1. ஸோதாபத்திவக்³கோ³

1. வாதஸுத்தவண்ணனா

206. தி³ட்டி²ஸம்யுத்தே ந வாதா வாயந்தீதிஆதீ³ஸு ஏவம் கிர தேஸம் தி³ட்டி² – ‘‘யேபி ஏதே ருக்க²ஸாகா²தீ³னி ப⁴ஞ்ஜந்தா வாதா வாயந்தி, ந ஏதே வாதா, வாதலேஸோ நாமேஸோ, வாதோ பன ஏஸிகத்த²ம்போ⁴ விய பப்³ப³தகூடம் விய ச டி²தோ. ததா² யாபி ஏதா திணகட்டா²தீ³னி வஹந்தியோ நதி³யோ ஸந்த³ந்தி, ந ஏத்த² உத³கம் ஸந்த³கி, உத³கலேஸோ நாமேஸ, உத³கம் பன ஏஸிகத்த²ம்போ⁴ விய பப்³ப³தகூடம் விய ச டி²தம். யாபிமா க³ப்³பி⁴னியோ விஜாயந்தீதி ச வுச்சந்தி, கிஞ்சாபி தா மிலாதுத³ரா ஹோந்தி, க³ப்³போ⁴ பன ந நிக்க²மதி, க³ப்³ப⁴லேஸோ நாமேஸோ, க³ப்³போ⁴ பன ஏஸிகத்த²ம்போ⁴ விய பப்³ப³தகூடம் விய ச டி²தோ. யேபி ஏதே சந்தி³மஸூரியா உதே³ந்தி வா அபேந்தி வா, நேவ தே உதே³ந்தி ந அபேந்தி, சந்தி³மஸூரியலேஸோ நாமேஸ, சந்தி³மஸூரியா பன ஏஸிகத்த²ம்போ⁴ விய பப்³ப³தகூடம் விய ச டி²தா’’தி.

2-4. ஏதம்மமஸுத்தாதி³வண்ணனா

207-209. தி³ட்ட²ந்திஆதீ³ஸு தி³ட்ட²ம் ரூபாயதனம். ஸுதம் ஸத்³தா³யதனம். முதம் க³ந்தா⁴யதனம் ரஸாயதனம் போ²ட்ட²ப்³பா³யதனம். தஞ்ஹி பத்வா க³ஹேதப்³ப³தோ முதந்தி ச வுத்தம். அவஸேஸானி ஸத்தாயதனானி விஞ்ஞாதம் நாம. பத்தந்தி பரியேஸித்வா வா அபரியேஸித்வா வா பத்தம். பரியேஸிதந்தி பத்தம் வா அபத்தம் வா பரியேஸிதம். அனுவிசரிதம் மனஸாதி சித்தேன அனுஸஞ்சரிதம். லோகஸ்மிஞ்ஹி பரியேஸித்வா பத்தம்பி அத்தி², பரியேஸித்வா நோபத்தம்பி, அபரியேஸித்வா பத்தம்பி, அபரியேஸித்வா நோபத்தம்பி. தத்த² பரியேஸித்வா பத்தம் பத்தம் நாம, பரியேஸித்வா நோபத்தம் பரியேஸிதம் நாம. அபரியேஸித்வா பத்தஞ்ச அபரியேஸித்வா நோபத்தஞ்ச மனஸானுவிசரிதம் நாம. அத² வா பரியேஸித்வா பத்தம்பி அபரியேஸித்வா பத்தம்பி பத்தட்டே²ன பத்தம் நாம, பரியேஸித்வா நோபத்தமேவ பரியேஸிதம் நாம, அபரியேஸித்வா நோபத்தம் மனஸானுவிசரிதம் நாம. ஸப்³ப³ம் வா ஏதம் மனஸா அனுவிசரிதமேவ.

