4. மாரஸம்யுத்தம்

1. பட²மவக்³கோ³

1. தபோகம்மஸுத்தவண்ணனா

137. மாரஸம்யுத்தஸ்ஸ பட²மே உருவேலாயம் விஹரதீதி படிவித்³த⁴ஸப்³ப³ஞ்ஞுதஞ்ஞாணோ உருவேலகா³மம் உபனிஸ்ஸாய விஹரதி. பட²மாபி⁴ஸம்பு³த்³தோ⁴தி அபி⁴ஸம்பு³த்³தோ⁴ ஹுத்வா பட²மம் அந்தோஸத்தாஹஸ்மிம்யேவ. து³க்கரகாரிகாயாதி ச²ப்³ப³ஸ்ஸானி கதாய து³க்கரகாரிகாய. மாரோ பாபிமாதி அத்தனோ விஸயம் அதிக்கமிதும் படிபன்னே ஸத்தே மாரேதீதி மாரோ. பாபே நியோஜேதி, ஸயம் வா பாபே நியுத்தோதி பாபிமா. அஞ்ஞானிபிஸ்ஸ கண்ஹோ, அதி⁴பதி, வஸவத்தீ, அந்தகோ, நமுசி, பமத்தப³ந்தூ⁴திஆதீ³னி ப³ஹூனி நாமானி, இத⁴ பன நாமத்³வயமேவ க³ஹிதம். உபஸங்கமீதி – ‘‘அயம் ஸமணோ கோ³தமோ ‘முத்தோஸ்மீ’தி மஞ்ஞதி, அமுத்தபா⁴வமஸ்ஸ கதே²ஸ்ஸாமீ’’தி சிந்தேத்வா உபஸங்கமி.

தபோகம்மா அபக்கம்மாதி தபோகம்மதோ அபக்கமித்வா. அபரத்³தோ⁴தி ‘‘தூ³ரே த்வம் ஸுத்³தி⁴மக்³கா³’’தி வத³தி. அமரம் தபந்தி அமரதபம் அமரபா⁴வத்தா²ய கதம் லூக²தபம், அத்தகிலமதா²னுயோகோ³. ஸப்³பா³னத்தா²வஹம் ஹோதீதி, ‘‘ஸப்³ப³ம் தபம் மய்ஹம் அத்தா²வஹம் ந ப⁴வதீ’’தி ஞத்வா. பி²யாரித்தம்வ த⁴ம்மனீதி அரஞ்ஞே த²லே பி²யாரித்தம் விய. இத³ம் வுத்தம் ஹோதி – யதா² அரஞ்ஞே த²லே நாவம் ட²பேத்வா ப⁴ண்ட³ஸ்ஸ பூரேத்வா மஹாஜனா அபி⁴ரூஹித்வா பி²யாரித்தம் க³ஹேத்வா ஸம்கட்³டே⁴ய்யும் சேவ உப்பீலேய்யும் ச, ஸோ மஹாஜனஸ்ஸ வாயாமோ ஏகங்கு³லத்³வங்கு³லமத்தம்பி நாவாய க³மனம் அஸாதே⁴ந்தோ நிரத்த²கோ ப⁴வேய்ய ந அனத்தா²வஹோ, ஏவமேவ அஹம் ‘ஸப்³ப³ம் அமரம் தபம் அனத்தா²வஹம் ஹோதீ’தி ஞத்வா விஸ்ஸஜ்ஜேஸிந்தி.

இதா³னி தம் அமரம் தபம் பஹாய யேன மக்³கே³ன பு³த்³தோ⁴ ஜாதோ, தம் த³ஸ்ஸேந்தோ ஸீலந்திஆதி³மாஹ. தத்த² ஸீலந்தி வசனேன ஸம்மாவாசாகம்மந்தாஜீவா க³ஹிதா, ஸமாதி⁴னா ஸம்மாவாயாமஸதிஸமாத⁴யோ, பஞ்ஞாய ஸம்மாதி³ட்டி²ஸங்கப்பா. மக்³க³ம் போ³தா⁴ய பா⁴வயந்தி இமம் அட்ட²ங்கி³கமேவ அரியமக்³க³ம் போ³த⁴த்தா²ய பா⁴வயந்தோ. ஏத்த² ச போ³தா⁴யாதி மக்³க³த்தா²ய. யதா² ஹி யாகு³த்தா²ய யாகு³மேவ பசந்தி, பூவத்தா²ய பூவமேவ பசந்தி, ந அஞ்ஞம் கிஞ்சி கரோந்தி, ஏவம் மக்³க³மேவ மக்³க³த்தா²ய பா⁴வேதி. தேனாஹ ‘‘மக்³க³ம் போ³தா⁴ய பா⁴வய’’ந்தி. பரமம் ஸுத்³தி⁴ந்தி அரஹத்தம். நிஹதோதி த்வம் மயா நிஹதோ பராஜிதோ. பட²மம்.

2. ஹத்தி²ராஜவண்ணஸுத்தவண்ணனா

138. து³தியே ரத்தந்த⁴காரதிமிஸாயந்தி ரத்திம் அந்த⁴பா⁴வகாரகே மஹாதமே சதுரங்கே³ தமஸி. அப்³போ⁴காஸே நிஸின்னோ ஹோதீதி க³ந்த⁴குடிதோ நிக்க²மித்வா சங்கமனகோடியம் பாஸாணப²லகே மஹாசீவரம் ஸீஸே ட²பேத்வா பதா⁴னம் பரிக்³க³ண்ஹமானோ நிஸின்னோ ஹோதி.

நனு ச ததா²க³தஸ்ஸ அபா⁴விதோ வா மக்³கோ³, அப்பஹீனா வா கிலேஸா, அப்படிவித்³த⁴ம் வா அகுப்பம், அஸச்சி²கதோ வா நிரோதோ⁴ நத்தி², கஸ்மா ஏவமகாஸீதி? அனாக³தே குலபுத்தானம் அங்குஸத்த²ம். ‘‘அனாக³தே ஹி குலபுத்தா மயா க³தமக்³க³ம் ஆவஜ்ஜித்வா அப்³போ⁴காஸவாஸம் வஸிதப்³ப³ம் மஞ்ஞமானா பதா⁴னகம்மம் கரிஸ்ஸந்தீ’’தி ஸம்பஸ்ஸமானோ ஸத்தா² ஏவமகாஸி. மஹாதி மஹந்தோ. அரிட்ட²கோதி காளகோ. மணீதி பாஸாணோ. ஏவமஸ்ஸ ஸீஸம் ஹோதீதி ஏவரூபம் தஸ்ஸ காளவண்ணம் கூடாகா³ரப்பமாணம் மஹாபாஸாணஸதி³ஸம் ஸீஸம் ஹோதி.

ஸுபா⁴ஸுப⁴ந்தி தீ³க⁴மத்³தா⁴னம் ஸம்ஸரந்தோ ஸுந்த³ராஸுந்த³ரம் வண்ணம் கத்வா ஆக³தோஸீதி வத³தி. அத² வா ஸம்ஸரந்தி ஸம்ஸரந்தோ ஆக³ச்ச²ந்தோ. தீ³க⁴மத்³தா⁴னந்தி வஸவத்திட்டா²னதோ யாவ உருவேலாய தீ³க⁴மக்³க³ம், புரே போ³தா⁴ய வா ச²ப்³ப³ஸ்ஸானி து³க்கரகாரிகஸமயஸங்கா²தம் தீ³க⁴காலம். வண்ணம் கத்வா ஸுபா⁴ஸுப⁴ந்தி ஸுந்த³ரஞ்ச அஸுந்த³ரஞ்ச நானப்பகாரம் வண்ணம் கத்வா அனேகவாரம் மம ஸந்திகம் ஆக³தோஸீதி அத்தோ². ஸோ கிர வண்ணோ நாம நத்தி², யேன வண்ணேன மாரோ விபி⁴ம்ஸகத்தா²ய ப⁴க³வதோ ஸந்திகம் ந ஆக³தபுப்³போ³. தேன தம் ப⁴க³வா ஏவமாஹ. அலம் தே தேனாதி அலம் துய்ஹம் ஏதேன மாரவிபி⁴ம்ஸாகாரத³ஸ்ஸனப்³யாபாரேன. து³தியம்.

3. ஸுப⁴ஸுத்தவண்ணனா

139. ததியே ஸுஸம்வுதாதி ஸுபிஹிதா. ந தே மாரவஸானுகா³தி, மார, தே துய்ஹம் வஸானுகா³ ந ஹோந்தி. ந தே மாரஸ்ஸ ப³த்³த⁴கூ³தி தே துய்ஹம் மாரஸ்ஸ ப³த்³த⁴சரா ஸிஸ்ஸா அந்தேவாஸிகா ந ஹோந்தி. ததியம்.

4. பட²மமாரபாஸஸுத்தவண்ணனா

140. சதுத்தே² யோனிஸோ மனஸிகாராதி உபாயமனஸிகாரேன. யோனிஸோ ஸம்மப்பதா⁴னாதி உபாயவீரியேன காரணவீரியேன. விமுத்தீதி அரஹத்தப²லவிமுத்தி. அஜ்ஜ²பா⁴ஸீதி ‘‘அயம் அத்தனா வீரியம் கத்வா அரஹத்தம் பத்வாபி ந துஸ்ஸதி, இதா³னி அஞ்ஞேஸம்பி ‘பாபுணாதா²’தி உஸ்ஸாஹம் கரோதி, படிபா³ஹேஸ்ஸாமி ந’’ந்தி சிந்தேத்வா அபா⁴ஸி.

