1. அனிச்சவக்³கோ³

1. அஜ்ஜ²த்தானிச்சஸுத்தவண்ணனா

1. ஸளாயதனவக்³க³ஸ்ஸ பட²மே சக்கு²ந்தி த்³வே சக்கூ²னி – ஞாணசக்கு² சேவ மம்ஸசக்கு² ச. தத்த² ஞாணசக்கு² பஞ்சவித⁴ம் – பு³த்³த⁴சக்கு², த⁴ம்மசக்கு², ஸமந்தசக்கு², தி³ப்³ப³சக்கு², பஞ்ஞாசக்கூ²தி. தேஸு பு³த்³த⁴சக்கு² நாம ஆஸயானுஸயஞாணஞ்சேவ இந்த்³ரியபரோபரியத்தஞாணஞ்ச, யம் – ‘‘பு³த்³த⁴சக்கு²னா லோகம் வோலோகேந்தோ’’தி (மஹாவ. 9; ம. நி. 1.283; 2.338) ஆக³தம். த⁴ம்மசக்கு² நாம ஹேட்டி²மா தயோ மக்³கா³ தீணி ச ப²லானி, யம் – ‘‘விரஜம் வீதமலம் த⁴ம்மசக்கு²ம் உத³பாதீ³’’தி (மஹாவ. 16; ம. நி. 2.395) ஆக³தம். ஸமந்தசக்கு² நாம ஸப்³ப³ஞ்ஞுதஞ்ஞாணம், யம் – ‘‘பாஸாத³மாருய்ஹ ஸமந்தசக்கூ²’’தி (மஹாவ. 8; ம. நி. 1.282; 2.338) ஆக³தம். தி³ப்³ப³சக்கு² நாம ஆலோகப²ரணேன உப்பன்னம் ஞாணம், யம் – ‘‘தி³ப்³பே³ன சக்கு²னா விஸுத்³தே⁴னா’’தி (பாரா. 13; ம. நி. 2.341) ஆக³தம். பஞ்ஞாசக்கு² நாம சதுஸச்சபரிச்சே²த³கஞாணம், யம் – ‘‘சக்கு²ம் உத³பாதீ³’’தி (ஸ. நி. 5.1081; மஹாவ. 15) ஆக³தம்.

மம்ஸசக்கு²பி து³வித⁴ம் – ஸஸம்பா⁴ரசக்கு², பஸாத³சக்கூ²தி. தேஸு ய்வாயம் அக்கி²கூபகே அக்கி²படலேஹி பரிவாரிதோ மம்ஸபிண்டோ³, யத்த² சதஸ்ஸோ தா⁴துயோ வண்ணக³ந்த⁴ரஸோஜா ஸம்ப⁴வோ ஜீவிதம் பா⁴வோ சக்கு²பஸாதோ³ காயபஸாதோ³தி ஸங்கே²பதோ தேரஸ ஸம்பா⁴ரா ஹோந்தி. வித்தா²ரதோ பன சதஸ்ஸோ தா⁴துயோ வண்ணக³ந்த⁴ரஸோஜா ஸம்ப⁴வோதி இமே நவ சதுஸமுட்டா²னவஸேன ச²த்திம்ஸ, ஜீவிதம் பா⁴வோ சக்கு²பஸாதோ³ காயபஸாதோ³தி இமே கம்மஸமுட்டா²னா தாவ சத்தாரோதி சத்தாரீஸ ஸம்பா⁴ரா ஹோந்தி. இத³ம் ஸஸம்பா⁴ரசக்கு² நாம. யம் பனேத்த² ஸேதமண்ட³லபரிச்சி²ன்னேன கண்ஹமண்ட³லேன பரிவாரிதே தி³ட்டி²மண்ட³லே ஸன்னிவிட்ட²ம் ரூபத³ஸ்ஸனஸமத்த²ம் பஸாத³மத்தம், இத³ம் பஸாத³சக்கு² நாம. தஸ்ஸ ததோ பரேஸஞ்ச ஸோதாதீ³னம் வித்தா²ரகதா² விஸுத்³தி⁴மக்³கே³ வுத்தாவ.

தத்த² யதி³த³ம் பஸாத³சக்கு², தம் க³ஹேத்வா ப⁴க³வா – சக்கு²ம், பி⁴க்க²வே, அனிச்சந்திஆதி³மாஹ. தத்த² – ‘‘சதூஹி காரணேஹி அனிச்சம் உத³யப்³ப³யவந்ததாயா’’திஆதி³னா நயேன வித்தா²ரகதா² ஹேட்டா² பகாஸிதாயேவ. ஸோதம்பி பஸாத³ஸோதமேவ அதி⁴ப்பேதம், ததா² கா⁴னஜிவ்ஹாகாயா. மனோதி தேபூ⁴மகஸம்மஸனசாரசித்தம். இதி இத³ம் ஸுத்தம் ச²ஸு அஜ்ஜ²த்திகாயதனேஸு தீணி லக்க²ணானி த³ஸ்ஸேத்வா கதி²தே பு³ஜ்ஜ²னகானம் அஜ்ஜா²ஸயேன வுத்தம்.

2-3. அஜ்ஜ²த்தது³க்க²ஸுத்தாதி³வண்ணனா

2-3. து³தியம் த்³வே லக்க²ணானி, ததியம் ஏகலக்க²ணம் த³ஸ்ஸேத்வா கதி²தே பு³ஜ்ஜ²னகானம் அஜ்ஜா²ஸயேன வுத்தம். ஸேஸானி பன தேஹி ஸல்லக்கி²தானி வா ஏத்தகேனேவ வா ஸல்லக்கே²ஸ்ஸந்தீதி.

4-6. பா³ஹிரானிச்சஸுத்தாதி³வண்ணனா

4-6. சதுத்தே² ரூபக³ந்த⁴ரஸபோ²ட்ட²ப்³பா³ சதுஸமுட்டா²னா, ஸத்³தோ³ த்³விஸமுட்டா²னோ, த⁴ம்மாதி தேபூ⁴மகத⁴ம்மாரம்மணம். இத³ம்பி பா³ஹிரேஸு ச²ஸு ஆயதனேஸு திலக்க²ணம் த³ஸ்ஸேத்வா கதி²தே பு³ஜ்ஜ²னகானம் வஸேன வுத்தம். பஞ்சமே ச²ட்டே² ச து³தியததியேஸு வுத்தஸதி³ஸோவ நயோ.

7-12. அஜ்ஜ²த்தானிச்சாதீதானாக³தஸுத்தாதி³வண்ணனா

7-12. ஸத்தமாதீ³னி அதீதானாக³தேஸு சக்கா²தீ³ஸு அனிச்சலக்க²ணாதீ³னி ஸல்லக்கே²த்வா பச்சுப்பன்னேஸு ப³லவகா³ஹேன கிலமந்தானம் வஸேன வுத்தானி. ஸேஸம் ஸப்³ப³த்த² ஹேட்டா² வுத்தனயமேவாதி.

அனிச்சவக்³கோ³ பட²மோ.