீதிபி ஸந்தா²கா³ரம். தேஸம் ராஜூனம் ஸஹ அத்தா²னுஸாஸனம் அகா³ரந்திபி ஸந்தா²கா³ரம். க³ணராஜானோ ஹி தே, தஸ்மா உப்பன்னம் கிச்சம் ஏகஸ்ஸ வஸேன ந சி²ஜ்ஜதி, ஸப்³பே³ஸம் ச²ந்தோ³பி லத்³து⁴ம் வட்டதி, தஸ்மா ஸப்³பே³ தத்த² ஸன்னிபதித்வா அனுஸாஸந்தி. தேன வுத்தம் ‘‘ஸஹ அத்தா²னுஸாஸனம் அகா³ரந்திபி ஸந்தா²கா³ர’’ந்தி. யஸ்மா பன தே தத்த² ஸன்னிபதித்வா, ‘‘இமஸ்மிம் காலே கஸிதும் வட்டதி, இமஸ்மிம் காலே வபிது’’ந்தி ஏவமாதி³னா நயேன க⁴ராவாஸகிச்சானி ஸம்மந்தயந்தி, தஸ்மா சி²த்³தா³வசி²த்³த³ம் க⁴ராவாஸம் தத்த² ஸந்த²ரந்தீதிபி, ஸந்தா²கா³ரம். அசிரகாரிதம் ஹோதீதி இட்ட²ககம்மஸுதா⁴கம்மசித்தகம்மாதி³வஸேன ஸுஸஜ்ஜிதம் தே³வவிமானம் விய அது⁴னா நிட்டா²பிதம். ஸமணேன வாதி ஏத்த² யஸ்மா க⁴ரவத்து²பரிக்³க³ஹணகாலேயேவ தே³வதா அத்தனோ வஸனட்டா²னம் க³ண்ஹந்தி, தஸ்மா ‘‘தே³வேன வா’’தி அவத்வா, ‘‘ஸமணேன வா ப்³ராஹ்மணேன வா கேனசி வா மனுஸ்ஸபூ⁴தேனா’’தி வுத்தம்.

யேன ப⁴க³வா தேனுபஸங்கமிம்ஸூதி ஸந்தா²கா³ரம் நிட்டி²தந்தி ஸுத்வா ‘‘க³ச்சா²ம நம் பஸ்ஸிஸ்ஸாமா’’தி க³ந்த்வா த்³வாரகோட்ட²கதோ பட்டா²ய ஸப்³ப³ம் ஓலோகேத்வா ‘‘இத³ம் ஸந்தா²கா³ரம் அதிவிய மனோரமம் ஸஸ்ஸிரிகம். கேன பட²மம் பரிபு⁴த்தம் அம்ஹாகம் தீ³க⁴ரத்தம் ஹிதாய ஸுகா²ய அஸ்ஸா’’தி சிந்தேத்வா – ‘‘அம்ஹாகம் ஞாதிஸேட்ட²ஸ்ஸ பட²மம் தி³ய்யமானேபி ஸத்து²னோவ அனுச்ச²விகம், த³க்கி²ணேய்யவஸேன தி³ய்யமானேபி ஸத்து²னோவ அனுச்ச²விகம், தஸ்மா ஸத்தா²ரம் பட²மம் பரிபு⁴ஞ்ஜாபேஸ்ஸாம, பி⁴க்கு²ஸங்க⁴ஸ்ஸ ச ஆக³மனம் கரிஸ்ஸாம, பி⁴க்கு²ஸங்கே⁴ ஆக³தே தேபிடகம் பு³த்³த⁴வசனம் ஆக³தமேவ ப⁴விஸ்ஸதி, ஸத்தா²ரம் தியாமரத்திம் அம்ஹாகம் த⁴ம்மகத²ம் கதா²பேஸ்ஸாம, இதி தீஹி ரதனேஹி பரிபு⁴த்தம் பச்சா² மயம் பரிபு⁴ஞ்ஜிஸ்ஸாம, ஏவம் நோ தீ³க⁴ரத்தம் ஹிதாய ஸுகா²ய ப⁴விஸ்ஸதீ’’தி ஸன்னிட்டா²னம் கத்வா உபஸங்கமிம்ஸு.

யேன நவம் ஸந்தா²கா³ரம் தேனுபஸங்கமிம்ஸூதி தம்தி³வஸம் கிர ஸந்தா²கா³ரம் கிஞ்சாபி ராஜகுலானம் த³ஸ்ஸனத்தா²ய தே³வவிமானம் விய ஸுஸஜ்ஜிதம் ஹோதி ஸுபடிஜக்³கி³தம், பு³த்³தா⁴ரஹம் பன கத்வா அபஞ்ஞத்தம். பு³த்³தா⁴ ஹி நாம அரஞ்ஞஜ்ஜா²ஸயா அரஞ்ஞாராமா அந்தோகா³மே வஸேய்யும் வா நோ வா, தஸ்மா ‘‘ப⁴க³வதோ மனம் ஜானித்வாவ, பஞ்ஞாபேஸ்ஸாமா’’தி சிந்தேத்வா, தே ப⁴க³வந்தம் உபஸங்கமிம்ஸு, இதா³னி பன மனம் லபி⁴த்வா பஞ்ஞாபேதுகாமா யேன ஸந்தா²கா³ரம் தேனுபஸங்கமிம்ஸு.

