5. பி⁴க்கு²னீஸம்யுத்தம்

1. ஆளவிகாஸுத்தவண்ணனா

162. பி⁴க்கு²னீஸம்யுத்தஸ்ஸ பட²மே ஆளவிகாதி ஆளவியம் ஜாதா ஆளவினக³ரதோயேவ ச நிக்க²ம்ம பப்³ப³ஜிதா. அந்த⁴வனந்தி கஸ்ஸபஸம்மாஸம்பு³த்³த⁴ஸ்ஸ சேதியே நவகம்மத்தா²ய த⁴னம் ஸமாத³பேத்வா ஆக³ச்ச²ந்தஸ்ஸ யஸோத⁴ரஸ்ஸ நாம த⁴ம்மபா⁴ணகஸ்ஸ அரியபுக்³க³லஸ்ஸ அக்கீ²னி உப்பாடேத்வா தத்தே²வ அக்கி²பே⁴த³ப்பத்தேஹி பஞ்சஹி சோரஸதேஹி நிவுத்த²த்தா ததோ பட்டா²ய ‘‘அந்த⁴வன’’ந்தி ஸங்க²ம் க³தம் வனம். தம் கிர ஸாவத்தி²தோ த³க்கி²ணபஸ்ஸே கா³வுதமத்தே ஹோதி ராஜாரக்கா²ய கு³த்தம். தத்த² பவிவேககாமா பி⁴க்கூ² ச பி⁴க்கு²னியோ ச க³ச்ச²ந்தி. தஸ்மா அயம்பி காயவிவேகத்தி²னீ யேன தம் வனம், தேனுபஸங்கமி. நிஸ்ஸரணந்தி நிப்³பா³னம். பஞ்ஞாயாதி பச்சவேக்க²ணஞாணேன. ந த்வம் ஜானாஸி தம் பத³ந்தி த்வம் ஏதம் நிப்³பா³னபத³ம் வா நிப்³பா³னகா³மிமக்³க³பத³ம் வா ந ஜானாஸி. ஸத்திஸூலூபமாதி வினிவிஜ்ஜ²னத்தே²ன ஸத்திஸூலஸதி³ஸா. க²ந்தா⁴ஸம் அதி⁴குட்டனாதி க²ந்தா⁴ தேஸம் அதி⁴குட்டனப⁴ண்டி³கா. பட²மம்.

2. ஸோமாஸுத்தவண்ணனா

163. து³தியே டா²னந்தி அரஹத்தம். து³ரபி⁴ஸம்ப⁴வந்தி து³ப்பஸஹம். த்³வங்கு³லபஞ்ஞாயாதி பரித்தபஞ்ஞாய. யஸ்மா வா த்³வீஹி அங்கு³லேஹி கப்பாஸவட்டிம் க³ஹேத்வா ஸுத்தம் கந்தந்தி, தஸ்மா இத்தீ² ‘‘த்³வங்கு³லபஞ்ஞா’’தி வுச்சதி. ஞாணம்ஹி வத்தமானம்ஹீதி ப²லஸமாபத்திஞாணே பவத்தமானே. த⁴ம்மம் விபஸ்ஸதோதி சதுஸச்சத⁴ம்மம் விபஸ்ஸந்தஸ்ஸ, புப்³ப³பா⁴கே³ வா விபஸ்ஸனாய ஆரம்மணபூ⁴தம் க²ந்த⁴பஞ்சகமேவ. கிஞ்சி வா பன அஞ்ஞஸ்மீதி அஞ்ஞம் வா கிஞ்சி ‘‘அஹம் அஸ்மீ’’தி தண்ஹாமானதி³ட்டி²வஸேன யஸ்ஸ ஸியா. து³தியம்.

