3. ததியவக்³கோ³

1. புக்³க³லஸுத்தவண்ணனா

132. ததியவக்³க³ஸ்ஸ பட²மே ‘‘நீசே குலே பச்சாஜாதோ’’திஆதி³கேன தமேன யுத்தோதி தமோ. காயது³ச்சரிதாதீ³ஹி புன நிரயதமூபக³மனதோ தமபராயணோ. இதி உப⁴யேனபி க²ந்த⁴தமோவ கதி²தோ ஹோதி. ‘‘உச்சே குலே பச்சாஜாதோ’’திஆதி³கேன ஜோதினா யுத்ததோ ஜோதி, ஆலோகீபூ⁴தோதி வுத்தம் ஹோதி. காயஸுசரிதாதீ³ஹி புன ஸக்³கூ³பபத்திஜோதிபா⁴வூபக³மனதோ ஜோதிபராயணோ. இமினா நயேன இதரேபி த்³வே வேதி³தப்³பா³.

வேனகுலேதி விலீவகாரகுலே. நேஸாத³குலேதி மிக³லுத்³த³காதீ³னம் குலே. ரத²காரகுலேதி சம்மகாரகுலே. புக்குஸகுலேதி புப்ப²ச²ட்³ட³ககுலே. கஸிரவுத்திகேதி து³க்க²வுத்திகே. து³ப்³ப³ண்ணோதி பம்ஸுபிஸாசகோ விய ஜா²மகா²ணுவண்ணோ. து³த்³த³ஸிகோதி விஜாதமாதுயாபி அமனாபத³ஸ்ஸனோ. ஓகோடிமகோதி லகுண்ட³கோ. காணோதி ஏகக்கி²காணோ வா உப⁴யக்கி²காணோ வா. குணீதி ஏகஹத்த²குணீ வா உப⁴யஹத்த²குணீ வா. க²ஞ்ஜோதி ஏகபாத³க²ஞ்ஜோ வா உப⁴யபாத³க²ஞ்ஜோ வா. பக்க²ஹதோதி ஹதபக்கோ² பீட²ஸப்பீ. பதீ³பேய்யஸ்ஸாதி தேலகபல்லகாதி³னோ பதீ³பஉபகரணஸ்ஸ. ஏவம் கோ², மஹாராஜாதி ஏத்த² ஏகோ புக்³க³லோ ப³ஹித்³தா⁴ ஆலோகம் அதி³ஸ்வா மாதுகுச்சி²ஸ்மிம்யேவ காலம் கத்வா அபாயேஸு நிப்³ப³த்தந்தோ ஸகலம் கப்பம்பி ஸம்ஸரதி, ஸோபி தமோதமபராயணோவ. ஸோ பன குஹகபுக்³க³லோ ப⁴வேய்ய. குஹகஸ்ஸ ஹி ஏவரூபா நிப்³ப³த்தி ஹோதீதி வுத்தம்.

ஏத்த² ச ‘‘நீசே குலே பச்சாஜாதோ ஹோதி சண்டா³லகுலே வா’’திஆதீ³ஹி ஆக³மனவிபத்தி சேவ புப்³பு³ப்பன்னபச்சயவிபத்தி ச த³ஸ்ஸிதா. த³லித்³தே³திஆதீ³ஹி பவத்தபச்சயவிபத்தி. கஸிரவுத்திகேதிஆதீ³ஹி ஆஜீவுபாயவிபத்தி. து³ப்³ப³ண்ணோதிஆதீ³ஹி அத்தபா⁴வவிபத்தி. ப³வ்ஹாபா³தோ⁴திஆதீ³ஹி து³க்க²காரணஸமாயோகோ³. ந லாபீ⁴திஆதீ³ஹி ஸுக²காரணவிபத்தி சேவ உபபோ⁴க³விபத்தி ச. காயேன து³ச்சரிதந்திஆதீ³ஹி தமபராயணபா⁴வஸ்ஸ காரணஸமாயோகோ³. காயஸ்ஸ பே⁴தா³திஆதீ³ஹி ஸம்பராயிகதமூபக³மோ. ஸுக்கபக்கோ² வுத்தபடிபக்க²னயேன வேதி³தப்³போ³.

