6. நஜீரதிஸுத்தவண்ணனா

76. ச²ட்டே² நாமகோ³த்தம் ந ஜீரதீதி அதீதபு³த்³தா⁴னம் யாவஜ்ஜதி³வஸா நாமகோ³த்தம் கதி²யதி, தஸ்மா ந ஜீரதீதி வுச்சதி. போராணா பன ‘‘அத்³தா⁴னே க³ச்ச²ந்தே ந பஞ்ஞாயிஸ்ஸதி, ஜீரணஸபா⁴வோ பன ந ஹோதியேவா’’தி வத³ந்தி. ஆலஸ்யந்தி ஆலஸியம், யேன டி²தட்டா²னே டி²தோவ, நிஸின்னட்டா²னே நிஸின்னோவ ஹோதி, தேலேபி உத்தரந்தே டி²திம் ந கரோதி. பமாதோ³தி நித்³தா³ய வா கிலேஸவஸேன வா பமாதோ³. அனுட்டா²னந்தி கம்மஸமயே கம்மகரணவீரியாபா⁴வோ. அஸம்யமோதி ஸீலஸஞ்ஞமாபா⁴வோ விஸ்ஸட்டா²சாரதா. நித்³தா³தி ஸோப்பப³ஹுலதா. தாய க³ச்ச²ந்தோபி டி²தோபி நிஸின்னோபி நித்³தா³யதி, பகே³வ நிபன்னோ. தந்தீ³தி அதிச்சா²தாதி³வஸேன ஆக³ந்துகாலஸியம். தே சி²த்³தே³தி தானி ச² சி²த்³தா³னி விவரானி. ஸப்³ப³ஸோதி ஸப்³பா³காரேன. தந்தி நிபாதமத்தம். விவஜ்ஜயேதி வஜ்ஜேய்ய ஜஹேய்ய. ச²ட்ட²ம்.