5. நத்தி²தி³ன்னஸுத்தவண்ணனா

210. நத்தி² தி³ன்னந்திஆதீ³ஸு நத்தி² தி³ன்னந்தி தி³ன்னஸ்ஸ ப²லாபா⁴வம் ஸந்தா⁴ய வத³ந்தி. யிட்ட²ம் வுச்சதி மஹாயாகோ³. ஹுதந்தி பஹேணகஸக்காரோ அதி⁴ப்பேதோ. தம்பி உப⁴யம் ப²லாபா⁴வமேவ ஸந்தா⁴ய படிக்கி²பந்தி. ஸுகதது³க்கடானந்தி ஸுகதது³க்கதானம், குஸலாகுஸலானந்தி அத்தோ². ப²லம் விபாகோதி யம் ப²லந்தி வா விபாகோதி வா வுச்சதி, தம் நத்தீ²தி வத³ந்தி. நத்தி² அயம் லோகோதி பரலோகே டி²தஸ்ஸ அயம் லோகோ நத்தி². நத்தி² பரோ லோகோதி இத⁴ லோகே டி²தஸ்ஸபி பரோ லோகோ நத்தி², ஸப்³பே³ தத்த² தத்தே²வ உச்சி²ஜ்ஜந்தீதி த³ஸ்ஸேந்தி. நத்தி² மாதா நத்தி² பிதாதி தேஸு ஸம்மாபடிபத்திமிச்சா²படிபத்தீனம் ப²லாபா⁴வவஸேன வத³ந்தி. நத்தி² ஸத்தா ஓபபாதிகாதி சவித்வா உப்பஜ்ஜனகஸத்தா நாம நத்தீ²தி வத³ந்தி. நத்தி² லோகே ஸமணப்³ராஹ்மணாதி லோகே ஸம்மாபடிபன்னா ஸமணப்³ராஹ்மணா நாம நத்தீ²தி வத³ந்தி.

சாதுமஹாபூ⁴திகோதி சதுமஹாபூ⁴தமயோ. பத²வீ பத²வீகாயந்தி அஜ்ஜ²த்திகா பத²வீதா⁴து பா³ஹிரம் பத²வீதா⁴தும். அனுபேதீதி அனுயாதி. அனுபக³ச்ச²தீதி தஸ்ஸேவ வேவசனம், அனுக³ச்ச²தீதிபி அத்தோ². உப⁴யேனாபி உபேதி உபக³ச்ச²தீதி த³ஸ்ஸேந்தி. ஆபாதீ³ஸுபி ஏஸேவ நயோ. இந்த்³ரியானீதி மனச்ச²ட்டா²னி இந்த்³ரியானி. ஸங்கமந்தீதி ஆகாஸம் பக்க²ந்த³ந்தி. ஆஸந்தி³பஞ்சமாதி நிபன்னமஞ்சேன பஞ்சமா, மஞ்சோ சேவ, சத்தாரோ மஞ்சபாதே³ க³ஹேத்வா டி²தா சத்தாரோ புரிஸா சாதி அத்தோ². யாவ ஆளாஹனாதி யாவ ஸுஸானா. பதா³னீதி ‘‘அயம் ஏவம் ஸீலவா அஹோஸி, ஏவம் து³ஸ்ஸீலோ’’திஆதி³னா நயேன பவத்தானி கு³ணாகு³ணபதா³னி. ஸரீரமேவ வா ஏத்த² பதா³னீதி அதி⁴ப்பேதம். காபோதகானீதி கபோதகவண்ணானி, பாராவதபக்க²வண்ணானீதி அத்தோ². ப⁴ஸ்ஸந்தாதி ப⁴ஸ்மந்தா. அயமேவ வா பாளி. ஆஹுதியோதி யம் பஹேணகஸக்காராதி³பே⁴த³ம் தி³ன்னதா³னம், ஸப்³ப³ம் தம் சா²ரிகாவஸானமேவ ஹோதி, ந ததோ பரம் ப²லதா³யகம் ஹுத்வா க³ச்ச²தீதி அத்தோ². த³த்துபஞ்ஞத்தந்தி த³த்தூஹி பா³லமனுஸ்ஸேஹி பஞ்ஞத்தம். இத³ம் வுத்தம் ஹோதி – பா³லேஹி அபு³த்³தீ⁴ஹி பஞ்ஞத்தமித³ம் தா³னம், ந பண்டி³தேஹி. பா³லா தே³ந்தி, பண்டி³தா க³ண்ஹந்தீதி த³ஸ்ஸேந்தி.

