12. லோககாமகு³ணவக்³கோ³

1-2. பட²மமாரபாஸஸுத்தாதி³வண்ணனா

114-115. லோககாமகு³ணவக்³க³ஸ்ஸ பட²மே ஆவாஸக³தோதி வஸனட்டா²னம் க³தோ. மாரஸ்ஸ வஸம் க³தோதி திவித⁴ஸ்ஸாபி மாரஸ்ஸ வஸம் க³தோ. படிமுக்க’ஸ்ஸ மாரபாஸோதி அஸ்ஸ கீ³வாய மாரபாஸோ படிமுக்கோ பவேஸிதோ. து³தியம் உத்தானமேவ.

3. லோகந்தக³மனஸுத்தவண்ணனா

116. ததியே லோகஸ்ஸாதி சக்கவாளலோகஸ்ஸ. லோகஸ்ஸ அந்தந்தி ஸங்கா²ரலோகஸ்ஸ அந்தம். விஹாரம் பாவிஸீதி ‘‘மயி விஹாரம் பவிட்டே² இமே பி⁴க்கூ², இமம் உத்³தே³ஸம் ஆனந்த³ம் புச்சி²ஸ்ஸந்தி, ஸோ ச தேஸம் மம ஸப்³ப³ஞ்ஞுதஞ்ஞாணேன ஸம்ஸந்தி³த்வா கதே²ஸ்ஸதி. ததோ நம் தோ²மேஸ்ஸாமி, மம தோ²மனம் ஸுத்வா பி⁴க்கூ² ஆனந்த³ம் உபஸங்கமிதப்³ப³ம், வசனஞ்சஸ்ஸ ஸோதப்³ப³ம் ஸத்³தா⁴தப்³ப³ம் மஞ்ஞிஸ்ஸந்தி, தம் நேஸம் ப⁴விஸ்ஸதி தீ³க⁴ரத்தம் ஹிதாய ஸுகா²யா’’தி சிந்தேத்வா ஸம்கி²த்தேன பா⁴ஸிதஸ்ஸ வித்தா²ரேன அத்த²ம் அவிப⁴ஜித்வாவ நிஸின்னாஸனே அந்தரஹிதோ க³ந்த⁴குடியம் பாதுரஹோஸி. தேன வுத்தம் ‘‘உட்டா²யாஸனா விஹாரம் பாவிஸீ’’தி.

ஸத்து² சேவ ஸம்வண்ணிதோதி ஸத்தா²ரா ச பஸத்தோ². விஞ்ஞூனந்தி இத³ம்பி கரணத்தே² ஸாமிவசனம், பண்டி³தேஹி ஸப்³ரஹ்மசாரீஹி ச ஸம்பா⁴விதோதி அத்தோ². பஹோதீதி ஸக்கோதி. அதிக்கம்மேவ மூலம் அதிக்கம்மேவ க²ந்த⁴ந்தி ஸாரோ நாம மூலே வா க²ந்தே⁴ வா ப⁴வேய்ய, தம்பி அதிக்கமித்வாதி அத்தோ². ஏவம்ஸம்பத³மித³ந்தி ஏவம்ஸம்பத்திகம், ஈதி³ஸந்தி அத்தோ². அதிஸித்வாதி அதிக்கமித்வா. ஜானம் ஜானாதீதி ஜானிதப்³ப³மேவ ஜானாதி. பஸ்ஸம் பஸ்ஸதீதி பஸ்ஸிதப்³ப³மேவ பஸ்ஸதி. யதா² வா ஏகச்சோ விபரீதம் க³ண்ஹந்தோ ஜானந்தோபி ந ஜானாதி, பஸ்ஸந்தோபி ந பஸ்ஸதி, ந ஏவம் ப⁴க³வா. ப⁴க³வா பன ஜானந்தோ ஜானாதி, பஸ்ஸந்தோ பஸ்ஸதியேவ. ஸ்வாயம் த³ஸ்ஸனபரிணாயகட்டே²ன சக்கு²பூ⁴தோ. விதி³தகரணட்டே²ன ஞாணபூ⁴தோ. அவிபரீதஸபா⁴வட்டே²ன பரியத்தித⁴ம்மபவத்தனதோ வா ஹத³யேன சிந்தேத்வா வாசாய நிச்சா²ரிதத⁴ம்மமயோதி த⁴ம்மபூ⁴தோ. ஸேட்ட²ட்டே²ன ப்³ரஹ்மபூ⁴தோ. அத² வா சக்கு² விய பூ⁴தோதி சக்கு²பூ⁴தோ. ஏவமேதேஸு பதே³ஸு அத்தோ² வேதி³தப்³போ³. ஸ்வாயம் த⁴ம்மஸ்ஸ வத்தனதோ வத்தா. பவத்தனதோ பவத்தா. அத்த²ம் நீஹரித்வா நீஹரித்வா த³ஸ்ஸனஸமத்த²தாய அத்த²ஸ்ஸ நின்னேதா. அமதாதி⁴க³மாய படிபத்திம் தே³ஸேதீதி அமதஸ்ஸ தா³தா.