மாரபாஸேனாதி கிலேஸபாஸேன. யே தி³ப்³பா³ யே ச மானுஸாதி யே தி³ப்³பா³ காமகு³ணஸங்கா²தா மானுஸா காமகு³ணஸங்கா²தா ச மாரபாஸா நாம அத்தி², ஸப்³பே³ஹி தேஹி த்வம் ப³த்³தோ⁴தி வத³தி. மாரப³ந்த⁴னப³த்³தோ⁴தி மாரப³ந்த⁴னேன ப³த்³தோ⁴, மாரப³ந்த⁴னே வா ப³த்³தோ⁴. ந மே ஸமண மோக்க²ஸீதி ஸமண த்வம் மம விஸயதோ ந முச்சிஸ்ஸஸி. சதுத்த²ம்.

5. து³தியமாரபாஸஸுத்தவண்ணனா

141. பஞ்சமே முத்தாஹந்தி முத்தோ அஹம். புரிமம் ஸுத்தம் அந்தோவஸ்ஸே வுத்தம், இத³ம் பன பவாரேத்வா வுட்ட²வஸ்ஸகாலே. சாரிகந்தி அனுபுப்³ப³க³மனசாரிகம். (பவாரேத்வா) தி³வஸே தி³வஸே யோஜனபரமம் க³ச்ச²ந்தா சரதா²தி வத³தி. மா ஏகேன த்³வேதி ஏகமக்³கே³ன த்³வே ஜனா மா அக³மித்த². ஏவஞ்ஹி க³தேஸு ஏகஸ்மிம் த⁴ம்மம் தே³ஸேந்தே, ஏகேன துண்ஹீபூ⁴தேன டா²தப்³ப³ம் ஹோதி. தஸ்மா ஏவமாஹ.

ஆதி³கல்யாணந்தி ஆதி³ம்ஹி கல்யாணம் ஸுந்த³ரம் ப⁴த்³த³கம். ததா² மஜ்ஜ²பரியோஸானேஸு. ஆதி³மஜ்ஜ²பரியோஸானஞ்ச நாமேதம் ஸாஸனஸ்ஸ ச தே³ஸனாய ச வஸேன து³வித⁴ம். தத்த² ஸாஸனஸ்ஸ ஸீலம் ஆதி³, ஸமத²விபஸ்ஸனாமக்³கா³ மஜ்ஜ²ம், ப²லனிப்³பா³னானி பரியோஸானம். ஸீலஸமாத⁴யோ வா ஆதி³, விபஸ்ஸனாமக்³கா³ மஜ்ஜ²ம், ப²லனிப்³பா³னானி பரியோஸானம். ஸீலஸமாதி⁴விபஸ்ஸனா வா ஆதி³, மக்³கோ³ மஜ்ஜ²ம், ப²லனிப்³பா³னானி பரியோஸானம். தே³ஸனாய பன சதுப்பதி³காய கா³தா²ய தாவ பட²மபாதோ³ ஆதி³, து³தியததியா மஜ்ஜ²ம், சதுத்தோ² பரியோஸானம். பஞ்சபத³ச²ப்பதா³னம் பட²மபாதோ³ ஆதி³, அவஸானபாதோ³ பரியோஸானம், அவஸேஸா மஜ்ஜ²ம். ஏகானுஸந்தி⁴கஸுத்தஸ்ஸ நிதா³னம் ஆதி³, ‘‘இத³மவோசா’’தி பரியோஸானம், ஸேஸம் மஜ்ஜ²ம். அனேகானுஸந்தி⁴கஸ்ஸ மஜ்ஜே² ப³ஹூபி அனுஸந்தி⁴ மஜ்ஜ²மேவ, நிதா³னம் ஆதி³, ‘‘இத³மவோசா’’தி பரியோஸானம்.

ஸாத்த²ந்தி ஸாத்த²கம் கத்வா தே³ஸேத². ஸப்³யஞ்ஜனந்தி ப்³யஞ்ஜனேஹி சேவ பதே³ஹி ச பரிபூரம் கத்வா தே³ஸேத². கேவலபரிபுண்ணந்தி ஸகலபரிபுண்ணம். பரிஸுத்³த⁴ந்தி நிருபக்கிலேஸம். ப்³ரஹ்மசரியந்தி ஸிக்க²த்தயஸங்க³ஹம் ஸாஸனப்³ரஹ்மசரியம். பகாஸேதா²தி ஆவிகரோத².

அப்பரஜக்க²ஜாதிகாதி பஞ்ஞாசக்கு²ம்ஹி அப்பகிலேஸரஜஸபா⁴வா, து³கூலஸாணியா படிச்ச²ன்னா விய சதுப்பதி³ககா³தா²பரியோஸானே அரஹத்தம் பத்தும் ஸமத்தா² ஸந்தீதி அத்தோ². அஸ்ஸவனதாதி அஸ்ஸவனதாய. பரிஹாயந்தீதி அலாப⁴பரிஹானியா த⁴ம்மதோ பரிஹாயந்தி. ஸேனானிக³மோதி பட²மகப்பிகானம் ஸேனாய நிவிட்டோ²காஸே பதிட்டி²தகா³மோ, ஸுஜாதாய வா பிது ஸேனானீ நாம நிக³மோ. தேனுபஸங்கமிஸ்ஸாமீதி நாஹம் தும்ஹே உய்யோஜேத்வா பரிவேணாதீ³னி காரேத்வா உபட்டா²காதீ³ஹி பரிசரியமானோ விஹரிஸ்ஸாமி, திண்ணம் பன ஜடிலானம் அட்³டு⁴ட்³டா⁴னி பாடிஹாரியஸஹஸ்ஸானி த³ஸ்ஸேத்வா த⁴ம்மமேவ தே³ஸேதும் உபஸங்கமிஸ்ஸாமீதி. தேனுபஸங்கமீதி, ‘‘அயம் ஸமணோ கோ³தமோ மஹாயுத்³த⁴ம் விசாரேந்தோ விய, ‘மா ஏகேன த்³வே அக³மித்த², த⁴ம்மம் தே³ஸேதா²’தி ஸட்டி² ஜனே உய்யோஜேதி, இமஸ்மிம் பன ஏகஸ்மிம்பி த⁴ம்மம் தே³ஸேந்தே மய்ஹம் சித்தஸ்ஸாத³ம் நத்தி², ஏவம் ப³ஹூஸு தே³ஸேந்தேஸு குதோ ப⁴விஸ்ஸதி, படிபா³ஹாமி ந’’ந்தி சிந்தேத்வா உபஸங்கமி. பஞ்சமம்.

6. ஸப்பஸுத்தவண்ணனா

142. ச²ட்டே² ஸோண்டி³காகிலஞ்ஜந்தி ஸுராகாரகானம் பிட்ட²பத்த²ரணககிலஞ்ஜம். கோஸலிகா கம்ஸபாதீதி கோஸலரஞ்ஞோ ரத²சக்கப்பமாணா பரிபோ⁴க³பாதி. க³ளக³ளாயந்தேதி க³ஜ்ஜந்தே. கம்மாரக³க்³க³ரியாதி கம்மாருத்³த⁴னபணாளியா. த⁴மமானாயாதி ப⁴ஸ்தவாதேன பூரியமானாய. இதி விதி³த்வாதி – ‘‘ஸமணோ கோ³தமோ பதா⁴னமனுயுத்தோ ஸுகே²ன நிஸின்னோ, க⁴ட்டயிஸ்ஸாமி ந’’ந்தி வுத்தப்பகாரம் அத்தபா⁴வம் மாபேத்வா நியாமபூ⁴மியம் இதோ சிதோ ச ஸஞ்சரந்தம் விஜ்ஜுலதாலோகேன தி³ஸ்வா, ‘‘கோ நு கோ² ஏஸோ ஸத்தோ’’தி? ஆவஜ்ஜேந்தோ, ‘‘மாரோ அய’’ந்தி ஏவம் விதி³த்வா.

ஸுஞ்ஞகே³ஹானீதி ஸுஞ்ஞாகா³ரானி. ஸேய்யாதி ஸேய்யத்தா²ய. ட²ஸ்ஸாமி சங்கமிஸ்ஸாமி நிஸீதி³ஸ்ஸாமி நிபஜ்ஜிஸ்ஸாமீதி ஏதத³த்தா²ய யோ ஸுஞ்ஞாகா³ரானி ஸேவதீதி அத்தோ². ஸோ முனி அத்தஸஞ்ஞதோதி ஸோ பு³த்³த⁴முனி ஹத்த²பாத³குக்குச்சாபா⁴வேன ஸம்யதத்தபா⁴வோ. வோஸ்ஸஜ்ஜ சரேய்ய தத்த² ஸோதி ஸோ தஸ்மிம் அத்தபா⁴வே ஆலயம் நிகந்திம் வோஸ்ஸஜ்ஜித்வா பஹாய சரேய்ய. பதிரூபம் ஹி ததா²வித⁴ஸ்ஸ தந்தி தாதி³ஸஸ்ஸ தம்ஸண்டி²தஸ்ஸ பு³த்³த⁴முனினோ தம் அத்தபா⁴வே நிகந்திம் வோஸ்ஸஜ்ஜித்வா சரணம் நாம பதிரூபம் யுத்தம் அனுச்ச²விகம்.