ஸப்³ப³ஸந்த²ரிம் ஸந்தா²கா³ரம் ஸந்த²ரித்வாதி யதா² ஸப்³ப³மேவ ஸந்த²தம் ஹோதி, ஏவம் தம் ஸந்த²ராபேத்வா. ஸப்³ப³பட²மம் தாவ ‘‘கோ³மயம் நாம ஸப்³ப³மங்க³லேஸு வட்டதீ’’தி ஸுதா⁴பரிகம்மகதம்பி பூ⁴மிம் அல்லகோ³மயேன ஓபுஞ்ஜாபேத்வா, பரிஸுக்க²பா⁴வம் ஞத்வா, யதா² அக்கந்தட்டா²னே பத³ம் பஞ்ஞாயதி, ஏவம் சதுஜ்ஜாதியக³ந்தே⁴ஹி லிம்பாபேத்வா உபரி நானாவண்ணகடஸாரகே ஸந்த²ரித்வா தேஸம் உபரி மஹாபிட்டி²ககோஜவே ஆதி³ம் கத்வா ஹத்த²த்த²ரஅஸ்ஸத்த²ரஸீஹத்த²ரப்³யக்³க⁴த்த²ரசந்த³த்த²ரகஸூரியத்த²ரகசித்தத்த²ரகாதீ³ஹி நானாவண்ணேஹி அத்த²ரகேஹி ஸந்த²ரிதப்³ப³யுத்தகம் ஸப்³போ³காஸம் ஸந்த²ராபேஸும். தேன வுத்தம் ‘‘ஸப்³ப³ஸந்த²ரிம் ஸந்தா²கா³ரம் ஸந்த²ரித்வா’’தி.

ஆஸனானி பஞ்ஞாபேத்வாதி மஜ்ஜ²ட்டா²னே தாவ மங்க³லத²ம்ப⁴ம் நிஸ்ஸாய மஹாரஹம் பு³த்³தா⁴ஸனம் பஞ்ஞாபேத்வா, தத்த² தத்த² யம் யம் முது³கஞ்ச மனோரமஞ்ச பச்சத்த²ரணம், தம் தம் பச்சத்த²ரித்வா உப⁴தோலோஹிதகம் மனுஞ்ஞத³ஸ்ஸனம் உபதா⁴னம் உபத³ஹித்வா உபரி ஸுவண்ணரஜததாரகவிசித்தவிதானம் ப³ந்தி⁴த்வா க³ந்த⁴தா³மபுப்ப²தா³மபத்ததா³மாதீ³ஹி அலங்கரித்வா ஸமந்தா த்³வாத³ஸஹத்தே² டா²னே புப்ப²ஜாலம் காரேத்வா, திம்ஸஹத்த²மத்தம் டா²னம் படஸாணியா பரிக்கி²பாபேத்வா பச்சி²மபி⁴த்திம் நிஸ்ஸாய பி⁴க்கு²ஸங்க⁴ஸ்ஸ பல்லங்கபீட²அபஸ்ஸயபீட²முண்ட³பீடா²னி பஞ்ஞாபேத்வா உபரி ஸேதபச்சத்த²ரணேஹி பச்சத்த²ராபேத்வா பாசீனபி⁴த்திம் நிஸ்ஸாய அத்தனோ அத்தனோ மஹாபிட்டி²ககோஜவே பஞ்ஞாபேத்வா மனோரமானி ஹம்ஸலோமாதி³பூரிதானி உபதா⁴னானி ட²பாபேஸும் ‘‘ஏவம் அகிலமமானா ஸப்³ப³ரத்திம் த⁴ம்மம் ஸுணிஸ்ஸாமா’’தி. இத³ம் ஸந்தா⁴ய வுத்தம் ‘‘ஆஸனானி பஞ்ஞாபேத்வா’’தி.

உத³கமணிகம் பதிட்டா²பேத்வாதி மஹாகுச்சி²கம் உத³கசாடிம் பதிட்டா²பேத்வா ‘‘ஏவம் ப⁴க³வா ச பி⁴க்கு²ஸங்கோ⁴ ச யதா²ருசியா ஹத்தே² வா தோ⁴விஸ்ஸந்தி பாதே³ வா, முக²ம் வா விக்கா²லேஸ்ஸந்தீ’’தி தேஸு தேஸு டா²னேஸு மணிவண்ணஸ்ஸ உத³கஸ்ஸ பூராபேத்வா வாஸத்தா²ய நானாபுப்பா²னி சேவ உத³கவாஸசுண்ணானி ச பக்கி²பித்வா கத³லிபண்ணேஹி பித³ஹித்வா பதிட்டா²பேஸும். இத³ம் ஸந்தா⁴ய வுத்தம் ‘‘உத³கமணிகம் பதிட்டா²பேத்வா’’தி.

