3. ததியவக்³கோ³

1. ஸம்ப³ஹுலஸுத்தவண்ணனா

157. ததியவக்³க³ஸ்ஸ பட²மே ஜடண்டு³வேனாதி ஜடாசும்ப³டகேன. அஜினக்கி²பனிவத்தோ²தி ஸகு²ரம் அஜினசம்மம் ஏகம் நிவத்தோ² ஏகம் பாருதோ. உது³ம்ப³ரத³ண்ட³ந்தி அப்பிச்ச²பா⁴வப்பகாஸனத்த²ம் ஈஸகம் வங்கம் உது³ம்ப³ரத³ண்ட³ம் க³ஹேத்வா. ஏதத³வோசாதி லோகே ப்³ராஹ்மணஸ்ஸ வசனம் நாம ஸுஸ்ஸூஸந்தி, ப்³ராஹ்மணேஸுபி பப்³ப³ஜிதஸ்ஸ, பப்³ப³ஜிதேஸுபி மஹல்லகஸ்ஸாதி மஹல்லகப்³ராஹ்மணஸ்ஸ பப்³ப³ஜிதவேஸம் க³ஹேத்வா பதா⁴னபூ⁴மியம் கம்மம் கரோந்தே தே பி⁴க்கூ² உபஸங்கமித்வா ஹத்த²ம் உக்கி²பித்வா ஏதம் ‘‘த³ஹரா ப⁴வந்தோ’’திஆதி³வசனம் அவோச. ஓகம்பேத்வாதி ஹனுகேன உரம் பஹரந்தோ அதோ⁴னதம் கத்வா. ஜிவ்ஹம் நில்லாலேத்வாதி கப³ரமஹாஜிவ்ஹம் நீஹரித்வா உத்³த⁴மதோ⁴ உப⁴யபஸ்ஸேஸு ச லாலேத்வா. திவிஸாக²ந்தி திஸாக²ம். நலாடிகந்தி ப⁴குடிம், நலாடே உட்டி²தம் வலித்தயந்தி அத்தோ². பக்காமீதி தும்ஹே ஜானந்தானம் வசனம் அகத்வா அத்தனோவ தேலே பச்சிஸ்ஸதா²தி வத்வா ஏகம் மக்³க³ம் க³ஹேத்வா க³தோ. பட²மம்.

2. ஸமித்³தி⁴ஸுத்தவண்ணனா

158. து³தியே லாபா⁴ வத மே, ஸுலத்³த⁴ம் வத மேதி ஏவரூபஸ்ஸ ஸத்து² சேவ த⁴ம்மஸ்ஸ ச ஸப்³ரஹ்மசாரீனஞ்ச லத்³த⁴த்தா மய்ஹம் லாபா⁴ மய்ஹம் ஸுலத்³த⁴ந்தி. ஸோ கிராயஸ்மா பச்சா² மூலகம்மட்டா²னம் ஸம்மஸித்வா ‘‘அரஹத்தம் க³ஹேஸ்ஸாமீ’’தி பாஸாதி³கம் தாவ கம்மட்டா²னம் க³ஹேத்வா பு³த்³த⁴த⁴ம்மஸங்க⁴கு³ணே ஆவஜ்ஜேத்வா சித்தகல்லதம் உப்பாதே³த்வா சித்தம் ஹாஸேத்வா தோஸேத்வா நிஸின்னோ. தேனஸ்ஸ ஏவமஹோஸி. உபஸங்கமீதி ‘‘அயம் ஸமித்³தி⁴ பி⁴க்கு² பாஸாதி³கம் கம்மட்டா²னம் க³ஹேத்வா நிஸின்னஸதி³ஸோ, யாவ மூலகம்மட்டா²னம் க³ஹேத்வா அரஹத்தம் ந க³ண்ஹாதி, தாவஸ்ஸ அந்தராயம் கரிஸ்ஸாமீ’’தி உபஸங்கமி. க³ச்ச² த்வந்தி ஸத்தா² ஸகலஜம்பு³தீ³பம் ஓலோகேந்தோ ‘‘தஸ்மிம்யேவ டா²னே தஸ்ஸ கம்மட்டா²னம் ஸப்பாயம் ப⁴விஸ்ஸதீ’’தி அத்³த³ஸ, தஸ்மா ஏவமாஹ. ஸதிபஞ்ஞா ச மே பு³த்³தா⁴தி மயா ஸதி ச பஞ்ஞா ச ஞாதா. கரஸ்ஸு ரூபானீதி ப³ஹூனிபி விபி⁴ம்ஸகாரஹானி ரூபானி கரஸ்ஸு. நேவ மம் ப்³யாத⁴யிஸ்ஸஸீதி மம் நேவ வேத⁴யிஸ்ஸஸி ந கம்பஸ்ஸேஸி. து³தியம்.

