7. து³க்க²த⁴ம்மஸுத்தவண்ணனா

244. ஸத்தமே து³க்க²த⁴ம்மானந்தி து³க்க²ஸம்ப⁴வத⁴ம்மானம். பஞ்சஸு ஹி க²ந்தே⁴ஸு ஸதி சே²த³னவத⁴ப³ந்த⁴னாதி³பே⁴த³ம் து³க்க²ம் ஸம்ப⁴வதி, தஸ்மா தே து³க்க²ஸம்ப⁴வத⁴ம்மத்தா து³க்க²த⁴ம்மாதி வுச்சந்தி. ததா² கோ² பனஸ்ஸாதி தேனாகாரேனஸ்ஸ. யதா²ஸ்ஸ காமே பஸ்ஸதோதி யேனாகாரேனஸ்ஸ காமே பஸ்ஸந்தஸ்ஸ. யதா² சரந்தந்தி யேனாகாரேன சாரஞ்ச விஹாரஞ்ச அனுப³ந்தி⁴த்வா சரந்தம். அங்கா³ரகாஸூபமா காமா தி³ட்டா² ஹோந்தீதி பரியேட்டி²மூலகஸ்ஸ சேவ படிஸந்தி⁴மூலகஸ்ஸ ச து³க்க²ஸ்ஸ வஸேன அங்கா³ரகாஸு விய மஹாபரிளாஹாதி தி³ட்டா² ஹோந்தி. காமே பரியேஸந்தானஞ்ஹி நாவாய மஹாஸமுத்³தோ³கா³ஹனஅஜபத²ஸங்குபத²படிபஜ்ஜனஉப⁴தோப்³யூள்ஹஸங்கா³மபக்க²ந்த³னாதி³வஸேன பரியேட்டி²மூலகம்பி, காமே பரிபு⁴ஞ்ஜந்தானம் காமபரிபோ⁴க³சேதனாய சதூஸு அபாயேஸு தி³ன்னபடிஸந்தி⁴மூலகம்பி மஹாபரிளாஹது³க்க²ம் உப்பஜ்ஜதி. ஏவமேதஸ்ஸ து³வித⁴ஸ்ஸாபி து³க்க²ஸ்ஸ வஸேன அங்கா³ரகாஸு விய மஹாபரிளாஹாதி தி³ட்டா² ஹோந்தி.

தா³யந்தி அடவிம். புரதோபி கண்டகோதி புரிமபஸ்ஸே விஜ்ஜி²துகாமோ விய ஆஸன்னட்டா²னேயேவ டி²தகண்டகோ. பச்ச²தோதிஆதீ³ஸுபி ஏஸேவ நயோ. ஹேட்டா² பன பாதே³ஹி அக்கந்தட்டா²னஸ்ஸ ஸந்திகே, ந அக்கந்தட்டா²னேயேவ. ஏவம் ஸோ கண்டகக³ப்³ப⁴ம் பவிட்டோ² விய ப⁴வேய்ய. மா மம் கண்டகோதி மா மம் கண்டகோ விஜ்ஜீ²தி கண்டகவேத⁴ம் ரக்க²மானோ.

த³ந்தோ⁴, பி⁴க்க²வே, ஸதுப்பாதோ³தி ஸதியா உப்பாதோ³யேவ த³ந்தோ⁴, உப்பன்னமத்தாய பன தாய காசி கிலேஸா நிக்³க³ஹிதாவ ஹோந்தி, ந ஸண்டா²தும் ஸக்கோந்தி. சக்கு²த்³வாரஸ்மிஞ்ஹி ராகா³தீ³ஸு உப்பன்னேஸு து³தியஜவனவாரேன ‘‘கிலேஸா மே உப்பன்னா’’தி ஞத்வா ததியே ஜவனவாரே ஸம்வரஜவனம்யேவ ஜவதி. அனச்ச²ரியஞ்சேதம், யம் விபஸ்ஸகோ ததியஜவனவாரே கிலேஸே நிக்³க³ண்ஹேய்ய. சக்கு²த்³வாரே பன இட்டா²ரம்மணே ஆபாத²க³தே ப⁴வங்க³ம் ஆவட்டேத்வா ஆவஜ்ஜனாதீ³ஸு உப்பன்னேஸு வோட்ட²ப்³ப³னானந்தரம் ஸம்பத்தகிலேஸஜவனவாரம் நிவத்தேத்வா குஸலமேவ உப்பாதே³தி. ஆரத்³த⁴விபஸ்ஸகானஞ்ஹி அயமானிஸம்ஸோ பா⁴வனாபடிஸங்கா²னே பதிட்டி²தபா⁴வஸ்ஸ.

அபி⁴ஹட்டு²ம் பவாரேய்யுந்தி ஸுதி³ன்னத்தே²ரஸ்ஸ விய ரட்ட²பாலகுலபுத்தஸ்ஸ விய ச காயேன வா ஸத்த ரதனானி அபி⁴ஹரித்வா வாசாய வா ‘‘அம்ஹாகம் த⁴னதோ யத்தகம் இச்ச²ஸி, தத்தகம் க³ண்ஹா’’தி வத³ந்தா பவாரேய்யும். அனுத³ஹந்தீதி ஸரீரே பலிவேடி²தத்தா உண்ஹபரிளாஹம் ஜனேத்வா அனுத³ஹந்தி. ஸஞ்ஜாதஸேதே³ வா ஸரீரே லக்³க³ந்தா அனுஸேந்தீதிபி அத்தோ². யஞ்ஹி தம், பி⁴க்க²வே, சித்தந்தி இத³ம் யஸ்மா சித்தே அனாவட்டந்தே புக்³க³லஸ்ஸ ஆவட்டனம் நாம நத்தி². ஏவரூபஞ்ஹி சித்தம் அனாவட்டந்தி, தஸ்மா வுத்தம். இதி இமஸ்மிம் ஸுத்தே விபஸ்ஸனாப³லமேவ தீ³பிதம்.