தேலப்பதீ³பம் ஆரோபேத்வாதி ரஜதஸுவண்ணாதி³மயத³ண்ட³தீ³பிகாஸு யோனகரூபகிராதரூபகாதீ³னம் ஹத்தே² ட²பிதஸுவண்ணரஜதாதி³மயகபல்லிகாஸு ச தேலப்பதீ³பம் ஜாலாபேத்வாதி அத்தோ². யேன ப⁴க³வா தேனுபஸங்கமிம்ஸூதி ஏத்த² பன தே ஸக்யராஜானோ ந கேவலம் ஸந்தா²கா³ரமேவ, அத² கோ² யோஜனாவட்டே கபிலவத்து²ஸ்மிம் நக³ரவீதி²யோபி ஸம்மஜ்ஜாபேத்வா த⁴ஜே உஸ்ஸாபேத்வா கே³ஹத்³வாரேஸு புண்ணக⁴டே ச கத³லியோ ச ட²பாபேதேவா ஸகலனக³ரம் தீ³பமாலாதீ³ஹி விப்பகிண்ணதாரகம் விய கத்வா ‘‘கீ²ரூபகே³ தா³ரகே கீ²ரம் பாயேத², த³ஹரே குமாரே லஹும் லஹும் போ⁴ஜேத்வா ஸயாபேத², உச்சாஸத்³த³ம் மா கரித்த², அஜ்ஜ ஏகரத்திம் ஸத்தா² அந்தோகா³மே வஸிஸ்ஸதி, பு³த்³தா⁴ நாம அப்பஸத்³த³காமா ஹோந்தீ’’தி பே⁴ரிம் சராபேத்வா ஸயம் த³ண்ட³தீ³பிகா ஆதா³ய யேன ப⁴க³வா தேனுபஸங்கமிம்ஸு.

அத² கோ² ப⁴க³வா நிவாஸேத்வா பத்தசீவரமாதா³ய ஸத்³தி⁴ம் பி⁴க்கு²ஸங்கே⁴ன யேன நவம் ஸந்தா²கா³ரம் தேனுபஸங்கமீதி ‘‘யஸ்ஸ தா³னி, ப⁴ந்தே, ப⁴க³வா காலம் மஞ்ஞதீ’’தி ஏவம் கிர காலே ஆரோசிதே ப⁴க³வா லாகா²ரஸதிந்தரத்தகோவிளாரபுப்ப²வண்ணம் ரத்தது³பட்டம் கத்தரியா பது³மம் கந்தேந்தோ விய, ஸம்விதா⁴ய திமண்ட³லம் படிச்சா²தே³ந்தோ நிவாஸேத்வா ஸுவண்ணபாமங்கே³ன பது³மகலாபம் பரிக்கி²பந்தோ விய, விஜ்ஜுலதாஸஸ்ஸிரிகம் காயப³ந்த⁴னம் ப³ந்தி⁴த்வா ரத்தகம்ப³லேன க³ஜகும்ப⁴ம் பரியோனந்த⁴ந்தோ விய, ரதனஸதுப்³பே³தே⁴ ஸுவண்ணக்³கி⁴கே பவாளஜாலம் கி²பமானோ விய ஸுவண்ணசேதியே ரத்தகம்ப³லகஞ்சுகம் படிமுஞ்சந்தோ விய, க³ச்ச²ந்தம் புண்ணசந்த³ம் ரத்தவண்ணவலாஹகேன படிச்சா²த³யமானோ விய, கஞ்சனபப்³ப³தமத்த²கே ஸுபக்கலாகா²ரஸம் பரிஸிஞ்சந்தோ விய, சித்தகூடபப்³ப³தமத்த²கம் விஜ்ஜுலதாய பரிக்கி²பந்தோ விய ச ஸசக்கவாளஸினேருயுக³ந்த⁴ரம் மஹாபத²விம் ஸஞ்சாலேத்வா க³ஹிதம் நிக்³ரோத⁴பல்லவஸமானவண்ணம் ரத்தவரபம்ஸுகூலம் பாருபித்வா, க³ந்த⁴குடித்³வாரதோ நிக்க²மி கஞ்சனகு³ஹதோ ஸீஹோ விய உத³யபப்³ப³தகூடதோ புண்ணசந்தோ³ விய ச. நிக்க²மித்வா பன க³ந்த⁴குடிபமுகே² அட்டா²ஸி.

அத²ஸ்ஸ காயதோ மேக⁴முகே²ஹி விஜ்ஜுகலாபா விய ரஸ்மியோ நிக்க²மித்வா ஸுவண்ணரஸதா⁴ராபரிஸேகபிஞ்ஜரபத்தபுப்ப²ப²லவிடபே விய ஆராமருக்கே² கரிம்ஸு. தாவதே³வ ச அத்தனோ அத்தனோ பத்தசீவரமாதா³ய மஹாபி⁴க்கு²ஸங்கோ⁴ ப⁴க³வந்தம் பரிவாரேஸி. தே பன பரிவாரேத்வா டி²தா பி⁴க்கூ² ஏவரூபா அஹேஸும் – அப்பிச்சா² ஸந்துட்டா² பவிவித்தா அஸம்ஸட்டா² ஆரத்³த⁴வீரியா வத்தாரோ வசனக்க²மா சோத³கா பாபக³ரஹினோ ஸீலஸம்பன்னா ஸமாதி⁴ஸம்பன்னா பஞ்ஞாவிமுத்திவிமுத்திஞாணத³ஸ்ஸனஸம்பன்னா. தேஹி பரிவாரிதோ ப⁴க³வா ரத்தகம்ப³லபரிக்கி²த்தோ விய ஸுவண்ணக்க²ந்தோ⁴, ரத்தபது³மஸண்ட³மஜ்ஜ²க³தா விய ஸுவண்ணனாவா, பவாளவேதி³காபரிக்கி²த்தோ விய ஸுவண்ணபாஸாதோ³ விரோசித்த². ஸாரிபுத்தமோக்³க³ல்லானாத³யோ மஹாதே²ராபி நம் மேக⁴வண்ணம் பம்ஸுகூலம் பாருபித்வா மணிவம்மவம்மிகா விய மஹானாகா³ பரிவாரயிம்ஸு வந்தராகா³ பி⁴ன்னகிலேஸா விஜடிதஜடா சி²ன்னப³ந்த⁴னா குலே வா க³ணே வா அலக்³கா³.

