5. வக்கலிஸுத்தவண்ணனா

87. பஞ்சமே கும்ப⁴காரனிவேஸனேதி கும்ப⁴காரஸாலாயம். தே²ரோ கிர வுத்த²வஸ்ஸோ பவாரேத்வா ப⁴க³வந்தம் த³ஸ்ஸனாய ஆக³ச்ச²தி. தஸ்ஸ நக³ரமஜ்ஜே² மஹாஆபா³தோ⁴ உப்பஜ்ஜி, பாதா³ ந வஹந்தி. அத² நம் மஞ்சகஸிவிகாய கும்ப⁴காரஸாலம் ஆஹரிம்ஸு. ஸா ச ஸாலா தேஸம் கம்மஸாலா, ந நிவேஸனஸாலா. தம் ஸந்தா⁴ய வுத்தம் ‘‘கும்ப⁴காரனிவேஸனே விஹரதீ’’தி. பா³ள்ஹகி³லானோதி அதி⁴மத்தகி³லானோ. ஸமதோ⁴ஸீதி ஸமந்ததோ அதோ⁴ஸி, சலனாகாரேன அபசிதிம் த³ஸ்ஸேஸி. வத்தம் கிரேதம் பா³ள்ஹகி³லானேனபி பு³ட்³ட⁴தரம் தி³ஸ்வா உட்டா²னாகாரேன அபசிதி த³ஸ்ஸேதப்³பா³. தேன பன ‘‘மா சலி மா சலீ’’தி வத்தப்³போ³. ஸந்திமானி ஆஸனானீதி பு³த்³த⁴காலஸ்மிஞ்ஹி ஏகஸ்ஸபி பி⁴க்கு²னோ வஸனட்டா²னே ‘‘ஸசே ஸத்தா² ஆக³ச்சி²ஸ்ஸதி, இத⁴ நிஸீதி³ஸ்ஸதீ’’தி ஆஸனம் பஞ்ஞத்தமேவ ஹோதி அந்தமஸோ ப²லகமத்தம்பி பண்ணஸந்தா²ரமத்தம்பி. க²மனீயம் யாபனீயந்தி கச்சி து³க்க²ம் க²மிதும் இரியாபத²ம் வா யாபேதும் ஸக்காதி புச்ச²தி. படிக்கமந்தீதி நிவத்தந்தி. அபி⁴க்கமந்தீதி அதி⁴க³ச்ச²ந்தி. படிக்கமோஸானந்தி படிக்கமோ ஏதாஸம். ஸீலதோ ந உபவத³தீதி ஸீலம் ஆரப்³ப⁴ ஸீலபா⁴வேன ந உபவத³தி. சிரபடிகாஹந்தி சிரபடிகோ அஹம், சிரதோ பட்டா²ய அஹந்தி அத்தோ². பூதிகாயேனாதி அத்தனோ ஸுவண்ணவண்ணம்பி காயம் ப⁴க³வா து⁴வபக்³க⁴ரணட்டே²ன ஏவமாஹ. யோ கோ², வக்கலி, த⁴ம்மந்தி இத⁴ ப⁴க³வா ‘‘த⁴ம்மகாயோ கோ², மஹாராஜ, ததா²க³தோ’’தி வுத்தம் த⁴ம்மகாயதம் த³ஸ்ஸேதி. நவவிதோ⁴ ஹி லோகுத்தரத⁴ம்மோ ததா²க³தஸ்ஸ காயோ நாம.

இதா³னி தே²ரஸ்ஸ திபரிவட்டத⁴ம்மதே³ஸனம் ஆரப⁴ந்தோ தம் கிம் மஞ்ஞஸீதிஆதி³மாஹ. காளஸிலாதி காளஸிலாவிஹாரோ. விமோக்கா²யாதி மக்³க³விமோக்க²த்தா²ய. ஸுவிமுத்தோ விமுச்சிஸ்ஸதீதி அரஹத்தப²லவிமுத்தியா விமுத்தோ ஹுத்வா விமுச்சிஸ்ஸதி. தா கிர தே³வதா ‘‘யேன நீஹாரேன இமினா விபஸ்ஸனா ஆரத்³தா⁴, அனந்தராயேன அரஹத்தம் பாபுணிஸ்ஸதீ’’தி ஞத்வா ஏவமாஹம்ஸு. அபாபகந்தி அலாமகம். ஸத்த²ம் ஆஹரேஸீதி தே²ரோ கிர அதி⁴மானிகோ அஹோஸி. ஸோ ஸமாதி⁴விபஸ்ஸனாஹி விக்க²ம்பி⁴தானம் கிலேஸானம் ஸமுதா³சாரம் அபஸ்ஸந்தோ ‘‘கீ²ணாஸவோம்ஹீ’’தி ஸஞ்ஞீ ஹுத்வா ‘‘கிம் மே இமினா து³க்கே²ன ஜீவிதேன? ஸத்த²ம் ஆஹரித்வா மரிஸ்ஸாமீ’’தி திகி²ணேன ஸத்தே²ன கண்ட²னாளம் சி²ந்தி³. அத²ஸ்ஸ து³க்கா² வேத³னா உப்பஜ்ஜி. ஸோ தஸ்மிம் க²ணே அத்தனோ புது²ஜ்ஜனபா⁴வம் ஞத்வா அவிஸ்ஸட்ட²கம்மட்டா²னத்தா ஸீக⁴ம் மூலகம்மட்டா²னம் ஆதா³ய ஸம்மஸந்தோ அரஹத்தம் பாபுணித்வாவ காலமகாஸி. பச்சவேக்க²ணா பனஸ்ஸ ச கத²ம் அஹோஸீதி? கீ²ணாஸவஸ்ஸ ஏகூனவீஸதி பச்சவேக்க²ணா ந ஸப்³பா³வ அவஸ்ஸம் லத்³த⁴ப்³பா³, திகி²ணேனாபி பன அஸினா ஸீஸே சி²ஜ்ஜந்தே ஏகம் த்³வே ஞாணானி அவஸ்ஸம் உப்பஜ்ஜந்தி.

விவத்தக்க²ந்த⁴ந்தி பரிவத்தக்க²ந்த⁴ம். ஸேமானந்தி ஸயமானம். தே²ரோ கிர உத்தானகோ நிபன்னோ ஸத்த²ம் ஆஹரி. தஸ்ஸ ஸரீரம் யதா²டி²தமேவ அஹோஸி. ஸீஸம் பன த³க்கி²ணபஸ்ஸேன பரிவத்தித்வா அட்டா²ஸி. அரியஸாவகா ஹி யேபு⁴ய்யேன த³க்கி²ணபஸ்ஸேனேவ காலம் கரோந்தி. தேனஸ்ஸ ஸரீரம் யதா²டி²தம்யேவ அஹோஸி. ஸீஸம் பன த³க்கி²ணபஸ்ஸேன பரிவத்தித்வா டி²தம். தம் ஸந்தா⁴ய விவத்தக்க²ந்தோ⁴ நாம ஜாதோதிபி வத³ந்தி. தூ⁴மாயிதத்தந்தி தூ⁴மாயனபா⁴வம். திமிராயிதத்தந்தி திமிராயனபா⁴வம். தூ⁴மவலாஹகம் விய திமிரவலாஹகம் விய சாதி அத்தோ². பஞ்சமம்.