13. க³ஹபதிவக்³கோ³

1-3. வேஸாலீஸுத்தாதி³வண்ணனா

124-126. க³ஹபதிவக்³க³ஸ்ஸ பட²மே உக்³கோ³தி பணீததா³யகானம் அக்³க³உக்³கோ³, ஸோ ப⁴க³வதா ‘‘ஏதத³க்³க³ம், பி⁴க்க²வே, மம ஸாவகானம் பணீததா³யகானம் யதி³த³ம் உக்³கோ³ க³ஹபதீ’’தி ஏவம் ஏதத³க்³கே³ ட²பிதோ. ஸேஸமேதேஸு சேவ த்³வீஸு, ததியே ச வுத்தத்த²மேவ.

4-5. பா⁴ரத்³வாஜஸுத்தாதி³வண்ணனா

127-128. சதுத்தே² பிண்ட³ம் உலமானோ பரியேஸமானோ பப்³ப³ஜிதோதி பிண்டோ³லோ. ஸோ கிர பரிஜிண்ணபோ⁴கோ³ ப்³ராஹ்மணோ அஹோஸி. அத² பி⁴க்கு²ஸங்க⁴ஸ்ஸ லாப⁴ஸக்காரம் தி³ஸ்வா பிண்ட³த்தா²ய நிக்க²மித்வா பப்³ப³ஜிதோ. ஸோ மஹந்தம் கபல்லபத்தம் க³ஹேத்வா சரதி, தேன கபல்லபூரம் யாகு³ம் பிவதி, கபல்லபூரே பூவே கா²த³தி, கபல்லபூரம் ப⁴த்தம் பு⁴ஞ்ஜதி. அத²ஸ்ஸ மஹக்³க⁴ஸபா⁴வம் ஸத்து² ஆரோசயிம்ஸு. ஸத்தா² தஸ்ஸ பத்தத்த²விகம் நானுஜானி. ஹேட்டா²மஞ்சே பத்தம் நிக்குஜ்ஜித்வா ட²பேதி. ஸோ ட²பேந்தோபி க⁴ம்ஸந்தோவ பணாமேத்வா ட²பேதி, க³ண்ஹந்தோபி க⁴ம்ஸந்தோவ ஆகட்³டி⁴த்வா க³ண்ஹாதி. தம் க³ச்ச²ந்தே காலே த⁴ம்ஸனேன பரிக்கீ²ணம் நாளிகோத³னமத்தமேவ க³ண்ஹனகம் ஜாதம். ததோ ஸத்து² ஆரோசேஸும், அத²ஸ்ஸ ஸத்தா² பத்தத்த²விகம் அனுஜானி. தே²ரோ அபரேன ஸமயேன இந்த்³ரியபா⁴வனம் பா⁴வேத்வா அக்³க³ப²லே அரஹத்தே பதிட்டா²ஸி. இதி ஸோ பிண்ட³த்தா²ய பப்³ப³ஜிதத்தா பிண்டோ³லோ, கோ³த்தேன பன பா⁴ரத்³வாஜோதி உப⁴யம் ஏகதோ கத்வா பிண்டோ³லபா⁴ரத்³வாஜோதி வுச்சதி.

உபஸங்கமீதி உக்³க³துக்³க³தேஹி மஹாஅமச்சேஹி பரிவுதோ உபஸங்கமி. தே²ரோ கிர ஏகதி³வஸம் ஸாவத்தி²யம் பிண்டா³ய சரித்வா கதப⁴த்தகிச்சோ நிதா³க⁴ஸமயே ஸீதடா²னே தி³வாவிஹாரம் நிஸீதி³ஸ்ஸாமீதி ஆகாஸேன க³ந்த்வா க³ங்கா³தீரே உதே³னஸ்ஸ ரஞ்ஞோ உத³பானம் நாம உய்யானம் அத்தி², தத்த² பவிஸித்வா அஞ்ஞதரஸ்மிம் ருக்க²மூலே தி³வாவிஹாரம் நிஸீதி³ ஸீதேன உத³கவாதேன பீ³ஜியமானோ.