சரகாதி ஸீஹப்³யக்³கா⁴தி³கா ஸஞ்சரணஸத்தா. பே⁴ரவாதி ஸவிஞ்ஞாணகஅவிஞ்ஞாணகபே⁴ரவா. தத்த² ஸவிஞ்ஞாணகா ஸீஹப்³யக்³கா⁴த³யோ, அவிஞ்ஞாணகா ரத்திபா⁴கே³ கா²ணுவம்மிகாத³யோ. தேபி ஹி தஸ்மிம் காலே யக்கா² விய உபட்ட²ஹந்தி, ரஜ்ஜுவல்லியாதீ³னி ஸப்³பா³னி ஸப்பா விய உபட்ட²ஹந்தி. தத்தா²தி தேஸு பே⁴ரவேஸு ஸுஞ்ஞாகா³ரக³தோ பு³த்³த⁴முனி லோமசலனமத்தகம்பி ந கரோதி.

இதா³னி அட்டா²னபரிகப்பம் த³ஸ்ஸேந்தோ நப⁴ம் ப²லேய்யாதிஆதி³மாஹ. தத்த² ப²லேய்யாதி காகபத³ம் விய ஹீரஹீரஸோ ப²லேய்ய. சலேய்யாதி போக்க²ரபத்தே வாதாஹதோ உத³கபி³ந்து³ விய சலேய்ய. ஸல்லம்பி சே உரஸி பகப்பயேய்யுந்தி திகி²ணஸத்திஸல்லம் சேபி உரஸ்மிம் சாரேயேய்யும். உபதீ⁴ஸூதி க²ந்தூ⁴பதீ⁴ஸு. தாணம் ந கரோந்தீதி திகி²ணே ஸல்லே உரஸ்மிம் சாரியமானே ப⁴யேன கு³ம்ப³ந்தரகந்த³ராதீ³னி பவிஸந்தா தாணம் கரோந்தி நாம. பு³த்³தா⁴ பன ஸமுச்சி²ன்னஸப்³ப³ப⁴யா ஏவரூபம் தாணம் நாம ந கரோந்தி. ச²ட்ட²ம்.

7. ஸுபதிஸுத்தவண்ணனா

143. ஸத்தமே பாதே³ பக்கா²லேத்வாதி உதுகா³ஹாபனத்த²ம் தோ⁴வித்வா. பு³த்³தா⁴னம் பன ஸரீரே ரஜோஜல்லம் ந உபலிம்பதி, உத³கம்பி போக்க²ரபத்தே பக்கி²த்தம் விய விவட்டித்வா க³ச்ச²தி. அபிச கோ² தோ⁴தபாத³கே கே³ஹே பாதே³ தோ⁴வித்வா பவிஸனம் பப்³ப³ஜிதானம் வத்தம். தத்த² பு³த்³தா⁴னம் வத்தபே⁴தோ³ நாம நத்தி², வத்தஸீஸே பன ட²த்வா தோ⁴வந்தி. ஸசே ஹி ததா²க³தோ நேவ ந்ஹாயேய்ய, ந பாதே³ தோ⁴வேய்ய, ‘‘நாயம் மனுஸ்ஸோ’’தி வதே³ய்யும். தஸ்மா மனுஸ்ஸகிரியம் அமுஞ்சந்தோ தோ⁴வதி. ஸதோ ஸம்பஜானோதி ஸோப்பபரிக்³கா³ஹகேன ஸதிஸம்பஜஞ்ஞேன ஸமன்னாக³தோ. உபஸங்கமீதி ஸமணோ கோ³தமோ ஸப்³ப³ரத்திம் அப்³போ⁴காஸே சங்கமித்வா க³ந்த⁴குடிம் பவிஸித்வா நித்³தா³யதி, அதிவிய ஸுக²ஸயிதோ ப⁴விஸ்ஸதி, க⁴ட்டயிஸ்ஸாமி நந்தி சிந்தேத்வா உபஸங்கமி.

கிம் ஸோப்பஸீதி கிம் ஸுபஸி, கிம் ஸோப்பம் நாமித³ம் தவாதி வத³தி. கிம் நு ஸோப்பஸீதி கஸ்மா நு ஸுபஸி? து³ப்³ப⁴கோ³ வியாதி மதோ விய, விஸஞ்ஞீ விய ச. ஸுஞ்ஞமகா³ரந்தி ஸுஞ்ஞம் மே க⁴ரம் லத்³த⁴ந்தி ஸோப்பஸீதி வத³தி. ஸூரியே உக்³க³தேதி ஸூரியம்ஹி உட்டி²தே. இதா³னி ஹி அஞ்ஞே பி⁴க்கூ² ஸம்மஜ்ஜந்தி, பானீயம் உபட்ட²பேந்தி, பி⁴க்கா²சாரக³மனஸஜ்ஜா ப⁴வந்தி, த்வம் கஸ்மா ஸோப்பஸியேவ.

ஜாலினீதி தயோ ப⁴வே அஜ்ஜோ²த்த²ரித்வா டி²தேன ‘‘அஜ்ஜ²த்திகஸ்ஸுபாதா³ய அட்டா²ரஸதண்ஹாவிசரிதானீ’’திஆதி³னா (விப⁴. 842) தேன தேன அத்தனோ கோட்டா²ஸபூ⁴தேன ஜாலேன ஜாலினீ. விஸத்திகாதி ரூபாதீ³ஸு தத்த² தத்த² விஸத்ததாய விஸமூலதாய விஸபரிபோ⁴க³தாய ச விஸத்திகா. குஹிஞ்சி நேதவேதி கத்த²சி நேதும். ஸப்³பூ³பதி⁴ பரிக்க²யாதி ஸப்³பே³ஸம் க²ந்த⁴கிலேஸாபி⁴ஸங்கா²ரகாமகு³ணபே⁴தா³னம் உபதீ⁴னம் பரிக்க²யா. கிம் தவேத்த², மாராதி, மார, துய்ஹம் கிம் ஏத்த²? கஸ்மா த்வம் உண்ஹயாகு³யம் நிலீயிதும் அஸக்கோந்தீ கு²த்³த³கமக்கி²கா விய அந்தந்தேனேவ உஜ்ஜா²யந்தோ ஆஹிண்ட³ஸீதி. ஸத்தமம்.

8. நந்த³திஸுத்தவண்ணனா

144. அட்ட²மம் தே³வதாஸம்யுத்தே வுத்தத்த²மேவ. அட்ட²மம்.

9. பட²மஆயுஸுத்தவண்ணனா

145. நவமே அப்பம் வா பி⁴ய்யோதி பி⁴ய்யோ ஜீவந்தோ அபரம் வஸ்ஸஸதம் ஜீவிதும் ந ஸக்கோதி, பண்ணாஸம் வா ஸட்டி² வா வஸ்ஸானி ஜீவதி. அஜ்ஜ²பா⁴ஸீதி ஸமணோ கோ³தமோ ‘‘மனுஸ்ஸானம் அப்பமாயூ’’தி கதே²தி, தீ³க⁴பா⁴வமஸ்ஸ கதே²ஸ்ஸாமீதி பச்சனீகஸாததாய அபி⁴ப⁴வித்வா அபா⁴ஸி.

ந நம் ஹீளேதி தம் ஆயும் ‘‘அப்பகமித³’’ந்தி ந ஹீளேய்ய. கீ²ரமத்தோ வாதி யதா² த³ஹரோ குமாரோ உத்தானஸேய்யகோ கீ²ரம் பிவித்வா து³கூலசும்ப³டகே நிபன்னோ அஸஞ்ஞீ விய நித்³தா³யதி, கஸ்ஸசி ஆயும் அப்பம் வா தீ³க⁴ம் வாதி ந சிந்தேதி, ஏவம் ஸப்புரிஸோ. சரேய்யாதி³த்தஸீஸோ வாதி ஆயும் பரித்தந்தி ஞத்வா பஜ்ஜலிதஸீஸோ விய சரேய்ய. நவமம்.

10. து³தியஆயுஸுத்தவண்ணனா

146. த³ஸமே நேமீவ ரத²குப்³ப³ரந்தி யதா² தி³வஸம் க³ச்ச²ந்தஸ்ஸ ரத²ஸ்ஸ சக்கனேமி குப்³ப³ரம் அனுபரியாயதி ந விஜஹதி, ஏவம் ஆயு அனுபரியாயதீதி. த³ஸமம்.

பட²மோ வக்³கோ³.

2. து³தியவக்³கோ³

1. பாஸாணஸுத்தவண்ணனா

147. து³தியவக்³க³ஸ்ஸ பட²மே நிஸின்னோதி புப்³பே³ வுத்தனயேனேவ பதா⁴னம் பரிக்³க³ண்ஹந்தோ நிஸின்னோ. மாரோபிஸ்ஸ ஸுக²னிஸின்னபா⁴வம் ஞத்வா க⁴ட்டயிஸ்ஸாமீதி உபஸங்கமந்தோ. பதா³லேஸீதி பப்³ப³தபிட்டே² ட²த்வா பவிஜ்ஜி². பாஸாணா நிரந்தரா அஞ்ஞமஞ்ஞம் அபி⁴ஹனந்தா பதந்தி. கேவலந்தி ஸகலம். ஸப்³ப³ந்தி தஸ்ஸேவ வேவசனம். பட²மம்.

2. கின்னுஸீஹஸுத்தவண்ணனா

148. து³தியே விசக்கு²கம்மாயாதி பரிஸாய பஞ்ஞாசக்கு²ம் வினாஸேதுகம்யதாய. பு³த்³தா⁴னம் பனேஸ பஞ்ஞாசக்கு²ம் வினாஸேதும் ந ஸக்கோதி, பரிஸாய பே⁴ரவாரம்மணம் ஸாவேந்தோ வா த³ஸ்ஸேந்தோ வா ஸக்கோதி. விஜிதாவீ நு மஞ்ஞஸீதி கிம் நு த்வம் ‘‘விஜிதவிஜயோ அஹ’’ந்தி மஞ்ஞஸி? மா ஏவம் மஞ்ஞி, நத்தி² தே ஜயோ. பரிஸாஸூதி, அட்ட²ஸு பரிஸாஸு. ப³லப்பத்தாதி த³ஸப³லப்பத்தா. து³தியம்.