3. கிஸாகோ³தமீஸுத்தவண்ணனா

164. ததியே கிஸாகோ³தமீதி அப்பமம்ஸலோஹிததாய கிஸா, கோ³தமீதி பனஸ்ஸா நாமம். புப்³பே³ கிர ஸாவத்தி²யம் ஏகஸ்மிம் குலே அஸீதிகோடித⁴னம் ஸப்³ப³ம் அங்கா³ராவ ஜாதம். குடும்பி³கோ அங்கா³ரஜாதானி அனீஹரித்வா – ‘‘அவஸ்ஸம் கோசி புஞ்ஞவா ப⁴விஸ்ஸதி, தஸ்ஸ புஞ்ஞேன புன பாகதிகம் ப⁴விஸ்ஸதீ’’தி ஸுவண்ணஹிரஞ்ஞஸ்ஸ சாடியோ பூரேத்வா ஆபணே ட²பேத்வா ஸமீபே நிஸீதி³. அதே²கா து³க்³க³தகுலஸ்ஸ தீ⁴தா – ‘‘அட்³ட⁴மாஸகம் க³ஹேத்வா தா³ருஸாகம் ஆஹரிஸ்ஸாமீ’’தி வீதி²ம் க³தா தம் தி³ஸ்வா குடும்பி³கம் ஆஹ – ‘‘ஆபணே தாவ த⁴னம் ஏத்தகம், கே³ஹே கித்தகம் ப⁴விஸ்ஸதீ’’தி. கிம் தி³ஸ்வா அம்ம ஏவம் கதே²ஸீதி? இமம் ஹிரஞ்ஞஸுவண்ணந்தி. ஸோ ‘‘புஞ்ஞவதீ ஏஸா ப⁴விஸ்ஸதீ’’தி தஸ்ஸா வஸனட்டா²னம் புச்சி²த்வா ஆபணே ப⁴ண்ட³ம் படிஸாமேத்வா தஸ்ஸா மாதாபிதரோ உபஸங்கமித்வா ஏவமாஹ – ‘‘அம்ஹாகம் கே³ஹே வயப்பத்தோ தா³ரகோ அத்தி², தஸ்ஸேதம் தா³ரிகம் தே³தா²’’தி. கிம் ஸாமி து³க்³க³தேஹி ஸத்³தி⁴ம் கேளிம் கரோஸீதி? மித்தஸந்த²வோ நாம து³க்³க³தேஹிபி ஸத்³தி⁴ம் ஹோதி, தே³த² நம், குடும்ப³ஸாமினீ ப⁴விஸ்ஸதீதி நம் க³ஹேத்வா க⁴ரம் ஆனேஸி. ஸா ஸம்வாஸமன்வாய புத்தம் விஜாதா. புத்தோ பத³ஸா ஆஹிண்ட³னகாலே காலமகாஸி. ஸா து³க்³க³தகுலே உப்பஜ்ஜித்வா மஹாகுலம் க³ந்த்வாபி ‘‘புத்தவினாஸம் பத்தாம்ஹீ’’தி உப்பன்னப³லவஸோகா புத்தஸ்ஸ ஸரீரகிச்சம் வாரேத்வா தம் மதகளேவரம் ஆதா³ய நக³ரே விப்பலபந்தீ சரதி.