உதே³னோபி கோ² நாம ராஜா ஸத்தாஹம் மஹாபானம் பிவித்வா ஸத்தமே தி³வஸே உய்யானம் படிஜக்³கா³பேத்வா மஹாஜனபரிவாரோ உய்யானம் க³ந்த்வா மங்க³லஸிலாபட்டே அத்த²தாய ஸேய்யாய நிபஜ்ஜி. தஸ்ஸ ஏகா பரிசாரிகா பாதே³ ஸம்பா³ஹமானா நிஸின்னா. ராஜா கமேன நித்³த³ம் ஓக்கமி. தஸ்மிம் நித்³த³ம் ஓக்கந்தே நாடகித்தி²யோ ‘‘யஸ்ஸத்தா²ய மயம் கீ³தாதீ³னி பயோஜேய்யாம, ஸோ நித்³த³ம் உபக³தோ, ந ச நித்³தா³காலே மஹாஸத்³த³ம் காதும் வட்டதீ’’தி அத்தனோ அத்தனோ தூரியானி ட²பேத்வா உய்யானம் பக்கந்தா. தா தத்த² தத்த² ப²லாப²லானி கா²த³மானா புப்பா²னி பிளந்த⁴மானா விசரந்தியோ தே²ரம் தி³ஸ்வா ‘‘மா ஸத்³த³ம் கரித்தா²’’தி அஞ்ஞமஞ்ஞம் நிவாரயமானா வந்தி³த்வா நிஸீதி³ம்ஸு. தே²ரோ ‘‘இஸ்ஸா பஹாதப்³பா³, மச்சே²ரம் வினோதே³தப்³ப³’’ந்திஆதி³னா நயேன தாஸம் அனுரூபம் த⁴ம்மகத²ம் கதே²ஸி.

ஸாபி கோ² ரஞ்ஞோ பாதே³ ஸம்பா³ஹமானா நிஸின்னா இத்தீ² பாதே³ சாலேத்வா ராஜானம் பபோ³தே⁴ஸி. ஸோ ‘‘கஹம் தா க³தா’’தி புச்சி². கிம் தாஸம் தும்ஹேஹி? தா ஏகம் ஸமணம் பரிவாரேத்வா நிஸின்னாதி. ராஜா குத்³தோ⁴ உத்³த⁴னே பக்கி²த்தலோணம் விய தடதடாயமானோ உட்ட²ஹித்வா ‘‘தம்ப³கிபில்லிகாஹி நம் கா²தா³பேஸ்ஸாமீ’’தி க³ச்ச²ந்தோ ஏகஸ்மிம் அஸோகருக்கே² தம்ப³கிபில்லிகானம் புடம் தி³ஸ்வா ஹத்தே²னாகட்³டி⁴த்வா ஸாக²ம் க³ண்ஹிதும் நாஸக்கி². கிபில்லிகபுடோ சி²ஜ்ஜித்வா ரஞ்ஞோ ஸீஸே பதி, ஸகலஸரீரம் ஸாலிது²ஸேஹி பரிகிண்ணம் விய த³ண்ட³தீ³பிகாஹி ட³ய்ஹமானம் விய ச அஹோஸி. தே²ரோ ரஞ்ஞோ பது³ட்ட²பா⁴வம் ஞத்வா இத்³தி⁴யா ஆகாஸம் பக்க²ந்தி³. தாபி இத்தி²யோ உட்டா²ய ரஞ்ஞோ ஸந்திகம் க³ந்த்வா ஸரீரம் புஞ்ச²ந்தியோ விய பூ⁴மியம் பதிதபதிதா கிபில்லிகாயோ க³ஹேத்வா ஸரீரே கி²பமானா ஸப்³பா³ முக²ஸத்தீஹி விஜ்ஜி²ம்ஸு – ‘‘கிம் நாமேதம், அஞ்ஞே ராஜானோ பப்³ப³ஜிதே தி³ஸ்வா வந்த³ந்தி, பஞ்ஹம் புச்ச²ந்தி, அயம் பன ராஜா கிபில்லிகபுடம் ஸீஸே பி⁴ந்தி³துகாமோ ஜாதோ’’தி.