3. ஸகலிகஸுத்தவண்ணனா

149. ததியே மந்தி³யா நூதி மந்த³பா⁴வேன மோமூஹபா⁴வேன. உதா³ஹு காவேய்யமத்தோதி உதா³ஹு யதா² கவி கப்³ப³ம் சிந்தேந்தோ தேன கப்³ப³கரணேன மத்தோ ஸயதி, ஏவம் ஸயஸி. ஸம்பசுராதி ப³ஹவோ. கிமித³ம் ஸோப்பஸே வாதி கஸ்மா இத³ம் ஸோப்பம் ஸோப்பஸியேவ? அத்த²ம் ஸமேச்சாதி அத்த²ம் ஸமாக³ந்த்வா பாபுணித்வா. மய்ஹம் ஹி அஸங்க³ஹோ நாம ஸங்க³ஹவிபன்னோ வா அத்தோ² நத்தி². ஸல்லந்தி திகி²ணம் ஸத்திஸல்லம். ஜக்³க³ம் ந ஸங்கேதி யதா² ஏகச்சோ ஸீஹபதா²தீ³ஸு ஜக்³க³ந்தோ ஸங்கதி, ததா² அஹம் ஜக்³க³ந்தோபி ந ஸங்காமி. நபி பே⁴மி ஸோத்துந்தி யதா² ஏகச்சோ ஸீஹபதா²தீ³ஸுயேவ ஸுபிதும் பா⁴யதி, ஏவம் அஹம் ஸுபிதும்பி ந பா⁴யாமி. நானுதபந்தி மாமந்தி யதா² ஆசரியஸ்ஸ வா அந்தேவாஸிகஸ்ஸ வா அபா²ஸுகே ஜாதே உத்³தே³ஸபரிபுச்சா²ய டி²தத்தா அந்தேவாஸிம் ரத்திந்தி³வா அதிக்கமந்தா அனுதபந்தி, ஏவம் மம் நானுதபந்தி. ந ஹி மய்ஹம் கிஞ்சி அபரினிட்டி²தகம்மம் நாம அத்தி². தேனேவாஹ ஹானிம் ந பஸ்ஸாமி குஹிஞ்சி லோகேதி. ததியம்.

4. பதிரூபஸுத்தவண்ணனா

150. சதுத்தே² அனுரோத⁴விரோதே⁴ஸூதி ராக³படிகே⁴ஸு. மா ஸஜ்ஜித்தோ² ததா³சரந்தி ஏவம் த⁴ம்மகத²ம் ஆசரந்தோ மா லக்³கி³. த⁴ம்மகத²ம் கதே²ந்தஸ்ஸ ஹி ஏகச்சே ஸாது⁴காரம் த³த³ந்தி, தேஸு ராகோ³ உப்பஜ்ஜதி. ஏகச்சே அஸக்கச்சம் ஸுணந்தி, தேஸு படிகோ⁴ உப்பஜ்ஜதி. இதி த⁴ம்மகதி²கோ அனுரோத⁴விரோதே⁴ஸு ஸஜ்ஜதி நாம. த்வம் ஏவம் மா ஸஜ்ஜித்தோ²தி வத³தி. யத³ஞ்ஞமனுஸாஸதீதி யம் அஞ்ஞம் அனுஸாஸதி, தம். ஸம்பு³த்³தோ⁴ ஹிதானுகம்பீ ஹிதேன அனுபகம்பதி. யஸ்மா ச ஹிதானுகம்பீ, தஸ்மா அனுரோத⁴விரோதே⁴ஹி விப்பமுத்தோ ததா²க³தோதி. சதுத்த²ம்.

5. மானஸஸுத்தவண்ணனா

151. பஞ்சமே ஆகாஸே சரந்தேபி ப³ந்த⁴தீதி அந்தலிக்க²சரோ. பாஸோதி ராக³பாஸோ. மானஸோதி மனஸம்பயுத்தோ. பஞ்சமம்.

6. பத்தஸுத்தவண்ணனா

152. ச²ட்டே² பஞ்சன்னம் உபாதா³னக்க²ந்தா⁴னம் உபாதா³யாதி பஞ்ச உபாதா³னக்க²ந்தே⁴ ஆதி³யித்வா, ஸபா⁴வஸாமஞ்ஞலக்க²ணவஸேன நானப்பகாரதோ விப⁴ஜித்வா த³ஸ்ஸேந்தோ. ஸந்த³ஸ்ஸேதீதி க²ந்தா⁴னம் ஸபா⁴வலக்க²ணாதீ³னி த³ஸ்ஸேதி. ஸமாத³பேதீதி க³ண்ஹாபேதி. ஸமுத்தேஜேதீதி ஸமாதா³னம்ஹி உஸ்ஸாஹம் ஜனேதி. ஸம்பஹம்ஸேதீதி படிவித்³த⁴கு³ணேன வோதா³பேதி ஜோதாபேதி. அட்டி²ம் கத்வாதி அத்தி²கம் கத்வா, ‘‘அயம் நோ அதி⁴க³ந்தப்³போ³ அத்தோ²’’தி ஏவம் ஸல்லக்கே²த்வா தாய தே³ஸனாய அத்தி²கா ஹுத்வா. மனஸி கத்வாதி சித்தே ட²பேத்வா. ஸப்³ப³சேதஸோ ஸமன்னாஹரித்வாதி ஸப்³பே³ன தேன கம்மகாரகசித்தேன ஸமன்னாஹரித்வா. ஓஹிதஸோதாதி ட²பிதாஸோதா. அப்³போ⁴காஸே நிக்கி²த்தாதி ஓதாபனத்தா²ய ட²பிதா.

ரூபம் வேத³யிதம் ஸஞ்ஞாந்தி, ஏதே ரூபாத³யோ தயோ க²ந்தா⁴. யஞ்ச ஸங்க²தந்தி இமினா ஸங்கா²ரக்க²ந்தோ⁴ க³ஹிதோ. ஏவம் தத்த² விரஜ்ஜதீதி ‘‘ஏஸோ அஹம் ந ஹோமி, ஏதம் மய்ஹம் ந ஹோதீ’’தி பஸ்ஸந்தோ ஏவம் தேஸு க²ந்தே⁴ஸு விரஜ்ஜதி. கே²மத்தந்தி கே²மீபூ⁴தம் அத்தபா⁴வம். இமினா ப²லக்க²ணம் த³ஸ்ஸேதி. அன்வேஸந்தி ப⁴வயோனிக³திடி²திஸத்தாவாஸஸங்கா²தேஸு ஸப்³ப³ட்டா²னேஸு பரியேஸமானா. நாஜ்ஜ²கா³தி ந பஸ்ஸீதி. ச²ட்ட²ம்.

7. ச²ப²ஸ்ஸாயதனஸுத்தவண்ணனா

153. ஸத்தமே ப²ஸ்ஸாயதனானந்தி ஸஞ்ஜாதிஸமோஸரணட்டே²ன ச²த்³வாரிகஸ்ஸ ப²ஸ்ஸஸ்ஸ ஆயதனானம். ப⁴யபே⁴ரவம் ஸத்³த³ந்தி மேக⁴து³ந்து³பி⁴அஸனிபாதஸத்³த³ஸதி³ஸம் ப⁴யஜனகம் ஸத்³த³ம். பத²வீ மஞ்ஞே உந்த்³ரீயதீதி அயம் மஹாபத²வீ படபடஸத்³த³ம் குருமானா விய அஹோஸி. ஏத்த² லோகோ விமுச்சி²தோதி ஏதேஸு ச²ஸு ஆரம்மணேஸு லோகோ அதி⁴முச்சி²தோ. மாரதே⁴ய்யந்தி மாரஸ்ஸ டா²னபூ⁴தம் தேபூ⁴மகவட்டம். ஸத்தமம்.

8. பிண்ட³ஸுத்தவண்ணனா

154. அட்ட²மே பாஹுனகானி ப⁴வந்தீதி ததா²ரூபே நக்க²த்தே தத்த² தத்த² பேஸேதப்³பா³னி பாஹுனகானி ப⁴வந்தி, ஆக³ந்துகபண்ணாகாரதா³னானி வா. ஸயம்சரணதி³வஸே ஸமவயஜாதிகோ³த்தா குமாரகா ததோ ததோ ஸன்னிபதந்தி. குமாரிகாயோபி அத்தனோ அத்தனோ விப⁴வானுரூபேன அலங்கதா தஹம் தஹம் விசரந்தி. தத்ர குமாரிகாயோபி யதா²ருசிகானம் குமாரகானம் பண்ணாகாரம் பேஸேந்தி, குமாரகாபி குமாரிகானம் அஞ்ஞஸ்மிம் அஸதி அந்தமஸோ மாலாகு³ளேனபி பரிக்கி²பந்தி. அன்வாவிட்டா²தி அனு ஆவிட்டா². தம்தி³வஸம் கிர பஞ்சஸதா குமாரிகாயோ உய்யானகீளம் க³ச்ச²ந்தியோ படிபதே² ஸத்தா²ரம் தி³ஸ்வா ச²ணபூவம் த³தே³ய்யும். ஸத்தா² தாஸம் தா³னானுமோத³னத்த²ம் பகிண்ணகத⁴ம்மதே³ஸனம் தே³ஸேய்ய, தே³ஸனாபரியோஸானே ஸப்³பா³பி ஸோதாபத்திப²லே பதிட்ட²ஹேய்யும். மாரோ தாஸம் ஸம்பத்தியா அந்தராயம் கரிஸ்ஸாமீதி அன்வாவிஸி. பாளியம் பன மா ஸமணோ கோ³தமோ பிண்ட³மலத்தா²தி ஏத்தகம்யேவ வுத்தந்தி.