6. கரோதோஸுத்தவண்ணனா

211. கரோதோதி ஸஹத்தா² கரோந்தஸ்ஸ. காரயதோதி ஆணத்தியா காரேந்தஸ்ஸ. சி²ந்த³தோதி பரேஸம் ஹத்தா²தீ³னி சி²ந்த³ந்தஸ்ஸ. சே²தா³பயதோதி பரேஹி சே²தா³பேந்தஸ்ஸ. பசதோதி த³ண்டே³ன பீளேந்தஸ்ஸ. பசாபயதோதி பரேஹி த³ண்டா³தி³னா பீளாபேந்தஸ்ஸ. ஸோசதோ ஸோசாபயதோதி பரஸ்ஸ ப⁴ண்ட³ஹரணாதீ³ஹி ஸோகம் ஸயம் கரோந்தஸ்ஸாபி பரேஹி காரேந்தஸ்ஸாபி. கிலமதோ கிலமாபயதோதி ஆஹாருபச்சே²த³ப³ந்த⁴னாகா³ரபவேஸனாதீ³ஹி ஸயம் கிலமேந்தஸ்ஸபி பரேஹி கிலமாபேந்தஸ்ஸபி. ப²ந்த³தோ ப²ந்தா³பயதோதி பரம் ப²ந்த³ந்தம் ப²ந்த³னகாலே ஸயம்பி ப²ந்த³தோ பரேம்பி ப²ந்தா³பயதோ. பாணமதிபாதயதோதி பாணம் ஹனந்தஸ்ஸபி ஹனாபேந்தஸ்ஸபி. ஏவம் ஸப்³ப³த்த² கரணகாராபனவஸேனேவ அத்தோ² வேதி³தப்³போ³.

ஸந்தி⁴ந்தி க⁴ரஸந்தி⁴ம். நில்லோபந்தி மஹாவிலோபம். ஏகாகா³ரிகந்தி ஏகமேவ க⁴ரம் பரிவாரேத்வா விலும்பனம். பரிபந்தே² திட்ட²தோதி ஆக³தாக³தானம் அச்சி²ந்த³னத்த²ம் மக்³கே³ திட்ட²தோ. கரோதோ ந கரீயதி பாபந்தி யம்கிஞ்சி பாபம் கரோமீதி ஸஞ்ஞாய கரோதோபி பாபம் ந கரீயதி, நத்தி² பாபம். ஸத்தா பன கரோமாதி ஏவம்ஸஞ்ஞினோ ஹோந்தீதி தீ³பேந்தி. கு²ரபரியந்தேனாதி கு²ரனேமினா, கு²ரதா⁴ரஸதி³ஸபரியந்தேன வா. ஏகமம்ஸக²லந்தி ஏகமம்ஸராஸிம். புஞ்ஜந்தி தஸ்ஸேவ வேவசனம். ததோனிதா³னந்தி ஏகமம்ஸக²லகரணனிதா³னம்.