அக³ரும் கரித்வாதி புனப்புனம் யாசாபேந்தோபி ஹி க³ரும் கரோதி நாம. அத்தனோ ஸேக்க²படிஸம்பி⁴தா³ஞாணே ட²த்வா ஸினேருபாத³தோ வாலிகம் உத்³த⁴ரமானோ விய து³ப்³பி³ஞ்ஞேய்யம் கத்வா கதே²ந்தோபி க³ரும் கரோதியேவ நாம. ஏவம் அகத்வா அம்ஹே புனப்புனம் அயாசாபேத்வா ஸுவிஞ்ஞேய்யம்பி நோ கத்வா கதே²ஹீதி வுத்தம் ஹோதி.

யம் கோ² வோதி யம் கோ² தும்ஹாகம். சக்கு²னா கோ², ஆவுஸோ, லோகஸ்மிம் லோகஸஞ்ஞீ ஹோதி லோகமானீதி சக்கு²ஞ்ஹி லோகே அப்பஹீனதி³ட்டி² புது²ஜ்ஜனோ ஸத்தலோகவஸேன லோகோதி ஸஞ்ஜானாதி சேவ மஞ்ஞதி ச, ததா² சக்கவாளலோகவஸேன. ந ஹி அஞ்ஞத்ர சக்கா²தீ³ஹி த்³வாத³ஸாயதனேஹி தஸ்ஸ ஸா ஸஞ்ஞா வா மானோ வா உப்பஜ்ஜதி. தேன வுத்தம், ‘‘சக்கு²னா கோ², ஆவுஸோ, லோகஸ்மிம் லோகஸஞ்ஞீ ஹோதி லோகமானீ’’தி. இமஸ்ஸ ச லோகஸ்ஸ க³மனேன அந்தோ நாம ஞாதும் வா த³ட்டு²ம் வா பத்தும் வா ந ஸக்கா. லுஜ்ஜனட்டே²ன பன தஸ்ஸேவ சக்கா²தி³பே⁴த³ஸ்ஸ லோகஸ்ஸ நிப்³பா³னஸங்கா²தம் அந்தம் அப்பத்வா வட்டது³க்க²ஸ்ஸ அந்தகிரியா நாம நத்தீ²தி வேதி³தப்³பா³.

ஏவம் பஞ்ஹம் விஸ்ஸஜ்ஜேத்வா இதா³னி ‘‘ஸாவகேன பஞ்ஹோ கதி²தோதி மா நிக்கங்கா² அஹுவத்த², அயம் ப⁴க³வா ஸப்³ப³ஞ்ஞுதஞ்ஞாணதுலம் க³ஹேத்வா நிஸின்னோ. இச்ச²மானா தமேவ உபஸங்கமித்வா நிக்கங்கா² ஹோதா²’’தி உய்யோஜேந்தோ ஆகங்க²மானா பனாதிஆதி³மாஹ.

இமேஹி ஆகாரேஹீதி இமேஹி காரணேஹி சக்கவாளலோகஸ்ஸ அந்தாபா⁴வகாரணேஹி சேவ ஸங்கா²ரலோகஸ்ஸ அந்தாபத்திகாரணேஹி ச. இமேஹி பதே³ஹீதி இமேஹி அக்க²ரஸம்பிண்ட³னேஹி. ப்³யஞ்ஜனேஹீதி பாடியேக்கஅக்க²ரேஹி.

