10. ப³ந்த⁴னஸுத்தவண்ணனா

121. த³ஸமே இத⁴, ப⁴ந்தே, ரஞ்ஞாதி இத³ம் தே பி⁴க்கூ² தேஸு மனுஸ்ஸேஸு ஆனந்த³த்தே²ரஸ்ஸ ஸுகதகாரணம் ஆரோசேந்தா ஆரோசேஸும். ரஞ்ஞோ கிர ஸக்கேன குஸராஜஸ்ஸ தி³ன்னோ அட்ட²வங்கோ மணி பவேணியா ஆக³தோ. ராஜா அலங்கரணகாலே தம் மணிம் ஆஹரதா²தி ஆஹ. மனுஸ்ஸா ‘‘ட²பிதட்டா²னே ந பஸ்ஸாமா’’தி ஆரோசேஸும். ராஜா அந்தோக⁴ரசாரினோ ‘‘மணிம் பரியேஸித்வா தே³தா²’’தி ப³ந்தா⁴பேஸி. ஆனந்த³த்தே²ரோ தே தி³ஸ்வா மணிபடிஸாமகானம் ஏகம் உபாயம் ஆசிக்கி². தே ரஞ்ஞோ ஆரோசேஸும். ராஜா ‘‘பண்டி³தோ தே²ரோ, தே²ரஸ்ஸ வசனம் கரோதா²’’தி. படிஸாமகமனுஸ்ஸா ராஜங்க³ணே உத³கசாடிம் ட²பேத்வா ஸாணியா பரிக்கி²பாபேத்வா தே மனுஸ்ஸே ஆஹம்ஸு – ‘‘ஸாடகம் பாருபித்வா ஏத்த² க³ந்த்வா ஹத்த²ம் ஓதாரேதா²’’தி. மணிசோரோ சிந்தேஸி – ‘‘ராஜப⁴ண்ட³ம் விஸ்ஸஜ்ஜேதும் வா வலஞ்ஜேதும் வா ந ஸக்கா’’தி. ஸோ கே³ஹம் க³ந்த்வா மணிம் உபகச்ச²கே ட²பேத்வா ஸாடகம் பாருபித்வா ஆக³ம்ம உத³கசாடியம் பக்கி²பித்வா பக்காமி. மஹாஜனே படிக்கந்தே ராஜமனுஸ்ஸா சாடியம் ஹத்த²ம் ஓதாரேத்வா மணிம் தி³ஸ்வா ஆஹரித்வா ரஞ்ஞோ அத³ம்ஸு. ‘‘ஆனந்த³த்தே²ரேன கிர த³ஸ்ஸிதனயேன மணி தி³ட்டோ²’’தி மஹாஜனோ கோலாஹலம் அகாஸி. தே பி⁴க்கூ² தம் காரணம் ததா²க³தஸ்ஸ ஆரோசேந்தா இமம் பவத்திம் ஆரோசேஸும். ஸத்தா² – ‘‘அனச்ச²ரியம், பி⁴க்க²வே, யம் ஆனந்தோ³ மனுஸ்ஸானம் ஹத்தா²ருள்ஹமணிம் ஆஹராபேய்ய, யத்த² புப்³பே³ பண்டி³தா அத்தனோ ஞாணே ட²த்வா அஹேதுகபடிஸந்தி⁴யம் நிப்³ப³த்தானம் திரச்சா²னக³தானம்பி ஹத்தா²ருள்ஹம் ப⁴ண்ட³ம் ஆஹராபேத்வா ரஞ்ஞோ அத³ம்ஸூ’’தி வத்வா –

‘‘உக்கட்டே² ஸூரமிச்ச²ந்தி, மந்தீஸு அகுதூஹலம்;

பியஞ்ச அன்னபானம்ஹி, அத்தே² ஜாதே ச பண்டி³த’’ந்தி. (ஜா. 1.1.92) –

மஹாஸாரஜாதகம் கதே²ஸி.

ந தம் த³ள்ஹந்தி தம் ப³ந்த⁴னம் தி²ரந்தி ந கதே²ந்தி. யதா³யஸந்தி யம் ஆயஸா கதம். ஸாரத்தரத்தாதி ஸுட்டு² ரத்தரத்தா, ஸாரத்தேன வா ரத்தா ஸாரத்தரத்தா, ஸாரம் இத³ந்தி மஞ்ஞனாய ரத்தாதி அத்தோ². அபேக்கா²தி ஆலயோ நிகந்தி. ஆஹூதி கதே²ந்தி. ஓஹாரினந்தி சதூஸு அபாயேஸு ஆகட்³ட⁴னகம். ஸிதி²லந்தி ந ஆயஸாதி³ப³ந்த⁴னம் விய இரியாபத²ம் நிவாரேத்வா டி²தம். தேன ஹி ப³ந்த⁴னேன ப³த்³தா⁴ பரதே³ஸம்பி க³ச்ச²ந்தியேவ. து³ப்பமுஞ்சந்தி அஞ்ஞத்ர லோகுத்தரஞாணேன முஞ்சிதும் அஸக்குணேய்யந்தி. த³ஸமம்.

பட²மோ வக்³கோ³.