த³க்கி²ணந்தி த³க்கி²ணதீரே மனுஸ்ஸா கக்க²ளா தா³ருணா, தே ஸந்தா⁴ய ஹனந்தோதிஆதி³ வுத்தம். உத்தரந்தி உத்தரதீரே ஸத்³தா⁴ ஹோந்தி பஸன்னா பு³த்³த⁴மாமகா த⁴ம்மமாமகா ஸங்க⁴மாமகா, தே ஸந்தா⁴ய த³த³ந்தோதிஆதி³ வுத்தம். தத்த² யஜந்தோதி மஹாயாக³ம் கரோந்தோ. த³மேனாதி இந்த்³ரியத³மேன உபோஸத²கம்மேன. ஸம்யமேனாதி ஸீலஸம்யமேன. ஸச்சவஜ்ஜேனாதி ஸச்சவசனேன. ஆக³மோதி ஆக³மனம், பவத்தீதி அத்தோ². ஸப்³ப³தா²பி பாபபுஞ்ஞானம் கிரியமேவ படிக்கி²பந்தி.

7. ஹேதுஸுத்தவண்ணனா

212. நத்தி² ஹேது நத்தி² பச்சயோதி ஏத்த² பச்சயோதி ஹேதுவேவசனமேவ. உப⁴யேனாபி விஜ்ஜமானமேவ காயது³ச்சரிதாதீ³னம் ஸம்கிலேஸபச்சயம், காயஸுசரிதாதீ³னஞ்ச விஸுத்³தி⁴பச்சயம் படிக்கி²பந்தி. நத்தி² ப³லந்தி யம்ஹி அத்தனோ ப³லே பதிட்டி²தா இமே ஸத்தா தே³வத்தம்பி மாரத்தம்பி ப்³ரஹ்மத்தம்பி ஸாவகபோ³தி⁴ம்பி பச்சேகபோ³தி⁴ம்பி ஸப்³ப³ஞ்ஞுதம்பி பாபுணந்தி, தம் ப³லம் படிக்கி²பந்தி. நத்தி² வீரியந்திஆதீ³னி ஸப்³பா³னி அஞ்ஞமஞ்ஞவேவசனானேவ. ‘‘இத³ம் நோ வீரியேன, இத³ம் புரிஸதா²மேன, இத³ம் புரிஸபரக்கமேன பத்த’’ந்தி, ஏவம் பவத்தவசனபடிக்கே²பகரணவஸேன பனேதானி விஸும் ஆதி³யந்தி.

ஸப்³பே³ ஸத்தாதி ஓட்ட²கோ³ணக³த்³ரபா⁴த³யோ அனவஸேஸே பரிக்³க³ண்ஹந்தி. ஸப்³பே³ பாணாதி ஏகிந்த்³ரியோ பாணோ, த்³விந்த்³ரியோ பாணோதிஆதி³வஸேன வத³ந்தி. ஸப்³பே³ பூ⁴தாதி அண்ட³கோஸவத்தி²கோஸேஸு பூ⁴தே ஸந்தா⁴ய வத³ந்தி. ஸப்³பே³ ஜீவாதி ஸாலியவகோ³து⁴மாத³யோ ஸந்தா⁴ய வத³ந்தி. தேஸு ஹி தே விருஹனபா⁴வேன ஜீவஸஞ்ஞினோ. அவஸா அப³லா அவீரியாதி தேஸம் அத்தனோ வஸோ வா ப³லம் வா வீரியம் வா நத்தி². நியதிஸங்க³திபா⁴வபரிணதாதி ஏத்த² நியதீதி நியததா. ஸங்க³தீதி ச²ன்னம் அபி⁴ஜாதீனம் தத்த² தத்த² க³மனம். பா⁴வோதி ஸபா⁴வோயேவ. ஏவம் நியதியா ச ஸங்க³தியா ச பா⁴வேன ச பரிணதா நானப்பகாரதம் பத்தா. யேன ஹி யதா² ப⁴விதப்³ப³ம், ஸோ ததே²வ ப⁴வதி. யேன ந ப⁴விதப்³ப³ம், ஸோ ந ப⁴வதீதி த³ஸ்ஸேந்தி. ச²ஸ்வேவாபி⁴ஜாதீஸூதி ச²ஸு ஏவ அபி⁴ஜாதீஸு ட²த்வா ஸுக²ஞ்ச து³க்க²ஞ்ச படிஸம்வேதே³ந்தி, அஞ்ஞா ஸுக²து³க்க²பூ⁴மி நத்தீ²தி த³ஸ்ஸேந்தி.