3. கோ³தி⁴கஸுத்தவண்ணனா

159. ததியே இஸிகி³லிபஸ்ஸேதி இஸிகி³லிஸ்ஸ நாம பப்³ப³தஸ்ஸ பஸ்ஸே. காளஸிலாயந்தி காளவண்ணாய ஸிலாயம். ஸாமயிகம் சேதோவிமுத்திந்தி அப்பிதப்பிதக்க²ணே பச்சனீகத⁴ம்மேஹி விமுச்சதி, ஆரம்மணே ச அதி⁴முச்சதீதி லோகியஸமாபத்தி ஸாமயிகா சேதோவிமுத்தி நாம. பு²ஸீதி படிலபி⁴. பரிஹாயீதி கஸ்மா யாவ ச²ட்ட²ம் பரிஹாயி? ஸாபா³த⁴த்தா. தே²ரஸ்ஸ கிர வாதபித்தஸேம்ஹவஸேன அனுஸாயிகோ ஆபா³தோ⁴ அத்தி², தேன ஸமாதி⁴ஸ்ஸ ஸப்பாயே உபகாரகத⁴ம்மே பூரேதும் ந ஸக்கோதி, அப்பிதப்பிதாய ஸமாபத்தியா பரிஹாயதி.

யம்னூனாஹம் ஸத்த²ம் ஆஹரேய்யந்தி ஸோ கிர சிந்தேஸி, யஸ்மா பரிஹீனஜ்ஜா²னஸ்ஸ காலங்கரோதோ அனிப³த்³தா⁴ க³தி ஹோதி, அபரிஹீனஜ்ஜா²னஸ்ஸ நிப³த்³தா⁴ க³தி ஹோதி, ப்³ரஹ்மலோகே நிப்³ப³த்ததி, தஸ்மா ஸத்த²ம் ஆஹரிதுகாமோ அஹோஸி. உபஸங்கமீதி – ‘‘அயம் ஸமணோ ஸத்த²ம் ஆஹரிதுகாமோ, ஸத்தா²ஹரணஞ்ச நாமேதம் காயே ச ஜீவிதே ச அனபேக்க²ஸ்ஸ ஹோதி. யோ ஏவம் காயே ச ஜீவிதே ச அனபேக்கோ² ஹோதி, ஸோ மூலகம்மட்டா²னம் ஸம்மஸித்வா அரஹத்தம்பி க³ஹேதும் ஸமத்தோ² ஹோதி, மயா பன படிபா³ஹிதோபி ஏஸ ந ஓரமிஸ்ஸதி, ஸத்தா²ரா படிபா³ஹிதோ ஓரமிஸ்ஸதீ’’தி தே²ரஸ்ஸ அத்த²காமோ விய ஹுத்வா யேன ப⁴க³வா தேனுபஸங்கமி.