இதி ப⁴க³வா ஸயம் வீதராகோ³ வீதராகே³ஹி, வீததோ³ஸோ வீததோ³ஸேஹி, வீதமோஹோ வீதமோஹேஹி, நித்தண்ஹோ நித்தண்ஹேஹி, நிக்கிலேஸோ நிக்கிலேஸேஹி, ஸயம் பு³த்³தோ⁴ ப³ஹுஸ்ஸுதபு³த்³தே⁴ஹி பரிவாரிதோ பத்தபரிவாரிதம் விய கேஸரம், கேஸரபரிவாரிதா விய கண்ணிகா, அட்ட²னாக³ஸஹஸ்ஸபரிவாரிதோ விய ச²த்³த³ந்தோ நாக³ராஜா, நவுதிஹம்ஸஸஹஸ்ஸபரிவாரிதோ விய த⁴தரட்டோ² ஹம்ஸராஜா, ஸேனங்க³பரிவாரிதோ விய சக்கவத்திராஜா, மருக³ணபரிவாரிதோ விய ஸக்கோ தே³வராஜா, ப்³ரஹ்மக³ணபரிவாரிதோ விய ஹாரிதமஹாப்³ரஹ்மா, தாராக³ணபரிவாரிதோ விய புண்ணசந்தோ³ அஸமேன பு³த்³த⁴வேஸேன அபரிமாணேன பு³த்³த⁴விலாஸேன கபிலவத்து²கா³மிமக்³க³ம் படிபஜ்ஜி.

அத²ஸ்ஸ புரத்தி²மகாயதோ ஸுவண்ணவண்ணா ரஸ்மி உட்ட²ஹித்வா அஸீதிஹத்த²ட்டா²னம் அக்³க³ஹேஸி பச்சி²ம-காயதோ, த³க்கி²ணஹத்த²தோ, வாமஹத்த²தோ ஸுவண்ணவண்ணா ரஸ்மி உட்ட²ஹித்வா அஸீதிஹத்த²ட்டா²னம் அக்³க³ஹேஸி. உபரி கேஸந்ததோ பட்டா²ய ஸப்³ப³கேஸாவட்டேஹி மோரகீ³வவண்ணா ரஸ்மி உட்ட²ஹித்வா க³க³னதலே அஸீதிஹத்த²ட்டா²னம் அக்³க³ஹேஸி. ஹேட்டா² பாத³தலேஹி பவாளவண்ணா ரஸ்மி உட்ட²ஹித்வா க⁴னபத²விம் அஸீதிஹத்த²ட்டா²னம் அக்³க³ஹேஸி. ஏவம் ஸமந்தா அஸீதிஹத்த²ட்டா²னம் ச²ப்³ப³ண்ணா பு³த்³த⁴ரஸ்மியோ விஜ்ஜோதமானா விப்ப²ந்த³மானா கஞ்சனத³ண்ட³தீ³பிகாஹி நிச்ச²ரித்வா ஆகாஸம் பக்க²ந்த³ஜாலா விய சாதுத்³தீ³பிகமஹாமேக⁴தோ நிக்க²ந்தவிஜ்ஜுலதா விய விதா⁴விம்ஸு. ஸப்³ப³தி³ஸாபா⁴கா³ ஸுவண்ணசம்பகபுப்பே²ஹி விகிரியமானா விய, ஸுவண்ணக⁴டதோ நிக்க²ந்தஸுவண்ணரஸதா⁴ராஹி ஸிஞ்சமானா விய, பஸாரிதஸுவண்ணபடபரிக்கி²த்தா விய, வேரம்ப⁴வாதஸமுட்டி²தகிம்ஸுககணிகாரபுப்ப²சுண்ணஸமோகிண்ணா விய விப்பபா⁴ஸிம்ஸு.

ப⁴க³வதோபி அஸீதிஅனுப்³யஞ்ஜனப்³யாமப்பபா⁴த்³வத்திம்ஸவரலக்க²ணஸமுஜ்ஜலஸரீரம் ஸமுக்³க³ததாரகம் விய க³க³னதலம், விகஸிதமிவ பது³மவனம், ஸப்³ப³பாலிபு²ல்லோ விய யோஜனஸதிகோ பாரிச்ச²த்தகோ, படிபாடியா ட²பிதானம் த்³வத்திம்ஸசந்தா³னம் த்³வத்திம்ஸஸூரியானம் த்³வத்திம்ஸசக்கவத்தீனம் த்³வத்திம்ஸதே³வராஜானம் த்³வத்திம்ஸமஹாப்³ரஹ்மானம் ஸிரியா ஸிரிம் அபி⁴ப⁴வமானம் விய விரோசித்த², யதா² தம் த³ஸஹி பாரமீஹி த³ஸஹி உபபாரமீஹி த³ஸஹி பரமத்த²பாரமீஹி ஸம்மதே³வ பூரிதாஹி ஸமதிம்ஸபாரமிதாஹி அலங்கதம். கப்பஸதஸஹஸ்ஸாதி⁴கானி சத்தாரி அஸங்க்²யேய்யானி தி³ன்னதா³னம் ரக்கி²தஸீலம் கதகல்யாணகம்மம் ஏகஸ்மிம் அத்தபா⁴வே ஓதரித்வா விபாகம் தா³தும் டா²னம் அலப⁴மானம் ஸம்பா³த⁴பத்தம் விய அஹோஸி. நாவாஸஹஸ்ஸப⁴ண்ட³ம் ஏகனாவம் ஆரோபனகாலோ விய, ஸகடஸஹஸ்ஸப⁴ண்ட³ம் ஏகஸகடம் ஆரோபனகாலோ விய, பஞ்சவீஸதியா க³ங்கா³னம் ஓக⁴ஸ்ஸ ஸம்பி⁴ஜ்ஜ முக²த்³வாரே ஏகதோ ராஸிபூ⁴தகாலோ விய அஹோஸி.

