6. ஜராவக்³கோ³

1. ஜராஸுத்தவண்ணனா

51. ஜராவக்³க³ஸ்ஸ பட²மே ஸாதூ⁴தி லத்³த⁴கம் ப⁴த்³த³கம். ஸீலம் யாவ ஜராதி இமினா இத³ம் த³ஸ்ஸேதி – யதா² முத்தாமணிரத்தவத்தா²தீ³னி ஆப⁴ரணானி தருணகாலேயேவ ஸோப⁴ந்தி, ஜராஜிண்ணகாலே தானி தா⁴ரேந்தோ ‘‘அயம் அஜ்ஜாபி பா³லபா⁴வம் பத்தே²தி, உம்மத்தகோ மஞ்ஞே’’தி வத்தப்³ப³தம் ஆபஜ்ஜதி, ந ஏவம் ஸீலம். ஸீலஞ்ஹி நிச்சகாலம் ஸோப⁴தி. பா³லகாலேபி ஹி ஸீலம் ரக்க²ந்தம் ‘‘கிம் இமஸ்ஸ ஸீலேனா’’தி? வத்தாரோ நத்தி². மஜ்ஜி²மகாலேபி மஹல்லககாலேபீதி.

ஸத்³தா⁴ ஸாது⁴ பதிட்டி²தாதி ஹத்தா²ளவகசித்தக³ஹபதிஆதீ³னம் விய மக்³கே³ன ஆக³தா பதிட்டி²தஸத்³தா⁴ நாம ஸாது⁴. பஞ்ஞா நரானம் ரதனந்தி ஏத்த² சித்தீகதட்டா²தீ³ஹி ரதனம் வேதி³தப்³ப³ம். வுத்தஞ்ஹேதம் –

‘‘யதி³ சித்தீகதந்தி ரதனம், நனு ப⁴க³வா சித்தீகதோ புரிஸஸீஹோ, யே ச லோகே சித்தீகதா, தேஸம் சித்தீகதோ ப⁴க³வா. யதி³ ரதிகரந்தி ரதனம், நனு ப⁴க³வா ரதிகரோ புரிஸஸீஹோ, தஸ்ஸ வசனேன சரந்தா ஜா²னரதிஸுகே²ன அபி⁴ரமந்தி. யதி³ அதுல்யந்தி ரதனம், நனு ப⁴க³வா அதுலோ புரிஸஸீஹோ. ந ஹி ஸக்கா துலேதும் கு³ணேஹி கு³ணபாரமிம் க³தோ. யதி³ து³ல்லப⁴ந்தி ரதனம், நனு ப⁴க³வா து³ல்லபோ⁴ புரிஸஸீஹோ. யதி³ அனோமஸத்தபரிபோ⁴க³ந்தி ரதனம், நனு ப⁴க³வா அனோமோ ஸீலேன ஸமாதி⁴னா பஞ்ஞாய விமுத்தியா விமுத்திஞாணத³ஸ்ஸனேனா’’தி.

இத⁴ பன து³ல்லப⁴பாதுபா⁴வட்டே²ன பஞ்ஞா ‘‘ரதன’’ந்தி வுத்தம். புஞ்ஞந்தி புஞ்ஞசேதனா, ஸா ஹி அரூபத்தா பரிஹரிதும் ந ஸக்காதி. பட²மம்.

2. அஜரஸாஸுத்தவண்ணனா

52. து³தியே அஜரஸாதி அஜீரணேன, அவிபத்தியாதி அத்தோ². ஸீலஞ்ஹி அவிபன்னமேவ ஸாது⁴ ஹோதி, விபன்னஸீலம் ஆசரியுபஜ்ஜா²யாத³யோபி ந ஸங்க³ண்ஹந்தி, க³தக³தட்டா²னே நித்³த⁴மிதப்³போ³வ ஹோதீதி. து³தியம்.

3. மித்தஸுத்தவண்ணனா

53. ததியே ஸத்தோ²தி ஸத்³தி⁴ம்சரோ, ஜங்க⁴ஸத்தோ² வா ஸகடஸத்தோ² வா. மித்தந்தி ரோகே³ உப்பன்னே பாடங்கியா வா அஞ்ஞேன வா யானேன ஹரித்வா கே²மந்தஸம்பாபனேன மித்தம். ஸகே க⁴ரேதி அத்தனோ கே³ஹே. ததா²ரூபே ரோகே³ ஜாதே புத்தப⁴ரியாத³யோ ஜிகு³ச்ச²ந்தி, மாதா பன அஸுசிம்பி சந்த³னம் விய மஞ்ஞதி. தஸ்மா ஸா ஸகே க⁴ரே மித்தம். ஸஹாயோ அத்த²ஜாதஸ்ஸாதி உப்பன்னகிச்சஸ்ஸ யோ தம் கிச்சம் வஹதி நித்த²ரதி, ஸோ கிச்சேஸு ஸஹ அயனபா⁴வேன ஸஹாயோ மித்தம், ஸுராபானாதி³ஸஹாயா பன ந மித்தா. ஸம்பராயிகந்தி ஸம்பராயஹிதம். ததியம்.