8-10. மஹாதி³ட்டி²ஸுத்தாதி³வண்ணனா

213-215. அகடாதி அகதா. அகடவிதா⁴தி அகதவிதா⁴னா, ‘‘ஏவம் கரோஹீ’’தி கேனசி காரிதாபி ந ஹோந்தீதி அத்தோ². அனிம்மிதாதி இத்³தி⁴யாபி ந நிம்மிதா. அனிம்மாதாதி அனிம்மாபிதா. ‘‘அனிம்மிதப்³பா³’’திபி பாடோ², ந நிம்மிதப்³பா³தி அத்தோ². வஞ்ஜா²தி வஞ்ஜ²பஸுவஞ்ஜ²தாலாத³யோ விய அப²லா கஸ்ஸசி அஜனகா. பப்³ப³தகூடம் விய டி²தாதி கூடட்டா². ஏஸிகட்டா²யினோ விய ஹுத்வா டி²தாதி ஏஸிகட்டா²யிட்டி²தா, யதா² ஸுனிகா²தோ ஏஸிகத்த²ம்போ⁴ நிச்சலோ திட்ட²தி, ஏவம் டி²தாதி அத்தோ². ந இஞ்ஜந்தீதி ஏஸிகத்த²ம்போ⁴ விய டி²தத்தா ந சலந்தி. ந விபரிணமந்தீதி பகதிம் ந விஜஹந்தி. ந அஞ்ஞமஞ்ஞம் ப்³யாபா³தே⁴ந்தீதி அஞ்ஞமஞ்ஞம் ந உபஹனந்தி. நாலந்தி ந ஸமத்தா². பத²வீகாயோதிஆதீ³ஸு பத²வீயேவ பத²வீகாயோ, பத²வீஸமூஹோ வா. ஸத்தன்னம்த்வேவ காயானந்தி யதா² முக்³க³ராஸிஆதீ³ஸு பஹடம் ஸத்த²ம் முக்³க³ராஸிஆதீ³னம் அந்தரேனேவ பவிஸதி, ஏவம் ஸத்தன்னம் காயானம் அந்தரேன சி²த்³தே³ன விவரேன ஸத்த²ம் பவிஸதி. தத்த² ‘‘அஹம் இமம் ஜீவிதா வோரோபேமீ’’தி கேவலம் ஸஞ்ஞாமத்தமேவ ஹோதீதி த³ஸ்ஸேந்தி.

யோனிபமுக²ஸதஸஹஸ்ஸானீதி பமுக²யோனீனம் உத்தமயோனீனம் சுத்³த³ஸஸதஸஹஸ்ஸானி அஞ்ஞானி ச ஸட்டி²ஸதானி அஞ்ஞானி ச ச²ஸதானி பஞ்ச ச கம்முனோ ஸதானீதி பஞ்சகம்மஸதானி சாதி கேவலம் தக்கமத்தகேன நிரத்த²கதி³ட்டி²ம் தீ³பேந்தி. பஞ்ச ச கம்மானி தீணி ச கம்மானீதிஆதீ³ஸுபி ஏஸேவ நயோ. கேசி பனாஹு ‘‘பஞ்ச கம்மானீதி பஞ்சிந்த்³ரியவஸேன க³ண்ஹந்தி, தீணீதி காயகம்மாதி³வஸேனா’’தி. கம்மே ச அட்³ட⁴கம்மே சாதி ஏத்த² பனஸ்ஸ காயகம்மவசீகம்மானி கம்மந்தி லத்³தி⁴, மனோகம்மம் உபட்³ட⁴கம்மந்தி. த்³வட்டி²படிபதா³தி த்³வாஸட்டி²படிபதா³தி வத³ந்தி. த்³வட்ட²ந்தரகப்பாதி ஏகஸ்மிம் கப்பே சதுஸட்டி² அந்தரகப்பா நாம ஹோந்தி, அயம் பன அஞ்ஞே த்³வே அஜானந்தோ ஏவமாஹ.