ஜலாதி ஜலமானா. பாதே³ வந்தா³மி சக்கு²மாதி பஞ்சஹி சக்கூ²ஹி சக்கு²மா தவ பாதே³ வந்தா³மி. ஜுதிந்த⁴ராதி ஆனுபா⁴வத⁴ரா. அப்பத்தமானஸோதி அப்பத்தஅரஹத்தோ. ஸேகோ²தி ஸீலாதீ³னி ஸிக்க²மானோ ஸகரணீயோ. ஜனே ஸுதாதி ஜனே விஸ்ஸுதா. ஸத்த²ம் ஆஹரிதம் ஹோதீதி தே²ரோ கிர ‘‘கிம் மய்ஹம் இமினா ஜீவிதேனா’’தி? உத்தானோ நிபஜ்ஜித்வா ஸத்தே²ன க³லனாளிம் சி²ந்தி³, து³க்கா² வேத³னா உப்பஜ்ஜிம்ஸு. தே²ரோ வேத³னம் விக்க²ம்பே⁴த்வா தம்யேவ வேத³னம் பரிக்³க³ஹேத்வா ஸதிம் உபட்ட²பேத்வா மூலகம்மட்டா²னம் ஸம்மஸந்தோ அரஹத்தம் பத்வா ஸமஸீஸீ ஹுத்வா பரினிப்³பா³யி. ஸமஸீஸீ நாம திவிதோ⁴ ஹோதி இரியாபத²ஸமஸீஸீ, ரோக³ஸமஸீஸீ, ஜீவிதஸமஸீஸீதி.

தத்த² யோ டா²னாதீ³ஸு இரியாபதே²ஸு அஞ்ஞதரம் அதி⁴ட்டா²ய – ‘‘இமம் அகோபேத்வாவ அரஹத்தம் பாபுணிஸ்ஸாமீ’’தி விபஸ்ஸனம் பட்ட²பேதி, அத²ஸ்ஸ அரஹத்தப்பத்தி ச இரியாபத²கோபனஞ்ச ஏகப்பஹாரேனேவ ஹோதி. அயம் இரியாபத²ஸமஸீஸீ நாம. யோ பன சக்கு²ரோகா³தீ³ஸு அஞ்ஞதரஸ்மிம் ஸதி – ‘‘இதோ அனுட்டி²தோவ அரஹத்தம் பாபுணிஸ்ஸாமீ’’தி விபஸ்ஸனம் பட்ட²பேதி, அத²ஸ்ஸ அரஹத்தப்பத்தி ச ரோக³தோ வுட்டா²னஞ்ச ஏகப்பஹாரேனேவ ஹோதி. அயம் ரோக³ஸமஸீஸீ நாம. கேசி பன தஸ்மிம்யேவ இரியாபதே² தஸ்மிஞ்ச ரோகே³ பரினிப்³பா³னவஸேனேத்த² ஸமஸீஸிதம் பஞ்ஞாபேந்தி. யஸ்ஸ பன ஆஸவக்க²யோ ச ஜீவிதக்க²யோ ச ஏகப்பஹாரேனேவ ஹோதி. அயம் ஜீவிதஸமஸீஸீ நாம. வுத்தம்பி சேதம் – ‘‘யஸ்ஸ புக்³க³லஸ்ஸ அபுப்³ப³ம் அசரிமம் ஆஸவபரியாதா³னஞ்ச ஹோதி ஜீவிதபரியாதா³னஞ்ச, அயம் வுச்சதி புக்³க³லோ ஸமஸீஸீ’’தி (பு. ப. 16).

ஏத்த² ச பவத்திஸீஸம் கிலேஸஸீஸந்தி த்³வே ஸீஸானி. தத்த² பவத்திஸீஸம் நாம ஜீவிதிந்த்³ரியம், கிலேஸஸீஸம் நாம அவிஜ்ஜா. தேஸு ஜீவிதிந்த்³ரியம் சுதிசித்தம் கே²பேதி, அவிஜ்ஜா மக்³க³சித்தம். த்³வின்னம் சித்தானம் ஏகதோ உப்பாதோ³ நத்தி². மக்³கா³னந்தரம் பன ப²லம், ப²லானந்தரம் ப⁴வங்க³ம், ப⁴வங்க³தோ வுட்டா²ய பச்சவேக்க²ணம், தம் பரிபுண்ணம் வா ஹோதி அபரிபுண்ணம் வா. திகி²ணேன அஸினா ஸீஸே சி²ஜ்ஜந்தேபி ஹி ஏகோ வா த்³வே வா பச்சவேக்க²ணவாரா அவஸ்ஸம் உப்பஜ்ஜந்தியேவ, சித்தானம் பன லஹுபரிவத்திதாய ஆஸவக்க²யோ ச ஜீவிதபரியாதா³னஞ்ச ஏகக்க²ணே விய பஞ்ஞாயதி.