அக்கோஸதீதி த³ஸஹி அக்கோஸவத்தூ²ஹி அக்கோஸதி. பரிபா⁴ஸதீதி, ‘‘கஸ்மா திட்ட²த²? கிம் தும்ஹேஹி அம்ஹாகம் கஸிகம்மாதீ³னி கதானீ’’திஆதீ³ஹி? பரிப⁴வவசனேஹி பரிபா⁴ஸதி. ரோஸகோதி க⁴ட்டகோ. அப்³யக்³க³மனஸோதி ஏகக்³க³சித்தோ. பட²மம்.

2. அய்யிகாஸுத்தவண்ணனா

133. து³தியே ஜிண்ணாதி ஜராஜிண்ணா. வுட்³டா⁴தி வயோவுட்³டா⁴. மஹல்லிகாதி ஜாதிமஹல்லிகா. அத்³த⁴க³தாதி அத்³த⁴ம் சிரகாலம் அதிக்கந்தா. வயோஅனுப்பத்தாதி பச்சி²மவயம் ஸம்பத்தா. பியா மனாபாதி ரஞ்ஞோ கிர மாதரி மதாய அய்யிகா மாதுட்டா²னே ட²த்வா படிஜக்³கி³, தேனஸ்ஸ அய்யிகாய ப³லவபேமம் உப்பஜ்ஜி. தஸ்மா ஏவமாஹ. ஹத்தி²ரதனேனாதி ஸதஸஹஸ்ஸக்³க⁴னகோ ஹத்தீ² ஸதஸஹஸ்ஸக்³க⁴னகேன அலங்காரேன அலங்கதோ ஹத்தி²ரதனம் நாம. அஸ்ஸரதனேபி ஏஸேவ நயோ. கா³மவரோபி ஸதஸஹஸ்ஸுட்டா²னககா³மோவ. ஸப்³பா³னி தானி பே⁴த³னத⁴ம்மானீதி தேஸு ஹி கிஞ்சி கரியமானமேவ பி⁴ஜ்ஜதி, கிஞ்சி கதபரியோஸிதம் சக்கதோ அனபனீதமேவ, கிஞ்சி அபனேத்வா பூ⁴மியம் ட²பிதமத்தம், கிஞ்சி ததோ பரம், ஏவமேவ ஸத்தேஸுபி கோசி படிஸந்தி⁴ம் க³ஹேத்வா மரதி, கோசி மூள்ஹக³ப்³பா⁴ய மாதரி மாதுகுச்சி²தோ அனிக்க²ந்தோவ, கோசி நிக்க²ந்தமத்தோ, கோசி ததோ பரந்தி. தஸ்மா ஏவமாஹ. து³தியம்.

134. ததியே ஸப்³ப³ம் உத்தானமேவ. ததியம்.

4. இஸ்ஸத்தஸுத்தவண்ணனா

135. சதுத்த²ஸ்ஸ அட்டு²ப்பத்திகோ நிக்கே²போ. ப⁴க³வதோ கிர பட²மபோ³தி⁴யம் மஹாலாப⁴ஸக்காரோ உத³பாதி³ பி⁴க்கு²ஸங்க⁴ஸ்ஸ ச. தித்தி²யா ஹதலாப⁴ஸக்காரா ஹுத்வா குலேஸு ஏவம் கந்தே²ந்தா விசரந்தி – ‘‘ஸமணோ கோ³தமோ ஏவமாஹ, ‘மய்ஹமேவ தா³னம் தா³தப்³ப³ம், ந அஞ்ஞேஸம் தா³னம் தா³தப்³ப³ம். மய்ஹமேவ ஸாவகானம் தா³னம் தா³தப்³ப³ம், ந அஞ்ஞேஸம் ஸாவகானம் தா³னம் தா³தப்³ப³ம். மய்ஹமேவ தி³ன்னம் மஹப்ப²லம், ந அஞ்ஞேஸம் தி³ன்னம் மஹப்ப²லம். மய்ஹமேவ ஸாவகானம் தி³ன்னம் மஹப்ப²லம், ந அஞ்ஞேஸம் ஸாவகானம் தி³ன்னம் மஹப்ப²ல’ந்தி. யுத்தம் நு கோ² ஸயம்பி பி⁴க்கா²சாரனிஸ்ஸிதேன பரேஸம் பி⁴க்கா²சாரனிஸ்ஸிதானம் சதுன்னம் பச்சயானம் அந்தராயம் காதும், அயுத்தம் கரோதி அனனுச்ச²விக’’ந்தி. ஸா கதா² பத்த²ரமானா ராஜகுலம் ஸம்பத்தா. ராஜா ஸுத்வா சிந்தேஸி – ‘‘அட்டா²னமேதம் யம் ததா²க³தோ பரேஸம் லாப⁴ந்தராயம் கரேய்ய. ஏதே ததா²க³தஸ்ஸ அலாபா⁴ய அயஸாய பரிஸக்கந்தி. ஸசாஹம் இதே⁴வ ட²த்வா ‘மா ஏவம் அவோசுத்த², ந ஸத்தா² ஏவம் கதே²தீ’தி வதே³ய்யம், ஏவம் ஸா கதா² நிஜ்ஜ²த்திம் ந க³ச்சே²ய்ய, இமஸ்ஸ மஹாஜனஸ்ஸ ஸன்னிபதிதகாலேயேவ நம் நிஜ்ஜா²பேஸ்ஸாமீ’’தி ஏகம் ச²ணதி³வஸம் ஆக³மேந்தோ துண்ஹீ அஹோஸி.