கிம் பன ஸத்தா² மாராவட்டனம் அஜானித்வா பவிட்டோ²தி? ஆம அஜானித்வா. கஸ்மா? அனாவஜ்ஜனதாய. பு³த்³தா⁴னஞ்ஹி – ‘‘அஸுகட்டா²னே ப⁴த்தம் லபி⁴ஸ்ஸாம, ந லபி⁴ஸ்ஸாமா’’தி ஆவஜ்ஜனம் ந அனனுச்ச²விகம். பவிட்டோ² பன மனுஸ்ஸானம் உபசாரபே⁴த³ம் தி³ஸ்வா, ‘‘கிம் இத³’’ந்தி? ஆவஜ்ஜேந்தோ ஞத்வா, ‘‘ஆமிஸத்த²ம் மாராவட்டனம் பி⁴ந்தி³தும் அனனுச்ச²விக’’ந்தி அபி⁴ந்தி³த்வாவ நிக்க²ந்தோ.

உபஸங்கமீதி அமித்தவிஜயேன விய துட்டோ² ஸகலகா³மே கடச்சு²மத்தம்பி ப⁴த்தம் அலபி⁴த்வா கா³மதோ நிக்க²மந்தம் ப⁴க³வந்தம் கா³மியமனுஸ்ஸவேஸேன உபஸங்கமி. ததா²ஹம் கரிஸ்ஸாமீதி இத³ம் ஸோ முஸா பா⁴ஸதி. ஏவம் கிரஸ்ஸ அஹோஸி – ‘‘மயா ஏவம் வுத்தே புன பவிஸிஸ்ஸதி, அத² நம் கா³மதா³ரகா ‘ஸகலகா³மே சரித்வா கடச்சு²பி⁴க்க²ம்பி அலபி⁴த்வா கா³மதோ நிக்க²ம்ம புன பவிட்டோ²ஸீ’திஆதீ³னி வத்வா உப்பண்டே³ஸ்ஸந்தீ’’தி. ப⁴க³வா பன – ‘‘ஸசாயம் மம் ஏவம் விஹேடே²ஸ்ஸதி முத்³த⁴மஸ்ஸேவ ஸத்ததா⁴ ப²லிஸ்ஸதீ’’தி தஸ்மிம் அனுகம்பாய அபவிஸித்வா கா³தா²த்³வயமாஹ.

தத்த² பஸவீதி ஜனேஸி நிப்பா²தே³ஸி. ஆஸஜ்ஜாதி ஆஸாதே³த்வா க⁴ட்டேத்வா. ந மே பாபம் விபச்சதீதி மம பாபம் ந பச்சதி. நிப்ப²லம் ஏதந்தி கிம் நு த்வம் ஏவம் மஞ்ஞஸி? மா ஏவம் மஞ்ஞி, அத்தி² தயா கதஸ்ஸ பாபஸ்ஸ ப²லந்தி தீ³பேதி. கிஞ்சனந்தி மத்³தி³தும் ஸமத்த²ம் ராக³கிஞ்சனாதி³ கிலேஸஜாதம். ஆப⁴ஸ்ஸரா யதா²தி யதா² ஆப⁴ஸ்ஸரா தே³வா ஸப்பீதிகஜ்ஜா²னேன யாபேந்தா பீதிப⁴க்கா² நாம ஹோந்தி, ஏவம் ப⁴விஸ்ஸாமாதி. அட்ட²மம்.

9. கஸ்ஸகஸுத்தவண்ணனா

155. நவமே நிப்³பா³னபடிஸம்யுத்தாயாதி நிப்³பா³னம் அபதி³ஸித்வா பவத்தாய. ஹடஹடகேஸோதி புரிமகேஸே பச்ச²தோ, பச்சி²மகேஸே புரதோ வாமபஸ்ஸகேஸே த³க்கி²ணதோ, த³க்கி²ணபஸ்ஸகேஸே வாமதோ ப²ரித்வா ப²ரித்வா விப்பகிண்ணகேஸோ. மம சக்கு²ஸம்ப²ஸ்ஸவிஞ்ஞாணாயதனந்தி சக்கு²விஞ்ஞாணேன ஸம்பயுத்தோ சக்கு²ஸம்ப²ஸ்ஸோபி விஞ்ஞாணாயதனம்பி மமேவாதி. ஏத்த² ச சக்கு²ஸம்ப²ஸ்ஸேன விஞ்ஞாணஸம்பயுத்தகா த⁴ம்மா க³ஹிதா, விஞ்ஞாணாயதனேன ஸப்³பா³னிபி சக்கு²த்³வாரே உப்பன்னானி ஆவஜ்ஜனாதி³விஞ்ஞாணானி. ஸோதத்³வாராதீ³ஸுபி ஏஸேவ நயோ. மனோத்³வாரே பன மனோதி ஸாவஜ்ஜனகம் ப⁴வங்க³சித்தம். த⁴ம்மாதி ஆரம்மணத⁴ம்மா. மனோஸம்ப²ஸ்ஸோதி ஸாவஜ்ஜனேன ப⁴வங்கே³ன ஸம்பயுத்தப²ஸ்ஸோ. விஞ்ஞாணாயதனந்தி ஜவனசித்தம் ததா³ரம்மணம்பி வட்டதி.

தவேவ பாபிம, சக்கூ²தி யம் லோகே திமிரகாசாதீ³ஹி உபத்³து³தம் அனேகரோகா³யதனம் உபக்கவிபக்கம் அந்தமஸோ காணசக்கு²பி, ஸப்³ப³ம் தம் தவேவ ப⁴வது. ரூபாதீ³ஸுபி ஏஸேவ நயோ.

யம் வத³ந்தீதி யம் ப⁴ண்ட³கம் ‘‘மம இத³’’ந்தி வத³ந்தி. யே வத³ந்தி மமந்தி சாதி யே ச புக்³க³லா ‘‘மம’’ந்தி வத³ந்தி. ஏத்த² சே தே மனோ அத்தீ²தி ஏதேஸு ச டா²னேஸு யதி³ சித்தம் அத்தி². ந மே ஸமண மோக்க²ஸீதி ஸமண மய்ஹம் விஸயதோ ந முச்சிஸ்ஸஸி. யம் வத³ந்தீதி யம் ப⁴ண்ட³கம் வத³ந்தி, ந தம் மய்ஹம். யே வத³ந்தீதி யேபி புக்³க³லா ஏவம் வத³ந்தி, ந தே அஹம். ந மே மக்³க³ம்பி த³க்க²ஸீதி ப⁴வயோனிக³திஆதீ³ஸு மய்ஹம் க³தமக்³க³ம்பி ந பஸ்ஸஸி. நவமம்.

10. ரஜ்ஜஸுத்தவண்ணனா

156. த³ஸமே அஹனம் அகா⁴தயந்தி அஹனந்தேன அகா⁴தயந்தேன. அஜினம் அஜாபயந்தி பரஸ்ஸ த⁴னஜானிம் அகரோந்தேன அகாராபேந்தேன. அஸோசம் அஸோசாபயந்தி அஸோசந்தேன அஸோசாபயந்தேன. இதி ப⁴க³வா அத⁴ம்மிகராஜூனம் ரஜ்ஜே விஜிதே த³ண்ட³கரபீளிதே மனுஸ்ஸே தி³ஸ்வா காருஞ்ஞவஸேன ஏவம் சிந்தேஸி. உபஸங்கமீதி ‘‘ஸமணோ கோ³தமோ ‘ஸக்கா நு கோ² ரஜ்ஜம் காரேது’ந்தி சிந்தேஸி, ரஜ்ஜம் காரேதுகாமோ ப⁴விஸ்ஸதி, ரஜ்ஜஞ்ச நாமேதம் பமாத³ட்டா²னம், ரஜ்ஜம் காரேந்தே ஸக்கா ஓதாரம் லபி⁴தும், க³ச்சா²மி உஸ்ஸாஹமஸ்ஸ ஜனேஸ்ஸாமீ’’தி சிந்தேத்வா உபஸங்கமி. இத்³தி⁴பாதா³தி இஜ்ஜ²னககோட்டா²ஸா. பா⁴விதாதி வட்³டி⁴தா. ப³ஹுலீகதாதி புனப்புனம் கதா. யானீகதாதி யுத்தயானம் விய கதா. வத்து²கதாதி பதிட்ட²ட்டே²னவத்து²கதா. அனுட்டி²தாதி அவிஜஹிதா நிச்சானுப³த்³தா⁴. பரிசிதாதி ஸாதச்சகிரியாய ஸுபரிசிதா கதா இஸ்ஸாஸஸ்ஸ அவிராதி⁴தவேதி⁴ஹத்தோ² விய. ஸுஸமாரத்³தா⁴தி ஸுட்டு² ஸமாரத்³தா⁴ பரிபுண்ணபா⁴வனா. அதி⁴முச்சேய்யாதி சிந்தேய்ய.

