3. கி³ஞ்ஜகாவஸத²ஸுத்தவண்ணனா

97. ததியே தா⁴தும், பி⁴க்க²வேதி இதோ பட்டா²ய அஜ்ஜா²ஸயம் தா⁴தூதி தீ³பேதி. உப்பஜ்ஜதி ஸஞ்ஞாதி அஜ்ஜா²ஸயம் படிச்ச ஸஞ்ஞா உப்பஜ்ஜதி, தி³ட்டி² உப்பஜ்ஜதி, விதக்கோ உப்பஜ்ஜதீதி. இதா⁴பி ‘‘கச்சானோ பஞ்ஹம் புச்சி²ஸ்ஸதீ’’தி தஸ்ஸ ஓகாஸதா³னத்த²ம் ஏத்தாவதாவ தே³ஸனம் நிட்டா²பேஸி. அஸம்மாஸம்பு³த்³தே⁴ஸூதி ச²ஸு ஸத்தா²ரேஸு. ஸம்மாஸம்பு³த்³தா⁴தி மயமஸ்ம ஸம்மாஸம்பு³த்³தா⁴தி. கிம் படிச்ச பஞ்ஞாயதீதி கிஸ்மிம் ஸதி ஹோதீதி? ஸத்தா²ரானம் உப்பன்னம் தி³ட்டி²ம் புச்ச²தி. அஸம்மாஸம்பு³த்³தே⁴ஸு தேஸு ஸம்மாஸம்பு³த்³தா⁴ ஏதேதி ஏவம் உப்பன்னம் தித்தி²யஸாவகானம்பி தி³ட்டி²ம் புச்ச²தியேவ.

இதா³னி யஸ்மா தேஸம் அவிஜ்ஜாதா⁴தும் படிச்ச ஸா தி³ட்டி² ஹோதி, அவிஜ்ஜாதா⁴து ச நாம மஹதீ தா⁴து, தஸ்மா மஹதிம் தா⁴தும் படிச்ச தஸ்ஸா உப்பத்திம் தீ³பேந்தோ மஹதீ கோ² ஏஸாதிஆதி³மாஹ. ஹீனம், கச்சான, தா⁴தும் படிச்சாதி ஹீனம் அஜ்ஜா²ஸயம் படிச்ச. பணிதீ⁴தி சித்தட்ட²பனம். ஸா பனேஸா இத்தி²பா⁴வம் வா மக்கடாதி³திரச்சா²னபா⁴வம் வா பத்தே²ந்தஸ்ஸ உப்பஜ்ஜதி. ஹீனோ புக்³க³லோதி யஸ்ஸேதே ஹீனா த⁴ம்மா உப்பஜ்ஜந்தி, ஸப்³போ³ ஸோ புக்³க³லோபி ஹீனோ நாம. ஹீனா வாசாதி யா தஸ்ஸ வாசா, ஸாபி ஹீனா. ஹீனம் ஆசிக்க²தீதி ஸோ ஆசிக்க²ந்தோபி ஹீனமேவ ஆசிக்க²தி, தே³ஸேந்தோபி ஹீனமேவ தே³ஸேதீதி ஸப்³ப³பதா³னி யோஜேதப்³பா³னி. உபபத்தீதி த்³வே உபபத்தியோ படிலாபோ⁴ ச நிப்³ப³த்தி ச. நிப்³ப³த்தி ஹீனகுலாதி³வஸேன வேதி³தப்³பா³, படிலாபோ⁴ சித்துப்பாத³க்க²ணே ஹீனத்திகவஸேன. கத²ம்? தஸ்ஸ ஹி பஞ்சஸு நீசகுலேஸு உப்பஜ்ஜனதோ ஹீனா நிப்³ப³த்தி, வேஸ்ஸஸுத்³த³குலேஸு உப்பஜ்ஜனதோ மஜ்ஜி²மா, க²த்தியப்³ராஹ்மணகுலேஸு உப்பஜ்ஜனதோ பணீதா. த்³வாத³ஸாகுஸலசித்துப்பாதா³னம் பன படிலாப⁴தோ ஹீனோ படிலாபோ⁴, தேபூ⁴மகத⁴ம்மானம் படிலாப⁴தோ மஜ்ஜி²மோ, நவலோகுத்தரத⁴ம்மானம் படிலாப⁴தோ பணீதோ. இமஸ்மிம் பன டா²னே நிப்³ப³த்தியேவ அதி⁴ப்பேதாதி. ததியம்.