ராஜா அத்தனோ அபராத⁴ம் தி³ஸ்வா உய்யானபாலம் பக்கோஸாபேத்வா புச்சி² – ‘‘கிம் ஏஸ பப்³ப³ஜிதோ? அஞ்ஞேஸுபி தி³வஸேஸு இத⁴ ஆக³ச்ச²தீ’’தி? ஆம, தே³வாதி. இத⁴ த்வம் ஆக³ததி³வஸே மய்ஹம் ஆரோசேய்யாஸீதி. தே²ரோபி கதிபாஹேனேவ புன ஆக³ந்த்வா ருக்க²மூலே நிஸீதி³. உய்யானபாலோ தி³ஸ்வா – ‘‘மஹந்தோ மே அயம் பண்ணாகாரோ’’தி வேகே³ன க³ந்த்வா ரஞ்ஞோ ஆரோசேஸி. ராஜா உட்ட²ஹித்வா ஸங்க²பணவாதி³ஸத்³த³ம் நிவாரேத்வா உக்³க³துக்³க³தேஹி அமச்சேஹி ஸத்³தி⁴ம் உய்யானம் அக³மாஸி. தேன வுத்தம் ‘‘உபஸங்கமீ’’தி.

அனிகீளிதாவினோ காமேஸூதி யா காமேஸு காமகீளா, தம் அகீளிதபுப்³பா³, அபரிபு⁴த்தகாமாதி அத்தோ². அத்³தா⁴னஞ்ச ஆபாதே³ந்தீதி பவேணிம் படிபாதே³ந்தி, தீ³க⁴ரத்தம் அனுப³ந்தா⁴பேந்தி. மாதுமத்தீஸூதி மாதுபமாணாஸு. லோகஸ்மிஞ்ஹி மாதா ப⁴கி³னீ தீ⁴தாதி இத³ம் திவித⁴ம் க³ருகாரம்மணம் நாம, இதி க³ருகாரம்மணே உபனிப³ந்த⁴ம் சித்தம் விமோசேதும் ந லப⁴தீதி த³ஸ்ஸேந்தோ ஏவமாஹ. அத²ஸ்ஸ தேன பஞ்ஹேன சித்தம் அனோதரந்தம் தி³ஸ்வா ப⁴க³வதா படிகூலமனஸிகாரவஸேன சித்தூபனிப³ந்த⁴னத்த²ம் வுத்தம் த்³வத்திம்ஸாகாரகம்மட்டா²னம் கதே²ஸி.

அபா⁴விதகாயாதி அபா⁴விதபஞ்சத்³வாரிககாயா. தேஸம் தம் து³க்கரம் ஹோதீதி தேஸம் தம் அஸுப⁴கம்மட்டா²னம் பா⁴வேதும் து³க்கரம் ஹோதி. இதிஸ்ஸ இமினாபி சித்தம் அனோதரந்தம் தி³ஸ்வா இந்த்³ரியஸம்வரஸீலம் கதே²ஸி. இந்த்³ரியஸம்வரஸ்மிஞ்ஹி உபனிப³ந்த⁴சித்தம் விஹேடே²தும் ந லப⁴தி. ராஜா தம் ஸுத்வா தத்த² ஓதிண்ணசித்தோ அச்ச²ரியம், போ⁴ பா⁴ரத்³வாஜாதிஆதி³மாஹ.

அரக்கி²தேனேவ காயேனாதிஆதீ³ஸு ஹத்த²பாதே³ கீளாபேந்தோ கீ³வம் பரிவத்தேந்தோ காயம் ந ரக்க²தி நாம, நானப்பகாரம் து³ட்டு²ல்லம் கதே²ந்தோ வசனம் ந ரக்க²தி நாம, காமவிதக்காத³யோ விதக்கேந்தோ சித்தம் ந ரக்க²தி நாம. ரக்கி²தேனேவ காயேனாதிஆதீ³ஸு வுத்தவிபரியாயேன அத்தோ² வேதி³தப்³போ³.