பப்³ப³தஸ்ஸாதி பப்³ப³தோ ப⁴வேய்ய. த்³வித்தாவாதி திட்ட²து ஏகோ பப்³ப³தோ, த்³விக்க²த்தும்பி தாவ மஹந்தோ ஸுவண்ணபப்³ப³தோ ஏகஸ்ஸ நாலம், ந பரியத்தோதி அத்தோ². இதி வித்³வா ஸமஞ்சரேதி ஏவம் ஜானந்தோ ஸமம் சரேய்ய. யதோனிதா³னந்தி து³க்க²ம் நாம பஞ்சகாமகு³ணனிதா³னம், தம் யதோனிதா³னம் ஹோதி, ஏவம் யோ அத³க்கி². கத²ம் நமேய்யாதி ஸோ ஜந்து தேஸு து³க்க²ஸ்ஸ நிதா³னபூ⁴தேஸு காமேஸு கேன காரணேன நமேய்ய. உபதி⁴ம் விதி³த்வாதி காமகு³ணஉபதி⁴ம் ‘‘ஸங்கோ³ ஏஸோ, லக்³க³னமேத’’ந்தி ஏவம் விதி³த்வா. தஸ்ஸேவ ஜந்து வினயாய ஸிக்கே²தி தஸ்ஸேவ உபதி⁴ஸ்ஸ வினயாய ஸிக்கே²ய்ய. த³ஸமம்.

து³தியோ வக்³கோ³.

3. ததியவக்³கோ³

1. ஸம்ப³ஹுலஸுத்தவண்ணனா

157. ததியவக்³க³ஸ்ஸ பட²மே ஜடண்டு³வேனாதி ஜடாசும்ப³டகேன. அஜினக்கி²பனிவத்தோ²தி ஸகு²ரம் அஜினசம்மம் ஏகம் நிவத்தோ² ஏகம் பாருதோ. உது³ம்ப³ரத³ண்ட³ந்தி அப்பிச்ச²பா⁴வப்பகாஸனத்த²ம் ஈஸகம் வங்கம் உது³ம்ப³ரத³ண்ட³ம் க³ஹேத்வா. ஏதத³வோசாதி லோகே ப்³ராஹ்மணஸ்ஸ வசனம் நாம ஸுஸ்ஸூஸந்தி, ப்³ராஹ்மணேஸுபி பப்³ப³ஜிதஸ்ஸ, பப்³ப³ஜிதேஸுபி மஹல்லகஸ்ஸாதி மஹல்லகப்³ராஹ்மணஸ்ஸ பப்³ப³ஜிதவேஸம் க³ஹேத்வா பதா⁴னபூ⁴மியம் கம்மம் கரோந்தே தே பி⁴க்கூ² உபஸங்கமித்வா ஹத்த²ம் உக்கி²பித்வா ஏதம் ‘‘த³ஹரா ப⁴வந்தோ’’திஆதி³வசனம் அவோச. ஓகம்பேத்வாதி ஹனுகேன உரம் பஹரந்தோ அதோ⁴னதம் கத்வா. ஜிவ்ஹம் நில்லாலேத்வாதி கப³ரமஹாஜிவ்ஹம் நீஹரித்வா உத்³த⁴மதோ⁴ உப⁴யபஸ்ஸேஸு ச லாலேத்வா. திவிஸாக²ந்தி திஸாக²ம். நலாடிகந்தி ப⁴குடிம், நலாடே உட்டி²தம் வலித்தயந்தி அத்தோ². பக்காமீதி தும்ஹே ஜானந்தானம் வசனம் அகத்வா அத்தனோவ தேலே பச்சிஸ்ஸதா²தி வத்வா ஏகம் மக்³க³ம் க³ஹேத்வா க³தோ. பட²மம்.

2. ஸமித்³தி⁴ஸுத்தவண்ணனா

158. து³தியே லாபா⁴ வத மே, ஸுலத்³த⁴ம் வத மேதி ஏவரூபஸ்ஸ ஸத்து² சேவ த⁴ம்மஸ்ஸ ச ஸப்³ரஹ்மசாரீனஞ்ச லத்³த⁴த்தா மய்ஹம் லாபா⁴ மய்ஹம் ஸுலத்³த⁴ந்தி. ஸோ கிராயஸ்மா பச்சா² மூலகம்மட்டா²னம் ஸம்மஸித்வா ‘‘அரஹத்தம் க³ஹேஸ்ஸாமீ’’தி பாஸாதி³கம் தாவ கம்மட்டா²னம் க³ஹேத்வா பு³த்³த⁴த⁴ம்மஸங்க⁴கு³ணே ஆவஜ்ஜேத்வா சித்தகல்லதம் உப்பாதே³த்வா சித்தம் ஹாஸேத்வா தோஸேத்வா நிஸின்னோ. தேனஸ்ஸ ஏவமஹோஸி. உபஸங்கமீதி ‘‘அயம் ஸமித்³தி⁴ பி⁴க்கு² பாஸாதி³கம் கம்மட்டா²னம் க³ஹேத்வா நிஸின்னஸதி³ஸோ, யாவ மூலகம்மட்டா²னம் க³ஹேத்வா அரஹத்தம் ந க³ண்ஹாதி, தாவஸ்ஸ அந்தராயம் கரிஸ்ஸாமீ’’தி உபஸங்கமி. க³ச்ச² த்வந்தி ஸத்தா² ஸகலஜம்பு³தீ³பம் ஓலோகேந்தோ ‘‘தஸ்மிம்யேவ டா²னே தஸ்ஸ கம்மட்டா²னம் ஸப்பாயம் ப⁴விஸ்ஸதீ’’தி அத்³த³ஸ, தஸ்மா ஏவமாஹ. ஸதிபஞ்ஞா ச மே பு³த்³தா⁴தி மயா ஸதி ச பஞ்ஞா ச ஞாதா. கரஸ்ஸு ரூபானீதி ப³ஹூனிபி விபி⁴ம்ஸகாரஹானி ரூபானி கரஸ்ஸு. நேவ மம் ப்³யாத⁴யிஸ்ஸஸீதி மம் நேவ வேத⁴யிஸ்ஸஸி ந கம்பஸ்ஸேஸி. து³தியம்.

3. கோ³தி⁴கஸுத்தவண்ணனா

159. ததியே இஸிகி³லிபஸ்ஸேதி இஸிகி³லிஸ்ஸ நாம பப்³ப³தஸ்ஸ பஸ்ஸே. காளஸிலாயந்தி காளவண்ணாய ஸிலாயம். ஸாமயிகம் சேதோவிமுத்திந்தி அப்பிதப்பிதக்க²ணே பச்சனீகத⁴ம்மேஹி விமுச்சதி, ஆரம்மணே ச அதி⁴முச்சதீதி லோகியஸமாபத்தி ஸாமயிகா சேதோவிமுத்தி நாம. பு²ஸீதி படிலபி⁴. பரிஹாயீதி கஸ்மா யாவ ச²ட்ட²ம் பரிஹாயி? ஸாபா³த⁴த்தா. தே²ரஸ்ஸ கிர வாதபித்தஸேம்ஹவஸேன அனுஸாயிகோ ஆபா³தோ⁴ அத்தி², தேன ஸமாதி⁴ஸ்ஸ ஸப்பாயே உபகாரகத⁴ம்மே பூரேதும் ந ஸக்கோதி, அப்பிதப்பிதாய ஸமாபத்தியா பரிஹாயதி.

யம்னூனாஹம் ஸத்த²ம் ஆஹரேய்யந்தி ஸோ கிர சிந்தேஸி, யஸ்மா பரிஹீனஜ்ஜா²னஸ்ஸ காலங்கரோதோ அனிப³த்³தா⁴ க³தி ஹோதி, அபரிஹீனஜ்ஜா²னஸ்ஸ நிப³த்³தா⁴ க³தி ஹோதி, ப்³ரஹ்மலோகே நிப்³ப³த்ததி, தஸ்மா ஸத்த²ம் ஆஹரிதுகாமோ அஹோஸி. உபஸங்கமீதி – ‘‘அயம் ஸமணோ ஸத்த²ம் ஆஹரிதுகாமோ, ஸத்தா²ஹரணஞ்ச நாமேதம் காயே ச ஜீவிதே ச அனபேக்க²ஸ்ஸ ஹோதி. யோ ஏவம் காயே ச ஜீவிதே ச அனபேக்கோ² ஹோதி, ஸோ மூலகம்மட்டா²னம் ஸம்மஸித்வா அரஹத்தம்பி க³ஹேதும் ஸமத்தோ² ஹோதி, மயா பன படிபா³ஹிதோபி ஏஸ ந ஓரமிஸ்ஸதி, ஸத்தா²ரா படிபா³ஹிதோ ஓரமிஸ்ஸதீ’’தி தே²ரஸ்ஸ அத்த²காமோ விய ஹுத்வா யேன ப⁴க³வா தேனுபஸங்கமி.

ஜலாதி ஜலமானா. பாதே³ வந்தா³மி சக்கு²மாதி பஞ்சஹி சக்கூ²ஹி சக்கு²மா தவ பாதே³ வந்தா³மி. ஜுதிந்த⁴ராதி ஆனுபா⁴வத⁴ரா. அப்பத்தமானஸோதி அப்பத்தஅரஹத்தோ. ஸேகோ²தி ஸீலாதீ³னி ஸிக்க²மானோ ஸகரணீயோ. ஜனே ஸுதாதி ஜனே விஸ்ஸுதா. ஸத்த²ம் ஆஹரிதம் ஹோதீதி தே²ரோ கிர ‘‘கிம் மய்ஹம் இமினா ஜீவிதேனா’’தி? உத்தானோ நிபஜ்ஜித்வா ஸத்தே²ன க³லனாளிம் சி²ந்தி³, து³க்கா² வேத³னா உப்பஜ்ஜிம்ஸு. தே²ரோ வேத³னம் விக்க²ம்பே⁴த்வா தம்யேவ வேத³னம் பரிக்³க³ஹேத்வா ஸதிம் உபட்ட²பேத்வா மூலகம்மட்டா²னம் ஸம்மஸந்தோ அரஹத்தம் பத்வா ஸமஸீஸீ ஹுத்வா பரினிப்³பா³யி. ஸமஸீஸீ நாம திவிதோ⁴ ஹோதி இரியாபத²ஸமஸீஸீ, ரோக³ஸமஸீஸீ, ஜீவிதஸமஸீஸீதி.

