3. வித்தஸுத்தவண்ணனா

73. ததியே ஸத்³தீ⁴த⁴ வித்தந்தி யஸ்மா ஸத்³தோ⁴ ஸத்³தா⁴ய முத்தமணிஆதீ³னிபி வித்தானி லப⁴தி, திஸ்ஸோபி குலஸம்பதா³, ச² காமஸக்³கா³னி, நவ ப்³ரஹ்மலோகே பத்வா பரியோஸானே அமதமஹானிப்³பா³னத³ஸ்ஸனம்பி லப⁴தி, தஸ்மா மணிமுத்தாதீ³ஹி வித்தேஹி ஸத்³தா⁴வித்தமேவ ஸேட்ட²ம். த⁴ம்மோதி த³ஸகுஸலகம்மபதோ². ஸுக²மாவஹதீதி ஸப்³ப³ம்பி ஸாஸவானாஸவம் அஸம்கிலிட்ட²ஸுக²ம் ஆவஹதி. ஸாது³தரந்தி லோகஸ்மிம் லோணம்பி³லாதீ³னம் ஸப்³ப³ரஸானம் ஸச்சமேவ மது⁴ரதரம். ஸச்சஸ்மிம் ஹி டி²தா ஸீக⁴வேக³ம் நதி³ம்பி நிவத்தேந்தி, விஸம்பி நிம்மத்³தே³ந்தி, அக்³கி³ம்பி படிபா³ஹந்தி, தே³வம்பி வஸ்ஸாபேந்தி, தஸ்மா தம் ஸப்³ப³ரஸானம் மது⁴ரதரந்தி வுத்தம். பஞ்ஞாஜீவிம் ஜீவிதமாஹு ஸேட்ட²ந்தி யோ பஞ்ஞாஜீவீ க³ஹட்டோ² ஸமானோ பஞ்சஸு ஸீலேஸு பதிட்டா²ய ஸலாகப⁴த்தாதீ³னி பட்ட²பேத்வா பஞ்ஞாய ஜீவதி, பப்³ப³ஜிதோ வா பன த⁴ம்மேன உப்பன்னே பச்சயே ‘‘இத³மத்த²’’ந்தி பச்சவேக்கி²த்வா பரிபு⁴ஞ்ஜந்தோ கம்மட்டா²னம் ஆதா³ய விபஸ்ஸனம் பட்ட²பேத்வா அரியப²லாதி⁴க³மவஸேன பஞ்ஞாய ஜீவதி, தம் பஞ்ஞாஜீவிம் புக்³க³லம் ஸேட்ட²ம் ஜீவிதம் ஜீவதீதி ஆஹு. ததியம்.