அதிவிய மம் தஸ்மிம் ஸமயே லோப⁴த⁴ம்மா பரிஸஹந்தீதி மம் தஸ்மிம் ஸமயே அதிக்கமித்வா லோபோ⁴ அதி⁴ப⁴வதீதி அத்தோ². உபட்டி²தாய ஸதியாதி காயக³தாய ஸதியா ஸுபட்டி²தாய. ந மம் ததா² தஸ்மிம் ஸமயேதி தஸ்மிம் ஸமயே மம் யதா² புப்³பே³, ந ததா² லோபோ⁴ அதிக்கமித்வா உப்பஜ்ஜதீதி அத்தோ². பரிஸஹந்தீதி பத³ஸ்ஸ உப்பஜ்ஜந்தீதிபி அத்தோ²யேவ. இதி இமஸ்மிம் ஸுத்தே தயோ காயா கதி²தா. கத²ம்? ‘‘இமமேவ காய’’ந்தி ஏத்த² ஹி கரஜகாயோ கதி²தோ, ‘‘பா⁴விதகாயோ’’தி ஏத்த² பஞ்சத்³வாரிககாயோ, ‘‘ரக்கி²தேனேவ காயேனா’’தி ஏத்த² சோபனகாயோ, காயவிஞ்ஞத்தீதி அத்தோ². பஞ்சமம் உத்தானமேவ.

6. கோ⁴ஸிதஸுத்தவண்ணனா

129. ச²ட்டே² ரூபா ச மனாபாதி ரூபா ச மனாபா ஸம்விஜ்ஜந்தி. சக்கு²விஞ்ஞாணஞ்சாதி சக்கு²விஞ்ஞாணஞ்ச ஸம்விஜ்ஜதி. ஸுக²வேத³னியம் ப²ஸ்ஸந்தி சக்கு²விஞ்ஞாணஸம்பயுத்தம் உபனிஸ்ஸயவஸேன ஜவனகாலே ஸுக²வேத³னாய பச்சயபூ⁴தம் ப²ஸ்ஸம். ஸுகா² வேத³னாதி ஏகம் ப²ஸ்ஸம் படிச்ச ஜவனவஸேன ஸுக²வேத³னா உப்பஜ்ஜதி. ஸேஸபதே³ஸுபி ஏஸேவ நயோ.

இதி இமஸ்மிம் ஸுத்தே தேவீஸதி தா⁴துயோ கதி²தா. கத²ம்? ஏத்த² ஹி சக்கு²பஸாதோ³ சக்கு²தா⁴து, தஸ்ஸ ஆரம்மணம் ரூபதா⁴து, சக்கு²விஞ்ஞாணம் விஞ்ஞாணதா⁴து, சக்கு²விஞ்ஞாணதா⁴துயா ஸஹஜாதா தயோ க²ந்தா⁴ த⁴ம்மதா⁴து, ஏவம் பஞ்சஸு த்³வாரேஸு சதுன்னம் சதுன்னம் வஸேன வீஸதி. மனோத்³வாரே ‘‘மனோதா⁴தூ’’தி ஆவஜ்ஜனசித்தம் க³ஹிதம், ஆரம்மணஞ்சேவ ஹத³யவத்து² ச த⁴ம்மதா⁴து, வத்து²னிஸ்ஸிதம் மனோவிஞ்ஞாணதா⁴தூதி ஏவம் தேவீஸதி ஹோந்தி. ஏவம் தேவீஸதியா தா⁴தூனம் வஸேன தா⁴துனானத்தம் வுத்தம் ப⁴க³வதாதி த³ஸ்ஸேதி.