தத்த² யோ டா²னாதீ³ஸு இரியாபதே²ஸு அஞ்ஞதரம் அதி⁴ட்டா²ய – ‘‘இமம் அகோபேத்வாவ அரஹத்தம் பாபுணிஸ்ஸாமீ’’தி விபஸ்ஸனம் பட்ட²பேதி, அத²ஸ்ஸ அரஹத்தப்பத்தி ச இரியாபத²கோபனஞ்ச ஏகப்பஹாரேனேவ ஹோதி. அயம் இரியாபத²ஸமஸீஸீ நாம. யோ பன சக்கு²ரோகா³தீ³ஸு அஞ்ஞதரஸ்மிம் ஸதி – ‘‘இதோ அனுட்டி²தோவ அரஹத்தம் பாபுணிஸ்ஸாமீ’’தி விபஸ்ஸனம் பட்ட²பேதி, அத²ஸ்ஸ அரஹத்தப்பத்தி ச ரோக³தோ வுட்டா²னஞ்ச ஏகப்பஹாரேனேவ ஹோதி. அயம் ரோக³ஸமஸீஸீ நாம. கேசி பன தஸ்மிம்யேவ இரியாபதே² தஸ்மிஞ்ச ரோகே³ பரினிப்³பா³னவஸேனேத்த² ஸமஸீஸிதம் பஞ்ஞாபேந்தி. யஸ்ஸ பன ஆஸவக்க²யோ ச ஜீவிதக்க²யோ ச ஏகப்பஹாரேனேவ ஹோதி. அயம் ஜீவிதஸமஸீஸீ நாம. வுத்தம்பி சேதம் – ‘‘யஸ்ஸ புக்³க³லஸ்ஸ அபுப்³ப³ம் அசரிமம் ஆஸவபரியாதா³னஞ்ச ஹோதி ஜீவிதபரியாதா³னஞ்ச, அயம் வுச்சதி புக்³க³லோ ஸமஸீஸீ’’தி (பு. ப. 16).

ஏத்த² ச பவத்திஸீஸம் கிலேஸஸீஸந்தி த்³வே ஸீஸானி. தத்த² பவத்திஸீஸம் நாம ஜீவிதிந்த்³ரியம், கிலேஸஸீஸம் நாம அவிஜ்ஜா. தேஸு ஜீவிதிந்த்³ரியம் சுதிசித்தம் கே²பேதி, அவிஜ்ஜா மக்³க³சித்தம். த்³வின்னம் சித்தானம் ஏகதோ உப்பாதோ³ நத்தி². மக்³கா³னந்தரம் பன ப²லம், ப²லானந்தரம் ப⁴வங்க³ம், ப⁴வங்க³தோ வுட்டா²ய பச்சவேக்க²ணம், தம் பரிபுண்ணம் வா ஹோதி அபரிபுண்ணம் வா. திகி²ணேன அஸினா ஸீஸே சி²ஜ்ஜந்தேபி ஹி ஏகோ வா த்³வே வா பச்சவேக்க²ணவாரா அவஸ்ஸம் உப்பஜ்ஜந்தியேவ, சித்தானம் பன லஹுபரிவத்திதாய ஆஸவக்க²யோ ச ஜீவிதபரியாதா³னஞ்ச ஏகக்க²ணே விய பஞ்ஞாயதி.

ஸமூலம் தண்ஹமப்³பு³ய்ஹாதி அவிஜ்ஜாமூலேன ஸமூலகம் தண்ஹம் அரஹத்தமக்³கே³ன உப்பாடேத்வா. பரினிப்³பு³தோதி அனுபாதி³ஸேஸனிப்³பா³னேன பரினிப்³பு³தோ.

விவத்தக்க²ந்த⁴ந்தி பரிவத்தக்க²ந்த⁴ம். ஸேமானந்தி உத்தானம் ஹுத்வா ஸயிதம் ஹோதி. தே²ரோ பன கிஞ்சாபி உத்தானகோ ஸயிதோ, ததா²பிஸ்ஸ த³க்கி²ணேன பஸ்ஸேன பரிசிதஸயனத்தா ஸீஸம் த³க்கி²ணதோவ பரிவத்தித்வா டி²தம். தூ⁴மாயிதத்தந்தி தூ⁴மாயிதபா⁴வம். தஸ்மிம் ஹி க²ணே தூ⁴மவலாஹகா விய திமிரவலாஹகா விய ச உட்ட²ஹிம்ஸு. விஞ்ஞாணம் ஸமன்வேஸதீதி படிஸந்தி⁴சித்தம் பரியேஸதி. அப்பதிட்டி²தேனாதி படிஸந்தி⁴விஞ்ஞாணேன அப்பதிட்டி²தேன, அப்பதிட்டி²தகாரணாதி அத்தோ². பே³லுவபண்டு³வீணந்தி பே³லுவபக்கம் விய பண்டு³வண்ணம் ஸுவண்ணமஹாவீணம். ஆதா³யாதி கச்சே² ட²பேத்வா. உபஸங்கமீதி ‘‘கோ³தி⁴கத்தே²ரஸ்ஸ நிப்³ப³த்தட்டா²னம் ந ஜானாமி, ஸமணம் கோ³தமம் புச்சி²த்வா நிக்கங்கோ² ப⁴விஸ்ஸாமீ’’தி கு²த்³த³கதா³ரகவண்ணீ ஹுத்வா உபஸங்கமி. நாதி⁴க³ச்சா²மீதி ந பஸ்ஸாமி. ஸோகபரேதஸ்ஸாதி ஸோகேன பு²ட்ட²ஸ்ஸ. அப⁴ஸ்ஸதா²தி பாத³பிட்டி²யம் பதிதா. ததியம்.

4. ஸத்தவஸ்ஸானுப³ந்த⁴ஸுத்தவண்ணனா

160. சதுத்தே² ஸத்த வஸ்ஸானீதி புரே போ³தி⁴யா ச²ப்³ப³ஸ்ஸானி, போ³தி⁴தோ பச்சா² ஏகம் வஸ்ஸம். ஓதாராபேக்கோ²தி ‘‘ஸசே ஸமணஸ்ஸ கோ³தமஸ்ஸ காயத்³வாராதீ³ஸு கிஞ்சிதே³வ அனனுச்ச²விகம் பஸ்ஸாமி, சோதே³ஸ்ஸாமி ந’’ந்தி ஏவம் விவரம் அபேக்க²மானோ. அலப⁴மானோதி ரத²ரேணுமத்தம்பி அவக்க²லிதம் அபஸ்ஸந்தோ. தேனாஹ –

‘‘ஸத்த வஸ்ஸானி ப⁴க³வந்தம், அனுப³ந்தி⁴ம் பதா³பத³ம்;

ஓதாரம் நாதி⁴க³ச்சி²ஸ்ஸம், ஸம்பு³த்³த⁴ஸ்ஸ ஸதீமதோ’’தி. (ஸு. நி. 448);

உபஸங்கமீதி ‘‘அஜ்ஜ ஸமணம் கோ³தமம் அதிக³ஹேத்வா க³மிஸ்ஸாமீ’’தி உபஸங்கமி.

ஜா²யஸீதி ஜா²யந்தோ அவஜ்ஜா²யந்தோ நிஸின்னோஸீதி வத³தி. வித்தம் நு ஜீனோதி ஸதம் வா ஸஹஸ்ஸம் வா ஜிதோஸி நு. ஆகு³ம் நு கா³மஸ்மிந்தி, கிம் நு அந்தோகா³மே பமாணாதிக்கந்தம் பாபகம்மம் அகாஸி, யேன அஞ்ஞேஸம் முக²ம் ஓலோகேதும் அவிஸஹந்தோ அரஞ்ஞே விசரஸி? ஸக்கி²ந்தி மித்தபா⁴வம்.

பலிகா²யாதி க²ணித்வா. ப⁴வலோப⁴ஜப்பந்தி ப⁴வலோப⁴ஸங்கா²தம் தண்ஹம். அனாஸவோ ஜா²யாமீதி நித்தண்ஹோ ஹுத்வா த்³வீஹி ஜா²னேஹி ஜா²யாமி. பமத்தப³ந்தூ⁴தி மாரம் ஆலபதி. ஸோ ஹி யேகேசி லோகே பமத்தா, தேஸம் ப³ந்து⁴.

ஸசே மக்³க³ம் அனுபு³த்³த⁴ந்தி யதி³ தயா மக்³கோ³ அனுபு³த்³தோ⁴. அபேஹீதி அபயாஹி. அமச்சுதே⁴ய்யந்தி மச்சுனோ அனோகாஸபூ⁴தம் நிப்³பா³னம். பாரகா³மினோதி யேபி பாரம் க³தா, தேபி பாரகா³மினோ. யேபி பாரம் க³ச்சி²ஸ்ஸந்தி, யேபி பாரம் க³ந்துகாமா, தேபி பாரகா³மினோ.

விஸூகாயிகானீதி மாரவிஸூகானி. விஸேவிதானீதி விருத்³த⁴ஸேவிதானி, ‘‘அப்பமாயு மனுஸ்ஸானம், அச்சயந்தி அஹோரத்தா’’தி வுத்தே. ‘‘தீ³க⁴மாயு மனுஸ்ஸானம், நாச்சயந்தி அஹோரத்தா’’திஆதீ³னி படிலோமகாரணானி. விப்ப²ந்தி³தானீதி, தம்ஹி தம்ஹி காலே ஹத்தி²ராஜவண்ணஸப்பவண்ணாதி³த³ஸ்ஸனானி. நிப்³பே³ஜனீயாதி உக்கண்ட²னீயா.