இமாய பு³த்³த⁴ஸிரியா ஓபா⁴ஸமானஸ்ஸாபி ச ப⁴க³வதோ புரதோ அனேகானி த³ண்ட³தீ³பிகாஸஹஸ்ஸானி உக்கி²பிம்ஸு, ததா² பச்ச²தோ, வாமபஸ்ஸே, த³க்கி²ணபஸ்ஸே. ஜாதிஸுமனசம்பகவனமல்லிகாரத்துப்பல-நீலுப்பல-ப³குலஸிந்து³வாரபுப்பா²னி சேவ நீலபீதாதி³வண்ணஸுக³ந்த⁴க³ந்த⁴சுண்ணானி ச சாதுத்³தீ³பிகமேக⁴விஸ்ஸட்டா² உத³கவுட்டி²யோ விய விப்பகிரியிம்ஸு. பஞ்சங்கி³கதூரியனிக்³கோ⁴ஸா சேவ பு³த்³த⁴த⁴ம்மஸங்க⁴கு³ணபடிஸம்யுத்தா து²திகோ⁴ஸா ச ஸப்³பா³ தி³ஸா பூரயிம்ஸு. தே³வமனுஸ்ஸனாக³ஸுபண்ணக³ந்த⁴ப்³ப³யக்கா²தீ³னம் அக்கீ²னி அமதபானம் விய லபி⁴ம்ஸு. இமஸ்மிம் பன டா²னே ட²த்வா பத³ஸஹஸ்ஸேன க³மனவண்ணம் வத்தும் வட்டதி. தத்ரித³ம் முக²மத்தம் –

‘‘ஏவம் ஸப்³ப³ங்க³ஸம்பன்னோ, கம்பயந்தோ வஸுந்த⁴ரம்;

அஹேட²யந்தோ பாணானி, யாதி லோகவினாயகோ.

‘‘த³க்கி²ணம் பட²மம் பாத³ம், உத்³த⁴ரந்தோ நராஸபோ⁴

க³ச்ச²ந்தோ ஸிரிஸம்பன்னோ, ஸோப⁴தே த்³விபது³த்தமோ.

‘‘க³ச்ச²தோ பு³த்³த⁴ஸேட்ட²ஸ்ஸ, ஹேட்டா²பாத³தலம் முது³;

ஸமம் ஸம்பு²ஸதே பூ⁴மிம், ரஜஸா நுபலிப்பதி.

‘‘நின்னட்டா²னம் உன்னமதி, க³ச்ச²ந்தே லோகனாயகே;

உன்னதஞ்ச ஸமம் ஹோதி, பத²வீ ச அசேதனா.

‘‘பாஸாணா ஸக்க²ரா சேவ, கத²லா கா²ணுகண்டகா;

ஸப்³பே³ மக்³கா³ விவஜ்ஜந்தி, க³ச்ச²ந்தே லோகனாயகே.

‘‘நாதிதூ³ரே உத்³த⁴ரதி, நச்சாஸன்னே ச நிக்கி²பம்;

அக⁴ட்டயந்தோ நிய்யாதி, உபோ⁴ ஜாணூ ச கோ³ப்ப²கே.

‘‘நாதிஸீக⁴ம் பக்கமதி, ஸம்பன்னசரணோ முனி;

ந சாபி ஸணிகம் யாதி, க³ச்ச²மானோ ஸமாஹிதோ.

‘‘உத்³த⁴ம் அதோ⁴ ச திரியஞ்ச, தி³ஸஞ்ச விதி³ஸம் ததா²;

ந பேக்க²மானோ ஸோ யாதி, யுக³மத்தஞ்ஹி பேக்க²தி.

‘‘நாக³விக்கந்தசாரோ ஸோ, க³மனே ஸோப⁴தே ஜினோ;

சாரும் க³ச்ச²தி லோகக்³கோ³, ஹாஸயந்தோ ஸதே³வகே.

‘‘உளுராஜாவ ஸோப⁴ந்தோ, சதுசாரீவ கேஸரீ;

தோஸயந்தோ ப³ஹூ ஸத்தே, புரம் ஸேட்ட²ம் உபாக³மீ’’தி.