அபரேன ஸமயேன மஹாச²ணே ஸம்பத்தே ‘‘அயம் இமஸ்ஸ காலோ’’தி நக³ரே பே⁴ரிம் சராபேஸி – ‘‘ஸத்³தா⁴ வா அஸ்ஸத்³தா⁴ வா ஸம்மாதி³ட்டி²கா வா மிச்சா²தி³ட்டி²கா வா கே³ஹரக்க²கே தா³ரகே வா மாதுகா³மே வா ட²பேத்வா அவஸேஸா யே விஹாரம் நாக³ச்ச²ந்தி, பஞ்ஞாஸம் த³ண்டோ³’’தி. ஸயம்பி பாதோவ ந்ஹத்வா கதபாதராஸோ ஸப்³பா³ப⁴ரணபடிமண்டி³தோ மஹதா ப³லகாயேன ஸத்³தி⁴ம் விஹாரம் அக³மாஸி. க³ச்ச²ந்தோ ச சிந்தேஸி – ‘‘ப⁴க³வா தும்ஹே கிர ஏவம் வத³த² ‘மய்ஹமேவ தா³னம் தா³தப்³ப³ம்…பே… ந அஞ்ஞேஸம் ஸாவகானம் தி³ன்னம் மஹப்ப²ல’ந்தி ஏவம் புச்சி²தும் அயுத்தம், பஞ்ஹமேவ புச்சி²ஸ்ஸாமி, பஞ்ஹம் கதே²ந்தோ ச மே ப⁴க³வா அவஸானே தித்தி²யானம் வாத³ம் ப⁴ஞ்ஜிஸ்ஸதீ’’தி. ஸோ பஞ்ஹம் புச்ச²ந்தோ கத்த² நு கோ², ப⁴ந்தே, தா³னம் தா³தப்³ப³ந்தி ஆஹ. யத்தா²தி யஸ்மிம் புக்³க³லே சித்தம் பஸீத³தி, தஸ்மிம் தா³தப்³ப³ம், தஸ்ஸ வா தா³தப்³ப³ந்தி அத்தோ².

ஏவம் வுத்தே ராஜா யேஹி மனுஸ்ஸேஹி தித்தி²யானம் வசனம் ஆரோசிதம், தே ஓலோகேஸி. தே ரஞ்ஞா ஓலோகிதமத்தாவ மங்குபூ⁴தா அதோ⁴முகா² பாத³ங்கு³ட்ட²கேன பூ⁴மிம் லேக²மானா அட்ட²ம்ஸு. ராஜா – ‘‘ஏகபதே³னேவ, ப⁴ந்தே, ஹதா தித்தி²யா’’தி மஹாஜனம் ஸாவேந்தோ மஹாஸத்³தே³ன அபா⁴ஸி. ஏவஞ்ச பன பா⁴ஸித்வா – ‘‘ப⁴க³வா சித்தம் நாம நிக³ண்டா²சேலகபரிப்³பா³ஜகாதீ³ஸு யத்த² கத்த²சி பஸீத³தி, கத்த² பன, ப⁴ந்தே, தி³ன்னம் மஹப்ப²ல’’ந்தி புச்சி². அஞ்ஞம் கோ² ஏதந்தி, ‘‘மஹாராஜ, அஞ்ஞம் தயா பட²மம் புச்சி²தம், அஞ்ஞம் பச்சா², ஸல்லக்கே²ஹி ஏதம், பஞ்ஹாகத²னம் பன மய்ஹம் பா⁴ரோ’’தி வத்வா ஸீலவதோ கோ²திஆதி³மாஹ. தத்த² இத⁴ த்யஸ்ஸாதி இத⁴ தே அஸ்ஸ. ஸமுபப்³யூள்ஹோதி ராஸிபூ⁴தோ. அஸிக்கி²தோதி த⁴னுஸிப்பே அஸிக்கி²தோ. அகதஹத்தோ²தி முட்டி²ப³ந்தா⁴தி³வஸேன அஸம்பாதி³தஹத்தோ². அகதயோக்³கோ³தி திணபுஞ்ஜமத்திகாபுஞ்ஜாதீ³ஸு அகதபரிசயோ. அகதூபாஸனோதி ராஜராஜமஹாமத்தானம் அத³ஸ்ஸிதஸரக்கே²போ. ச²ம்பீ⁴தி பவேதி⁴தகாயோ.