ஏகதி³வஸம் மஹதியா பு³த்³த⁴வீதி²யா த³ஸப³லஸ்ஸ ஸந்திகம் க³ந்த்வா – ‘‘புத்தஸ்ஸ மே அரோக³பா⁴வத்தா²ய பே⁴ஸஜ்ஜம் தே³த² ப⁴க³வா’’தி ஆஹ. க³ச்ச² ஸாவத்தி²ம் ஆஹிண்டி³த்வா யஸ்மிம் கே³ஹே மதபுப்³போ³ நத்தி², ததோ ஸித்³த⁴த்த²கம் ஆஹர, புத்தஸ்ஸ தே பே⁴ஸஜ்ஜம் ப⁴விஸ்ஸதீதி. ஸா நக³ரம் பவிஸித்வா து⁴ரகே³ஹதோ பட்டா²ய ப⁴க³வதா வுத்தனயேன க³ந்த்வா ஸித்³த⁴த்த²கம் யாசந்தீ க⁴ரே க⁴ரே, ‘‘குதோ த்வம் ஏவரூபம் க⁴ரம் பஸ்ஸிஸ்ஸஸீ’’தி வுத்தா கதிபயானி கே³ஹானி ஆஹிண்டி³த்வா – ‘‘ஸப்³பே³ஸம்பி கிராயம் த⁴ம்மதா, ந மய்ஹம் புத்தஸ்ஸேவா’’தி ஸாலாயம் ச²வம் ச²ட்³டே³த்வா பப்³ப³ஜ்ஜம் யாசி. ஸத்தா² ‘‘இமம் பப்³பா³ஜேதூ’’தி பி⁴க்கு²னிஉபஸ்ஸயம் பேஸேஸி. ஸா கு²ரக்³கே³யேவ அரஹத்தம் பாபுணி. இமம் தே²ரிம் ஸந்தா⁴ய ‘‘அத² கோ² கிஸாகோ³தமீ’’தி வுத்தம்.

ஏகமாஸீதி ஏகா ஆஸி. ருத³ம்முகீ²தி ருத³மானமுகீ² விய. அச்சந்தம் மதபுத்தாம்ஹீதி ஏத்த² அந்தம் அதீதம் அச்சந்தம், பா⁴வனபும்ஸகமேதம். இத³ம் வுத்தம் ஹோதி – யதா² புத்தமரணம் அந்தம் அதீதம் ஹோதி, ஏவம் மதபுத்தா அஹம், இதா³னி மம புன புத்தமரணம் நாம நத்தி². புரிஸா ஏதத³ந்திகாதி புரிஸாபி மே ஏதத³ந்திகாவ. யோ மே புத்தமரணஸ்ஸ அந்தோ, புரிஸானம்பி மே ஏஸேவந்தோ, அப⁴ப்³பா³ அஹம் இதா³னி புரிஸம் க³வேஸிதுந்தி. ஸப்³ப³த்த² விஹதா நந்தீ³தி ஸப்³பே³ஸு க²ந்தா⁴யதனதா⁴துப⁴வயோனிக³திடி²தினிவாஸேஸு மம தண்ஹானந்தீ³ விஹதா. தமோக்க²ந்தோ⁴தி அவிஜ்ஜாக்க²ந்தோ⁴. பதா³லிதோதி ஞாணேன பி⁴ன்னோ. ததியம்.

4. விஜயாஸுத்தவண்ணனா

165. சதுத்தே² பஞ்சங்கி³கேனாதி ஆததம் விததம் ஆததவிததம் க⁴னம் ஸுஸிரந்தி ஏவம் பஞ்சங்க³ஸமன்னாக³தேன. நிய்யாதயாமி துய்ஹேவாதி ஸப்³பே³ துய்ஹம்யேவ தே³மி. நாஹம் தேனத்தி²காதி நாஹம் தேன அத்தி²கா. பூதிகாயேனாதி ஸுவண்ணவண்ணோபி காயோ நிச்சம் உக்³க⁴ரிதபக்³க⁴ரிதட்டே²ன பூதிகாயோவ, தஸ்மா ஏவமாஹ. பி⁴ந்த³னேனாதி பி⁴ஜ்ஜனஸபா⁴வேன. பப⁴ங்கு³னாதி சுண்ணவிசுண்ணம் ஆபஜ்ஜனத⁴ம்மேன. அட்டீயாமீதி அட்டா பீளிதா ஹோமி. ஹராயாமீதி லஜ்ஜாமி. ஸந்தா ஸமாபத்தீதி அட்ட²விதா⁴ லோகியஸமாபத்தி ஆரம்மணஸந்ததாய அங்க³ஸந்ததாய ச ஸந்தாதி வுத்தா. ஸப்³ப³த்தா²தி ஸப்³பே³ஸு ரூபாரூபப⁴வேஸு, தேஸம் த்³வின்னம் ப⁴வானம் க³ஹிதத்தா க³ஹிதே காமப⁴வே அட்ட²ஸு ச ஸமாபத்தீஸூதி ஏதேஸு ஸப்³பே³ஸு டா²னேஸு மய்ஹம் அவிஜ்ஜாதமோ விஹதோதி வத³தி. சதுத்த²ம்.