ச²ளாபி⁴ஜாதியோதி கண்ஹாபி⁴ஜாதி நீலாபி⁴ஜாதி லோஹிதாபி⁴ஜாதி ஹலித்³தா³பி⁴ஜாதி ஸுக்காபி⁴ஜாதி பரமஸுக்காபி⁴ஜாதீதி இமா ச² அபி⁴ஜாதியோ வத³ந்தி. தத்த² ஓரப்³பி⁴கா ஸூகரிகா ஸாகுணிகா மாக³விகா லுத்³தா³ மச்ச²கா⁴தகா சோரா சோரகா⁴தகா ப³ந்த⁴னாகா³ரிகா, யே வா பனஞ்ஞேபி கேசி குரூரகம்மந்தா, அயம் கண்ஹாபி⁴ஜாதீதி வத³ந்தி. பி⁴க்கூ² நீலாபி⁴ஜாதீதி வத³ந்தி. தே கிர சதூஸு பச்சயேஸு கண்டகே பக்கி²பித்வா கா²த³ந்தி, ‘‘பி⁴க்கூ² ச கண்டகவுத்திகா’’தி (அ. நி. 6.57) அயம் ஹிஸ்ஸ பாளி ஏவ. அத² வா கண்டகவுத்திகா ஏவ நாம ஏகே பப்³ப³ஜிதாதி வத³ந்தி. லோஹிதாபி⁴ஜாதி நாம நிக³ண்டா² ஏகஸாடகாதி வத³ந்தி. இமே கிர புரிமேஹி த்³வீஹி பண்ட³ரதரா. கி³ஹீ ஓதா³தவஸனா அசேலகஸாவகா ஹலித்³தா³பி⁴ஜாதீதி வத³ந்தி. ஏவம் அத்தனோ பச்சயதா³யகே நிக³ண்டே²ஹிபி ஜேட்ட²கதரே கரோந்தி. ஆஜீவகா ஆஜீவினியோ அயம் ஸுக்காபி⁴ஜாதீதி வத³ந்தி. தே கிர புரிமேஹி சதூஹி பண்ட³ரதரா. நந்தோ³ வச்சோ², கிஸோ ஸம்கிச்சோ, மக்க²லி கோ³ஸாலோ பரமஸுக்காபி⁴ஜாதீதி வத³ந்தி. தே கிர ஸப்³பே³ஹி பண்ட³ரதரா.

அட்ட² புரிஸபூ⁴மியோதி மந்த³பூ⁴மி கி²ட்³டா³பூ⁴மி வீமம்ஸகபூ⁴மி உஜுக³தபூ⁴மி ஸேக²பூ⁴மி ஸமணபூ⁴மி ஜானனபூ⁴மி பன்னபூ⁴மீதி இமா அட்ட² புரிஸபூ⁴மியோதி வத³ந்தி. தத்த² ஜாததி³வஸதோ பட்டா²ய ஸத்த தி³வஸே ஸம்பா³த⁴ட்டா²னதோ நிக்க²ந்தத்தா ஸத்தா மந்தா³ ஹோந்தி மோமூஹா, அயம் மந்த³பூ⁴மீதி வத³ந்தி. யே பன து³க்³க³திதோ ஆக³தா ஹோந்தி, தே அபி⁴ண்ஹம் ரோத³ந்தி சேவ விரவந்தி ச, ஸுக³திதோ ஆக³தா தம் அனுஸ்ஸரித்வா அனுஸ்ஸரித்வா ஹஸந்தி, அயம் கி²ட்³டா³பூ⁴மி நாம. மாதாபிதூனம் ஹத்த²ம் வா பாத³ம் வா மஞ்சம் வா பீட²ம் வா க³ஹேத்வா பூ⁴மியம் பத³னிக்கி²பனம் வீமம்ஸகபூ⁴மி நாம. பத³ஸா க³ந்தும் ஸமத்த²காலோ உஜுக³தபூ⁴மி நாம. ஸிப்பானி ஸிக்க²னகாலோ ஸேக²பூ⁴மி நாம. க⁴ரா நிக்க²ம்ம பப்³ப³ஜனகாலோ ஸமணபூ⁴மி நாம. ஆசரியம் ஸேவித்வா ஜானனகாலோ ஜானனபூ⁴மி நாம. ‘‘பி⁴க்கு² ச பன்னகோ ஜினோ ந கிஞ்சி ஆஹா’’தி ஏவம் அலாபி⁴ம் ஸமணம் பன்னபூ⁴மீதி வத³ந்தி.

