5. சங்கமஸுத்தவண்ணனா

99. பஞ்சமே பஸ்ஸத² நோதி பஸ்ஸத² நு. ஸப்³பே³ கோ² ஏதேதி ஸாரிபுத்தத்தே²ரோ ப⁴க³வதா ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் மஹாபஞ்ஞானம் யதி³த³ம் ஸாரிபுத்தோ’’தி (அ. நி. 1.189) மஹாபஞ்ஞேஸு ஏதத³க்³கே³ ட²பிதோ. இதி நம் ‘‘க²ந்த⁴ந்தரம் தா⁴த்வந்தரம் ஆயதனந்தரம் ஸதிபட்டா²னபோ³தி⁴பக்கி²யத⁴ம்மந்தரம் திலக்க²ணாஹதம் க³ம்பீ⁴ரம் பஞ்ஹம் புச்சி²ஸ்ஸாமா’’தி மஹாபஞ்ஞாவ பரிவாரேந்தி. ஸோபி தேஸம் பத²விம் பத்த²ரேந்தோ விய ஸினேருபாத³தோ வாலிகம் உத்³த⁴ரந்தோ விய சக்கவாளபப்³ப³தம் பி⁴ந்த³ந்தோ விய ஸினேரும் உக்கி²பந்தோ விய ஆகாஸம் வித்தா²ரேந்தோ விய சந்தி³மஸூரியே உட்டா²பேந்தோ விய ச புச்சி²தபுச்சி²தம் கதே²தி. தேன வுத்தம் ‘‘ஸப்³பே³ கோ² ஏதே, பி⁴க்க²வே, பி⁴க்கூ² மஹாபஞ்ஞா’’தி.

மஹாமோக்³க³ல்லானோபி ப⁴க³வதா ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் இத்³தி⁴மந்தானம் யதி³த³ம் மஹாமோக்³க³ல்லானோ’’தி இத்³தி⁴மந்தேஸு ஏதத³க்³கே³ ட²பிதோ. இதி நம் ‘‘பரிகம்மம் ஆனிஸம்ஸம் அதி⁴ட்டா²னம் விகுப்³ப³னம் புச்சி²ஸ்ஸாமா’’தி இத்³தி⁴மந்தோவ பரிவாரேந்தி. ஸோபி தேஸம் வுத்தனயேனேவ புச்சி²தபுச்சி²தம் கதே²தி. தேன வுத்தம் ‘‘ஸப்³பே³ கோ² ஏதே, பி⁴க்க²வே, பி⁴க்கூ² மஹித்³தி⁴கா’’தி.

மஹாகஸ்ஸபோபி ப⁴க³வதா ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் து⁴தவாதா³னம் யதி³த³ம் மஹாகஸ்ஸபோ’’தி து⁴தவாதே³ஸு ஏதத³க்³கே³ ட²பிதோ. இதி நம் ‘‘து⁴தங்க³பரிஹாரம் ஆனிஸம்ஸம் ஸமோதா⁴னம் அதி⁴ட்டா²னம் பே⁴த³ம் புச்சி²ஸ்ஸாமா’’தி து⁴தவாதா³வ பரிவாரேந்தி. ஸோபி தேஸம் ததே²வ புச்சி²தபுச்சி²தம் ப்³யாகரோதி. தேன வுத்தம் ‘‘ஸப்³பே³ கோ² ஏதே, பி⁴க்க²வே, பி⁴க்கூ² து⁴தவாதா³’’தி.

அனுருத்³த⁴த்தே²ரோபி ப⁴க³வதா ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் தி³ப்³ப³சக்கு²கானம் யதி³த³ம் அனுருத்³தோ⁴’’தி (அ. நி. 1.192) தி³ப்³ப³சக்கு²கேஸு ஏதத³க்³கே³ ட²பிதோ. இதி நம் ‘‘தி³ப்³ப³சக்கு²ஸ்ஸ பரிகம்மம் ஆனிஸம்ஸம் உபக்கிலேஸம் புச்சி²ஸ்ஸாமா’’தி தி³ப்³ப³சக்கு²காவ பரிவாரேந்தி. ஸோபி தேஸம் ததே²வ புச்சி²தபுச்சி²தம் கதே²தி. தேன வுத்தம் ‘‘ஸப்³பே³ கோ² ஏதே, பி⁴க்க²வே, பி⁴க்கூ² தி³ப்³ப³சக்கு²கா’’தி.