அனுபரியகா³திஆதீ³ஸு கிஞ்சாபி அதீதவசனம் கதம், அத்தோ² பன விகப்பவஸேன வேதி³தப்³போ³. இத³ம் வுத்தம் ஹோதி – யதா² மேத³வண்ணம் பாஸாணம் வாயஸோ தி³ஸ்வா – ‘‘அபி நாமேத்த² முது³ம் விந்தே³ய்யாம, அபி அஸ்ஸாதோ³ ஸியா’’தி அனுபரிக³ச்சே²ய்ய, அத² ஸோ தத்த² அஸ்ஸாத³ம் அலபி⁴த்வாவ வாயஸோ ஏத்தோ அபக்கமேய்ய, ததோ பாஸாணா அபக³ச்சே²ய்ய, ஏவம் மயம்பி ஸோ காகோ விய ஸேலம் கோ³தமம் ஆஸஜ்ஜ அஸ்ஸாத³ம் வா ஸந்த²வம் வா அலப⁴ந்தா கோ³தமா நிப்³பி³ந்தி³த்வா அபக³ச்சா²ம. சதுத்த²ம்.

5. மாரதீ⁴துஸுத்தவண்ணனா

161. பஞ்சமே அபா⁴ஸித்வாதி ஏத்த² அ-காரோ நிபாதமத்தம், பா⁴ஸித்வாதி அத்தோ². அபா⁴ஸயித்வாதிபி பாடோ². உபஸங்கமிம்ஸூதி ‘‘கோ³பாலகதா³ரகம் விய த³ண்ட³கேன பூ⁴மிம் லேக²ம் த³த்வா அதிவிய து³ம்மனோ ஹுத்வா நிஸின்னோ. ‘கின்னு கோ² காரண’ந்தி? புச்சி²த்வா, ஜானிஸ்ஸாமா’’தி உபஸங்கமிம்ஸு.

ஸோசஸீதி சிந்தேஸி. ஆரஞ்ஞமிவ குஞ்ஜரந்தி யதா² அரஞ்ஞதோ பேஸிதக³ணிகாரஹத்தி²னியோ ஆரஞ்ஞகம் குஞ்ஜரம் இத்தி²குத்தத³ஸ்ஸனேன பலோபே⁴த்வா ப³ந்தி⁴த்வா ஆனயந்தி, ஏவம் ஆனயிஸ்ஸாம. மாரதே⁴ய்யந்தி தேபூ⁴மகவட்டம்.

உபஸங்கமிம்ஸூதி – ‘‘தும்ஹே தோ²கம் அதி⁴வாஸேத², மயம் தம் ஆனேஸ்ஸாமா’’தி பிதரம் ஸமஸ்ஸாஸேத்வா உபஸங்கமிம்ஸு. உச்சாவசாதி நானாவிதா⁴. ஏகஸதம் ஏகஸதந்தி ஏகேகம் ஸதம் ஸதம் கத்வா. குமாரிவண்ணஸதந்தி இமினா நயேன குமாரிஅத்தபா⁴வானம் ஸதம்.

அத்த²ஸ்ஸ பத்திம் ஹத³யஸ்ஸ ஸந்திந்தி, த்³வீஹிபி பதே³ஹி அரஹத்தமேவ கதே²ஸி. ஸேனந்தி கிலேஸஸேனம். ஸா ஹி பியரூபஸாதரூபா நாம. ஏகாஹம் ஜா²யந்தி ஏகோ அஹம் ஜா²யந்தோ. ஸுக²மனுபோ³தி⁴ந்தி அரஹத்தஸுக²ம் அனுபு³ஜ்ஜி²ம். இத³ம் வுத்தம் ஹோதி – பியரூபம் ஸாதரூபம் ஸேனம் ஜினித்வா அஹம் ஏகோ ஜா²யந்தோ ‘‘அத்த²ஸ்ஸ பத்திம் ஹத³யஸ்ஸ ஸந்தி’’ந்தி ஸங்க²ம் க³தம் அரஹத்தஸுக²ம் அனுபு³ஜ்ஜி²ம். தஸ்மா ஜனேன மித்தஸந்த²வம் ந கரோமி, தேனேவ ச மே காரணேன கேனசி ஸத்³தி⁴ம் ஸக்கீ² ந ஸம்பஜ்ஜதீதி.

கத²ம்விஹாரீப³ஹுலோதி கதமேன விஹாரேன ப³ஹுலம் விஹரந்தோ. அலத்³தா⁴தி அலபி⁴த்வா. யோதி நிபாதமத்தம். இத³ம் வுத்தம் ஹோதி – கதமேன ஜா²னேன ப³ஹுலம் ஜா²யந்தம் தம் புக்³க³லம் காமஸஞ்ஞா அலபி⁴த்வாவ பரிபா³ஹிரா ஹோந்தீதி.

பஸ்ஸத்³த⁴காயோதி சதுத்த²ஜ்ஜா²னேன அஸ்ஸாஸபஸ்ஸாஸகாயஸ்ஸ பஸ்ஸத்³த⁴த்தா பஸ்ஸத்³த⁴காயோ. ஸுவிமுத்தசித்தோதி அரஹத்தப²லவிமுத்தியா ஸுட்டு² விமுத்தசித்தோ. அஸங்க²ரானோதி தயோ கம்மாபி⁴ஸங்கா²ரே அனபி⁴ஸங்க²ரோந்தோ. அனோகோதி அனாலயோ. அஞ்ஞாய த⁴ம்மந்தி சதுஸச்சத⁴ம்மம் ஜானித்வா. அவிதக்கஜா²யீதி அவிதக்கேன சதுத்த²ஜ்ஜா²னேன ஜா²யந்தோ. ந குப்பதீதிஆதீ³ஸு தோ³ஸேன ந குப்பதி, ராகே³ன ந ஸரதி, மோஹேன ந தீ²னோ. இமேஸு தீஸு மூலகிலேஸேஸு க³ஹிதேஸு தி³யட்³ட⁴கிலேஸஸஹஸ்ஸம் க³ஹிதமேவ ஹோதி. பட²மபதே³ன வா ப்³யாபாத³னீவரணம் க³ஹிதம், து³தியேன காமச்ச²ந்த³னீவரணம், ததியேன தி²னம் ஆதி³ம் கத்வா ஸேஸனீவரணானி. இதி இமினா நீவரணப்பஹானேன கீ²ணாஸவம் த³ஸ்ஸேதி.

பஞ்சோக⁴திண்ணோதி பஞ்சத்³வாரிகம் கிலேஸோக⁴ம் திண்ணோ. ச²ட்ட²ந்தி மனோத்³வாரிகம்பி ச²ட்ட²ம் கிலேஸோக⁴ம் அதரி. பஞ்சோக⁴க்³க³ஹணேன வா பஞ்சோரம்பா⁴கி³யானி ஸம்யோஜனானி, ச²ட்ட²க்³க³ஹணேன பஞ்சுத்³த⁴ம்பா⁴கி³யானி வேதி³தப்³பா³னி. க³ணஸங்க⁴சாரீதி க³ணே ச ஸங்கே⁴ ச சரதீதி ஸத்தா² க³ணஸங்க⁴சாரீ நாம. அத்³தா⁴ சரிஸ்ஸந்தீதி அஞ்ஞேபி ஸத்³தா⁴ ப³ஹுஜனா ஏகம்ஸேன சரிஸ்ஸந்தி. அயந்தி அயம் ஸத்தா². அனோகோதி அனாலயோ.

அச்சே²ஜ்ஜ நேஸ்ஸதீதி அச்சி²ந்தி³த்வா நயிஸ்ஸதி, மச்சுராஜஸ்ஸ ஹத்த²தோ அச்சி²ந்தி³த்வா நிப்³பா³னபாரம் நயிஸ்ஸதீதி வுத்தம் ஹோதி. நயமானானந்தி நயமானேஸு.

ஸேலம்வ ஸிரஸூஹச்ச, பாதாலே கா³த⁴மேஸதா²தி மஹந்தம் கூடாகா³ரப்பமாணம் ஸிலம் ஸீஸே ட²பேத்வா பாதாலே பதிட்ட²க³வேஸனம் விய. கா²ணும்வ உரஸாஸஜ்ஜாதி உரஸி கா²ணும் பஹரித்வா விய. அபேதா²தி அபக³ச்ச²த². இமஸ்மிம் டா²னே ஸங்கீ³திகாரா ‘‘இத³மவோசா’’தி தே³ஸனம் நிட்ட²பேத்வா த³த்³த³ல்லமானாதி கா³த²ம் ஆஹம்ஸு. தத்த² த³த்³த³ல்லமானாதி அதிவிய ஜலமானா ஸோப⁴மானா. ஆக³ஞ்சு²ந்தி ஆக³தா. பனுதீ³தி நீஹரி. தூலம் ப⁴ட்ட²ம்வ மாலுதோதி யதா² ப²லதோ ப⁴ட்ட²ம் ஸிம்ப³லிதூலம் வா போடகிதூலம் வா வாதோ பனுத³தி நீஹரதி, ஏவம் பனுதீ³தி. பஞ்சமம்.

ததியோ வக்³கோ³.

இதி ஸாரத்த²ப்பகாஸினியா

ஸம்யுத்தனிகாய-அட்ட²கதா²ய

மாரஸம்யுத்தவண்ணனா நிட்டி²தா.