4. வத்து²ஸுத்தவண்ணனா

54. சதுத்தே² புத்தா வத்தூ²தி மஹல்லககாலே படிஜக்³க³னட்டே²ன புத்தா பதிட்டா². பரமோதி அஞ்ஞேஸம் அகதே²தப்³ப³ஸ்ஸபி கு³ய்ஹஸ்ஸ கதே²தப்³ப³யுத்ததாய ப⁴ரியா பரமோ ஸகா² நாம. சதுத்த²ம்.

5-7. பட²மஜனஸுத்தாதி³வண்ணனா

55. பஞ்சமே விதா⁴வதீதி பரஸமுத்³தா³தி³க³மனவஸேன இதோ சிதோ ச விதா⁴வதி. பஞ்சமம்.

56. ச²ட்டே² து³க்கா²தி வட்டது³க்க²தோ. ச²ட்ட²ம்.

57. ஸத்தமே பராயணந்தி நிப்ப²த்தி அவஸ்ஸயோ. ஸத்தமம்.

8. உப்பத²ஸுத்தவண்ணனா

58. அட்ட²மே ராகோ³ உப்பதோ²தி ஸுக³திஞ்ச நிப்³பா³னஞ்ச க³ச்ச²ந்தஸ்ஸ அமக்³கோ³. ரத்திந்தி³வக்க²யோதி ரத்திதி³வேஹி, ரத்திதி³வேஸு வா கீ²யதி. இத்தீ² மலந்தி ஸேஸம் பா³ஹிரமலம் ப⁴ஸ்மகா²ராதீ³ஹி தோ⁴வித்வா ஸக்கா ஸோதே⁴தும், மாதுகா³மமலேன து³ட்டோ² பன ந ஸக்கா ஸுத்³தோ⁴ நாம காதுந்தி இத்தீ² ‘‘மல’’ந்தி வுத்தா. ஏத்தா²தி ஏத்த² இத்தி²யம் பஜா ஸஜ்ஜதி. தபோதி இந்த்³ரியஸம்வரது⁴தங்க³கு³ணவீரியது³க்கரகாரிகானம் நாமம், இத⁴ பன ட²பேத்வா து³க்கரகாரிகம் ஸப்³பா³பி கிலேஸஸந்தாபிகா படிபதா³ வட்டதி. ப்³ரஹ்மசரியந்தி மேது²னவிரதி. அட்ட²மம்.

9. து³தியஸுத்தவண்ணனா

59. நவமே கிஸ்ஸ சாபி⁴ரதோதி கிஸ்மிம் அபி⁴ரதோ. து³தியாதி ஸுக³திஞ்சேவ நிப்³பா³னஞ்ச க³ச்ச²ந்தஸ்ஸ து³தியிகா. பஞ்ஞா சேனம் பஸாஸதீதி பஞ்ஞா ஏதம் புரிஸம் ‘‘இத³ம் கரோஹி, இத³ம் மாகரீ’’தி அனுஸாஸதி. நவமம்.

10. கவிஸுத்தவண்ணனா

60. த³ஸமே ச²ந்தோ³ நிதா³னந்தி கா³யத்திஆதி³கோ ச²ந்தோ³ கா³தா²னம் நிதா³னம். புப்³ப³பட்டா²பனகா³தா² ஆரப⁴ந்தோ ஹி ‘‘கதரச்ச²ந்தே³ன ஹோதூ’’தி ஆரப⁴தி. வியஞ்ஜனந்தி ஜனனம். அக்க²ரம் ஹி பத³ம் ஜனேதி, பத³ம் கா³த²ம் ஜனேதி, கா³தா² அத்த²ம் பகாஸேதீதி. நாமஸன்னிஸ்ஸிதாதி ஸமுத்³தா³தி³பண்ணத்தினிஸ்ஸிதா. கா³தா² ஆரப⁴ந்தோ ஹி ஸமுத்³த³ம் வா பத²விம் வா யம் கிஞ்சி நாமம் நிஸ்ஸயித்வாவ ஆரப⁴தி. ஆஸயோதி பதிட்டா². கவிதோ ஹி கா³தா² பவத்தந்தி. ஸோ தாஸம் பதிட்டா² ஹோதீதி. த³ஸமம்.

ஜராவக்³கோ³ ச²ட்டோ².