வண்ணகாலோ நாம கிரேஸ, ஏவம்விதே⁴ஸு காலேஸு பு³த்³த⁴ஸ்ஸ ஸரீரவண்ணே வா கு³ணவண்ணே வா த⁴ம்மகதி²கஸ்ஸ தா²மோயேவ பமாணம். சுண்ணியபதே³ஹி வா கா³தா²ப³ந்தே⁴ன வா யத்தகம் ஸக்கோதி, தத்தகம் வத்தப்³ப³ம். து³க்கதி²தந்தி ந வத்தப்³ப³ம். அப்பமாணவண்ணா ஹி பு³த்³தா⁴. தேஸம் பு³த்³தா⁴பி அனவஸேஸதோ வண்ணம் வத்தும் அஸமத்தா², பகே³வ இதரா பஜாதி. இமினா ஸிரிவிலாஸேன அலங்கதபடியத்தம் ஸக்யராஜகுலம் பவிஸித்வா ப⁴க³வா பஸன்னசித்தேன ஜனேன க³ந்த⁴தூ⁴மவாஸசுண்ணாதீ³ஹி பூஜியமானோ ஸந்தா²கா³ரம் பாவிஸி. தேன வுத்தம் ‘‘அத² கோ² ப⁴க³வா நிவாஸேத்வா பத்தசீவரமாதா³ய ஸத்³தி⁴ம் பி⁴க்கு²ஸங்கே⁴ன யேன நவம் ஸந்தா²கா³ரம் தேனுபஸங்கமீ’’தி.

ப⁴க³வந்தம்யேவ புரக்க²த்வாதி ப⁴க³வந்தம் புரதோ கத்வா. தத்த² ப⁴க³வா பி⁴க்கூ²னஞ்சேவ உபாஸகானஞ்ச மஜ்ஜே² நிஸின்னோ க³ந்தோ⁴த³கேன ந்ஹாபேத்வா து³கூலசும்ப³டகேன வோத³கம் கத்வா ஜாதிஹிங்கு³லகேன மஜ்ஜித்வா ரத்தகம்ப³லபலிவேடி²தே பீடே² ட²பிதரத்தஸுவண்ணக⁴னபடிமா விய அதிவிரோசித்த². அயம் பனேத்த² போராணானம் வண்ணப⁴ணனமக்³கோ³ –

‘‘க³ந்த்வான மண்ட³லமாளம், நாக³விக்கந்தசாரணோ;

ஓபா⁴ஸயந்தோ லோகக்³கோ³, நிஸீதி³ வரமாஸனே.

‘‘தஹிம் நிஸின்னோ நரத³ம்மஸாரதி²,

தே³வாதிதே³வோ ஸதபுஞ்ஞலக்க²ணோ;

பு³த்³தா⁴ஸனே மஜ்ஜ²க³தோ விரோசதி,

ஸுவண்ணனேக்க²ம் விய பண்டு³கம்ப³லே.

‘‘நேக்க²ம் ஜம்போ³னத³ஸ்ஸேவ, நிக்கி²த்தம் பண்டு³கம்ப³லே;

விரோசதி வீதமலோ, மணிவேரோசனோ யதா².

‘‘மஹாஸாலோவ ஸம்பு²ல்லோ, நேருராஜாவ’லங்கதோ;

ஸுவண்ணயூபஸங்காஸோ, பது³மோ கோகனதோ³ யதா².

‘‘ஜலந்தோ தீ³பருக்கோ²வ, பப்³ப³தக்³கே³ யதா² ஸிகீ²;

தே³வானம் பாரிச்ச²த்தோவ, ஸப்³ப³பு²ல்லோ விரோசதீ’’தி.

காபிலவத்த²வே ஸக்யே ப³ஹுதே³வ ரத்திம் த⁴ம்மியா கதா²யாதி ஏத்த² த⁴ம்மகதா² நாம ஸந்தா²கா³ரானுமோத³னாபடிஸம்யுத்தா பகிண்ணககதா² வேதி³தப்³பா³. ததா³ ஹி ப⁴க³வா ஆகாஸக³ங்க³ம் ஓதாரேந்தோ விய பத²வோஜம் ஆகட்³ட⁴ந்தோ விய மஹாஜம்பு³ம் மத்த²கே க³ஹேத்வா சாலேந்தோ விய யோஜனிகம் மது⁴ப⁴ண்ட³ம் சக்கயந்தேன பீளேத்வா மது⁴பானம் பாயமானோ விய கபிலவத்து²வாஸீனம் ஸக்யானம் ஹிதஸுகா²வஹம் பகிண்ணககத²ம் கதே²ஸி. ‘‘ஆவாஸதா³னம் நாமேதம், மஹாராஜ, மஹந்தம், தும்ஹாகம் ஆவாஸோ மயா பரிபு⁴த்தோ, பி⁴க்கு²ஸங்கே⁴ன ச பரிபு⁴த்தோ, மயா ச பி⁴க்கு²ஸங்கே⁴ன ச பரிபு⁴த்தோ பன த⁴ம்மரதனேன பரிபு⁴த்தோயேவாதி தீஹி ரதனேஹி பரிபு⁴த்தோ நாம ஹோதி. ஆவாஸதா³னஸ்மிஞ்ஹி தி³ன்னே ஸப்³ப³தா³னம் தி³ன்னமேவ ஹோதி. பு⁴ம்மட்ட²கபண்ணஸாலாய வா ஸாகா²மண்ட³பஸ்ஸ வாபி ஆனிஸம்ஸோ நாம பரிச்சி²ந்தி³தும் ந ஸக்கா. ஆவாஸதா³னானுபா⁴வேன ஹி ப⁴வே ப⁴வே நிப்³ப³த்தஸ்ஸாபி ஸம்பா³தி⁴தக³ப்³ப⁴வாஸோ ந ஹோதி, த்³வாத³ஸஹத்தோ² ஓவரகோ விய மாதுகுச்சி² அஸம்பா³தோ⁴வ ஹோதீ’’தி. ஏவம் நானானயவிசித்தம் ப³ஹும் த⁴ம்மிம் கத²ம் கதே²த்வா –

‘‘ஸீதம் உண்ஹம் படிஹந்தி, ததோ வாளமிகா³னி ச;

ஸிரீஸபே ச மகஸே, ஸிஸிரே சாபி வுட்டி²யோ.