7-8. ஹாலித்³தி³கானிஸுத்தாதி³வண்ணனா

130-131. ஸத்தமே மனாபம் இத்தே²தந்தி பஜானாதீதி யம் அனேன மனாபம் ரூபம் தி³ட்ட²ம், தம் இத்தே²தந்தி ஏவமேதம் மனாபமேவ தந்தி பஜானாதி. சக்கு²விஞ்ஞாணம் ஸுக²வேத³னியஞ்ச ப²ஸ்ஸம் படிச்சாதி சக்கு²விஞ்ஞாணஞ்சேவ, யோ ச உபனிஸ்ஸயகோடியா வா அனந்தரகோடியா வா ஸமனந்தரகோடியா வா ஸம்பயுத்தகோடியா வா ஸுக²வேத³னாய பச்சயோ ப²ஸ்ஸோ, தம் ஸுக²வேத³னியம் ப²ஸ்ஸஞ்ச படிச்ச உப்பஜ்ஜதி ஸுக²வேத³னாதி. ஏஸ நயோ ஸப்³ப³த்த². இதி இமேஸு த்³வீஸு ஸுத்தேஸு கிரியாமனோவிஞ்ஞாணதா⁴து ஆவஜ்ஜனகிச்சா, மனோதா⁴துயேவ வா ஸமானா மனோதா⁴துனாமேன வுத்தாதி வேதி³தப்³பா³. அட்ட²மம் உத்தானமேவ.

9. லோஹிச்சஸுத்தவண்ணனா

132. நவமே மக்கரகதேதி ஏவம்னாமகே நக³ரே அரஞ்ஞகுடிகாயந்தி அரஞ்ஞே கதாய பாடியேக்காய குடியம், ந விஹாரபச்சந்தகுடியம். மாணவகாதி யேபி தத்த² மஹல்லகா, தே மஹல்லககாலேபி அந்தேவாஸிகதாய மாணவகாத்வேவ வுத்தா. தேனுபஸங்கமிம்ஸூதி பாதோ ஸிப்பம் உக்³க³ண்ஹித்வா ஸாயம் ‘‘ஆசரியஸ்ஸ கட்டா²னி ஆஹரிஸ்ஸாமா’’தி அரஞ்ஞம் பவிஸித்வா விசரந்தா யேன ஸா குடிகா, தேனுபஸங்கமிம்ஸு. பரிதோ பரிதோ குடிகாயாதி தஸ்ஸா குடிகாய ஸமந்ததோ ஸமந்ததோ. ஸேலேய்யகானீதி அஞ்ஞமஞ்ஞஸ்ஸ பிட்டி²ம் க³ஹேத்வா லங்கி⁴த்வா இதோ சிதோ சங்கமனகீளனானி.

முண்ட³காதிஆதீ³ஸு முண்டே³ முண்டா³தி, ஸமணே ச ஸமணாதி வத்தும் வட்டேய்ய, இமே பன ஹீளேந்தா ‘‘முண்ட³கா ஸமணகா’’தி ஆஹம்ஸு. இப்³பா⁴தி க³ஹபதிகா. கண்ஹாதி கண்ஹா, காளகாதி அத்தோ². ப³ந்து⁴பாதா³பச்சாதி ஏத்த² ப³ந்தூ⁴தி ப்³ரஹ்மா அதி⁴ப்பேதோ. தஞ்ஹி ப்³ராஹ்மணா பிதாமஹோதி வோஹரந்தி. பாதா³னம் அபச்சா பாதா³பச்சா, ப்³ரஹ்முனோ பிட்டி²பாத³தோ ஜாதாதி அதி⁴ப்பாயோ. தேஸம் கிர அயம் லத்³தி⁴ ‘‘ப்³ராஹ்மணா ப்³ரஹ்முனோ முக²தோ நிக்க²ந்தா, க²த்தியா உரதோ, வேஸ்ஸா நாபி⁴தோ, ஸுத்³தா³ ஜாணுதோ, ஸமணா பிட்டி²பாத³தோ’’தி. ப⁴ரதகானந்தி குடிம்பி³கானம். குடிம்பி³கா ஹி யஸ்மா ரட்ட²ம் ப⁴ரந்தி, தஸ்மா ப⁴ரதாதி வுச்சந்தி. இமே பன பரிப⁴வம் கத்வா வத³மானா ‘‘ப⁴ரதகான’’ந்தி ஆஹம்ஸு.