ஸமூலம் தண்ஹமப்³பு³ய்ஹாதி அவிஜ்ஜாமூலேன ஸமூலகம் தண்ஹம் அரஹத்தமக்³கே³ன உப்பாடேத்வா. பரினிப்³பு³தோதி அனுபாதி³ஸேஸனிப்³பா³னேன பரினிப்³பு³தோ.

விவத்தக்க²ந்த⁴ந்தி பரிவத்தக்க²ந்த⁴ம். ஸேமானந்தி உத்தானம் ஹுத்வா ஸயிதம் ஹோதி. தே²ரோ பன கிஞ்சாபி உத்தானகோ ஸயிதோ, ததா²பிஸ்ஸ த³க்கி²ணேன பஸ்ஸேன பரிசிதஸயனத்தா ஸீஸம் த³க்கி²ணதோவ பரிவத்தித்வா டி²தம். தூ⁴மாயிதத்தந்தி தூ⁴மாயிதபா⁴வம். தஸ்மிம் ஹி க²ணே தூ⁴மவலாஹகா விய திமிரவலாஹகா விய ச உட்ட²ஹிம்ஸு. விஞ்ஞாணம் ஸமன்வேஸதீதி படிஸந்தி⁴சித்தம் பரியேஸதி. அப்பதிட்டி²தேனாதி படிஸந்தி⁴விஞ்ஞாணேன அப்பதிட்டி²தேன, அப்பதிட்டி²தகாரணாதி அத்தோ². பே³லுவபண்டு³வீணந்தி பே³லுவபக்கம் விய பண்டு³வண்ணம் ஸுவண்ணமஹாவீணம். ஆதா³யாதி கச்சே² ட²பேத்வா. உபஸங்கமீதி ‘‘கோ³தி⁴கத்தே²ரஸ்ஸ நிப்³ப³த்தட்டா²னம் ந ஜானாமி, ஸமணம் கோ³தமம் புச்சி²த்வா நிக்கங்கோ² ப⁴விஸ்ஸாமீ’’தி கு²த்³த³கதா³ரகவண்ணீ ஹுத்வா உபஸங்கமி. நாதி⁴க³ச்சா²மீதி ந பஸ்ஸாமி. ஸோகபரேதஸ்ஸாதி ஸோகேன பு²ட்ட²ஸ்ஸ. அப⁴ஸ்ஸதா²தி பாத³பிட்டி²யம் பதிதா. ததியம்.

4. ஸத்தவஸ்ஸானுப³ந்த⁴ஸுத்தவண்ணனா

160. சதுத்தே² ஸத்த வஸ்ஸானீதி புரே போ³தி⁴யா ச²ப்³ப³ஸ்ஸானி, போ³தி⁴தோ பச்சா² ஏகம் வஸ்ஸம். ஓதாராபேக்கோ²தி ‘‘ஸசே ஸமணஸ்ஸ கோ³தமஸ்ஸ காயத்³வாராதீ³ஸு கிஞ்சிதே³வ அனனுச்ச²விகம் பஸ்ஸாமி, சோதே³ஸ்ஸாமி ந’’ந்தி ஏவம் விவரம் அபேக்க²மானோ. அலப⁴மானோதி ரத²ரேணுமத்தம்பி அவக்க²லிதம் அபஸ்ஸந்தோ. தேனாஹ –

‘‘ஸத்த வஸ்ஸானி ப⁴க³வந்தம், அனுப³ந்தி⁴ம் பதா³பத³ம்;

ஓதாரம் நாதி⁴க³ச்சி²ஸ்ஸம், ஸம்பு³த்³த⁴ஸ்ஸ ஸதீமதோ’’தி. (ஸு. நி. 448);

உபஸங்கமீதி ‘‘அஜ்ஜ ஸமணம் கோ³தமம் அதிக³ஹேத்வா க³மிஸ்ஸாமீ’’தி உபஸங்கமி.