‘‘ததோ வாதாதபோ கோ⁴ரோ, ஸஞ்ஜாதோ படிஹஞ்ஞதி;

லேணத்த²ஞ்ச ஸுக²த்த²ஞ்ச, ஜா²யிதுஞ்ச விபஸ்ஸிதும்.

‘‘விஹாரதா³னம் ஸங்க⁴ஸ்ஸ, அக்³க³ம் பு³த்³தே⁴ன வண்ணிதம்;

தஸ்மா ஹி பண்டி³தோ போஸோ, ஸம்பஸ்ஸம் அத்த²மத்தனோ.

‘‘விஹாரே காரயே ரம்மே, வாஸயேத்த² ப³ஹுஸ்ஸுதே;

தேஸம் அன்னஞ்ச பானஞ்ச, வத்த²ஸேனாஸனானி ச.

‘‘த³தே³ய்ய உஜுபூ⁴தேஸு, விப்பஸன்னேன சேதஸா;

தே தஸ்ஸ த⁴ம்மம் தே³ஸேந்தி, ஸப்³ப³து³க்கா²பனூத³னம்;

யம் ஸோ த⁴ம்மம் இத⁴ஞ்ஞாய, பரினிப்³பா³தி அனாஸவோ’’தி. (சூளவ. 295) –

ஏவம் ‘‘அயம்பி ஆவாஸே ஆனிஸம்ஸோ, அயம்பி ஆவாஸே ஆனிஸம்ஸோ’’தி ப³ஹுதே³வ ரத்திம் அதிரேகதரம் தி³யட்³ட⁴யாமம் ஆவாஸானிஸம்ஸகத²ம் கதே²ஸி. தத்த² இமா தாவ கா³தா²வ ஸங்க³ஹம் ஆருள்ஹா, பகிண்ணகத⁴ம்மதே³ஸனா பன ஸங்க³ஹம் நாரோஹதி. ஸந்த³ஸ்ஸேத்வாதிஆதீ³னி வுத்தத்தா²னேவ.

அபி⁴க்கந்தாதி அதிக்கந்தா த்³வே யாமா க³தா. யஸ்ஸ தா³னி காலம் மஞ்ஞதா²தி யஸ்ஸ தும்ஹே க³மனஸ்ஸ காலம் மஞ்ஞத², க³மனகாலோ தும்ஹாகம், க³ச்ச²தா²தி வுத்தம் ஹோதி. கஸ்மா பன ப⁴க³வா தே உய்யோஜேஸீதி? அனுகம்பாய. ஸுகு²மாலா ஹி தே, தியாமரத்திம் நிஸீதி³த்வா வீதினாமேந்தானம் ஸரீரே ஆபா³தோ⁴ உப்பஜ்ஜேய்ய. பி⁴க்கு²ஸங்கோ⁴பி மஹா, தஸ்ஸ டா²னனிஸஜ்ஜானம் ஓகாஸோ லத்³து⁴ம் வட்டதீதி உப⁴யானுகம்பாய உய்யோஜேஸி.

விக³ததி²னமித்³தோ⁴தி தத்ர கிர பி⁴க்கூ² யாமத்³வயம் டி²தாபி நிஸின்னாபி அசாலயிம்ஸு, பச்சி²மயாமே பன ஆஹாரோ பரிணமதி, தஸ்ஸ பரிணதத்தா பி⁴க்கு²ஸங்கோ⁴ விக³ததி²னமித்³தோ⁴ ஜாதோதி அகாரணமேதம். பு³த்³தா⁴னஞ்ஹி கத²ம் ஸுணந்தஸ்ஸ காயிகசேதஸிகத³ரதா² ந ஹோந்தி, காயசித்தலஹுதாத³யோ உப்பஜ்ஜந்தி, தேன தேஸம் த்³வே யாமே டி²தானம்பி நிஸின்னானம்பி த⁴ம்மம் ஸுணந்தானம் தி²னமித்³த⁴ம் விக³தம், பச்சி²மயாமேபி ஸம்பத்தே ததா² விக³தமேவ ஜாதம். தேனாஹ ‘‘விக³ததி²னமித்³தோ⁴’’தி.