காமச்ச²ந்தோ³ பஹீனோதிஆதீ³ஸு அரஹத்தமக்³கே³ன காமச்ச²ந்தோ³ பஹீனோ ஹோதி, அனாகா³மிமக்³கே³ன ப்³யாபாதோ³, அரஹத்தமக்³கே³னேவ தி²னமித்³த⁴ம், ததா² உத்³த⁴ச்சம், ததியேனேவ குக்குச்சம், பட²மமக்³கே³ன விசிகிச்சா² பஹீனா ஹோதி. அஸேக்கே²ன ஸீலக்க²ந்தே⁴னாதி அஸேக்க²ஸ்ஸ ஸீலக்க²ந்தோ⁴ அஸேக்கோ² ஸீலக்க²ந்தோ⁴ நாம. ஏஸ நயோ ஸப்³ப³த்த². ஏத்த² ச புரிமேஹி சதூஹி பதே³ஹி லோகியலோகுத்தரஸீலஸமாதி⁴பஞ்ஞாவிமுத்தியோ கதி²தா. விமுத்திஞாணத³ஸ்ஸனம் பச்சவேக்க²ணஞாணம் ஹோதி, தம் லோகியமேவ.

இஸ்ஸத்தந்தி உஸுஸிப்பம். ப³லவீரியந்தி ஏத்த² ப³லம் நாம வாயோதா⁴து, வீரியம் காயிகசேதஸிகவீரியமேவ. ப⁴ரேதி ப⁴ரேய்ய. நாஸூரம் ஜாதிபச்சயாதி, ‘‘அயம் ஜாதிஸம்பன்னோ’’தி ஏவம் ஜாதிகாரணா அஸூரம் ந ப⁴ரேய்ய.

க²ந்திஸோரச்சந்தி ஏத்த² க²ந்தீதி அதி⁴வாஸனக²ந்தி, ஸோரச்சந்தி அரஹத்தம். த⁴ம்மாதி ஏதே த்³வே த⁴ம்மா. அஸ்ஸமேதி ஆவஸதே². விவனேதி அரஞ்ஞட்டா²னே, நிருத³கே அரஞ்ஞே சதுரஸ்ஸபோக்க²ரணிஆதீ³னி காரயேதி அத்தோ². து³க்³கே³தி விஸமட்டா²னே. ஸங்கமனானீதி பண்ணாஸஹத்த²ஸட்டி²ஹத்தா²னி ஸமோகிண்ணபரிஸுத்³த⁴வாலிகானி ஸங்கமனானி கரேய்ய.

இதா³னி ஏதேஸு அரஞ்ஞஸேனாஸனேஸு வஸந்தானம் பி⁴க்கூ²னம் பி⁴க்கா²சாரவத்தம் ஆசிக்க²ந்தோ அன்னம் பானந்திஆதி³மாஹ. தத்த² ஸேனாஸனானீதி மஞ்சபீடா²தீ³னி. விப்பஸன்னேனாதி கீ²ணாஸவஸ்ஸ தே³ந்தோபி ஸகங்கே²ன கிலேஸமலினேன சித்தேன அத³த்வா விப்பஸன்னேனேவ சித்தேன த³தே³ய்ய. த²னயந்தி க³ஜ்ஜந்தோ. ஸதக்ககூதி ஸதஸிக²ரோ, அனேககூடோதி அத்தோ². அபி⁴ஸங்க²ச்சாதி அபி⁴ஸங்க²ரித்வா ஸமோதா⁴னேத்வா ராஸிம் கத்வா.

