2. திஸ்ஸஸுத்தவண்ணனா

84. து³தியே மது⁴ரகஜாதோ வியாதி ஸஞ்ஜாதக³ருபா⁴வோ விய அகம்மஞ்ஞோ. தி³ஸாபி மேதி அயம் புரத்தி²மா அயம் த³க்கி²ணாதி ஏவம் தி³ஸாபி மய்ஹம் ந பக்கா²யந்தி, ந பாகடா ஹோந்தீதி வத³தி. த⁴ம்மாபி மம் ந படிப⁴ந்தீதி பரியத்தித⁴ம்மாபி மய்ஹம் ந உபட்ட²ஹந்தி, உக்³க³ஹிதம் ஸஜ்ஜா²யிதம் ந தி³ஸ்ஸதீதி வத³தி. விசிகிச்சா²தி நோ மஹாவிசிகிச்சா². ந ஹி தஸ்ஸ ‘‘ஸாஸனம் நிய்யானிகம் நு கோ², ந நு கோ²’’தி விமதி உப்பஜ்ஜதி. ஏவம் பனஸ்ஸ ஹோதி ‘‘ஸக்கி²ஸ்ஸாமி நு கோ² ஸமணத⁴ம்மம் காதும், உதா³ஹு பத்தசீவரதா⁴ரணமத்தமேவ கரிஸ்ஸாமீ’’தி.

காமானமேதம் அதி⁴வசனந்தி யதா² ஹி நின்னம் பல்லலம் ஓலோகேந்தஸ்ஸ த³ஸ்ஸனராமணேய்யகமத்தம் அத்தி², யோ பனேத்த² ஓதரதி, தம் சண்ட³மீனாகுலதாய ஆகட்³டி⁴த்வா அனயப்³யஸனம் பாபேதி, ஏவமேவம் பஞ்சஸு காமகு³ணேஸு சக்கு²த்³வாராதீ³னம் ஆரம்மணே ராமணேய்யகமத்தம் அத்தி², யோ பனேத்த² கே³த⁴ம் ஆபஜ்ஜதி, தம் ஆகட்³டி⁴த்வா நிரயாதீ³ஸு ஏவ பக்கி²பந்தி. அப்பஸ்ஸாதா³ ஹி காமா ப³ஹுது³க்கா² ப³ஹுபாயாஸா, ஆதீ³னவோ ஏத்த² பி⁴ய்யோதி இமம் அத்த²வஸம் படிச்ச ‘‘காமானமேதம் அதி⁴வசன’’ந்தி வுத்தம். அஹமனுக்³க³ஹேனாதி அஹம் த⁴ம்மாமிஸானுக்³க³ஹேஹி அனுக்³க³ண்ஹாமி. அபி⁴னந்தீ³தி ஸம்படிச்சி². ந கேவலஞ்ச அபி⁴னந்தி³, இமம் பன ஸத்து² ஸந்திகா அஸ்ஸாஸம் லபி⁴த்வா க⁴டேந்தோ வாயமந்தோ கதிபாஹேன அரஹத்தே பதிட்டா²ஸி. து³தியம்.