பிட்டி² மே ஆகி³லாயதீதி கஸ்மா ஆகி³லாயதி? ப⁴க³வதோ ஹி ச²ப்³ப³ஸ்ஸானி மஹாபதா⁴னம் பத³ஹந்தஸ்ஸ மஹந்தம் காயது³க்க²ம் அஹோஸி, அத²ஸ்ஸ அபரபா⁴கே³ மஹல்லககாலே பிட்டி²வாதோ உப்பஜ்ஜீதி. அகாரணம் வா ஏதம். பஹோதி ஹி ப⁴க³வா உப்பன்னம் வேத³னம் விக்க²ம்பே⁴த்வா ஏகம்பி த்³வேபி ஸத்தாஹானி ஏகபல்லங்கேன நிஸீதி³தும். ஸந்தா²கா³ரஸாலம் பன சதூஹி இரியாபதே²ஹி பரிபு⁴ஞ்ஜிதுகாமோ அஹோஸி. தத்த² பாத³தோ⁴வனட்டா²னதோ யாவ த⁴ம்மாஸனா அக³மாஸி, ஏத்தகே டா²னே க³மனம் நிப்ப²ன்னம். த⁴ம்மாஸனம் பத்தம் தோ²கம் ட²த்வா நிஸீதி³, ஏத்தகே டா²னே டா²னம் நிப்ப²ன்னம். த்³வேயாமம் த⁴ம்மாஸனே நிஸீதி³, ஏத்தகே டா²னே நிஸஜ்ஜா நிப்ப²ன்னா. இதா³னி த³க்கி²ணேன பஸ்ஸேன தோ²கம் நிபன்னே ஸயனம் நிப்ப²ஜ்ஜிஸ்ஸதீதி ஏவம் சதூஹி இரியாபதே²ஹி பரிபு⁴ஞ்ஜிதுகாமோ அஹோஸி. உபாதி³ன்னகஸரீரஞ்ச நாம ‘‘நோ ஆகி³லாயதீ’’தி ந வத்தப்³ப³ம், தஸ்மா சிரனிஸஜ்ஜாய ஸஞ்ஜாதம் அப்பகம்பி ஆகி³லாயனம் க³ஹேத்வா ஏவமாஹ.

ஸங்கா⁴டிம் பஞ்ஞாபேத்வாதி ஸந்தா²கா³ரஸ்ஸ கிர ஏகபஸ்ஸே தே ராஜானோ படஸாணிம் பரிக்கி²பாபேத்வா கப்பியமஞ்சகம் பஞ்ஞாபேத்வா கப்பியபச்சத்த²ரணேன அத்த²ரித்வா உபரி ஸுவண்ணதாரகக³ந்த⁴மாலாதி³தா³மபடிமண்டி³தம் விதானம் ப³ந்தி⁴த்வா க³ந்த⁴தேலப்பதீ³பம் ஆரோபயிம்ஸு, ‘‘அப்பேவ நாம ஸத்தா² த⁴ம்மாஸனதோ வுட்டா²ய தோ²கம் விஸ்ஸமந்தோ இத⁴ நிபஜ்ஜேய்ய, ஏவம் நோ இமம் ஸந்தா²கா³ரம் ப⁴க³வதா சதூஹி இரியாபதே²ஹி பரிபு⁴த்தம் தீ³க⁴ரத்தம் ஹிதாய ஸுகா²ய ப⁴விஸ்ஸதீ’’தி. ஸத்தா²பி ததே³வ ஸந்தா⁴ய தத்த² ஸங்கா⁴டிம் பஞ்ஞாபேத்வா நிபஜ்ஜி. உட்டா²னஸஞ்ஞம் மனஸி கரித்வாதி ‘‘ஏத்தகம் காலம் அதிக்கமித்வா வுட்ட²ஹிஸ்ஸாமீ’’தி வுட்டா²னஸஞ்ஞம் சித்தே ட²பேத்வா, தஞ்ச கோ² அனித்³தா³யந்தோவ தே²ரஸ்ஸ த⁴ம்மகத²ம் ஸுணமானோ.

அவஸ்ஸுதபரியாயந்தி அவஸ்ஸுதஸ்ஸ பரியாயம், அவஸ்ஸுதஸ்ஸ காரணந்தி அத்தோ². அதி⁴முச்சதீதி கிலேஸாதி⁴முச்சனேன அதி⁴முச்சதி, கி³த்³தோ⁴ ஹோதி. ப்³யாபஜ்ஜதீதி ப்³யாபாத³வஸேன பூதிசித்தோ ஹோதி. சக்கு²தோதி சக்கு²பா⁴வேன. மாரோதி கிலேஸமாரோபி தே³வபுத்தமாரோபி. ஓதாரந்தி விவரம். ஆரம்மணந்தி பச்சயம். நளாகா³ரதிணாகா³ரம் விய ஹி ஸவிஸேவனானி ஆயதனானி, திணுக்கா விய கிலேஸுப்பத்திரஹம் ஆரம்மணம், திணுக்காய ட²பிதட²பிதட்டா²னே அங்கா³ரஸ்ஸுஜ்ஜலனம் விய ஆரம்மணே ஆபாத²மாக³தே கிலேஸானம் உப்பத்தி. தேன வுத்தம் லபே⁴த² மாரோ ஓதாரந்தி.

ஸுக்கபக்கே² ப³ஹலமத்திகபிண்டா³வலேபனம் கூடாகா³ரம் விய நிப்³பி³ஸேவனானி ஆயதனானி, திணுக்கா விய வுத்தபகாராரம்மணம், திணுக்காய ட²பிதட²பிதட்டா²னே நிப்³பா³பனம் விய நிப்³பி³ஸேவனானம் ஆயதனானம் ஆரம்மணே ஆபாத²மாக³தே கிலேஸபரிளாஹஸ்ஸ அனுப்பத்தி. தேன வுத்தம் நேவ லபே⁴த² மாரோ ஓதாரந்தி.