1. ஸத்ததா⁴துஸுத்தவண்ணனா

95. து³தியவக்³க³ஸ்ஸ பட²மே ஆபா⁴தா⁴தூதி ஆலோகதா⁴து. ஆலோகஸ்ஸபி ஆலோககஸிணே பரிகம்மம் கத்வா உப்பன்னஜ்ஜா²னஸ்ஸாபீதி ஸஹாரம்மணஸ்ஸ ஜா²னஸ்ஸ ஏதம் நாமம். ஸுப⁴தா⁴தூதி ஸுப⁴கஸிணே உப்பன்னஜ்ஜா²னவஸேன ஸஹாரம்மணஜ்ஜா²னமேவ. ஆகாஸானஞ்சாயதனமேவ ஆகாஸானஞ்சாயதனதா⁴து. ஸஞ்ஞாவேத³யிதனிரோதோ⁴வ ஸஞ்ஞாவேத³யிதனிரோத⁴தா⁴து. இதி ப⁴க³வா அனுஸந்தி⁴குஸலஸ்ஸ பி⁴க்கு²னோ தத்த² நிஸீதி³த்வா பஞ்ஹம் புச்சி²துகாமஸ்ஸ ஓகாஸம் தே³ந்தோ தே³ஸனம் நிட்டா²பேஸி.

அந்த⁴காரம் படிச்சாதி அந்த⁴காரோ ஹி ஆலோகேன பரிச்சி²ன்னோ, ஆலோகோபி அந்த⁴காரேன. அந்த⁴காரேன ஹி ஸோ பாகடோ ஹோதி. தஸ்மா ‘‘அந்த⁴காரம் படிச்ச பஞ்ஞாயதீ’’தி ஆஹ. அஸுப⁴ம் படிச்சாதி ஏத்தா²பி ஏஸேவ நயோ. அஸுப⁴ஞ்ஹி ஸுபே⁴ன, ஸுப⁴ஞ்ச அஸுபே⁴ன பரிச்சி²ன்னம், அஸுபே⁴ ஸதி ஸுப⁴ம் பஞ்ஞாயதி, தஸ்மா ஏவமாஹ. ரூபம் படிச்சாதி ரூபாவசரஸமாபத்திம் படிச்ச. ரூபாவசரஸமாபத்தியா ஹி ஸதி ஆகாஸானஞ்சாயதனஸமாபத்தி நாம ஹோதி ரூபஸமதிக்கமோ வா, தஸ்மா ஏவமாஹ. விஞ்ஞாணஞ்சாயதனதா⁴துஆதீ³ஸுபி ஏஸேவ நயோ. நிரோத⁴ம் படிச்சாதி சதுன்னம் க²ந்தா⁴னம் படிஸங்கா²அப்பவத்திம் படிச்ச. க²ந்த⁴னிரோத⁴ஞ்ஹி படிச்ச நிரோத⁴ஸமாபத்தி நாம பஞ்ஞாயதி, ந க²ந்த⁴பவத்திம், தஸ்மா ஏவமாஹ. ஏத்த² ச சதுன்னம் க²ந்தா⁴னம் நிரோதோ⁴வ நிரோத⁴ஸமாபத்தீதி வேதி³தப்³போ³.

கத²ம் ஸமாபத்தி பத்தப்³பா³தி கத²ம் ஸமாபத்தியோ கீதி³ஸா ஸமாபத்தியோ நாம ஹுத்வா பத்தப்³பா³தி? ஸஞ்ஞாஸமாபத்தி பத்தப்³பா³தி ஸஞ்ஞாய அத்தி²பா⁴வேன ஸஞ்ஞாஸமாபத்தியோ ஸஞ்ஞாஸமாபத்தியோ நாம ஹுத்வா பத்தப்³பா³. ஸங்கா²ராவஸேஸஸமாபத்தி பத்தப்³பா³தி ஸுகு²மஸங்கா²ரானம் அவஸிட்ட²தாய ஸங்கா²ராவஸேஸஸமாபத்தி நாம ஹுத்வா பத்தப்³பா³. நிரோத⁴ஸமாபத்தி பத்தப்³பா³தி நிரோதோ⁴வ நிரோத⁴ஸமாபத்தி நிரோத⁴ஸமாபத்தி நாம ஹுத்வா பத்தப்³பா³தி அத்தோ². பட²மம்.