ஜா²யஸீதி ஜா²யந்தோ அவஜ்ஜா²யந்தோ நிஸின்னோஸீதி வத³தி. வித்தம் நு ஜீனோதி ஸதம் வா ஸஹஸ்ஸம் வா ஜிதோஸி நு. ஆகு³ம் நு கா³மஸ்மிந்தி, கிம் நு அந்தோகா³மே பமாணாதிக்கந்தம் பாபகம்மம் அகாஸி, யேன அஞ்ஞேஸம் முக²ம் ஓலோகேதும் அவிஸஹந்தோ அரஞ்ஞே விசரஸி? ஸக்கி²ந்தி மித்தபா⁴வம்.

பலிகா²யாதி க²ணித்வா. ப⁴வலோப⁴ஜப்பந்தி ப⁴வலோப⁴ஸங்கா²தம் தண்ஹம். அனாஸவோ ஜா²யாமீதி நித்தண்ஹோ ஹுத்வா த்³வீஹி ஜா²னேஹி ஜா²யாமி. பமத்தப³ந்தூ⁴தி மாரம் ஆலபதி. ஸோ ஹி யேகேசி லோகே பமத்தா, தேஸம் ப³ந்து⁴.

ஸசே மக்³க³ம் அனுபு³த்³த⁴ந்தி யதி³ தயா மக்³கோ³ அனுபு³த்³தோ⁴. அபேஹீதி அபயாஹி. அமச்சுதே⁴ய்யந்தி மச்சுனோ அனோகாஸபூ⁴தம் நிப்³பா³னம். பாரகா³மினோதி யேபி பாரம் க³தா, தேபி பாரகா³மினோ. யேபி பாரம் க³ச்சி²ஸ்ஸந்தி, யேபி பாரம் க³ந்துகாமா, தேபி பாரகா³மினோ.

விஸூகாயிகானீதி மாரவிஸூகானி. விஸேவிதானீதி விருத்³த⁴ஸேவிதானி, ‘‘அப்பமாயு மனுஸ்ஸானம், அச்சயந்தி அஹோரத்தா’’தி வுத்தே. ‘‘தீ³க⁴மாயு மனுஸ்ஸானம், நாச்சயந்தி அஹோரத்தா’’திஆதீ³னி படிலோமகாரணானி. விப்ப²ந்தி³தானீதி, தம்ஹி தம்ஹி காலே ஹத்தி²ராஜவண்ணஸப்பவண்ணாதி³த³ஸ்ஸனானி. நிப்³பே³ஜனீயாதி உக்கண்ட²னீயா.

அனுபரியகா³திஆதீ³ஸு கிஞ்சாபி அதீதவசனம் கதம், அத்தோ² பன விகப்பவஸேன வேதி³தப்³போ³. இத³ம் வுத்தம் ஹோதி – யதா² மேத³வண்ணம் பாஸாணம் வாயஸோ தி³ஸ்வா – ‘‘அபி நாமேத்த² முது³ம் விந்தே³ய்யாம, அபி அஸ்ஸாதோ³ ஸியா’’தி அனுபரிக³ச்சே²ய்ய, அத² ஸோ தத்த² அஸ்ஸாத³ம் அலபி⁴த்வாவ வாயஸோ ஏத்தோ அபக்கமேய்ய, ததோ பாஸாணா அபக³ச்சே²ய்ய, ஏவம் மயம்பி ஸோ காகோ விய ஸேலம் கோ³தமம் ஆஸஜ்ஜ அஸ்ஸாத³ம் வா ஸந்த²வம் வா அலப⁴ந்தா கோ³தமா நிப்³பி³ந்தி³த்வா அபக³ச்சா²ம. சதுத்த²ம்.