பண்டி³தோதி பண்டி³ச்சேன ஸமன்னாக³தோ. சதூஹி காரணேஹி பண்டி³தோ தா⁴துகுஸலோ ஆயதனகுஸலோ பச்சயாகாரகுஸலோ காரணாகாரணகுஸலோதி. மஹாபஞ்ஞோதி மஹந்தே அத்தே² மஹந்தே த⁴ம்மே மஹந்தா நிருத்தியோ மஹந்தானி படிபா⁴னானி படிக்³க³ண்ஹனஸமத்த²தாய மஹாபஞ்ஞாய ஸமன்னாக³தோ. யதா² தம் ஆனந்தே³னாதி யதா² ஆனந்தே³ன ப்³யாகதம், தம் ஸந்தா⁴ய வுத்தம். யதா² ஆனந்தே³ன தம் ப்³யாகதம், அஹம்பி தம் ஏவமேவ ப்³யாகரேய்யந்தி அத்தோ².

4. காமகு³ணஸுத்தவண்ணனா

117. சதுத்தே² யே மேதி யே மம. சேதஸோ ஸம்பு²ட்ட²புப்³பா³தி சித்தேன அனுபூ⁴தபுப்³பா³. தத்ர மே சித்தம் ப³ஹுலம் க³ச்ச²மானம் க³ச்சே²ய்யாதி தேஸு பாஸாத³த்தயதிவித⁴னாடகாதி³பே⁴த³ஸம்பத்திவஸேன அனுபூ⁴தபுப்³பே³ஸு பஞ்சஸு காமகு³ணேஸு ப³ஹூஸு வாரேஸு உப்பஜ்ஜமானம் உப்பஜ்ஜேய்யாதி தீ³பேதி. பச்சுப்பன்னேஸு வாதி இத⁴ பதா⁴னசரியகாலே ச²ப்³ப³ஸ்ஸானி ஸுபுப்பி²தவனஸண்ட³ஜாதானம் தி³ஜக³ணாதீ³னம் வஸேன தி³ட்ட²ஸுதாதி³பே⁴த³ம் மனோரமாரம்மணம் காமகு³ணம் கத்வா த³ஸ்ஸேந்தோ ‘‘ஏவரூபேஸு பச்சுப்பன்னேஸு வா ப³ஹுலம் உப்பஜ்ஜேய்யா’’தி த³ஸ்ஸேதி. அப்பம் வா அனாக³தேஸூதி அனாக³தே ‘‘மேத்தேய்யோ நாம பு³த்³தோ⁴ ப⁴விஸ்ஸதி, ஸங்கோ² நாம ராஜா, கேதுமதீ நாம ராஜதா⁴னீ’’திஆதி³வஸேன (தீ³. நி. 3.106) பரித்தகமேவ அனாக³தேஸு காமகு³ணேஸு உப்பஜ்ஜேய்யாதி த³ஸ்ஸேதி. தத்ர மே அத்தரூபேனாதி தத்ர மயா அத்தனோ ஹிதகாமஜாதிகேன. அப்பமாதோ³தி ஸாதச்சகிரியா பஞ்சஸு காமகு³ணேஸு சித்தஸ்ஸ அவோஸ்ஸக்³கோ³. ஸதீதி ஆரம்மணபரிக்³க³ஹிதஸதி. ஆரக்கோ²தி அயம் அப்பமாதோ³ ச ஸதி ச சேதஸோ ஆரக்கோ² கரணீயோ, ஏவம் மே அஹோஸீதி த³ஸ்ஸேதி, ஆரக்க²த்தா²ய இமே த்³வே த⁴ம்மா காதப்³பா³தி வுத்தம் ஹோதி.