புண்ணத்தே²ரோபி ப⁴க³வதா ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் த⁴ம்மகதி²கானம் யதி³த³ம் புண்ணோ மந்தாணிபுத்தோ’’தி (அ. நி. 1.196) த⁴ம்மகதி²கேஸு ஏதத³க்³கே³ ட²பிதோ. இதி நம் ‘‘த⁴ம்மகதா²ய ஸங்கே²பவித்தா²ரக³ம்பீ⁴ருத்தானவிசித்ரகதா²தீ³ஸு தம் தம் ஆகாரம் புச்சி²ஸ்ஸாமா’’தி த⁴ம்மகதி²காவ பரிவாரேந்தி. ஸோபி தேஸம் ‘‘ஆவுஸோ, த⁴ம்மகதி²கேன நாம ஆதி³தோ பரிஸம் வண்ணேதும் வட்டதி, மஜ்ஜே² ஸுஞ்ஞதம் பகாஸேதும், அந்தே சதுஸச்சவஸேன கூடம் க³ண்ஹிது’’ந்தி ஏவம் தம் தம் த⁴ம்மகதா²னயம் ஆசிக்க²தி. தேன வுத்தம் ‘‘ஸப்³பே³ கோ² ஏதே, பி⁴க்க²வே, பி⁴க்கூ² த⁴ம்மகதி²கா’’தி.

உபாலித்தே²ரோபி ப⁴க³வதா ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் வினயத⁴ரானம் யதி³த³ம் உபாலீ’’தி (அ. நி. 1.228) வினயத⁴ரேஸு ஏதத³க்³கே³ ட²பிதோ. இதி நம் ‘‘க³ருகலஹுகம் ஸதேகிச்ச²அதேகிச்ச²ம் ஆபத்தானாபத்திம் புச்சி²ஸ்ஸாமா’’தி வினயத⁴ராவ பரிவாரேந்தி. ஸோபி தேஸம் புச்சி²தபுச்சி²தம் ததே²வ கதே²தி. தேன வுத்தம் ‘‘ஸப்³பே³ கோ² ஏதே, பி⁴க்க²வே, பி⁴க்கூ² வினயத⁴ரா’’தி.

ஆனந்த³த்தே²ரோபி ப⁴க³வதா ‘‘ஏதத³க்³க³ம், பி⁴க்க²வே, மம ஸாவகானம் பி⁴க்கூ²னம் ப³ஹுஸ்ஸுதானம் யதி³த³ம் ஆனந்தோ³’’தி (அ. நி. 1.223) ப³ஹுஸ்ஸுதேஸு ஏதத³க்³கே³ ட²பிதோ. இதி நம் ‘‘த³ஸவித⁴ம் ப்³யஞ்ஜனபு³த்³தி⁴ம் அட்டு²ப்பத்திம் அனுஸந்தி⁴ம் புப்³பா³பரம் புச்சி²ஸ்ஸாமா’’தி ப³ஹுஸ்ஸுதாவ பரிவாரேந்தி. ஸோபி தேஸம் ‘‘இத³ம் ஏவம் வத்தப்³ப³ம், இத³ம் ஏவம் க³ஹேதப்³ப³’’ந்தி ஸப்³ப³ம் கதே²தி. தேன வுத்தம் ‘‘ஸப்³பே³ கோ² ஏதே, பி⁴க்க²வே, பி⁴க்கூ² ப³ஹுஸ்ஸுதா’’தி.

தே³வத³த்தோ பன பாபிச்சோ² இச்சா²பகதோ, தேன நம் ‘‘குலஸங்க³ண்ஹனபரிஹாரம் நானப்பகாரகம் கோஹஞ்ஞதம் புச்சி²ஸ்ஸாமா’’தி பாபிச்சா²வ பரிவாரேந்தி. ஸோபி தேஸம் தம் தம் நியாமம் ஆசிக்க²தி. தேன வுத்தம் ‘‘ஸப்³பே³ கோ² ஏதே, பி⁴க்க²வே, பி⁴க்கூ² பாபிச்சா²’’தி.

கஸ்மா பனேதே அவிதூ³ரே சங்கமிம்ஸூதி. ‘‘தே³வத³த்தோ ஸத்த²ரி பது³ட்ட²சித்தோ அனத்த²ம்பி காதும் உபக்கமேய்யா’’தி ஆரக்க²க்³க³ஹணத்த²ம். அத² தே³வத³த்தோ கஸ்மா சங்கமீதி? ‘‘அகாரகோ அயம், யதி³ காரகோ ப⁴வேய்ய, ந இத⁴ ஆக³ச்சே²ய்யா’’தி அத்தனோ கததோ³ஸபடிச்சா²த³னத்த²ம். கிம் பன தே³வத³த்தோ ப⁴க³வதோ அனத்த²ம் காதும் ஸமத்தோ², ப⁴க³வதோ வா ஆரக்க²கிச்சம் அத்தீ²தி? நத்தி². தேன வுத்தம் ‘‘அட்டா²னமேதம், ஆனந்த³, அனவகாஸோ, யம் ததா²க³தோ பரூபக்கமேன பரினிப்³பா³யேய்யா’’தி (சூளவ. 341). பி⁴க்கூ² பன ஸத்த²ரி கா³ரவேன ஆக³தா. தேனேவ ப⁴க³வா ஏவம் வத்வா ‘‘விஸ்ஸஜ்ஜேஹி, ஆனந்த³, பி⁴க்கு²ஸங்க⁴’’ந்தி விஸ்ஸஜ்ஜாபேஸி. பஞ்சமம்.