5. மாரதீ⁴துஸுத்தவண்ணனா

161. பஞ்சமே அபா⁴ஸித்வாதி ஏத்த² அ-காரோ நிபாதமத்தம், பா⁴ஸித்வாதி அத்தோ². அபா⁴ஸயித்வாதிபி பாடோ². உபஸங்கமிம்ஸூதி ‘‘கோ³பாலகதா³ரகம் விய த³ண்ட³கேன பூ⁴மிம் லேக²ம் த³த்வா அதிவிய து³ம்மனோ ஹுத்வா நிஸின்னோ. ‘கின்னு கோ² காரண’ந்தி? புச்சி²த்வா, ஜானிஸ்ஸாமா’’தி உபஸங்கமிம்ஸு.

ஸோசஸீதி சிந்தேஸி. ஆரஞ்ஞமிவ குஞ்ஜரந்தி யதா² அரஞ்ஞதோ பேஸிதக³ணிகாரஹத்தி²னியோ ஆரஞ்ஞகம் குஞ்ஜரம் இத்தி²குத்தத³ஸ்ஸனேன பலோபே⁴த்வா ப³ந்தி⁴த்வா ஆனயந்தி, ஏவம் ஆனயிஸ்ஸாம. மாரதே⁴ய்யந்தி தேபூ⁴மகவட்டம்.

உபஸங்கமிம்ஸூதி – ‘‘தும்ஹே தோ²கம் அதி⁴வாஸேத², மயம் தம் ஆனேஸ்ஸாமா’’தி பிதரம் ஸமஸ்ஸாஸேத்வா உபஸங்கமிம்ஸு. உச்சாவசாதி நானாவிதா⁴. ஏகஸதம் ஏகஸதந்தி ஏகேகம் ஸதம் ஸதம் கத்வா. குமாரிவண்ணஸதந்தி இமினா நயேன குமாரிஅத்தபா⁴வானம் ஸதம்.

அத்த²ஸ்ஸ பத்திம் ஹத³யஸ்ஸ ஸந்திந்தி, த்³வீஹிபி பதே³ஹி அரஹத்தமேவ கதே²ஸி. ஸேனந்தி கிலேஸஸேனம். ஸா ஹி பியரூபஸாதரூபா நாம. ஏகாஹம் ஜா²யந்தி ஏகோ அஹம் ஜா²யந்தோ. ஸுக²மனுபோ³தி⁴ந்தி அரஹத்தஸுக²ம் அனுபு³ஜ்ஜி²ம். இத³ம் வுத்தம் ஹோதி – பியரூபம் ஸாதரூபம் ஸேனம் ஜினித்வா அஹம் ஏகோ ஜா²யந்தோ ‘‘அத்த²ஸ்ஸ பத்திம் ஹத³யஸ்ஸ ஸந்தி’’ந்தி ஸங்க²ம் க³தம் அரஹத்தஸுக²ம் அனுபு³ஜ்ஜி²ம். தஸ்மா ஜனேன மித்தஸந்த²வம் ந கரோமி, தேனேவ ச மே காரணேன கேனசி ஸத்³தி⁴ம் ஸக்கீ² ந ஸம்பஜ்ஜதீதி.

கத²ம்விஹாரீப³ஹுலோதி கதமேன விஹாரேன ப³ஹுலம் விஹரந்தோ. அலத்³தா⁴தி அலபி⁴த்வா. யோதி நிபாதமத்தம். இத³ம் வுத்தம் ஹோதி – கதமேன ஜா²னேன ப³ஹுலம் ஜா²யந்தம் தம் புக்³க³லம் காமஸஞ்ஞா அலபி⁴த்வாவ பரிபா³ஹிரா ஹோந்தீதி.