தஸ்மாதிஹ, பி⁴க்க²வே, ஸே ஆயதனே வேதி³தப்³பே³தி யஸ்மா சேதஸோ ஆரக்க²த்தா²ய அப்பமாதோ³ ச ஸதி ச காதப்³பா³, யஸ்மா தஸ்மிம் ஆயதனே விதி³தே அப்பமாதே³ன வா ஸதியா வா காதப்³ப³ம் நத்தி², தஸ்மா ஸே ஆயதனே வேதி³தப்³பே³, தம் காரணம் ஜானிதப்³ப³ந்தி அத்தோ². ஸளாயதனனிரோத⁴ந்தி ஸளாயதனனிரோதோ⁴ வுச்சதி நிப்³பா³னம், தம் ஸந்தா⁴ய பா⁴ஸிதந்தி அத்தோ². நிப்³பா³னஸ்மிஞ்ஹி சக்கு²ஆதீ³னி சேவ நிருஜ்ஜ²ந்தி ரூபஸஞ்ஞாத³யோ ச நிருஜ்ஜ²ந்தீதி. ஸேஸம் வுத்தனயமேவ.

5-6. ஸக்கபஞ்ஹஸுத்தாதி³வண்ணனா

118-119. பஞ்சமே தி³ட்டே²வ த⁴ம்மேதி இமஸ்மிம்யேவ அத்தபா⁴வே. பரினிப்³பா³யந்தீதி கிலேஸபரினிப்³பா³னேன பரினிப்³பா³யந்தி. தன்னிஸ்ஸிதம் விஞ்ஞாணம் ஹோதீதி தண்ஹானிஸ்ஸிதம் கம்மவிஞ்ஞாணம் ஹோதி. தது³பாதா³னந்தி தம்க³ஹணம், தண்ஹாக³ஹணேன ஸஹக³தம் விஞ்ஞாணம் ஹோதீதி அத்தோ². ச²ட்ட²ம் உத்தானமேவ.

7. ஸாரிபுத்தஸத்³தி⁴விஹாரிகஸுத்தவண்ணனா

120. ஸத்தமே ஸந்தானேஸ்ஸதீதி க⁴டேஸ்ஸதி, யோக³விச்சே²த³மஸ்ஸ பாபுணிதும் ந த³ஸ்ஸதி.

8. ராஹுலோவாத³ஸுத்தவண்ணனா

121. அட்ட²மே விமுத்திபரிபாசனியாதி விமுத்திம் பரிபாசேந்தீதி விமுத்திபரிபாசனியா. த⁴ம்மாதி பன்னரஸ த⁴ம்மா, தே ஸத்³தி⁴ந்த்³ரியாதீ³னம் விஸுத்³தி⁴கரணவஸேன வேதி³தப்³பா³. வுத்தஞ்ஹேதம் –

‘‘அஸ்ஸத்³தே⁴ புக்³க³லே பரிவஜ்ஜயதோ, ஸத்³தே⁴ புக்³க³லே ஸேவதோ ப⁴ஜதோ பயிருபாஸதோ, பஸாத³னீயே ஸுத்தந்தே பச்சவேக்க²தோ, இமேஹி தீஹாகாரேஹி ஸத்³தி⁴ந்த்³ரியம் விஸுஜ்ஜ²தி. குஸீதே புக்³க³லே பரிவஜ்ஜயதோ, ஆரத்³த⁴வீரியே புக்³க³லே ஸேவதோ ப⁴ஜதோ பயிருபாஸதோ, ஸம்மப்பதா⁴னே பச்சவேக்க²தோ, இமேஹி தீஹாகாரேஹி வீரியிந்த்³ரியம் விஸுஜ்ஜ²தி. முட்ட²ஸ்ஸதீ புக்³க³லே பரிவஜ்ஜயதோ, உபட்டி²தஸ்ஸதீ புக்³க³லே ஸேவதோ ப⁴ஜதோ பயிருபாஸதோ, ஸதிபட்டா²னே பச்சவேக்க²தோ, இமேஹி தீஹாகாரேஹி ஸதிந்த்³ரியம் விஸுஜ்ஜ²தி. அஸமாஹிதே புக்³க³லே பரிவஜ்ஜயதோ, ஸமாஹிதே புக்³க³லே ஸேவதோ ப⁴ஜதோ பயிருபாஸதோ, ஜா²னவிமோக்கே² பச்சவேக்க²தோ, இமேஹி தீஹாகாரேஹி ஸமாதி⁴ந்த்³ரியம் விஸுஜ்ஜ²தி. து³ப்பஞ்ஞே புக்³க³லே பரிவஜ்ஜயதோ, பஞ்ஞவந்தே புக்³க³லே ஸேவதோ ப⁴ஜதோ பயிருபாஸதோ, க³ம்பீ⁴ரஞாணசரியம் பச்சவேக்க²தோ, இமேஹி தீஹாகாரேஹி பஞ்ஞிந்த்³ரியம் விஸுஜ்ஜ²தி. இதி இமே பஞ்ச புக்³க³லே பரிவஜ்ஜயதோ, பஞ்ச புக்³க³லே ஸேவதோ ப⁴ஜதோ பயிருபாஸதோ, பஞ்ச ஸுத்தந்தே பச்சவேக்க²தோ, இமேஹி பன்னரஸஹி ஆகாரேஹி இமானி பஞ்சிந்த்³ரியானி விஸுஜ்ஜ²ந்தீ’’தி (படி. ம. 1.184).

