5. பீ⁴தாஸுத்தவண்ணனா

75. பஞ்சமே கிம்ஸூத⁴ பீ⁴தாதி கிம் பீ⁴தா? மக்³கோ³ சனேகாயதனப்பவுத்தோதி அட்ட²திம்ஸாரம்மணவஸேன அனேகேஹி காரணேஹி கதி²தோ. ஏவம் ஸந்தே கிஸ்ஸ பீ⁴தா ஹுத்வா அயம் ஜனதா த்³வாஸட்டி² தி³ட்டி²யோ அக்³க³ஹேஸீதி வத³தி. பூ⁴ரிபஞ்ஞாதி ப³ஹுபஞ்ஞ உஸ்ஸன்னபஞ்ஞ. பரலோகம் ந பா⁴யேதி இமஸ்மா லோகா பரம் லோகம் க³ச்ச²ந்தோ ந பா⁴யேய்ய. பணிதா⁴யாதி ட²பேத்வா. ப³ஹ்வன்னபானம் க⁴ரமாவஸந்தோதி அனாத²பிண்டி³காத³யோ விய ப³ஹ்வன்னபானே க⁴ரே வஸந்தோ. ஸம்விபா⁴கீ³தி அச்ச²ராய க³ஹிதம்பி நகே²ன பா²லேத்வா பரஸ்ஸ த³த்வாவ பு⁴ஞ்ஜனஸீலோ. வத³ஞ்ஞூதி வுத்தத்த²மேவ.

இதா³னி கா³தா²ய அங்கா³னி உத்³த⁴ரித்வா த³ஸ்ஸேதப்³பா³னி – ‘‘வாச’’ந்தி ஹி இமினா சத்தாரி வசீஸுசரிதானி க³ஹிதானி, ‘‘மனேனா’’திபதே³ன தீணி மனோஸுசரிதானி, ‘‘காயேனா’’தி பதே³ன தீணி காயஸுசரிதானி. இதி இமே த³ஸ குஸலகம்மபதா² புப்³ப³ஸுத்³தி⁴அங்க³ம் நாம. ப³ஹ்வன்னபானம் க⁴ரமாவஸந்தோதி இமினா யஞ்ஞஉபக்க²ரோ க³ஹிதோ. ஸத்³தோ⁴தி ஏகமங்க³ம், முதூ³தி ஏகம், ஸம்விபா⁴கீ³தி ஏகம், வத³ஞ்ஞூதி ஏகம். இதி இமானி சத்தாரி அங்கா³னி ஸந்தா⁴ய ‘‘ஏதேஸு த⁴ம்மேஸு டி²தோ சதூஸூ’’தி ஆஹ.

அபரோபி பரியாயோ – வாசந்திஆதீ³னி தீணி அங்கா³னி, ப³ஹ்வன்னபானந்தி இமினா யஞ்ஞஉபக்க²ரோவ க³ஹிதோ, ஸத்³தோ⁴ முதூ³ ஸம்விபா⁴கீ³ வத³ஞ்ஞூதி ஏகம் அங்க³ம். அபரோ து³கனயோ நாம ஹோதி. ‘‘வாசம் மனஞ்சா’’தி இத³மேகம் அங்க³ம், ‘‘காயேன பாபானி அகுப்³ப³மானோ, ப³ஹ்வன்னபானம் க⁴ரமாவஸந்தோ’’தி ஏகம், ‘‘ஸத்³தோ⁴ முதூ³’’தி ஏகம், ‘‘ஸம்விபா⁴கீ³ வத³ஞ்ஞூ’’தி ஏகம். ஏதேஸு சதூஸு த⁴ம்மேஸு டி²தோ த⁴ம்மே டி²தோ நாம ஹோதி. ஸோ இதோ பரலோகம் க³ச்ச²ந்தோ ந பா⁴யதி. பஞ்சமம்.