பஸ்ஸத்³த⁴காயோதி சதுத்த²ஜ்ஜா²னேன அஸ்ஸாஸபஸ்ஸாஸகாயஸ்ஸ பஸ்ஸத்³த⁴த்தா பஸ்ஸத்³த⁴காயோ. ஸுவிமுத்தசித்தோதி அரஹத்தப²லவிமுத்தியா ஸுட்டு² விமுத்தசித்தோ. அஸங்க²ரானோதி தயோ கம்மாபி⁴ஸங்கா²ரே அனபி⁴ஸங்க²ரோந்தோ. அனோகோதி அனாலயோ. அஞ்ஞாய த⁴ம்மந்தி சதுஸச்சத⁴ம்மம் ஜானித்வா. அவிதக்கஜா²யீதி அவிதக்கேன சதுத்த²ஜ்ஜா²னேன ஜா²யந்தோ. ந குப்பதீதிஆதீ³ஸு தோ³ஸேன ந குப்பதி, ராகே³ன ந ஸரதி, மோஹேன ந தீ²னோ. இமேஸு தீஸு மூலகிலேஸேஸு க³ஹிதேஸு தி³யட்³ட⁴கிலேஸஸஹஸ்ஸம் க³ஹிதமேவ ஹோதி. பட²மபதே³ன வா ப்³யாபாத³னீவரணம் க³ஹிதம், து³தியேன காமச்ச²ந்த³னீவரணம், ததியேன தி²னம் ஆதி³ம் கத்வா ஸேஸனீவரணானி. இதி இமினா நீவரணப்பஹானேன கீ²ணாஸவம் த³ஸ்ஸேதி.

பஞ்சோக⁴திண்ணோதி பஞ்சத்³வாரிகம் கிலேஸோக⁴ம் திண்ணோ. ச²ட்ட²ந்தி மனோத்³வாரிகம்பி ச²ட்ட²ம் கிலேஸோக⁴ம் அதரி. பஞ்சோக⁴க்³க³ஹணேன வா பஞ்சோரம்பா⁴கி³யானி ஸம்யோஜனானி, ச²ட்ட²க்³க³ஹணேன பஞ்சுத்³த⁴ம்பா⁴கி³யானி வேதி³தப்³பா³னி. க³ணஸங்க⁴சாரீதி க³ணே ச ஸங்கே⁴ ச சரதீதி ஸத்தா² க³ணஸங்க⁴சாரீ நாம. அத்³தா⁴ சரிஸ்ஸந்தீதி அஞ்ஞேபி ஸத்³தா⁴ ப³ஹுஜனா ஏகம்ஸேன சரிஸ்ஸந்தி. அயந்தி அயம் ஸத்தா². அனோகோதி அனாலயோ.

அச்சே²ஜ்ஜ நேஸ்ஸதீதி அச்சி²ந்தி³த்வா நயிஸ்ஸதி, மச்சுராஜஸ்ஸ ஹத்த²தோ அச்சி²ந்தி³த்வா நிப்³பா³னபாரம் நயிஸ்ஸதீதி வுத்தம் ஹோதி. நயமானானந்தி நயமானேஸு.

ஸேலம்வ ஸிரஸூஹச்ச, பாதாலே கா³த⁴மேஸதா²தி மஹந்தம் கூடாகா³ரப்பமாணம் ஸிலம் ஸீஸே ட²பேத்வா பாதாலே பதிட்ட²க³வேஸனம் விய. கா²ணும்வ உரஸாஸஜ்ஜாதி உரஸி கா²ணும் பஹரித்வா விய. அபேதா²தி அபக³ச்ச²த². இமஸ்மிம் டா²னே ஸங்கீ³திகாரா ‘‘இத³மவோசா’’தி தே³ஸனம் நிட்ட²பேத்வா த³த்³த³ல்லமானாதி கா³த²ம் ஆஹம்ஸு. தத்த² த³த்³த³ல்லமானாதி அதிவிய ஜலமானா ஸோப⁴மானா. ஆக³ஞ்சு²ந்தி ஆக³தா. பனுதீ³தி நீஹரி. தூலம் ப⁴ட்ட²ம்வ மாலுதோதி யதா² ப²லதோ ப⁴ட்ட²ம் ஸிம்ப³லிதூலம் வா போடகிதூலம் வா வாதோ பனுத³தி நீஹரதி, ஏவம் பனுதீ³தி. பஞ்சமம்.

ததியோ வக்³கோ³.

இதி ஸாரத்த²ப்பகாஸினியா

ஸம்யுத்தனிகாய-அட்ட²கதா²ய

மாரஸம்யுத்தவண்ணனா நிட்டி²தா.