ஆமோத³மானோதி துட்ட²மானஸோ ஹுத்வா. பகிரேதீதி தா³னக்³கே³ விசிரதி, பகிரந்தோ விய வா தா³னம் தே³தி. புஞ்ஞதா⁴ராதி அனேகதா³னசேதனாமயா புஞ்ஞதா⁴ரா. தா³தாரம் அபி⁴வஸ்ஸதீதி யதா² ஆகாஸே ஸமுட்டி²தமேக⁴தோ நிக்க²ந்தா உத³கதா⁴ரா பத²விம் ஸினேஹயந்தீ தேமேந்தீ கிலேத³யந்தீ அபி⁴வஸ்ஸதி, ஏவமேவ அயம்பி தா³யகஸ்ஸ அப்³ப⁴ந்தரே உப்பன்னா புஞ்ஞதா⁴ரா தமேவ தா³தாரம் அந்தோ ஸினேஹேதி பூரேதி அபி⁴ஸந்தே³தி. தேன வுத்தம் ‘‘தா³தாரம் அபி⁴வஸ்ஸதீ’’தி. சதுத்த²ம்.

5. பப்³ப³தூபமஸுத்தவண்ணனா

136. பஞ்சமே முத்³தா⁴வஸித்தானந்தி க²த்தியாபி⁴ஸேகேன முத்³த⁴னி அவஸித்தானம் கதாபி⁴ஸேகானம். காமகே³த⁴பரியுட்டி²தானந்தி காமேஸு கே³தே⁴ன பரியுட்டி²தானம் அபி⁴பூ⁴தானம். ஜனபத³த்தா²வரியப்பத்தானந்தி ஜனபதே³ தி²ரபா⁴வப்பத்தானம். ராஜகரணீயானீதி ராஜகம்மானி ராஜூஹி கத்தப்³ப³கிச்சானி. தேஸு க்²வாஹந்தி தேஸு அஹம். உஸுக்கமாபன்னோதி ப்³யாபாரம் ஆபன்னோ. ஏஸ கிர ராஜா தி³வஸஸ்ஸ திக்க²த்தும் ப⁴க³வதோ உபட்டா²னம் க³ச்ச²தி, அந்தராக³மனானி ப³ஹூனிபி ஹோந்தி. தஸ்ஸ நிப³த்³த⁴ம் க³ச்ச²தோ ப³லகாயோ மஹாபி ஹோதி அப்போபி. அதே²கதி³வஸம் பஞ்சஸதா சோரா சிந்தயிம்ஸு – ‘‘அயம் ராஜா அவேலாய அப்பேன ப³லேன ஸமணஸ்ஸ கோ³தமஸ்ஸ உபட்டா²னம் க³ச்ச²தி, அந்தராமக்³கே³ நம் க³ஹேத்வா ரஜ்ஜம் க³ண்ஹிஸ்ஸாமா’’தி. தே அந்த⁴வனே நிலீயிம்ஸு. ராஜானோ ச நாம மஹாபுஞ்ஞா ஹோந்தி. அத² தேஸம்யேவ அப்³ப⁴ந்தரதோ ஏகோ புரிஸோ நிக்க²மித்வா ரஞ்ஞோ ஆரோசேஸி. ராஜா மஹந்தம் ப³லகாயம் ஆதா³ய அந்த⁴வனம் பரிவாரேத்வா தே ஸப்³பே³ க³ஹேத்வா அந்த⁴வனதோ யாவ நக³ரத்³வாரா மக்³க³ஸ்ஸ உபோ⁴ஸு பஸ்ஸேஸு யதா² அஞ்ஞமஞ்ஞம் சக்கு²னா சக்கு²ம் உபனிப³ந்தி⁴த்வா ஓலோகேந்தி, ஏவம் ஆஸன்னானி ஸூலானி ரோபாபேத்வா ஸூலேஸு உத்தாஸேஸி. இத³ம் ஸந்தா⁴ய ஏவமாஹ.

