3. கஸ்ஸபகோ³த்தஸுத்தவண்ணனா

223. ததியே சே²தந்தி ஏகம் மிக³லுத்³த³கம். ஓவத³தீதி ஸோ கிர மிக³லுத்³த³கோ பாதோவ பு⁴ஞ்ஜித்வா ‘‘மிகே³ வதி⁴ஸ்ஸாமீ’’தி அரஞ்ஞம் பவிட்டோ² ஏகம் ரோஹிதமிக³ம் தி³ஸ்வா ‘‘ஸத்தியா நம் பஹரிஸ்ஸாமீ’’தி அனுப³ந்த⁴மானோ தே²ரஸ்ஸ பட²மஸுத்தே வுத்தனயேனேவ தி³வாவிஹாரம் நிஸின்னஸ்ஸ அவிதூ³ரேன பக்கமதி. அத² நம் தே²ரோ – ‘‘உபாஸக, பாணாதிபாதோ நாமேஸ அபாயஸம்வத்தனிகோ அப்பாயுகஸம்வத்தனிகோ, ஸக்கா அஞ்ஞேனபி கஸிவணிஜ்ஜாதி³கம்மேன தா³ரப⁴ரணம் காதும், மா ஏவரூபம் கக்க²ளகம்மம் கரோஹீ’’தி ஆஹ. ஸோபி ‘‘மஹாபம்ஸுகூலிகத்தே²ரோ கதே²தீ’’தி கா³ரவேன ட²த்வா ஸோதும் ஆரத்³தோ⁴. அத²ஸ்ஸ ஸோதுகாமதம் ஜனேஸ்ஸாமீதி தே²ரோ அங்கு³ட்ட²கம் ஜாலாபேஸி. ஸோ அக்கீ²ஹிபி பஸ்ஸதி, கண்ணேஹிபி ஸுணாதி, சித்தம் பனஸ்ஸ ‘‘அஸுகட்டா²னம் மிகோ³ க³தோ ப⁴விஸ்ஸதி, அஸுகதித்த²ம் ஓதிண்ணோ, தத்த² நம் க³ந்த்வா கா⁴தேத்வா யாவதி³ச்ச²கம் மம்ஸம் கா²தி³த்வா ஸேஸம் காஜேனாதா³ய க³ந்த்வா புத்தகே தோஸேஸ்ஸாமீ’’தி ஏவம் மிக³ஸ்ஸேவ அனுபத³ம் தா⁴வதி. ஏவம் விக்கி²த்தசித்தஸ்ஸ த⁴ம்மம் தே³ஸேந்தம் தே²ரம் ஸந்தா⁴ய வுத்தம் ‘‘ஓவத³தீ’’தி. அஜ்ஜ²பா⁴ஸீதி ‘‘அயம் தே²ரோ அதா³ரும் தச்ச²ந்தோ விய அகே²த்தே வப்பந்தோ விய அத்தனோபி கம்மம் நாஸேதி, ஏதஸ்ஸாபி சோதே³ஸ்ஸாமி ந’’ந்தி அபா⁴ஸி.

அப்பபஞ்ஞந்தி நிப்பஞ்ஞம். அசேதஸந்தி காரணஜானனஸமத்தே²ன சித்தேன ரஹிதம். மந்தோ³வாதி அந்த⁴பா³லோ விய. ஸுணாதீதி தவ த⁴ம்மகத²ம் ஸுணாதி. ந விஜானாதீதி அத்த²மஸ்ஸ ந ஜானாதி. ஆலோகேதீதி தவ புது²ஜ்ஜனிகஇத்³தி⁴யா ஜலந்தம் அங்கு³ட்ட²கம் ஆலோகேதி. ந பஸ்ஸதீதி ஏத்த² ‘‘நேவ தேலம் ந வட்டி ந தீ³பகபல்லிகா, தே²ரஸ்ஸ பன ஆனுபா⁴வேனாயம் ஜலதீ’’தி இமம் காரணம் ந பஸ்ஸதி. த³ஸ பஜ்ஜோதேதி த³ஸஸு அங்கு³லீஸு த³ஸ பதீ³பே. ரூபானீதி காரணரூபானி. சக்கூ²தி பஞ்ஞாசக்கு². ஸம்வேக³மாபாதீ³தி கிம் மே இமினாதி? வீரியம் பக்³க³ய்ஹ பரமவிவேகம் அரஹத்தமக்³க³ம் படிபஜ்ஜி. ததியம்.