1.தா⁴துனானத்தஸுத்தவண்ணனா

85. தா⁴துஸம்யுத்தஸ்ஸ பட²மே நிஸ்ஸத்தட்ட²ஸுஞ்ஞதட்ட²ஸங்கா²தேன ஸபா⁴வட்டே²ன தா⁴தூதி லத்³த⁴னாமானம் த⁴ம்மானம் நானாஸபா⁴வோ தா⁴துனானத்தம். சக்கு²தா⁴தூதிஆதீ³ஸு சக்கு²பஸாதோ³ சக்கு²தா⁴து, ரூபாரம்மணம் ரூபதா⁴து, சக்கு²பஸாத³வத்து²கம் சித்தம் சக்கு²விஞ்ஞாணதா⁴து. ஸோதபஸாதோ³ ஸோததா⁴து, ஸத்³தா³ரம்மணம் ஸத்³த³தா⁴து, ஸோதபஸாத³வத்து²கம் சித்தம் ஸோதவிஞ்ஞாணதா⁴து. கா⁴னபஸாதோ³ கா⁴னதா⁴து, க³ந்தா⁴ரம்மணம் க³ந்த⁴தா⁴து, கா⁴னபஸாத³வத்து²கம் சித்தம் கா⁴னவிஞ்ஞாணதா⁴து. ஜிவ்ஹாபஸாதோ³ ஜிவ்ஹாதா⁴து, ரஸாரம்மணம் ரஸதா⁴து, ஜிவ்ஹாபஸாத³வத்து²கம் சித்தம் ஜிவ்ஹாவிஞ்ஞாணதா⁴து. காயபஸாதோ³ காயதா⁴து, போ²ட்ட²ப்³பா³ரம்மணம் போ²ட்ட²ப்³ப³தா⁴து, காயபஸாத³வத்து²கம் சித்தம் காயவிஞ்ஞாணதா⁴து. திஸ்ஸோ மனோதா⁴துயோ மனோதா⁴து, வேத³னாத³யோ தயோ க²ந்தா⁴ ஸுகு²மரூபானி நிப்³பா³னஞ்ச த⁴ம்மதா⁴து, ஸப்³ப³ம்பி மனோவிஞ்ஞாணம் மனோவிஞ்ஞாணதா⁴தூதி. ஏத்த² ச ஸோளஸ தா⁴துயோ காமாவசரா, அவஸானே த்³வே சதுபூ⁴மிகாதி. பட²மம்.