விஹாரா நிக்க²மித்வாதி ‘‘ரத்திட்ட²காபரிச்ச²ன்னே ரஜதபட்டஸன்னிப⁴ஸமவிப்பகிண்ணவாலிகே ரமணீயே பரிவேணே கட்ட²கலாபே ப³ந்தி⁴த்வா கி²பமானா வாலிகம் ஆலுளேத்வா, ஹத்தே²ன ஹத்த²ம் ஆதா³ய பண்ணகுடிம் பரியாயந்தா ‘இமே இமேஸம் ப⁴ரதகானம் ஸக்கதா, இமே இமேஸம் ப⁴ரதகானம் ஸக்கதா’தி புனப்புனம் விரவந்தா அதிவிய இமே மாணவகா கீளம் கரோந்தி, விஹாரே பி⁴க்கூ²னம் அத்தி²பா⁴வம்பி ந ஜானந்தி, த³ஸ்ஸேஸ்ஸாமி நேஸம் பி⁴க்கூ²னம் அத்தி²பா⁴வ’’ந்தி சிந்தேத்வா பண்ணகுடிதோ நிக்க²மி.

ஸீலுத்தமா புப்³ப³தரா அஹேஸுந்தி கு³ணவந்தானம் கு³ணே கதி²தே நிக்³கு³ணானம் கு³ணாபா⁴வோ பாகடோவ ப⁴விஸ்ஸதீதி போராணகப்³ராஹ்மணானம் கு³ணே கதே²ந்தோ ஏவமாஹ. தத்த² ஸீலுத்தமாதி ஸீலஜேட்ட²கா. ஸீலஞ்ஹி தேஸம் உத்தமம், ந ஜாதிகோ³த்தம். யே புராணம் ஸரந்தீதி யே போராணகம் ப்³ராஹ்மணத⁴ம்மம் ஸரந்தி. அபி⁴பு⁴ய்ய கோத⁴ந்தி கோத⁴ம் அபி⁴ப⁴வித்வா தேஸம் த்³வாரானி ஸுகு³த்தானி ஸுரக்கி²தானி அஹேஸும். த⁴ம்மே ச ஜா²னே ச ரதாதி த³ஸவிதே⁴ குஸலகம்மபத²த⁴ம்மே அட்ட²ஸமாபத்திஜா²னேஸு ச ரதா.

ஏவம் போராணானம் கு³ணம் கதே²த்வா அதே²தரஹி ப்³ராஹ்மணானம் மானம் நிம்மத்³தே³ந்தோ இமே ச வோக்கம்ம ஜபாமஸேதிஆதி³மாஹ. தத்த² வோக்கம்மாதி ஏதேஹி கு³ணேஹி அபக்கமித்வா. ஜபாமஸேதி மயம் ஜபாம ஸஜ்ஜா²யாமாதி ஏத்தகேனேவ ப்³ராஹ்மணம்ஹாதி மஞ்ஞமானா ப்³ராஹ்மணா மயந்தி இமினா கோ³த்தேன மத்தா ஹுத்வா விஸமம் சரந்தி, விஸமானி காயகம்மாதீ³னி கரோந்தீதி அத்தோ². புது²அத்தத³ண்டா³தி புது² அத்தா த³ண்டா³ ஏதேஹீதி புது²அத்தத³ண்டா³, க³ஹிதனானாவித⁴த³ண்டா³தி அத்தோ². ஸதண்ஹாதண்ஹேஸூதி ஸதண்ஹனித்தண்ஹேஸு. அகு³த்தத்³வாரஸ்ஸ ப⁴வந்தி மோகா⁴தி அஸம்வுதத்³வாரஸ்ஸ ஸப்³பே³பி வதஸமாதா³னா மோகா⁴ ப⁴வந்தீதி தீ³பேதி. யதா² கிந்தி? ஸுபினேவ லத்³த⁴ம் புரிஸஸ்ஸ வித்தந்தி யதா² ஸுபினே புரிஸஸ்ஸ லத்³த⁴ம் மணிமுத்தாதி³னானாவித⁴ம் வித்தம் மோக⁴ம் ஹோதி, பபு³ஜ்ஜி²த்வா கிஞ்சி ந பஸ்ஸதி, ஏவம் மோகா⁴ ப⁴வந்தீதி அத்தோ².