ஏகூனபஞ்ஞாஸ ஆஜீவகஸதேதி ஏகூனபஞ்ஞாஸ ஆஜீவவுத்திஸதானி. பரிப்³பா³ஜகஸதேதி பரிப்³பா³ஜகபப்³ப³ஜ்ஜாஸதானி. நாக³வாஸஸதேதி நாக³மண்ட³லஸதானி. வீஸே இந்த்³ரியஸதேதி வீஸ இந்த்³ரியஸதானி. திம்ஸே நிரயஸதேதி திம்ஸ நிரயஸதானி. ரஜோதா⁴துயோதி ரஜஓகிரணட்டா²னானி. ஹத்த²பிட்டி²பாத³பிட்டா²தீ³னி ஸந்தா⁴ய வத³தி. ஸத்த ஸஞ்ஞீக³ப்³பா⁴தி ஓட்ட²கோ³ணக³த்³ரப⁴அஜபஸுமிக³மஹிம்ஸே ஸந்தா⁴ய வத³தி. ஸத்த அஸஞ்ஞீக³ப்³பா⁴தி ஸாலியவகோ³து⁴மமுக்³க³கங்கு³வரககுத்³ரூஸகே ஸந்தா⁴ய வத³தி. நிக³ண்டி²க³ப்³பா⁴தி க³ண்டி²ம்ஹி ஜாதக³ப்³பா⁴, உச்சு²வேளுனளாத³யோ ஸந்தா⁴ய வத³தி. ஸத்த தே³வாதி ப³ஹூ தே³வா, ஸோ பன ஸத்தாதி வத³தி. மனுஸ்ஸாபி அனந்தா, ஸோ ஸத்தாதி வத³தி. ஸத்த பேஸாசாதி பிஸாசா மஹந்தமஹந்தா, ஸத்தாதி வத³தி. ஸராதி மஹாஸரா. கண்ணமுண்ட³-ரத²கார-அனோதத்த-ஸீஹப்பபாத-ச²த்³த³ந்த-முசலிந்த³-குணாலத³ஹே க³ஹேத்வா வத³தி.

பவுடாதி க³ண்டி²கா. பபாதாதி மஹாபபாதா. பபாதஸதானீதி கு²த்³த³கபபாதஸதானி. ஸுபினாதி மஹாஸுபினா. ஸுபினஸதானீதி கு²த்³த³கஸுபினஸதானி. மஹாகப்பினோதி மஹாகப்பானம். ஏத்த² ஏகம்ஹா மஹாஸரா வஸ்ஸஸதே வஸ்ஸஸதே குஸக்³கே³ன ஏகம் உத³கபி³ந்து³ம் நீஹரித்வா ஸத்தக்க²த்தும் தம்ஹி ஸரே நிருத³கே கதே ஏகோ மஹாகப்போதி வத³தி. ஏவரூபானம் மஹாகப்பானம் சதுராஸீதிஸதஸஹஸ்ஸானி கே²பேத்வா பா³லே ச பண்டி³தே ச து³க்க²ஸ்ஸந்தம் கரோந்தீதி அயமஸ்ஸ லத்³தி⁴. பண்டி³தோபி கிர அந்தராவிஸுஜ்ஜி²தும் ந ஸக்கோதி, பா³லோபி ததோ உத்³த⁴ம் ந க³ச்ச²தி.

