7. ஸஞ்ஞானானத்தஸுத்தவண்ணனா

91. ஸத்தமே ரூபதா⁴தூதி ஆபாதே² பதிதம் அத்தனோ வா பரஸ்ஸ வா ஸாடகவேட²னாதி³வத்து²கம் ரூபாரம்மணம். ரூபஸஞ்ஞாதி சக்கு²விஞ்ஞாணஸம்பயுத்தா ஸஞ்ஞா. ரூபஸங்கப்போதி ஸம்படிச்ச²னாதீ³ஹி தீஹி சித்தேஹி ஸம்பயுத்தோ ஸங்கப்போ. ரூபச்ச²ந்தோ³தி ரூபே ச²ந்தி³கதட்டே²ன ச²ந்தோ³. ரூபபரிளாஹோதி ரூபே அனுட³ஹனட்டே²ன பரிளாஹோ. ரூபபரியேஸனாதி பரிளாஹே உப்பன்னே ஸந்தி³ட்ட²ஸம்ப⁴த்தே க³ஹேத்வா தஸ்ஸ ரூபஸ்ஸ படிலாப⁴த்தா²ய பரியேஸனா. ஏத்த² ச ஸஞ்ஞாஸங்கப்பச²ந்தா³ ஏகஜவனவாரேபி நானாஜவனவாரேபி லப்³ப⁴ந்தி, பரிளாஹபரியேஸனா பன நானாஜவனவாரேயேவ லப்³ப⁴ந்தீதி. ஏவம் கோ², பி⁴க்க²வே, தா⁴துனானத்தந்தி ஏத்த² ச ஏவம் ரூபாதி³னானாஸபா⁴வம் தா⁴தும் படிச்ச ரூபஸஞ்ஞாதி³னானாஸபா⁴வஸஞ்ஞா உப்பஜ்ஜதீதி இமினா நயேன அத்தோ² வேதி³தப்³போ³. ஸத்தமம்.