5. ஸமனுபஸ்ஸனாஸுத்தவண்ணனா

47. பஞ்சமே பஞ்சுபாதா³னக்க²ந்தே⁴ ஸமனுபஸ்ஸந்தி ஏதேஸம் வா அஞ்ஞதரந்தி பரிபுண்ணகா³ஹவஸேன பஞ்சக்க²ந்தே⁴ ஸமனுபஸ்ஸந்தி, அபரிபுண்ணகா³ஹவஸேன ஏதேஸம் அஞ்ஞதரம். இதி அயஞ்சேவ ஸமனுபஸ்ஸனாதி இதி அயஞ்ச தி³ட்டி²ஸமனுபஸ்ஸனா. அஸ்மீதி சஸ்ஸ அவிக³தம் ஹோதீதி யஸ்ஸ அயம் ஸமனுபஸ்ஸனா அத்தி², தஸ்மிம் அஸ்மீதி தண்ஹாமானதி³ட்டி²ஸங்கா²தம் பபஞ்சத்தயம் அவிக³தமேவ ஹோதி. பஞ்சன்னம் இந்த்³ரியானம் அவக்கந்தி ஹோதீதி தஸ்மிம் கிலேஸஜாதே ஸதி கம்மகிலேஸபச்சயானம் பஞ்சன்னம் இந்த்³ரியானம் நிப்³ப³த்தி ஹோதி.

அத்தி², பி⁴க்க²வே, மனோதி இத³ம் கம்மமனம் ஸந்தா⁴ய வுத்தம். த⁴ம்மாதி ஆரம்மணம். அவிஜ்ஜாதா⁴தூதி ஜவனக்க²ணே அவிஜ்ஜா. அவிஜ்ஜாஸம்ப²ஸ்ஸஜேனாதி அவிஜ்ஜாஸம்பயுத்தப²ஸ்ஸதோ ஜாதேன. அபிச மனோதி ப⁴வங்க³க்க²ணே விபாகமனோதா⁴து, ஆவஜ்ஜனக்க²ணே கிரியமனோதா⁴து. த⁴ம்மாத³யோ வுத்தப்பகாராவ. அஸ்மீதிபிஸ்ஸ ஹோதீதி தண்ஹாமானதி³ட்டி²வஸேன அஸ்மீதி ஏவம்பிஸ்ஸ ஹோதி. இதோ பரேஸு அயமஹமஸ்மீதி ரூபாதீ³ஸு கிஞ்சிதே³வ த⁴ம்மம் க³ஹேத்வா ‘‘அயம் அஹமஸ்மீ’’தி அத்ததி³ட்டி²வஸேன வுத்தம். ப⁴விஸ்ஸந்தி ஸஸ்ஸததி³ட்டி²வஸேன. ந ப⁴விஸ்ஸந்தி உச்சே²த³தி³ட்டி²வஸேன. ரூபீ ப⁴விஸ்ஸந்திஆதீ³னி ஸப்³பா³னி ஸஸ்ஸதமேவ ப⁴ஜந்தி. அதே²த்தா²தி அத² தேனேவாகாரேன டி²தேஸு ஏதேஸு இந்த்³ரியேஸு. அவிஜ்ஜா பஹீயதீதி சதூஸு ஸச்சேஸு அஞ்ஞாணபூ⁴தா அவிஜ்ஜா பஹீயதி. விஜ்ஜா உப்பஜ்ஜதீதி அரஹத்தமக்³க³விஜ்ஜா உப்பஜ்ஜதி. ஏவமேத்த² அஸ்மீதி தண்ஹாமானதி³ட்டி²யோ. கம்மஸ்ஸ பஞ்சன்னஞ்ச இந்த்³ரியானம் அந்தரே ஏகோ ஸந்தி⁴, விபாகமனம் பஞ்சிந்த்³ரியபக்கி²கம் கத்வா பஞ்சன்னஞ்ச இந்த்³ரியானம் கம்மஸ்ஸ ச அந்தரே ஏகோ ஸந்தீ⁴தி. இதி தயோ பபஞ்சா அதீதோ அத்³தா⁴, இந்த்³ரியாதீ³னி பச்சுப்பன்னோ அத்³தா⁴, தத்த² கம்மமனம் ஆதி³ம் கத்வா அனாக³தஸ்ஸ பச்சயோ த³ஸ்ஸிதோதி. பஞ்சமம்.