அபரேபி பன்னரஸ த⁴ம்மா விமுத்திபரிபாசனியா – ஸத்³தா⁴பஞ்சமானி இந்த்³ரியானி, அனிச்சஸஞ்ஞா, அனிச்சே து³க்க²ஸஞ்ஞா, து³க்கே² அனத்தஸஞ்ஞா, பஹானஸஞ்ஞா, விராக³ஸஞ்ஞாதி இமா பஞ்ச நிப்³பே³த⁴பா⁴கி³யா ஸஞ்ஞா, மேகி⁴யத்தே²ரஸ்ஸ கதி²தா கல்யாணமித்ததாத³யோ பஞ்ச த⁴ம்மாதி (உதா³. 31). காய பன வேலாய ப⁴க³வதோ ஏதத³ஹோஸீதி? பச்சூஸஸமயே லோகம் வோலோகேந்தஸ்ஸ.

அனேகானி தே³வதாஸஹஸ்ஸானீதி ஆயஸ்மதா ராஹுலேன பது³முத்தரஸ்ஸ ப⁴க³வதோ பாத³மூலே பாலிதனாக³ராஜகாலே பத்த²னம் பட்ட²பேந்தேன ஸத்³தி⁴ம் பத்த²னம் பட்ட²பிததே³வதாஸு பன காசி பூ⁴மட்ட²கா தே³வதா, காசி அந்தலிக்க²ட்ட²கா, காசி சாதுமஹாராஜிகா, காசி தே³வலோகே, காசி ப்³ரஹ்மலோகே நிப்³ப³த்தா. இமஸ்மிம் பன தி³வஸே ஸப்³பா³பி தா ஏகட்டா²னே அந்த⁴வனஸ்மிம்யேவ ஸன்னிபதிதா, தா ஸந்தா⁴யாஹ – ‘‘அனேகானி தே³வதாஸஹஸ்ஸானீ’’தி. த⁴ம்மசக்கு²ந்தி இமஸ்மிம் ஸுத்தே சத்தாரோ ச மக்³கா³ சத்தாரி ச ப²லானி த⁴ம்மசக்கு²ந்தி வேதி³தப்³பா³னி. தத்த² ஹி காசி தே³வதா ஸோதாபன்னா அஹேஸும், காசி ஸகதா³கா³மீ, அனாகா³மீ, கீ²ணாஸவா. தாஸஞ்ச பன தே³வதானம் ஏத்தகாதி க³ணனவஸேன பரிச்சே²தோ³ நத்தி². ஸேஸம் ஸப்³ப³த்த² உத்தானமேவ.

9-10. ஸம்யோஜனியத⁴ம்மஸுத்தாதி³வண்ணனா

122-123. நவமத³ஸமானி இட்டா²ரம்மணவஸேன கதி²யமானே பு³ஜ்ஜ²னகானம் வஸேன வுத்தானீதி.

லோககாமகு³ணவக்³கோ³ த்³வாத³ஸமோ.