4. வுட்டி²ஸுத்தவண்ணனா

74. சதுத்தே² பீ³ஜந்தி உப்பதந்தானம் ஸத்தவித⁴ம் த⁴ஞ்ஞபீ³ஜம் ஸேட்ட²ம். தஸ்மிஞ்ஹி உக்³க³தே ஜனபதோ³ கே²மோ ஹோதி ஸுபி⁴க்கோ². நிபததந்தி நிபதந்தானம் மேக⁴வுட்டி² ஸேட்டா². மேக⁴வுட்டி²யஞ்ஹி ஸதி விவிதா⁴னி ஸஸ்ஸானி உப்பஜ்ஜந்தி, ஜனபதா³ பீ²தா ஹோந்தி கே²மா ஸுபி⁴க்கா². பவஜமானானந்தி ஜங்க³மானம் பத³ஸா சரமானானம் கா³வோ ஸேட்டா². தா நிஸ்ஸாய ஹி ஸத்தா பஞ்ச கோ³ரஸே பரிபு⁴ஞ்ஜமானா ஸுக²ம் விஹரந்தி. பவத³தந்தி ராஜகுலமஜ்ஜா²தீ³ஸு வத³ந்தானம் புத்தோ வரோ. ஸோ ஹி மாதாபிதூனம் அனத்தா²வஹம் ந வத³தி.

விஜ்ஜா உப்பததம் ஸேட்டா²தி புரிமபஞ்ஹே கிர ஸுத்வா ஸமீபே டி²தா ஏகா தே³வதா ‘‘தே³வதே, கஸ்மா த்வம் ஏதம் பஞ்ஹம் த³ஸப³லம் புச்ச²ஸி? அஹம் தே கதே²ஸ்ஸாமீ’’தி அத்தனோ க²ந்தியா லத்³தி⁴யா பஞ்ஹம் கதே²ஸி. அத² நம் இதரா தே³வதா ஆஹ – ‘‘யாவ பத⁴ம்ஸீ வதே³ஸி தே³வதே யாவ பக³ப்³பா⁴ முக²ரா, அஹம் பு³த்³த⁴ம் ப⁴க³வந்தம் புச்சா²மி. த்வம் மய்ஹம் கஸ்மா கதே²ஸீ’’தி? நிவத்தேத்வா ததே³வ பஞ்ஹம் த³ஸப³லம் புச்சி². அத²ஸ்ஸா ஸத்தா² விஸ்ஸஜ்ஜேந்தோ விஜ்ஜா உப்பததந்திஆதி³மாஹ. தத்த² விஜ்ஜாதி சதுமக்³க³விஜ்ஜா. ஸா ஹி உப்பதமானா ஸப்³பா³குஸலத⁴ம்மே ஸமுக்³கா⁴தேதி. தஸ்மா ‘‘உப்பததம் ஸேட்டா²’’தி வுத்தா. அவிஜ்ஜாதி வட்டமூலகமஹாஅவிஜ்ஜா. ஸா ஹி நிபதந்தானம் ஓஸீத³ந்தானம் வரா. பவஜமானானந்தி பத³ஸா சரமானானம் ஜங்க³மானம் அனோமபுஞ்ஞக்கே²த்தபூ⁴தோ ஸங்கோ⁴ வரோ. தஞ்ஹி தத்த² தத்த² தி³ஸ்வா பஸன்னசித்தா ஸத்தா ஸோத்தி²ம் பாபுணந்தி. பு³த்³தோ⁴தி யாதி³ஸோ புத்தோ வா ஹோது அஞ்ஞோ வா, யேஸம் கேஸஞ்சி வத³மானானம் பு³த்³தோ⁴ வரோ. தஸ்ஸ ஹி த⁴ம்மதே³ஸனம் ஆக³ம்ம அனேகஸதஸஹஸ்ஸானம் பாணானம் ப³ந்த⁴னமோக்கோ² ஹோதீதி. சதுத்த²ம்.