5. உப்பலவண்ணாஸுத்தவண்ணனா

166. பஞ்சமே ஸுபுப்பி²தக்³க³ந்தி அக்³க³தோ பட்டா²ய ஸுட்டு² புப்பி²தம் ஸாலருக்க²ம். ந சத்தி² தே து³தியா வண்ணதா⁴தூதி தவ வண்ணதா⁴துஸதி³ஸா து³தியா வண்ணதா⁴து நத்தி², தயா ஸதி³ஸா அஞ்ஞா பி⁴க்கு²னீ நத்தீ²தி வத³தி. இதா⁴க³தா தாதி³ஸிகா ப⁴வேய்யுந்தி யதா² த்வம் இதா⁴க³தா கிஞ்சி ஸந்த²வம் வா ஸினேஹம் வா ந லப⁴ஸி, ஏவமேவம் தேபி தயாவ ஸதி³ஸா ப⁴வேய்யும். பகு²மந்தரிகாயந்தி த்³வின்னம் அக்கீ²னம் மஜ்ஜே² நாஸவம்ஸேபி திட்ட²ந்திம் மம் ந பஸ்ஸஸி. வஸீபூ⁴தம்ஹீதி வஸீபூ⁴தா அஸ்மி. பஞ்சமம்.

6. சாலாஸுத்தவண்ணனா

167. ச²ட்டே² கோ நு தம் இத³மாத³பயீதி கோ நு மந்த³பு³த்³தி⁴ பா³லோ தம் ஏவம் கா³ஹாபேஸி? பரிக்லேஸந்தி அஞ்ஞம்பி நானப்பகாரம் உபத்³த³வம். இதா³னி யம் மாரோ ஆஹ – ‘‘கோ நு தம் இத³மாத³பயீ’’தி, தம் மத்³த³ந்தீ – ‘‘ந மம் அந்த⁴பா³லோ ஆத³பேஸி, லோகே பன அக்³க³புக்³க³லோ ஸத்தா² த⁴ம்மம் தே³ஸேஸீ’’தி த³ஸ்ஸேதும், பு³த்³தோ⁴திஆதி³மாஹ. தத்த² ஸச்சே நிவேஸயீதி பரமத்த²ஸச்சே நிப்³பா³னே நிவேஸேஸி. நிரோத⁴ம் அப்பஜானந்தாதி நிரோத⁴ஸச்சம் அஜானந்தா. ச²ட்ட²ம்.

7. உபசாலாஸுத்தவண்ணனா

168. ஸத்தமே ஏந்தி மாரவஸம் புனாதி புனப்புனம் மரணமாரகிலேஸமாரதே³வபுத்தமாரானம் வஸம் ஆக³ச்ச²ந்தி. பதூ⁴பிதோதி ஸந்தாபிதோ. அக³தி யத்த² மாரஸ்ஸாதி யத்த² துய்ஹம் மாரஸ்ஸ அக³தி. தத்தா²தி தஸ்மிம் நிப்³பா³னே. ஸத்தமம்.