அனாஸகாதி ஏகாஹத்³வீஹாதி³வஸேன அனாஹாரகா. த²ண்டி³லஸாயிகா சாதி ஹரிதகுஸஸந்த²தே பூ⁴மிபா⁴கே³ ஸயனம், பாதோ ஸினானஞ்ச தயோ ச வேதா³தி பாதோவ உத³கம் பவிஸித்வா ந்ஹானஞ்சேவ தயோ ச வேதா³. க²ராஜினம் ஜடா பங்கோதி க²ரஸம்ப²ஸ்ஸம் அஜினசம்மஞ்சேவ ஜடாகலாபோ ச பங்கோ ச, பங்கோ நாம த³ந்தமலம். மந்தா ஸீலப்³ப³தம் தபோதி மந்தா ச அஜஸீலகோ³ஸீலஸங்கா²தம் ஸீலம் அஜவதகோ³வதஸங்கா²தம் வதஞ்ச. அயம் இதா³னி ப்³ராஹ்மணானம் தபோதி வத³தி. குஹனா வங்கத³ண்டா³ சாதி படிச்ச²ன்னகூபோ விய படிச்ச²ன்னதோ³ஸம் கோஹஞ்ஞஞ்சேவ வங்கத³ண்டோ³, ச உது³ம்ப³ரபலாஸபே³ளுவருக்கா²னம் அஞ்ஞதரதோ க³ஹிதம் வங்கத³ண்ட³ஞ்சாதி அத்தோ². உத³காசமனானி சாதி உத³கேன முக²பரிமஜ்ஜனானி. வண்ணா ஏதே ப்³ராஹ்மணானந்தி ஏதே ப்³ராஹ்மணானம் பரிக்கா²ரப⁴ண்ட³கவண்ணாதி த³ஸ்ஸேதி. கத கிஞ்சிக்க²பா⁴வனாதி கதா கிஞ்சிக்க²பா⁴வனா. அயமேவ வா பாடோ², ஆமிஸகிஞ்சிக்க²ஸ்ஸ வட்³ட⁴னத்தா²ய கதந்தி அத்தோ².

ஏவம் ஏதரஹி ப்³ராஹ்மணானம் மானம் நிம்மத்³தி³த்வா புன போராணகப்³ராஹ்மணானம் வண்ணம் கதே²ந்தோ சித்தஞ்ச ஸுஸமாஹிதந்திஆதி³மாஹ. தத்த² ஸுஸமாஹிதந்தி தேஸம் ப்³ராஹ்மணானம் சித்தம் உபசாரப்பனாஸமாதீ⁴ஹி ஸுஸமாஹிதம் அஹோஸீதி த³ஸ்ஸேதி. அகி²லந்தி முது³ அத²த்³த⁴ம். ஸோ மக்³கோ³ ப்³ரஹ்மபத்தியாதி ஸோ ஸேட்ட²பத்தியா மக்³கோ³, தும்ஹே பன கிம் ப்³ராஹ்மணா நாமாதி தீ³பேந்தோ ஏவமாஹ.

ஆக³மம்ஸு நு க்²விதா⁴தி ஆக³மம்ஸு நு கோ² இத⁴. அதி⁴முச்சதீதி கிலேஸவஸேன அதி⁴முத்தோ கி³த்³தோ⁴ ஹோதி. ப்³யாபஜ்ஜதீதி ப்³யாபாத³வஸேன பூதிசித்தம் ஹோதி. பரித்தசேதஸோதி அனுபட்டி²தஸதிதாய ஸம்கிலேஸசித்தேன பரித்தசித்தோ. சேதோவிமுத்திந்தி ப²லஸமாதி⁴ம். பஞ்ஞாவிமுத்திந்தி ப²லபஞ்ஞம். அப்பமாணசேதஸோதி உபட்டி²தஸதிதாய நிக்கிலேஸசித்தேன அப்பமாணசித்தோ.

10. வேரஹச்சானிஸுத்தவண்ணனா

133. த³ஸமே காமண்டா³யந்தி ஏவம்னாமகே நக³ரே. யக்³கே⁴தி சோத³னத்தே² நிபாதோ. ஸேஸம் உத்தானமேவாதி.

க³ஹபதிவக்³கோ³ தேரஸமோ.