ஸீலேன வாதி அசேலகஸீலேன வா அஞ்ஞேன வா யேன கேனசி. வதேனாதி தாதி³ஸேனேவ வதேன. தபேனாதி தபோகம்மேன. அபரிபக்கம் பரிபாசேதி நாம யோ ‘‘அஹம் பண்டி³தோ’’தி அந்தரா விஸுஜ்ஜ²தி. பரிபக்கம் பு²ஸ்ஸ பு²ஸ்ஸ ப்³யந்தீகரோதி நாம யோ ‘‘அஹம் பா³லோ’’தி வுத்தபரிமாணகாலம் அதிக்கமித்வா யாதி. ஹேவம் நத்தீ²தி ஏவம் நத்தி². தஞ்ஹி உப⁴யம்பி ந ஸக்கா காதுந்தி தீ³பேதி. தோ³ணமிதேதி தோ³ணேன மிதம் விய. ஸுக²து³க்கே²தி ஸுக²து³க்க²ம். பரியந்தகதேதி வுத்தபரிமாணேன காலேன கதபரியந்தோ. நத்தி² ஹாயனவட்³ட⁴னேதி நத்தி² ஹாயனவட்³ட⁴னானி, ந ஸம்ஸாரோ பண்டி³தஸ்ஸ ஹாயதி, ந பா³லஸ்ஸ வட்³ட⁴தீதி அத்தோ². உக்கம்ஸாவகம்ஸேதி உக்கம்ஸாவகம்ஸா. ஹாயனவட்³ட⁴னானமேவேதம் வேவசனம். இதா³னி தமத்த²ம் உபமாய ஸாதே⁴ந்தோ ஸேய்யதா²பி நாமாதிஆதி³மாஹ. தத்த² ஸுத்தகு³ளேதி வேடே²த்வா கதஸுத்தகு³ளே. நிப்³பே³டி²யமானமேவ பலேதீதி பப்³ப³தே வா ருக்க²க்³கே³ வா ட²த்வா கி²த்தம் ஸுத்தப்பமாணேன நிப்³பே³டி²யமானமேவ க³ச்ச²தி, ஸுத்தே கீ²ணே தத்தே²வ திட்ட²தி, ந க³ச்ச²தி ஏவமேவ பா³லா ச பண்டி³தா ச காலவஸேன நிப்³பே³டி²யமானா ஸுக²து³க்க²ம் பலேந்தி, யதா²வுத்தேன காலேன அதிக்கமந்தீதி த³ஸ்ஸேதி.

11-18. அந்தவாஸுத்தாதி³வண்ணனா

216-223. அந்தவா லோகோதி ஏகதோ வட்³டி⁴தனிமித்தம் லோகோதி கா³ஹேன வா தக்கேன வா உப்பன்னதி³ட்டி². அனந்தவாதி ஸப்³ப³தோ வட்³டி⁴தம் அப்பமாணனிமித்தம் லோகோதி கா³ஹேன வா தக்கேன வா உப்பன்னதி³ட்டி². தம் ஜீவம் தம் ஸரீரந்தி ஜீவஞ்ச ஸரீரஞ்ச ஏகமேவாதி உப்பன்னதி³ட்டி². ஸேஸம் ஸப்³ப³த்த² உத்தானமேவாதி. இமானி தாவ ஸோதாபத்திமக்³க³வஸேன அட்டா²ரஸ வேய்யாகரணானி ஏகம் க³மனம்.