8. ஸீஸுபசாலாஸுத்தவண்ணனா

169. அட்ட²மே ஸமணீ விய தி³ஸ்ஸஸீதி ஸமணிஸதி³ஸா தி³ஸ்ஸஸி. கிமிவ சரஸி மோமூஹாதி கிம் காரணா மோமூஹா விய சரஸி? இதோ ப³ஹித்³தா⁴தி இமம்ஹா ஸாஸனா ப³ஹி. பாஸம் டே³ந்தீதி பாஸண்டா³, ஸத்தானம் சித்தேஸு தி³ட்டி²பாஸம் கி²பந்தீதி அத்தோ². ஸாஸனம் பன பாஸே மோசேதி, தஸ்மா பாஸண்டோ³தி ந வுச்சதி, இதோ ப³ஹித்³தா⁴யேவ பாஸண்டா³ ஹோந்தி. பஸீத³ந்தீதி ஸம்ஸீத³ந்தி லக்³க³ந்தி.

இதா³னி ‘‘கம் நு உத்³தி³ஸ்ஸ முண்டா³ஸீ’’தி பஞ்ஹம் கதே²ந்தீ அத்தி² ஸக்யகுலே ஜாதோதிஆதி³மாஹ. தத்த² ஸப்³பா³பி⁴பூ⁴தி ஸப்³பா³னி க²ந்தா⁴யதனதா⁴துப⁴வயோனிக³திஆதீ³னி அபி⁴ப⁴வித்வா டி²தோ. மரணமாராத³யோ நுதி³ நீஹரீதி மாரனுதோ³. ஸப்³ப³த்த²மபராஜிதோதி ஸப்³பே³ஸு ராகா³தீ³ஸு வா மாரயுத்³தே⁴ வா அஜிதோ. ஸப்³ப³த்த² முத்தோதி ஸப்³பே³ஸு க²ந்தா⁴தீ³ஸு முத்தோ. அஸிதோதி தண்ஹாதி³ட்டி²னிஸ்ஸயேன அனிஸ்ஸிதோ. ஸப்³ப³கம்மக்க²யம் பத்தோதி ஸப்³ப³கம்மக்க²யஸங்கா²தம் அரஹத்தம் பத்தோ. உபதி⁴ஸங்க²யேதி உபதி⁴ஸங்க²யஸங்கா²தே நிப்³பா³னே ஆரம்மணதோ விமுத்தோ. அட்ட²மம்.

9. ஸேலாஸுத்தவண்ணனா

170. நவமே கேனித³ம் பகதந்தி கேன இத³ம் கதம். பி³ம்ப³ந்தி அத்தபா⁴வம் ஸந்தா⁴ய வத³தி. அக⁴ந்தி து³க்க²பதிட்டா²னத்தா அத்தபா⁴வமேவ வத³தி. ஹேதுப⁴ங்கா³தி ஹேதுனிரோதே⁴ன பச்சயவேகல்லேன. நவமம்.

10. வஜிராஸுத்தவண்ணனா

171. த³ஸமே நயித⁴ ஸத்துபலப்³ப⁴தீதி இமஸ்மிம் ஸுத்³த⁴ஸங்கா²ரபுஞ்ஜே பரமத்த²தோ ஸத்தோ நாம ந உபலப்³ப⁴தி. க²ந்தே⁴ஸு ஸந்தேஸூதி பஞ்சஸு க²ந்தே⁴ஸு விஜ்ஜமானேஸு தேன தேனாகாரேன வவத்தி²தேஸு. ஸம்முதீதி ஸத்தோதி ஸமஞ்ஞாமத்தமேவ ஹோதி. து³க்க²ந்தி பஞ்சக்க²ந்த⁴து³க்க²ம். நாஞ்ஞத்ர து³க்கா²தி ட²பேத்வா து³க்க²ம் அஞ்ஞோ நேவ ஸம்போ⁴தி ந நிருஜ்ஜ²தீதி. த³ஸமம்.

இதி ஸாரத்த²ப்பகாஸினியா

ஸம்யுத்தனிகாய-அட்ட²கதா²ய

பி⁴க்கு²னீஸம்யுத்தவண்ணனா நிட்டி²தா.