2. யமகவக்³கோ³

1-4. பட²மபுப்³பே³ஸம்போ³த⁴ஸுத்தாதி³வண்ணனா

13-16. யமகவக்³க³ஸ்ஸ பட²மது³தியேஸு அஜ்ஜ²த்திகானந்தி அஜ்ஜ²த்தஜ்ஜ²த்தவஸேன அஜ்ஜ²த்திகானம். ஸோ பன நேஸம் அஜ்ஜ²த்திகபா⁴வோ ச²ந்த³ராக³ஸ்ஸ அதி⁴மத்தப³லவதாய வேதி³தப்³போ³. மனுஸ்ஸானஞ்ஹி அந்தோக⁴ரம் விய ச² அஜ்ஜ²த்திகாயதனானி, க⁴ரூபசாரம் விய ச² பா³ஹிராயதனானி. யதா² நேஸம் புத்ததா³ரத⁴னத⁴ஞ்ஞபுண்ணே அந்தோக⁴ரே ச²ந்த³ராகோ³ அதி⁴மத்தப³லவா ஹோதி, தத்த² கஸ்ஸசி பவிஸிதும் ந தே³ந்தி, அப்பமத்தேன பா⁴ஜனஸத்³த³மத்தேனாபி ‘‘கிம் ஏத’’ந்தி? வத்தாரோ ப⁴வந்தி. ஏவமேவம் ச²ஸு அஜ்ஜ²த்திகேஸு ஆயதனேஸு அதி⁴மத்தப³லவச²ந்த³ராகோ³தி. இதி இமாய ச²ந்த³ராக³ப³லவதாய தானி ‘‘அஜ்ஜ²த்திகானீ’’தி வுத்தானி. க⁴ரூபசாரே பன நோ ததா² ப³லவா ஹோதி, தத்த² சரந்தே மனுஸ்ஸேபி சதுப்பதா³னிபி ந ஸஹஸா நிவாரேந்தி. கிஞ்சாபி ந நிவாரேந்தி, அனிச்ச²ந்தா பன பஸுபச்சி²மத்தம்பி க³ஹிதும் ந தே³ந்தி. இதி நேஸம் தத்த² ந அதி⁴மத்தப³லவச²ந்த³ராகோ³ ஹோதி. ரூபாதீ³ஸுபி ததே²வ ந அதி⁴மத்தப³லவச²ந்த³ராகோ³, தஸ்மா தானி ‘‘பா³ஹிரானீ’’தி வுத்தானி. வித்தா²ரதோ பன அஜ்ஜ²த்திகபா³ஹிரகதா² விஸுத்³தி⁴மக்³கே³ வுத்தாவ. ஸேஸம் த்³வீஸுபி ஸுத்தேஸு ஹேட்டா² வுத்தனயமேவ. ததா² ததியசதுத்தே²ஸு.

5-6. பட²மனோசேஅஸ்ஸாத³ஸுத்தாதி³வண்ணனா

17-18. பஞ்சமே நிஸ்ஸடாதி நிக்க²ந்தா. விஸஞ்ஞுத்தாதி நோஸம்யுத்தா. விப்பமுத்தாதி நோ அதி⁴முத்தா விமரியாதீ³கதேன சேதஸாதி நிம்மரியாதீ³கதேன சேதஸா. யஞ்ஹி கிலேஸஜாதம் வா வட்டம் வா அப்பஹீனம் ஹோதி, தேன ஸேகா²னம் சித்தம் ஸமரியாதீ³கதம் நாம. யம் பஹீனம், தேன விமரியாதீ³கதம். இத⁴ பன ஸப்³ப³ஸோ கிலேஸானஞ்சேவ வட்டஸ்ஸ ச பஹீனத்தா விமரியாதீ³கதேன கிலேஸவட்டமரியாத³ம் அதிக்கந்தேன சித்தேன விஹரிம்ஸூதி அத்தோ². ச²ட்டே²பி ஏஸேவ நயோ. ச²ஸுபி பனேதேஸு ஸுத்தேஸு சதுஸச்சமேவ கதி²தந்தி வேதி³தப்³ப³ம்.

7-10. பட²மாபி⁴னந்த³ஸுத்தாதி³வண்ணனா

19-22. ஸத்தமாதீ³ஸு சதூஸு வட்டவிவட்டமேவ கதி²தம். அனுபுப்³ப³கதா² பன நேஸம் ஹேட்டா² வுத்தனயேனேவ வேதி³தப்³பா³தி.

யமகவக்³கோ³ து³தியோ.