2-4. ஏதம்மமஸுத்தாதி³வண்ணனா

207-209. தி³ட்ட²ந்திஆதீ³ஸு தி³ட்ட²ம் ரூபாயதனம். ஸுதம் ஸத்³தா³யதனம். முதம் க³ந்தா⁴யதனம் ரஸாயதனம் போ²ட்ட²ப்³பா³யதனம். தஞ்ஹி பத்வா க³ஹேதப்³ப³தோ முதந்தி ச வுத்தம். அவஸேஸானி ஸத்தாயதனானி விஞ்ஞாதம் நாம. பத்தந்தி பரியேஸித்வா வா அபரியேஸித்வா வா பத்தம். பரியேஸிதந்தி பத்தம் வா அபத்தம் வா பரியேஸிதம். அனுவிசரிதம் மனஸாதி சித்தேன அனுஸஞ்சரிதம். லோகஸ்மிஞ்ஹி பரியேஸித்வா பத்தம்பி அத்தி², பரியேஸித்வா நோபத்தம்பி, அபரியேஸித்வா பத்தம்பி, அபரியேஸித்வா நோபத்தம்பி. தத்த² பரியேஸித்வா பத்தம் பத்தம் நாம, பரியேஸித்வா நோபத்தம் பரியேஸிதம் நாம. அபரியேஸித்வா பத்தஞ்ச அபரியேஸித்வா நோபத்தஞ்ச மனஸானுவிசரிதம் நாம. அத² வா பரியேஸித்வா பத்தம்பி அபரியேஸித்வா பத்தம்பி பத்தட்டே²ன பத்தம் நாம, பரியேஸித்வா நோபத்தமேவ பரியேஸிதம் நாம, அபரியேஸித்வா நோபத்தம் மனஸானுவிசரிதம் நாம. ஸப்³ப³ம் வா ஏதம் மனஸா அனுவிசரிதமேவ.