3. பா⁴ரவக்³கோ³

1. பா⁴ரஸுத்தவண்ணனா

22. பா⁴ரவக்³க³ஸ்ஸ பட²மே பஞ்சுபாதா³னக்க²ந்தா⁴திஸ்ஸ வசனீயந்தி பஞ்சுபாதா³னக்க²ந்தா⁴ இதி அஸ்ஸ வசனீயம், ஏவம் வத்தப்³ப³ம் ப⁴வேய்யாதி அத்தோ². அயம் வுச்சதி, பி⁴க்க²வே, பா⁴ரோதி யே இமே பஞ்சுபாதா³னக்க²ந்தா⁴, அயம் பா⁴ரோதி வுச்சதி. கேனட்டே²னாதி? பரிஹாரபா⁴ரியட்டே²ன. ஏதேஸஞ்ஹி டா²பனக³மனனிஸீதா³பனனிபஜ்ஜாபனன்ஹாபனமண்ட³னகா²தா³பனபு⁴ஞ்ஜாபனாதி³பரிஹாரோ பா⁴ரியோதி பரிஹாரபா⁴ரியட்டே²ன பா⁴ரோதி வுச்சதி. ஏவம்னாமோதி திஸ்ஸோ த³த்தோதிஆதி³னாமோ. ஏவம்கோ³த்தோதி கண்ஹாயனோ வச்சா²யனோதிஆதி³கோ³த்தோ. இதி வோஹாரமத்தஸித்³த⁴ம் புக்³க³லம் ‘‘பா⁴ரஹாரோ’’தி கத்வா த³ஸ்ஸேதி. புக்³க³லோ ஹி படிஸந்தி⁴க்க²ணேயேவ க²ந்த⁴பா⁴ரம் உக்கி²பித்வா த³ஸபி வஸ்ஸானி வீஸதிபி வஸ்ஸஸதம்பீதி யாவஜீவம் இமம் க²ந்த⁴பா⁴ரம் ந்ஹாபேந்தோ போ⁴ஜேந்தோ முது³ஸம்ப²ஸ்ஸமஞ்சபீடே²ஸு நிஸீதா³பேந்தோ நிபஜ்ஜாபேந்தோ பரிஹரித்வா சுதிக்க²ணே ச²ட்³டே³த்வா புன படிஸந்தி⁴க்க²ணே அபரம் க²ந்த⁴பா⁴ரம் ஆதி³யதி, தஸ்மா பா⁴ரஹாரோதி ஜாதோ.

போனோப⁴விகாதி புனப்³ப⁴வனிப்³ப³த்திகா. நந்தீ³ராக³ஸஹக³தாதி நந்தி³ராகே³ன ஸஹ ஏகத்தமேவ க³தா. தப்³பா⁴வஸஹக³தஞ்ஹி இத⁴ அதி⁴ப்பேதம். தத்ர தத்ராபி⁴னந்தி³னீதி உபபத்திட்டா²னே வா ரூபாதீ³ஸு வா ஆரம்மணேஸு தத்த² தத்த² அபி⁴னந்த³னஸீலாவ. காமதண்ஹாதீ³ஸு பஞ்சகாமகு³ணிகோ ராகோ³ காமதண்ஹா நாம, ரூபாரூபப⁴வராகோ³ ஜா²னனிகந்தி ஸஸ்ஸததி³ட்டி²ஸஹக³தோ ராகோ³தி அயம் ப⁴வதண்ஹா நாம, உச்சே²த³தி³ட்டி²ஸஹக³தோ ராகோ³ விப⁴வதண்ஹா நாம. பா⁴ராதா³னந்தி பா⁴ரக³ஹணம். தண்ஹாய ஹி ஏஸ பா⁴ரம் ஆதி³யதி. அஸேஸவிராக³னிரோதோ⁴திஆதி³ ஸப்³ப³ம் நிப்³பா³னஸ்ஸேவ வேவசனம். தஞ்ஹி ஆக³ம்ம தண்ஹா அஸேஸதோ விரஜ்ஜதி நிருஜ்ஜ²தி சஜியதி படினிஸ்ஸஜ்ஜியதி விமுச்சதி, நத்தி² சேத்த² காமாலயோ வா தி³ட்டா²லயோ வாதி நிப்³பா³னம் ஏதானி நாமானி லப⁴தி. ஸமூலம் தண்ஹந்தி தண்ஹாய அவிஜ்ஜா மூலம் நாம. அப்³பு³ய்ஹாதி அரஹத்தமக்³கே³ன தம் ஸமூலகம் உத்³த⁴ரித்வா. நிச்சா²தோ பரினிப்³பு³தோதி நித்தண்ஹோ பரினிப்³பு³தோ நாமாதி வத்தும் வட்டதீதி. பட²மம்.

2. பரிஞ்ஞஸுத்தவண்ணனா

23. து³தியே பரிஞ்ஞேய்யேதி பரிஜானிதப்³பே³, ஸமதிக்கமிதப்³பே³தி அத்தோ². பரிஞ்ஞந்தி அச்சந்தபரிஞ்ஞம், ஸமதிக்கமந்தி அத்தோ². ராக³க்க²யோதிஆதி³ நிப்³பா³னஸ்ஸ நாமம். தஞ்ஹி அச்சந்தபரிஞ்ஞா நாம. து³தியம்.

3. அபி⁴ஜானஸுத்தவண்ணனா

24. ததியே அபி⁴ஜானந்தி அபி⁴ஜானந்தோ. இமினா ஞாதபரிஞ்ஞா கதி²தா, து³தியபதே³ன தீரணபரிஞ்ஞா, ததியசதுத்தே²ஹி பஹானபரிஞ்ஞாதி இமஸ்மிம் ஸுத்தே திஸ்ஸோ பரிஞ்ஞா கதி²தாதி. ததியம்.

4-9. ச²ந்த³ராக³ஸுத்தாதி³வண்ணனா

25-30. சதுத்தா²தீ³னி தா⁴துஸம்யுத்தே வுத்தனயேனேவ வேதி³தப்³பா³னி. படிபாடியா பனேத்த² பஞ்சமச²ட்ட²ஸத்தமேஸு சத்தாரி ஸச்சானி கதி²தானி, அட்ட²மனவமேஸு வட்டவிவட்டம். சதுத்தா²தீ³னி.

10. அக⁴மூலஸுத்தவண்ணனா

31. த³ஸமே அக⁴ந்தி து³க்க²ம். ஏவமேத்த² து³க்க²லக்க²ணமேவ கதி²தம். த³ஸமம்.

11. பப⁴ங்கு³ஸுத்தவண்ணனா

32. ஏகாத³ஸமே பப⁴ங்கு³ந்தி பபி⁴ஜ்ஜனஸபா⁴வம். ஏவமித⁴ அனிச்சலக்க²ணமேவ கதி²தந்தி. ஏகாத³ஸமம்.

பா⁴ரவக்³கோ³ ததியோ.