அத² ஸத்தா² சிந்தேஸி – ‘‘ஸசாஹம் வக்கா²மி, ‘மஹாராஜ, மாதி³ஸே நாம ஸம்மாஸம்பு³த்³தே⁴ து⁴ரவிஹாரே வஸந்தே தயா ஏவரூபம் தா³ருணம் கம்மம் கதம், அயுத்தம் தே கத’ந்தி, அதா²யம் ராஜா மங்கு ஹுத்வா ஸந்த²ம்பி⁴தும் ந ஸக்குணேய்ய, பரியாயேன த⁴ம்மம் கதே²ந்தஸ்ஸேவ மே ஸல்லக்கே²ஸ்ஸதீ’’தி த⁴ம்மதே³ஸனம் ஆரப⁴ந்தோ தம் கிம் மஞ்ஞஸீதிஆதி³மாஹ. தத்த² ஸத்³தா⁴யிகோதி ஸத்³தா⁴தப்³போ³, யஸ்ஸ த்வம் வசனம் ஸத்³த³ஹஸீதி அத்தோ². பச்சயிகோதி தஸ்ஸேவ வேவசனம், யஸ்ஸ வசனம் பத்தியாயஸீதி அத்தோ². அப்³ப⁴ஸமந்தி ஆகாஸஸமம். நிப்போதே²ந்தோ ஆக³ச்ச²தீதி பத²விதலதோ யாவ அகனிட்ட²ப்³ரஹ்மலோகா ஸப்³பே³ ஸத்தே ஸண்ஹகரணீயம் திணசுண்ணம் விய கரோந்தோ பிஸந்தோ ஆக³ச்ச²தி.

அஞ்ஞத்ர த⁴ம்மசரியாயாதி ட²பேத்வா த⁴ம்மசரியம் அஞ்ஞம் காதப்³ப³ம் நத்தி², த³ஸகுஸலகம்மபத²ஸங்கா²தா த⁴ம்மசரியாவ கத்தப்³பா³, ப⁴ந்தேதி – ஸமசரியாதீ³னி தஸ்ஸேவ வேவசனானி. ஆரோசேமீதி ஆசிக்கா²மி. படிவேத³யாமீதி ஜானாபேமி. அதி⁴வத்ததீதி அஜ்ஜோ²த்த²ரதி. ஹத்தி²யுத்³தா⁴னீதி நாளாகி³ரிஸதி³ஸே ஹேமகப்பனே நாகே³ அபி⁴ருய்ஹ யுஜ்ஜி²தப்³ப³யுத்³தா⁴னி. க³தீதி நிப்ப²த்தி. விஸயோதி ஓகாஸோ, ஸமத்த²பா⁴வோ வா. ந ஹி ஸக்கா தேஹி ஜராமரணம் படிபா³ஹிதும். மந்தினோ மஹாமத்தாதி மந்தஸம்பன்னா மஹோஸத⁴விது⁴ரபண்டி³தாதி³ஸதி³ஸா மஹாஅமச்சா. பூ⁴மிக³தந்தி மஹாலோஹகும்பி⁴யோ பூரேத்வா பூ⁴மியம் ட²பிதம். வேஹாஸட்ட²ந்தி சம்மபஸிப்³ப³கே பூரேத்வா துலாஸங்கா⁴டாதீ³ஸு லக்³கே³த்வா சேவ நிய்யுஹாதீ³ஸு ச பூரேத்வா ட²பிதம். உபலாபேதுந்தி அஞ்ஞமஞ்ஞம் பி⁴ந்தி³தும். யதா² த்³வே ஜனா ஏகேன மக்³கே³ன ந க³ச்ச²ந்தி ஏவம் காதும்.

நப⁴ம் ஆஹச்சாதி ஆகாஸம் பூரேத்வா. ஏவம் ஜரா ச மச்சு சாதி இத⁴ த்³வேயேவ பப்³ப³தா க³ஹிதா, ராஜோவாதே³ பன ‘‘ஜரா ஆக³ச்ச²தி ஸப்³ப³யோப்³ப³னம் விலும்பமானா’’தி ஏவம் ஜரா மரணம் ப்³யாதி⁴ விபத்தீதி சத்தாரோபேதே ஆக³தாவ. தஸ்மாதி யஸ்மா ஹத்தி²யுத்³தா⁴தீ³ஹி ஜராமரணம் ஜினிதும் ந ஸக்கா, தஸ்மா. ஸத்³த⁴ம் நிவேஸயேதி ஸத்³த⁴ம் நிவேஸேய்ய, பதிட்டா²பேய்யாதி. பஞ்சமம்.

ததியோ வக்³கோ³.

இதி ஸாரத்த²ப்பகாஸினியா

ஸம்யுத்தனிகாய-அட்ட²கதா²ய

கோஸலஸம்யுத்தவண்ணனா நிட்டி²தா.