10. புண்ணமஸுத்தவண்ணனா

82. த³ஸமே தத³ஹுபோஸதே²திஆதி³ பவாரணஸுத்தே வித்தா²ரிதமேவ. கிஞ்சிதே³வ தே³ஸந்தி கிஞ்சி காரணம். ஸகே ஆஸனே நிஸீதி³த்வா புச்ச² யதா³கங்க²ஸீதி கஸ்மா ஏவமாஹ? ஸோ கிர பி⁴க்கு² பஞ்சஸதபி⁴க்கு²பரிவாரோ. ஆசரியே பன டி²தகே புச்ச²ந்தே ஸசே தே பி⁴க்கூ² நிஸீத³ந்தி, ஸத்த²ரி கா³ரவம் கதம் ஹோதி, ஆசரியே அகா³ரவம். ஸசே உட்ட²ஹந்தி, ஆசரியே கா³ரவம் கதம் ஹோதி, ஸத்த²ரி அகா³ரவம். இதி நேஸம் சித்தம் அனேகக்³க³ம் ப⁴விஸ்ஸதி, தே³ஸனம் ஸம்படிச்சி²தும் ந ஸக்கி²ஸ்ஸந்தி. தஸ்மிம் பன நிஸீதி³த்வா புச்ச²ந்தே தேஸம் சித்தம் ஏகக்³க³ம் ப⁴விஸ்ஸதி, தே³ஸனம் ஸம்படிச்சி²தும் ஸக்கி²ஸ்ஸந்தீதி ஞத்வா ப⁴க³வா ஏவமாஹ. இமே நு கோ², ப⁴ந்தேதி அயம் தே²ரோ பஞ்சன்னம் பி⁴க்கு²ஸதானம் ஆசரியோ, பஞ்சக்க²ந்த⁴மத்தம்பி நப்பஜானாதீதி ந வத்தப்³போ³. பஞ்ஹம் புச்ச²ந்தேன பன ‘‘இமே பஞ்சுபாதா³னக்க²ந்தா⁴, ந அஞ்ஞே’’தி ஏவம் ஜானந்தேன விய ஹுத்வா புச்சி²தும் ந வட்டதி, தஸ்மா அஜானந்தோ விய புச்ச²தி. தேபி சஸ்ஸ அந்தேவாஸிகா ‘‘அம்ஹாகம் ஆசரியோ ‘அஹம் ஜானாமீ’தி ந கதே²தி, ஸப்³ப³ஞ்ஞுதஞ்ஞாணேன பன ஸத்³தி⁴ம் ஸம்ஸந்தி³த்வாவ கதே²தீ’’தி ஸோதப்³ப³ம் ஸத்³தா⁴தப்³ப³ம் மஞ்ஞிஸ்ஸந்தீதிபி அஜானந்தோ விய புச்ச²தி.

ச²ந்த³மூலகாதி தண்ஹாச²ந்த³மூலகா. ந கோ² பி⁴க்கு² தஞ்ஞேவ உபாதா³னம் தே பஞ்சுபாதா³னக்க²ந்தா⁴தி யஸ்மா ச²ந்த³ராக³மத்தம் பஞ்சக்க²ந்தா⁴ ந ஹோதி, தஸ்மா இத³ம் வுத்தம். யஸ்மா பன ஸஹஜாததோ வா ஆரம்மணதோ வா க²ந்தே⁴ முஞ்சித்வா உபாதா³னம் நத்தி², தஸ்மா நாபி அஞ்ஞத்ர பஞ்சஹி உபாதா³னக்க²ந்தே⁴ஹி உபாதா³னந்தி வுத்தம். தண்ஹாஸம்பயுத்தஸ்மிஞ்ஹி சித்தே வத்தமானே தம்சித்தஸமுட்டா²னரூபம் ரூபக்க²ந்தோ⁴, ட²பேத்வா தம் தண்ஹம் ஸேஸா அரூபத⁴ம்மா சத்தாரோ க²ந்தா⁴தி ஸஹஜாததோபி க²ந்தே⁴ முஞ்சித்வா உபாதா³னம் நத்தி². உபாதா³னஸ்ஸ பன ரூபாதீ³ஸு அஞ்ஞதரம் ஆரம்மணம் கத்வா உப்பஜ்ஜனதோ ஆரம்மணதோபி பஞ்சக்க²ந்தே⁴ முஞ்சித்வா உபாதா³னம் நத்தி². ச²ந்த³ராக³வேமத்ததாதி ச²ந்த³ராக³னானத்தம். ஏவம் கோ² பி⁴க்கூ²தி ஏவம் ரூபாரம்மணஸ்ஸ ச²ந்த³ராக³ஸ்ஸ வேத³னாதீ³ஸு அஞ்ஞதரம் ஆரம்மணம் அகரணதோ ஸியா ச²ந்த³ராக³வேமத்ததா. க²ந்தா⁴தி⁴வசனந்தி க²ந்தா⁴தி அயம் பஞ்ஞத்தி. அயம் பன அனுஸந்தி⁴ ந க⁴டியதி, கிஞ்சாபி ந க⁴டியதி, ஸானுஸந்தி⁴காவ புச்சா², ஸானுஸந்தி⁴கம் விஸ்ஸஜ்ஜனம். அயஞ்ஹி தே²ரோ தேஸம் தேஸம் பி⁴க்கூ²னம் அஜ்ஜா²ஸயேன புச்ச²தி, ஸத்தா²பி தேஸம் தேஸம் அஜ்ஜா²ஸயேனேவ விஸ்ஸஜ்ஜேதி. ஸேஸம் ஸப்³ப³த்த² உத்தானமேவ. த³ஸமம்.

இமஸ்ஸ ச பன வக்³க³ஸ்ஸ ஏகேகஸ்மிம் ஸுத்தே பஞ்சஸதா பஞ்சஸதா பி⁴க்கூ² அரஹத்தம் பத்தாதி.

க²ஜ்ஜனீயவக்³கோ³ அட்ட²மோ.